Zozué 4:1-24
4 Tawamhã uburé Izaraéu norĩ Zodã pa â na te te saprĩ zaꞌra pari, ma tô Uburé Danhibꞌapito hã tãma tinha ãne, Zozuéhé ma:
2 — Maꞌãpé aibâ norĩ 12 na pisutu zaꞌra na, Izaraéu nhihudu wamri mono bâ misi si.
3 Tawamhã te za ãne tãma iwaihuꞌu zaꞌra za: “Maꞌãpé ẽne hã 12 na asiwi waibui waꞌaba Zodã pa â waꞌwamhã, sasedoti norĩ iwa isimasabzéb ãmamhã. Tawamhã ta hã ẽne hã te za iꞌwasari ꞌwa, asiwi saꞌra waꞌaba da, ã mara na za ꞌri hã asima isãrĩ zaꞌra waꞌaba zéb ãmamhã.”
4 Tawamhã Zozué, aibâ 12 na te te ipisutu zaꞌra norĩ zô, te hâ.
5 Tahawa, te ãne tãma nharĩ zaꞌra:
— Mo oto aiꞌabaꞌréi waꞌaba, ate zaꞌra waꞌwa Uburé Danhibꞌapito ꞌRe ihâimana uꞌâsi mono te, wedehâꞌre ꞌmanharĩ nhowa. Tawamhã te za tô ime aiꞌabaꞌréi waꞌwa, Zodã pa â aiwa ãma isipoꞌo u. Aihâiba mono bâ te za misi si asisé u isaꞌra waꞌwa ẽne hã, Izaraéu nhihudu wamri zaꞌratazéb zarina.
6 Ta hã ẽne hã Uburé Danhibꞌapito nhimiꞌmanharĩzém na ãma ꞌre idasipoꞌre puꞌu zaꞌra mono zéb da hã, te za ꞌre simiꞌwara. Aptoꞌo ré, aiꞌra norĩ waꞌwa hã ã hã ẽne marĩ te te iwasuꞌu na te te ꞌre asadanharĩ zaꞌra waꞌaba mono wamhã,
7 te za tãma ꞌre iwasuꞌu zaꞌra waꞌaba mo, ꞌRe ihâimana uꞌâsi mono te, wedehâꞌre ꞌmanharĩ, Zodã pa â na te te saprĩ wa, tô taha bâtâ na â ipraba nhimizazâri na hã. Tahawa ã hã ẽne hã Izaraéu nhihudu norĩ ma, te za sina tãma wasuꞌu zaꞌra, õne uꞌâ ãma ꞌre isipoꞌre puꞌu zaꞌra mono zéb da hã.
8 Tawamhã aibâ norĩ hã, Zozué te te tãma iwaihuꞌu zaꞌra zéb zarina, ma tô siwi mreme ꞌmanha. Zozuéhé ma, Uburé Danhibꞌapito te te tãma inharĩzéb zarina ma tô Zodã pa â waꞌwa ãma ẽne 12 na siwi waibu, Izaraéu nhihudu wamri mono bâ misi si. Tawamhã te te oto ꞌwasari wamhã, ma tô saꞌra zaꞌra, romhâ ꞌmanharĩ na ꞌri isisõré ãma.
9 Tawamhã Zozuéhé zama ma tô 12 na ẽne hã Zodã pa â waꞌwa ãmamhã dame saꞌra, sasedoti norĩ, wedehâꞌre ꞌmanharĩ te te siwi âri wa, iré isimizahâri zaꞌra zéb ãma. (Ta hã ẽne te zahadu ꞌre simiꞌwara.)
10 Tahawa, sasedoti norĩ hã ma tô Zodã pa â waꞌwamhã mazahâri zaꞌra, Uburé Danhibꞌapito hã, Zozuéhé ma te te iwaihuꞌuzéb zarina aꞌuwẽ norĩ hã uburé te te iꞌmanharĩ zaꞌra zéb u, Mozésihi ma rotizéb zarina.
Tawamhã aꞌuwẽ norĩ â na ma tô saꞌẽtẽ saprĩ zaꞌra.
11 Uburé te te saprĩ zaꞌra wamhã, ma tô wedehâꞌre hã sina sõꞌre zaꞌra, isõwab zaꞌra duré hâimana zaꞌra da. Tawamhã sasedoti norĩ zama ma tô sina danhoꞌre zaꞌra, danhowa hâimana zaꞌra da, ta norĩ hã.
12 Aibâ Rubẽhẽ nhihudu norĩ hã, Gadihi nhihudu norĩ hã, duré Manaséhé nhihudu norĩ hã bâtâ pusizém hawimhã, ma tô danhowa saprĩ zaꞌra, simire zaꞌra sina siꞌwapé zaꞌra da hã, Mozési te te iwaihuꞌuzéb zarina.
13 40 miu na aibâ norĩ hã ma tô siꞌwapé zaꞌra da, simire sina â na saprĩ zaꞌra, ꞌRe ihâimana uꞌâsi mono Uburé Danhibꞌapito nhoꞌa, romharé u Zerico niwĩ.
14 Tawamhã taha bâtâ na hã Izaraéu nhihudu norĩ, Zozué aibâ dama isaꞌẽtẽ na te te waihuꞌu zaꞌra da hã, ma tô Uburé Danhibꞌapito hã tãma ꞌmanharĩ zaꞌra. Tahawa Mozési te te siwi ꞌre iwazéb zaꞌra mono ne, ma tô duré Zozué hã te te siwi ꞌre wazé pese.
15 Tawamhã Uburé Danhibꞌapito te Zozuéhé ma tinha, ãne:
16 — Sasedoti norĩ, ĩte wedehâꞌre te te siwi iꞌâri norĩ ma, nharĩ zaꞌra na, Zodã pa â hawimhã wairébé da.
17 Tawamhã Zozué ma tô ãne hã ꞌmanha.
18 Tawamhã sasedoti norĩ, Zodã pa â hawi wairébé wa, tiꞌa iꞌré tipara na te te watiꞌi zaꞌra pari, ma tô â hã oto apâ tipraba. Duré iwana te te isuwai mono ne, ma tô apâ pazaihâ hã te te suwa.
19 Tahawa, aꞌamo zaꞌratazé imorĩꞌrata na bâdâ dia 10 na ma tô aꞌuwẽ norĩ saprĩ zaꞌra, Zodã pa â na hã. Tawamhã Gilga na ꞌri waꞌõtõ nhisi ãma ma tô sima ꞌri nhoré zaꞌra, Zerico ãma bâtâ pusizém niwĩ.
20 Tame ma tô Zozué, 12 na ẽne hã saꞌra, Zodã pa â hawi te te isani zaꞌra hã.
21 Tawamhã Izaraéu nhihudu norĩ ma, ma tô ãne nharĩ zaꞌra:
— Niwa aptoꞌo ré, ẽne marĩ te te iwasuꞌu na aiꞌra norĩ hã duré asihudu waꞌaba mono hã, timama te te ꞌre sadanharĩ zaꞌra mono wamhã,
22 te za ãma tãma ꞌre irowasuꞌu zaꞌra waꞌaba mo, Izaraéu nhihudu norĩ, Zodã pa paꞌré na te te isaprĩ zaꞌra zém na hã.
23 Uburé Danhibꞌapito ate waꞌwa ꞌRe ihâimana uꞌâsi mono, ma tô Zodã pa â hã aima ꞌré zaꞌra waꞌwa, ãma isaprĩ zaꞌra waꞌaba zéb da hã, Âpré na â poré nhisi te te wama iꞌré zaꞌra ne, wa te ãma isaprĩ zaꞌra zéb da hã.
24 Ãne wa, te za daro mono bâ uburé pese da te ꞌre waihuꞌu zaꞌra, Uburé Danhibꞌapito ate waꞌwa ꞌRe ihâimana uꞌâsi mono iwaihuꞌu pese nhiptetezé hã. Taha dâꞌâsina te za duré a norĩ waꞌwa õne uꞌâ ꞌre iwazéb zaꞌra waꞌaba mo za.
