Zozué 2:1-24
2 Tawamhã Zozué, Sitĩ hawi ma tô wapsãiꞌaꞌwa norĩ hã satõrĩ zahuré, piꞌuriwi. Ãne te tãma robꞌru zahuré:
— Tiꞌa hã ꞌrâwi sabui wẽ waꞌaba da, te za ane waꞌwa. Tane nherẽ, ꞌri nhoꞌu Zerico si te za iwaihuꞌu wẽ waꞌwa, danhipai u.
Tawamhã oto neb zahuré wamhã, ma tô tizasi zahuré, piꞌõ Raꞌabi na isisi iwaꞌâbâ zô ꞌre isisõmri mono nhorõwa u, tame sõtõ zahuré da.
2 Tawamhã Zerico ãma apito u, ma tô romreme ãne itẽme wi:
— Izaraéu nhihudu hã ma tô we ãwamhã bara na ꞌmaihaimasisi, tiꞌa te te waimrami zahuré mono da hã.
3 Tahawa ma tô apito ãne romreme hã tãma tisõ, Raꞌabihi ma:
— Aibâ norĩ asõrõwa u ãma izasi zahuré hã, uburé tiꞌa te te waimrami zahuré da, ma tô we aimasisi. Ta norĩ hã maꞌãpé rob u we sani na.
4 Tawamhã Raꞌabi iwana zaꞌra aibâ norĩ te te simiꞌuri zahuré wa, ma tô apito ma romreme ꞌwapéiꞌwai norĩ ma, ãne ãma tãma waꞌrãmi zaꞌra:
— Tô sena ma tô we ĩnhorõwa u aibâ hã tineb zahuré. Tane nherẽ, wa hã te waihuꞌu õ di, nima hawim na we inem na hã.
5 Oto robra wa, ꞌri nhoꞌõmo te ꞌridawa zaꞌẽne za da te dasiwi isitobzé bâtâ ãma, ma tô oto tipusi zahuré. Tahawa, te waihuꞌu õ di, nimomo inebzé hã. Tane nherẽ, a norĩ waꞌwa hã isarina zahuré, saꞌẽtẽ aꞌe zaꞌra waꞌaba mono wamhã, ãté te za asiwi imrami ꞌwa.
6 Tane nherẽ, Raꞌabi wapsãiꞌaꞌwa norĩ hã, ma tô ꞌri nhisi hâpâ u hâimo iwana zaꞌra saprõni zahuré. Tame ma tô simiꞌuri zahuré, aro teihi ne zaꞌwari ꞌrãihâ ꞌrowi.
7 Tawamhã apito ma romreme ꞌwapéiꞌwa norĩ hã ma tô oto isarina aiꞌabaꞌré. Tawamhã ꞌri nhoꞌõmo hawi wairébé wi, ma tô ꞌridawa zaꞌẽne hã isaꞌu zaꞌra dasiwi sitom ni. Tawamhã wapsãiꞌaꞌwa norĩ zô ma tô sô sõpré, Zodã pa tẽme bâdâdi inomro na.
8 Tawamhã Raꞌabi, wapsãiꞌaꞌwa norĩ hã sõtõ zahuré wana ré, ma tô itẽme saiꞌuri zahuré, ꞌri nhisi hâpâ u hâimo te te tãma nharĩ zahuré da, ãne:
9 — Wa tô waihuꞌu wa hã, ã hã tiꞌa Uburé Danhibꞌapito te te aima isõmri zaꞌra waꞌaba zém na hã, Izaraéu nhihudu norĩ ma. Tahawa sena na wa za tinha, uburé wa norĩ hã wa tô aima zaꞌra waꞌaba wapahi pese zaꞌra ni.
10 E tihai wa. Wa tô waihuꞌu zaꞌra ni, Uburé Danhibꞌapito, asõꞌreb zaꞌra waꞌaba, Ezitu hawi aiwairébé aba wamhã, Âpré na â poré nhisi te te iꞌâꞌrézém na hã. Duré Zodã pa zara niwĩ bâtâ pusizém niwĩmhã, amoreu norĩ te apito Seõ norĩ, Oguehe me, duré ite zahuré dasiꞌwapéi ꞌmanharĩꞌwa norĩ isiꞌutõrĩzéb zama wa tô waihuꞌu zaꞌra ni.
11 Ã hã wa te wapari zaꞌra wamhã, wa tô siptete haiꞌutõrĩ zaꞌra ni. Tahawa wa tô uburé pese aima zaꞌra waꞌaba wapahi pese zaꞌra ni, ate zaꞌra waꞌwa ꞌRe ihâimana uꞌâsi mono, Uburé Danhibꞌapito, hâiwa ãma hâimo ꞌre hâimana mono wa, duré tiꞌai ꞌrowib zama.
12 Tahawa maꞌãpé, Uburé Danhibꞌapito nhisi na, ĩma ropisutu aba, iwẽ hã te aima ꞌmanharĩ aba wa, a norĩ waꞌaba zama ĩsisãnawã norĩ ma iwẽ hã ꞌmanharĩ aba da, aiwab da. Ãne da, wa za aiwi rowaptẽrẽ ꞌwa, sena na aimreme wasuꞌu aba zéb da, tiha ĩma ꞌmanharĩ aba da, ĩsima iwẽ na ĩhâimana da rosaꞌrata ahâ ãna.
13 Maꞌãpé ĩmama hã sõꞌreptui waꞌaba, ĩna me, ĩsisãnawã norĩ hã, ĩsisãnawã sipiꞌõ norĩ hã, duré iꞌra zaꞌra norĩ hã. Da te waꞌuprosi tõ da maꞌãpé waꞌmadâꞌâ pese aba za.
14 Tawamhã aibâ norĩ ma tô ãma tãma waꞌrãmi zahuré, ãne:
— Wa za tô ropisutu ni aima. Tawamhã wamreme wa te wasina uwaimrami õ wamhã, tô iꞌuwaibaba na hã wa aré tô wa norĩ si wadâꞌâ ni. A hã aré iꞌatâꞌâ da hã mare di. Tawamhã a hã ãme wa te iꞌmanharĩzé hã niꞌwai ma wasuꞌu õ wamhã, aima wanhimiropisutuzé hã iꞌuwaibaba wa za tô wasina uwaimrami ni. Uburé Danhibꞌapito, aptoꞌo ré ã hã tiꞌa te te wama sõmri zaꞌra wamhã, tawamhã iwẽ na hã wa za aima wasihâiꞌré ni, sena na wa te aima inharĩ na hã.
15 Raꞌabihi nhorõwa hã ꞌri nhoꞌõmo ꞌwawi waꞌra ꞌrãihâ ꞌmanharĩ wa, te ꞌre sa. Tahawa ma tô wapsãiꞌaꞌwa norĩ hã pawaptob zahuré, zanela ꞌri zadazâri hawi te te siꞌra zahuré da wedenhorõ na.
16 Tahawa, te ãne tãma nharĩ zahuré:
— Ẽtẽ u ane waꞌaba. Ane waꞌaba õ wamhã, aibâ norĩ, asô waꞌaba isõpré mono hã te za siwi asãmri ꞌwa. Õme siꞌubdatõ bâtâ na aimaꞌuri aba sina aihâimana aba, we apâ isiꞌabaꞌrézéb u. Taha parip si te za oto ane waꞌwa.
17 Tawamhã te wapsãiꞌaꞌwa norĩ hã tãma nharĩ zahuré, ãne:
— Wanhimiropisudu wawi iwaptẽrẽ hã wa za tô ãma aima uwaimrami ni, ãne na hã za wama ꞌmanharĩ wapsi:
18 Nimahã na oto asiptiꞌai u wanhisisi wamhã, te za zazahâ hâiwaré ihâpré hã zanela ꞌri zadazâri ãma iwasi, wa te isiꞌrazéb ãma. Duré asõrõwa ꞌre, ubumro na za aimama norĩ hã, ana, asisãnawã norĩ hã, duré uburé aimama sisãnawã siwadi norĩ hã. Ãne wapsi, wa za ãma aima uwaimrami ni, wanhimiropisutuzé hã.
19 Tawamhã niꞌwa hã rob u ꞌri para hawi watobro wamhã, ꞌrâwi te te sima ãma iꞌupa zarina te za tô ta hã dârâ. Wa norĩ hãi õ di za tawamhã, iꞌupa hã. Tane nherẽ, niꞌwa hã ꞌri para aime hâimana nherẽ, tô da te uꞌa wapsi hã, wa norĩ hã za tô iꞌupa.
20 Wa te iꞌmanharĩzé dama wasuꞌu wamhã, wa te ãma uwaimrami da hãi õ di, wanhimiropisutuzé wawi iwaptẽrẽ hã.
21 Tawamhã Raꞌabi hã ma te ãma sadaꞌâbâ zahuré, ãne:
— Wa tô ãma asazei waꞌwa.
Tahawa ma oto tãma waprosi zahuré, neb da. Tawamhã ma tô duré ãma wasisi zanela ꞌri zadazâri na, zazahâ hâiwaré ihâpré hã.
22 Tawamhã wapsãiꞌaꞌwa norĩ hã ẽtẽ u te oto tineb zahuré. Tame ma tô aimaꞌuri zahuré siꞌubdatõ bâtâ na hã, isiniwĩb zahuré ro inomro na dasiꞌwapéi ꞌmanharĩꞌwa norĩ sô rĩtĩ zaꞌra mono ré hã. Tane nherẽ, te te siwi sãmri zahuré õ di. Tahawa ma tô apâ aiꞌabaꞌré, Zerico u.
23 Tawamhã wapsãiꞌaꞌwa norĩ hã ma tô oto ẽtẽ hawimhã siꞌra zahuré. Zodã pa â na ma tô saprĩ zahuré. Taha pari te oto ne, Zozué te te sõpẽtẽ zahuré da hã. Tawamhã uburé pese marĩ tãma ihâimana zahuré zé hã ma tô tãma wasuꞌu zahuré.
24 Ãne ma te rowasuꞌu na hã ãma tãma ꞌrãsutu zahuré:
— Uburé Danhibꞌapito hã, õ hã tiꞌa uburé te te wama isõmri zaꞌra zém na hã wa tô wa norĩ hã sena na waihuꞌu ni. Tahawa ma tô õmemhã uburé pese wama tapahi pese zaꞌra ni.
