Zozué 23:1-16
23 Tawamhã Uburé Danhibꞌapito, ꞌRe ihâimana uꞌâsi mono, ma tô Izaraéu nhihudu norĩ, isitobꞌru te te siwi iꞌuirĩ norĩ waꞌwa rowẽ na si ꞌre ihâimana zaꞌra mono da hã oto tãma pisutu zaꞌra. Duré Zozué ꞌre hâimana hâ mono wa, ma tô oto siꞌihi pese.
2 Tawamhã ma tô uburé Izaraéu nhihudu norĩ zô tihârâ zaꞌra, dama rotiꞌwa norĩ zô, dama iꞌrãnhoꞌõmo norĩ zô, daꞌãma rowairébéꞌwa norĩ zô, duré dama ipire norĩ zô zama. Ãne te tãma nharĩ zaꞌra:
— Wa tô oto wa hã ĩsiꞌihi pese.
3 Uburé Danhibꞌapito, wate zaꞌra ꞌRe ihâimana uꞌâsi mono, ã hã aꞌuwẽ norĩ ma, aiꞌuꞌâbâ zaꞌra waꞌaba te te iꞌmanharĩzé hã ma tô a norĩ waꞌwa uburé iꞌmadâꞌâ zaꞌra waꞌwa. Ma tô duré ta hã aiꞌãma aiꞌwapé zaꞌra waꞌwa.
4 Maꞌãpé ãma aipoꞌre puꞌu zaꞌra waꞌaba! Wa hã wa tô tiꞌa hã aima te poꞌo ꞌwa, Izaraéu nhihudu waꞌõtõ mono bâ, zahadu wa te ãma iꞌaiꞌuté zaꞌra õ tedeꞌwa na ꞌre aihâimana zaꞌra waꞌaba mono da. Ãne wa tô duré danhiptiꞌa na wa te ãma iꞌaiꞌuté zaꞌra hã te aima poꞌo ꞌwa, Zodã pa nhoꞌõmo hawimhã, bâtâ pusizéb u hã, duré puꞌu wawẽ Mediterãniu u hã, bâtâ zasizém niwĩmhã.
5 Uburé Danhibꞌapito, ate ꞌRe ihâimana uꞌâsi mono ꞌwa hã te za ã hã aꞌuwẽ norĩ hã aima te te wanoꞌõ ꞌwa. Te za duré romhâ na te te aima sate zaꞌra waꞌwa. Tawamhã a norĩ waꞌwa ã hã aꞌuwẽ norĩ nhiptiꞌa hã te za asiwi iwaibui waꞌaba mo, Uburé Danhibꞌapito te te iropisutuzéb zarina.
6 Tahawa te za sada asiptete zaꞌra waꞌwa, uburé pese Mozési te te ãma irobꞌuiꞌérézé hã ꞌre ꞌmanharĩ zaꞌra waꞌaba mono da, niha na nima niwĩmhã isimiroti nhiti ꞌre aihâimana zaꞌra waꞌaba mono ãna.
7 Ã hã aꞌuwẽ isiꞌmairẽme norĩ hã aiwazari waꞌaba ꞌre hâimana zaꞌra mono nherẽ, ime hã ꞌre aihâimana zaꞌra waꞌaba mono tõ. Ite zaꞌra ihâibaꞌõ waihuꞌu pese newa ãma ꞌre iwata zaꞌra mono norĩ nhisi na hã ꞌre nharĩ zaꞌra waꞌaba mono tõ. Ta norĩ nhisi na dama ꞌre ropisutu zaꞌra waꞌaba mono tõ. Ãma ꞌre aiwata zaꞌra waꞌaba mono tõ. Duré isõꞌreb zaꞌra hã tãma ꞌre aiwẽꞌẽ zaꞌra waꞌaba mono tõ.
8 Uburé Danhibꞌapito ꞌRe ihâimana uꞌâsi mono siré si, ꞌrâwi ꞌre aihâimana zaꞌra waꞌaba mono, we ꞌre iꞌaihâimana zaꞌra waꞌaba mono ne, ã bâtâ u hã.
9 Uburé Danhibꞌapito, aꞌuwẽ isaꞌẽne hã, duré isiptede hã ma tô romhâ na hã te te sate. Duré niꞌwa, ã bâtâ u hã asada zaꞌra waꞌaba siptete waihuꞌu õ di.
10 Izaraéu nhihudu si misi nherẽ, te za tinhitobꞌru norĩ ma hã te te arobꞌmanharĩ, miu na ihâiba ma, sisaꞌrei mono da. E marĩ wa. Uburé Danhibꞌapito, ate ꞌRe ihâimana uꞌâsi mono ꞌwa hã, aiꞌãma zaꞌra waꞌaba ꞌre siꞌwapéi mono wa, te te iropisutuzéb zarina.
11 Tahawa maꞌãpé asimiꞌẽ na Uburé Danhibꞌapito, ate ꞌRe ihâimana uꞌâsi mono aba si asiwi ꞌre sawi zaꞌra waꞌaba mono.
12 Tane nherẽ, ãma ꞌre iꞌanomro aba mono zé ꞌre rẽme zaꞌra waꞌaba mono wamhã, aꞌuwẽ isiꞌmairẽme norĩ aiwazari waꞌaba ꞌre ihâimana zaꞌra mono norĩ me ꞌre asihâiba tob zaꞌra waꞌaba mono wamhã, duré ta norĩ me oto asina ꞌre aimro zaꞌra waꞌaba mono wamhã,
13 te za sena na iwaihuꞌu zaꞌra waꞌwa, aꞌuwẽ aiwazari ꞌre ihâimana zaꞌra mono norĩ hã, za te te isate zahu zaꞌra õ na hã, aihawib zaꞌra waꞌaba. Ãnei õ wamhã, te za ta norĩ hã apâ simimnhasi na asada ꞌre hâimana zaꞌra waꞌwa, abaze norĩ mramizéb ne ré hã, aiba wi wedenhorõ na da te ꞌre iꞌaipréꞌé zaꞌra waꞌaba mono ne, duré roꞌware atõmo aba ꞌre, ꞌre isisisi mono ne. Ãne na aima irobꞌmanharĩ zaꞌra waꞌaba na hã te za duré te te ãma aima uzusi zaꞌra waꞌwa, ã hã tiꞌa iwẽ hawimhã asô irobaba zaꞌra waꞌaba zéb u, Uburé Danhibꞌapito, ate ꞌRe ihâimana uꞌâsi mono ꞌwa hã te te aima isõmri zaꞌra waꞌaba zém hawimhã.
14 — Ãhã na romhutu di oto ĩdâꞌâzé hã. Uburé aima waihuꞌu pese zaꞌra waꞌaba di, ꞌrâwi aipẽꞌẽ aba mono na hã, Uburé Danhibꞌapito, ate ꞌRe ihâimana uꞌâsi mono ꞌwa hã, uburé marĩ iwẽ te te aima ꞌre isõmri zaꞌra waꞌaba mono na hã te te iropisutuzéb zarina. Õ hã ma tô uburé pese ãma uwaimra, te te duré ãma upai ãna.
15 23:15-16 Ĩhe tô, Uburé Danhibꞌapito, ate ꞌRe ihâimana uꞌâsi mono ꞌwa hã, uburé marĩ iwẽ na te te aima ꞌre iꞌaropisutu aba mono zéb zarina, ma tô te te ꞌre abꞌmanharĩ. Tane nherẽ, a norĩ waꞌwa aimawi ihâibaꞌõ na waihuꞌu pese newa ãma ꞌre idawata zaꞌra mono ãma, ꞌre aiwata zaꞌra waꞌaba mono wamhã, duré isõꞌre tãma ꞌre aiwẽꞌẽ zaꞌra waꞌaba mono wamhã, tawamhã asada ꞌre sitiꞌru zaꞌra waꞌaba mono wa, te za te te ꞌre aihâ zaꞌra waꞌwa za. E marĩ wa. Ãne hã ꞌre ꞌmanharĩ zaꞌra waꞌaba mono wamhã, te za Uburé Danhibꞌapito ꞌRe ihâimana uꞌâsi mono nhimiroti hã ãma ꞌre uwaimrami zaꞌra waꞌaba mono da, te te iꞌru hã asiwi iwamnarĩ ꞌwa. Tawamhã ã hawi aptoꞌoré hã tiꞌa iwẽ te te aima isõmri zaꞌra waꞌaba ꞌremhã ꞌre iꞌaiꞌmaihâimana aba mono da hã mare di za.
16 ꞌMadâꞌâ 23:15
