Zozué 24:1-33
24 Tawamhã Zozué, ma tô Izaraéu nhihudu norĩ waꞌõtõ mono bâ ꞌrãꞌõtõ, Siquẽ na ꞌri nhoꞌõmo nhisi ãma. Tahawa, ma tô dama rotiꞌwa norĩ zô tihârâ zaꞌra, dama iꞌrãnhoꞌõmo norĩ zô, daꞌãma rowairébéꞌwa norĩ zô, duré Izaraéu nhihudu norĩ ma ipire zô hã. Tawamhã ma tô ta norĩ hã oto ꞌRe ihâimana uꞌâsi mono nhoꞌremhã aimasa.
2 Tahawa te Zozué uburé dama tinha, ãne:
— Ãne te tinha, Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono hã: “Duréi aihiꞌrata norĩ waꞌwa pa nhoꞌu Eufrati pa zara niwĩ ꞌre hâimana zaꞌra mono ré hã ihâibaꞌõ waihuꞌu pese newa ãma ꞌre idawata zaꞌra mono ãma ma tô ꞌre wata zaꞌra. Aihiꞌrata norĩ waꞌwa, Tera, Abraꞌãhã mama, duré Naoho mama.
3 Tane nherẽ, wa hã, Abraꞌã Eufrati pa zara niwĩ tiꞌai hawimhã wa tô waze, uburé ãme Canaꞌã tiꞌai mono bâ ꞌre morĩ da. Wa hã wa tô duré tãma sõmri zaꞌra isihudu hã, ahâ uptabi na hã. Abraꞌãhã ma, Izaqui hã wa tô tãma tisõ.
4 Izaquihi ma, Zaco norĩ Ezau me hã wa tô tãma sõmri zahuré. Duré Ezauhu ma, wa tô Seꞌi na romnhisi ẽtẽ ãma ro hã tãma tisõ. Tane nherẽ, Zaco, tiꞌra norĩ me Ezitu u si ma tô tinhowada zaꞌra.
5 Taha pari, Mozési norĩ, Arãhã me te satõrĩ zahuré wamhã, wa tô duré Ezitu ãma ropipa zaꞌẽne hã dama ꞌmanha. Ãhã wa, wa tô ta hawimhã tiwi asani zaꞌra waꞌwa.
6 Tawamhã duré aihiꞌrata norĩ waꞌwa Ezitu hawi te sani zaꞌra wamhã, ma tô aihutu, Âpré na â poré wamri u hã. Tane nherẽ, ma tô ezipsiu norĩ hã taha u isarina zaꞌra sisaꞌre, awaru na wedewara zapore na dasiꞌwapézém na duré awaru na dasiꞌwapéi ꞌmanharĩzém na hã.
7 Tahawa, Izaraéu nhihudu norĩ te te ĩwi rowaptẽrẽ zaꞌra wamhã, wa tô robra wa hã ꞌmanha, ezipsiu norĩ wi te ãma isimiꞌuri zaꞌra zéb da hã. Duré â ma, wa tô tinha ezipsiu norĩ nhisiwi sisaꞌwari da hã. Ãhã wa, ma tô suwa zaꞌra. Tawamhã a norĩ waꞌwa atõmo na, wa hã, ezipsiu norĩ ma, te iꞌmanharĩzé hã ma tô iꞌmadâꞌâ zaꞌra waꞌwa. Taha pari ma tô duré rop si aꞌubuni wi ꞌre irosaꞌwari mono ãmamhã, ꞌre aihâimana hâ zaꞌra waꞌaba mo.
8 — “Tawamhã wa hã wa tô amoreu norĩ nhiptiꞌai u te asimroi waꞌwa, Zodã pa zara niwĩ bâtâ pusizém niwĩ ꞌre ihâimana zaꞌra mono norĩ u hã. Tawamhã ma tô amoreu norĩ te te siwi aiwanoꞌõ ꞌwa. Tane nherẽ, wa tô wa hã daꞌãma iꞌaiꞌuté zaꞌra waꞌaba zé hã aima sõmri zaꞌra waꞌwa. Tawamhã a norĩ waꞌwa isiptiꞌa zaꞌra hã asiwi âri aba wamhã, wa tô duré asõꞌa zaꞌra waꞌaba uprosi.
9 Tawamhã Moabi te apito, Baraqui, Zipoho ꞌra hã Izaraéu nhihudu norĩ da, dasiꞌwapé te te ꞌmanharĩ da, te te sima rosaꞌrata wamhã, ma tô Beꞌoho ꞌra Balaã zô daꞌmazatõ. Tawamhã ma tô tiwi waptẽ, ĩnhimirobꞌmanharĩ wasété zé hã te te aima pisutu zahi zaꞌra waꞌaba da hã.
10 Tane nherẽ, wa hã, Balaã te iwapari da hã te ĩsima wẽ õ di. Ãne nherẽ, ma tô nasi rowẽ hã aima pisutu zaꞌra waꞌwa. Taha zarina wa tô Baraquihi nhibꞌrata wi asõꞌreptu zaꞌra waꞌwa.
11 A norĩ waꞌwa pa nhoꞌu Zodã pa na saprĩ zaꞌra waꞌaba pari, ma tô ꞌrinhoꞌu Zerico u hã aihutu ꞌwa. Tawamhã Zerico ãma aibâ norĩ ma tô aiꞌwapé zaꞌra waꞌwa. Duré taha pari amoreu norĩ zama ma tô aiꞌwapé zaꞌra waꞌwa, perizeu norĩ, cananeu norĩ, hitita norĩ, gigazeu norĩ, heveu norĩ, duré zebuzeu norĩ hã. Ãhã wa, wa hã daꞌãma iꞌaiꞌuté zaꞌra waꞌaba zéb da hã wa tô asibꞌrata aima sõmri zaꞌra waꞌwa.
12 Aihutu aba wana ré, wa tô amoreu norĩ nhibꞌapito hã samarĩ zahuré. Wa tô ipahi pese zé hã tãma sõmri zahuré, sisamro da. Ate zaꞌra waꞌwa sibꞌézé ꞌwa pa ma, asimnhiꞌãsi zaꞌra waꞌaba ma, duré asiptoro zaꞌra waꞌaba ma, ta norĩ hã pusi õ di.
13 Ãne wa tô aima sõmri zaꞌra waꞌwa tiꞌa hã, niwa iwa ꞌre iromhuri zaꞌra waꞌaba mono õ hã, duré niwa ꞌrinhoꞌu iwa iꞌri zaꞌra waꞌaba õ hã. Tahawa, te oto ꞌri nhoꞌõmo wamhã ꞌre aihâimana zaꞌra waꞌaba mo. Te duré uwa ꞌru ꞌrã hã duré azeitona wede ꞌrã hã ꞌre ihuri aba mo, ꞌre izuri aba mono õ ꞌrã hã.”
14 Tawamhã Zozué ma te ãne timreme hã tãma ꞌrãsutu zaꞌra:
— Tahawa te za ã hawim haré ãhã na hã ꞌRe ihâimana uꞌâsi mono, Uburé Danhibꞌapito hã ꞌre iwazéb zaꞌra waꞌaba mo, isibꞌaꞌuwẽ sena na ãma ꞌre anomro aba mono da. Duré asisiti sãmra aba, aihiꞌrata norĩ Mezopotãmia ãma, duré Ezitu ãma, ihâibaꞌõ ãma waihuꞌu pese newa ãma ꞌre iwata zaꞌra mono hã, Uburé Danhibꞌapito ãmap si ꞌre anomro aba mono da oto.
15 Tane nherẽ, Uburé Danhibꞌapito ma, ꞌre anomro aba mono da, asima wẽ zaꞌra waꞌaba õ wamhã, ãhã na awaꞌawi na hã asima pisutu zaꞌra waꞌaba, nimahã ãma si ꞌre anomro aba mono da wamhã. Niha hã wamhã, te za tô asima irowairébé zaꞌra waꞌwa, aihiꞌrata norĩ hã Mezopotãmia ãma, ihâibaꞌõ ãma ꞌre iwata zaꞌra mono ma si ꞌre anomro aba mono da hã, niha wamhã, amoreu norĩ te ihâibaꞌõ norĩ ma hã, ã hã tiꞌai ꞌre, ꞌre ihâimana zaꞌra mono zéb ãma hã. Tane nherẽ, wa za tô wa norĩ hã wanhorõwa ꞌre, ꞌre iwahâimana zaꞌra mono norĩ hã Uburé Danhibꞌapito ãmap si ꞌre wanomro.
16 Tawamhã aꞌuwẽ norĩ, ma te ãma sadaꞌâbâ zaꞌra ãne:
— Niwamhã Uburé Danhibꞌapito wa te wasiwi irẽme da hã wa te rosaꞌrata zaꞌra õ di, ihâibaꞌõ ãma si iꞌupa na ꞌre wanomro mono da hã.
17 Õ hã Uburé Danhibꞌapito, wate ꞌRe ihâimana uꞌâsi mono ma te tô wahiꞌrata norĩ me simisutu na hã waꞌawaze, Ezitu ãma wapawaꞌâbâ ãna wa te ꞌre iromhuri zaꞌra mono zém hawimhã. Duré marĩ iwaihuꞌuꞌõ isaꞌreseꞌõ te te iꞌabꞌmanharĩ mono zé hã wa tô ꞌmadâꞌâ zaꞌra ni. Duré õ hã ma tô te te ꞌre waꞌabꞌmadâꞌâ pese, bâdâdi na ꞌre wanomro mono ré hã, duré tiꞌai waꞌõtõ nhoꞌõmo waꞌwaibaba ꞌre wanomro mono ré hã.
18 Wa norĩ hã taha zarina iꞌrowi ꞌre wanhisisi mono nhidâpâsi, ma tô Uburé Danhibꞌapito, aꞌuwẽ norĩ hã te te wama ꞌre awanoꞌõ, amoreu norĩ ã hã tiꞌai ꞌre, aré ꞌre ihâimana zaꞌra mono norĩ zama. Tahawa, wa za wa norĩ zama ãma ꞌre wanomro, Uburé Danhibꞌapito ãma hã. E marĩ wa. Ta hã wate ꞌRe ihâimana uꞌâsi mono wa.
19 Tawamhã te Zozué dama tinha, ãne:
— Uburé Danhibꞌapito ãma ꞌre iꞌanomro aba mono da hã mare di ãté. E marĩ wa. Õ hã, ꞌRe ihâimana uꞌâsi mono, marĩ iwasédé, ãma ꞌre ihâimana mono õ, iwẽ uptabi. Duré õ hã ihâibaꞌõ ãma ꞌre iwata zaꞌra mono norĩ hã te te ꞌwapé zei õ di. Tahawa, aiwasété zaꞌra waꞌwa te te aima ꞌre iꞌapari aba mono da hã, mare di za.
20 ꞌRe ihâimana uꞌâsi mono, Uburé Danhibꞌapito ꞌre rẽme zaꞌra waꞌaba mono wamhã, duré asiré aꞌuwẽꞌõ norĩ te, ihâibaꞌõ na si ꞌre aiwata zaꞌra waꞌaba mono wamhã, te za apâ õ hã asada ꞌre hâimana zaꞌra waꞌwa. Te za duré te te ꞌre aihâ zaꞌra waꞌwa. Iwẽ na aima ꞌre hâimana zaꞌra waꞌaba mono parim nherẽ, te za tawamhã aiꞌuprosi ꞌwa.
21 Tawamhã aꞌuwẽ norĩ ma tô ãne ãma sadaꞌâbâ zaꞌra:
— E niha hã. Ãne hã romhâimana õ di za! Wa tô wasima wẽ zaꞌra ni, ꞌRe ihâimana uꞌâsi mono, Uburé Danhibꞌapito ãma si ꞌre wanomro mono da.
22 Tahawa te Zozué, duré ãne tãma nharĩ zaꞌra:
— Asisõꞌa zaꞌra waꞌaba ma tô ꞌrâwi asima ipisutu zaꞌra waꞌwa, Uburé Danhibꞌapito ãma ꞌre anomro aba mono da hã.
— Ĩhe, wa norĩ hã wa tô wasisõꞌa wasima pisutu zaꞌra ni! — Ãne ma tô ãma tãma waꞌrãmi zaꞌra.
23 Zahadu te Zozué tãma nharĩ zaꞌra ãne:
— Tane wamhã, pé tô sãmra zaꞌra waꞌaba, asiré aꞌuwẽꞌõ norĩ te, ihâibaꞌõ aima ihâimana zaꞌra waꞌwa hã. Duré asina ropisutu zaꞌra waꞌaba, sena na Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono ãma si ꞌre iꞌanomro aba mono zém na hã za.
24 Tawamhã Zozuéhé ma, aꞌuwẽ norĩ hã ma ãma tãma waꞌrãmi zaꞌra ãne:
— Uburé Danhibꞌapito, wate ꞌRe ihâimana uꞌâsi mono ãma wa za ꞌre wanomro. Wa za duré isimiroti si wa te ꞌre wapari pese zaꞌra.
25 Ãne ma tô Zozué, Siquẽ ãma tô taha bâtâ na dapawapto, ꞌRe ihâimana uꞌâsi mono ma, da te dasina iropisutu zaꞌra zém na hã. Tame ma tô duré roti hã dama tisõ, da te ꞌre iꞌmadâꞌâ zaꞌra mono zéb da hã.
26 ꞌRe ihâimana uꞌâsi mono mreme na ibaihâ nhisi na ma tô robꞌuiꞌéré, roti na hã. Taha pari ẽtẽ tõmo wawẽ te te âri wamhã, ma tô wede iwazéb zahi zahâpâmhã tihi, ꞌRe ihâimana uꞌâsi mono, Uburé Danhibꞌapito ãma ꞌre idawata zaꞌra mono zéb ãma.
27 Tahawa te uburé dama tinha, ãne:
— Maꞌãpé ã hã ẽne asiwi ꞌmadâꞌâ aba! Ãma ꞌre iwasipoꞌre puꞌu zaꞌra mono zéb da hã te za wama ꞌre hâimana zaꞌra, wa te wasiwi ꞌre ꞌmadâꞌâ mono wa. Õ hã ma tô Uburé Danhibꞌapito te te wama inharĩ zaꞌra zé hã wapa. Niwa aptoꞌoré ꞌRe ihâimana uꞌâsi mono ꞌre rẽme zaꞌra waꞌaba mono õꞌumnhasite, te za te te ꞌre aiꞌuwati zaꞌra waꞌwa.
28 Tawamhã ãne pari ma tô Zozué, aꞌuwẽ norĩ ma robꞌru zaꞌra, tinhiptiꞌai mono bâ te te ropéi mono da.
Zozué norĩ idâꞌâ zahuré zé wasuꞌu, Eriazaha me
29 Tawamhã daꞌãma ronomro pari, ma tô oto Zozué Nuhu ꞌra hã dârâ, Uburé Danhibꞌapito ma romhuriꞌwa hã, 110 na ãma iwahum na.
30 Ma tô isiptiꞌa Timnate-Sera na ꞌri waꞌõtõ nhisi ãma dasiwi sẽrẽ ni, Efraĩhĩ niwĩ ẽne ihâimana ãma, Gaꞌasi na ẽtẽ nhisi ãma hâiwa nhimiꞌe niwĩmhã.
31 Tawamhã Izaraéu nhihudu norĩ, Zozué ꞌre hâimana mono ré, ma tô ꞌRe ihâimana uꞌâsi mono, Uburé Danhibꞌapito ãmamhã ꞌre nomro. Duré dâꞌâ parib zama ma tô ãma ꞌre nomro pese, dama iꞌrãnhoꞌõmo norĩ, ꞌRe ihâimana uꞌâsi mono, Izaraéu nhihudu norĩ ma, uburé pese te te ꞌre iꞌabꞌmanharĩ mono zé waihuꞌu pese ꞌwa norĩ, ꞌre hâimana zaꞌra mono ré hã.
32 Tahawa, Izaraéu nhihudu norĩ, Ezitu hawi Zuzéhé hi te te siwi iꞌâri hã, ma tô Siquẽ na romnhisi ãma siwi ãma tiꞌa, Hamohõ ꞌra norĩ wi, Zaco tiꞌai waꞌõno te te tiwi iꞌuipra zahuré ãma, 100 na prata waꞌõtõ na, Siquẽhẽ mama wi. Tawamhã ã hã tiꞌa hã ma tô Zuzéhé nhihudu norĩ hã tihiꞌrata uirĩ na hã ãma ate zaꞌra.
33 Tawamhã Arãhã ꞌra Eriaza zama dâꞌâ wamhã, ma tô duré Zibea na ꞌri nhoꞌõmo nhisi ãma siwi ãma tiꞌa, Efraĩhĩ niwĩ ẽne hã ihâimana ãma, iꞌra Finezaha ma, da te isõmri wa.
