Zozué 11:1-23
11 Tawamhã rowasuꞌu wisi wamhã, Hazo na ꞌri nhoꞌõmo nhisi te apito Zabĩ hã. Ma tô romreme hã apito norĩ ma sõmri zaꞌra: Zobabe, Madõ te apito ma; Sĩrõ ãma apito ma, duré Aquisape ãma apito ma;
2 ẽtẽ ãma apito ꞌre ihâimana zaꞌra mono norĩ ma, hâiwa nhimire niwĩmhã; Zodã pa ãma ẽtẽ nhiꞌriti romharé wa, ꞌre ihâimana zaꞌra mono norĩ ma, hâiwa nhimiꞌe niwĩ pu Galiléia na isisi ãmamhã; duré Dori na ꞌri nhoꞌõmo nhisi ꞌrata pazaihâ na romharé wa, ꞌre ihâimana zaꞌra mono norĩ ma.
3 Tawamhã aꞌuwẽ, Zodã pa pazaihâ siꞌuiwa na ꞌre ihâimana zaꞌra mono norĩ tẽmemhã ma tô duré rowasuꞌuꞌwa norĩ satõrĩ zaꞌra cananeu norĩ u hã, amoreu norĩ u hã, duré hitita norĩ u hã, perizeu norĩ u hã, ẽtẽ ãma zebuzeu norĩ ꞌre ihâimana zaꞌra mono norĩ u hã, duré heveu norĩ ẽne Hermo na isisi zahâpâ Mispa na rowamri ãma ꞌre ihâimana zaꞌra mono norĩ u hã.
4 Tahawa ma tô ta norĩ, uburé tite dasiꞌwapéi ꞌmanharĩꞌwa norĩ ré hã wairé ahâ uptabi na, pazaihâ na suparaꞌré ꞌre ihâimana zaꞌra mono ne. Duré awaru hã ahâ uptabi di. Awaru na wedewara zapore na dasiꞌwapézéb zama duré ahâ uptabi di.
5 Uburé apito norĩ, ma tô tite dasiꞌwapéi ꞌmanharĩꞌwa norĩ hã te te ꞌrãꞌõtõ. Merõ na sipti nhisi ꞌrata ma tô sima ꞌri nhoré zaꞌra, Izaraéu nhihudu norĩ te te ꞌwapé zaꞌra da hã.
6 Tawamhã Uburé Danhibꞌapito te Zozuéhé ma tinha, ãne:
— Tãma aipahi zaꞌra tõ. Awẽmhã tô ãne bâtâ na wa za ta norĩ hã uburé pese uprosi, Izaraéu nhihudu norĩ ma. Tawamhã a hã ite zaꞌra awaru te za tiwi iꞌamorĩꞌõ. Te za duré ãma tiwi iꞌazazu, wedewara zapore na dasiꞌwapézém na hã.
7 Ãne Zozué, uburé dasiꞌwapéi ꞌmanharĩꞌwa norĩ me, ma tô Merõ na romnhisi ãma sipti ꞌrata sahu zaꞌra, simizaꞌrese õ ré.
8 Tawamhã Uburé Danhibꞌapito hã ma tô Izaraéu nhihudu norĩ ma sõmri zaꞌra, te te daꞌãma iꞌaiꞌuté zaꞌra zé hã. Tinhitobꞌru norĩ te te sahui wamhã, ma tô Sidõ u isarina sisaꞌre, Misrefote-Maꞌĩ na ꞌri nhoꞌõmo nhisi u hã, duré bâtâ pusizém niwĩ ẽtẽ nhiꞌriti romharé ãma Mispa na ẽtẽ siwaꞌaba wa romharé nhisi u hã. Tame, ma tô duré ꞌwapé zaꞌra, te te uburé iꞌuprosizéb u.
9 Tawamhã Zozué, Uburé Danhibꞌapito te te tãma iꞌruzé hã ma tô ꞌmanha. Awaru ite zaꞌra ma tô te te amorĩꞌõ. Wedewara zapore na dasiꞌwapézém na ma tô duré te te ãma aroꞌo.
10 Tawamhã Zozué te oto apâ mo. Apâ morĩ wamhã, ma tô ꞌri nhoꞌu Hazo hã tiꞌâ. Ma tô duré tiwĩ, ite apito hã. Tahawa, ã hã dazaꞌru niwĩmhã Hazo ãma daꞌmadâꞌâzé hã isiptede, uburé daꞌmadâꞌâꞌwa norĩ hâiba amoi ma hã.
11 Ma tô Izaraéu nhihudu norĩ, iwa ꞌre ihâimana zaꞌra mono norĩ hã uburé siwi uprosi. Duré ꞌri nhoꞌõmo na ma tô ãma siwi roꞌo.
12 Ãne Zozué, uburé ꞌri nhoꞌõmo norĩ, duré ite apito norĩ te te waibui wamhã, ma tô uburé uprosi, Uburé Danhibꞌapito ma romhuriꞌwa, Mozési te te iwaihuꞌuzéb zarina.
13 Tane nherẽ, Izaraéu nhihudu norĩ, ꞌri isiprum nhisiwi da te ꞌre iꞌri zaꞌra mono ãma hã te te ãma siwi sazui õ di. Hazo ãmap si ma tô Zozué hã ãma roꞌo.
14 Tawamhã marĩ iwaꞌâbâ zaꞌẽtẽ norĩ na, duré ꞌri nhoꞌõmo norĩ te danhimizama na hã ma tô Izaraéu nhihudu norĩ hã uburé pese ãma ate zaꞌra. Tane nherẽ, ma tô uburé pese siwi daꞌuprosi, niꞌwa hã hâiba ré hã hâimana ãna.
15 Uburé Danhibꞌapito, Mozési tãma iromhuriꞌwai ma, te te iwaihuꞌuzém na ma tô Zozuéhé ma tãma waihuꞌu, Mozési hã. Ta hã ma tô duré wapari pese, te te rẽme ãna, Zozué hã. Tahawa ma tô uburé pese marĩ ꞌmanha, Uburé Danhibꞌapito, Mozésihi ma te te ꞌmanharĩ da, te te tãma iꞌruzéb zarina.
Zozué hã te te duré daꞌãma iꞌaiꞌutézé wasuꞌu
16 Ãne ma tô Zozué uburé tiꞌa hã waibu, Zuda tiꞌa niwĩ ẽne ihâimana hã, uburé hâiwa nhimire niwĩ tiꞌa hã, uburé Gosẽ na romnhisi niwĩ tiꞌa hã, Zuda tiꞌa niwĩ romharé hã, Zodã pa ãma ẽtẽ nhiꞌriti siwaꞌaba wa, romharé hã, ẽtẽ niwĩ tiꞌa hã, duré Izaraéu na romnhisi niwĩ puꞌu zaihâ na romharé zama hã.
17 Taha ro hã Halaque na ẽtẽ wamri hawi, Seꞌi na romnhisi ꞌratamhã, Libanu ãma romharé niwĩ Baau-Gadi na ꞌri waꞌõtõ nhisi u hã te nomro, Hermo na ẽtẽ zahâpâ naꞌrata ãma. Zozué hã taha rom norĩ na ma tô uburé uprosi, apito norĩ hã.
18 Ã hã apito norĩ hã ma tô Zozué bâtâ ahâ na hã te te aꞌwapé.
19 Ã hã ꞌri nhoꞌõmo norĩ nima hã Izaraéu nhihudu norĩ me ãma sisaze zaꞌra õ di, siꞌwapéi ãna siré ꞌre ihâimana zaꞌra mono da na hã. Gibiã norĩ si ma tô ãne hã tãma ꞌmanharĩ zaꞌra, nima norĩ heveu ꞌre ihâimana zaꞌra mono ãma. Ihâiba amo norĩ si ma tô dasiwi waibu ni, dasiꞌwapéi uꞌâbâ.
20 Uburé Danhibꞌapito, ã hã ꞌri nhoꞌõmo norĩ ꞌre, ꞌre ihâimana zaꞌra mono ma hã ma tô tãma ꞌmanharĩ zaꞌra, pẽꞌẽ tete na Izaraéu nhihudu norĩ te te ꞌwapé zaꞌra da, duré taha zarina uburé ta norĩ hã siꞌutõrĩ da, ãma pẽꞌẽzé zaꞌra ãna, duré ãma siwamri zaꞌra ãna, ãne na Uburé Danhibꞌapito, Mozésihi ma, te te iwaihuꞌuzéb zarina.
21 Tawamhã ãne hã romhâimana ré, ma tô Zozué, aꞌuwẽ iꞌrãihâ anaqui na iwamri norĩ, ẽtẽ ãma ꞌre ihâimana zaꞌra mono hã uprosi: Hebrõ ãma, Débi ãma, Anabe ãma, uburé Zuda niwĩ ẽtẽ ãma hã, duré Izaraéu niwĩmhã. Tawamhã uburé pese ma tô Zozué hã uprosi, duré ite zaꞌra ꞌri nhoꞌõmo norĩ zama.
22 Tawamhã anaqui norĩ, hâiba ré hã da te ꞌmairẽme õ di, Izaraéu nhihudu norĩ nhiptiꞌai ãmamhã. Gaza ãmap si, Gati ãma, duré Asidodi ãma ma tô niꞌwam norĩ dâꞌâ ãna hã tihâimana zaꞌra.
23 Ãne ma tô Zozué, uburé tiꞌa norĩ hã waibu, Uburé Danhibꞌapito, Mozésihi ma te te inharĩzéb zarina, Izaraéu nhihudu waꞌõtõ mono bâ te te sõmri zaꞌra mono da, ãma isipoꞌo mono hã.
Ãne tiꞌa hã ma tô oto waꞌudu, dasiꞌwapé na hã.
