Zozué 6:1-27
6 ꞌRi nhoꞌu Zerico te, ꞌridawa zaꞌẽtẽ norĩ hã sitop tete uptabi zaꞌra di, Izaraéu nhihudu norĩ sisisi tõ da hã. Tahawa niꞌwa isébré da hã mare di, duré niꞌwa iwatobro da hã mare di, ꞌri nhoꞌõmo hawimhã.
2 Tawamhã Zozuéhé ma, te Uburé Danhibꞌapito hã tinha, ãne:
— Maꞌãpé waihuꞌu! Zerico hã wa tô aima tisõ asibꞌrata, isibꞌapito hã, duré ite dasiꞌwapéi ꞌmanharĩꞌwa isibꞌru norĩ hã.
3 Tahawa a hã, Izaraéu nhihudu norĩ te, dasiꞌwapéi ꞌmanharĩꞌwa norĩ me hã te za misi si bâtâ mono na nasi ꞌrinhoꞌu hã asõré pese na ropãrĩ zaꞌra waꞌaba mono sina iꞌuirĩ zaꞌra waꞌaba mo, 6 na bâdâ ihâimana ꞌremhã.
4 Ĩte wedehâꞌre ꞌmanharĩ nhowamhã, te za sasedoti norĩ hã 7 na aiꞌabaꞌré, poneꞌẽrebâ zéré mapure siꞌaibâ õmo na tinhimnhihârâzé hã hâiba mono bâ te te ꞌwasari sina. Tawamhã a hã, 7 bâtâ ãmamhã ate dasiꞌwapéi ꞌmanharĩꞌwa norĩ me hã te za ꞌrinhoꞌu 7 na ropãrĩ zaꞌra waꞌaba mono sina asõré pese na asiwi iꞌuirĩ waꞌwa, sasedoti norĩ hã tinhimnhihârâzé te te hãsi mono ré.
5 Tawamhã ta norĩ, pẽꞌẽ hâ sina te te hãsi mono wamhã, te za uburé aꞌuwẽ norĩ hã saꞌẽtẽ uptabi tizadari zaꞌra. Tahawa, ꞌri nhoꞌõmo ꞌwawi waꞌra ꞌrãihâ hã te za waptãrã. Tawamhã hâiba mono bâ awaꞌawi te za ꞌri nhoꞌõmo u hã sisaꞌre, sisisi mono da.
6 Tawamhã Zozué, ma tô sasedoti norĩ zô hâ, te te tãma nharĩ zaꞌra da, ãne:
— Wedehâꞌre ꞌmanharĩ ꞌRe ihâimana uꞌâsi mono te ré hã te za asiwi iꞌâri ꞌwa. Tawamhã te za isõwamhã 7 na sasedoti norĩ tinhimnhihãsi zéb ré hã aiꞌabaꞌré.
7 Tawamhã te duré aꞌuwẽ norĩ ma nharĩ zaꞌra, ãne:
— ꞌRi nhoꞌõmo uirĩzém na maꞌãpé ãma sãnaꞌrata zaꞌra waꞌaba oto, ropãrĩ zaꞌra waꞌaba mono sina asõré pese aba na! Duré Uburé Danhibꞌapito te, wedehâꞌre ꞌmanharĩ nhowamhã te za dasiꞌwapéi ꞌmanharĩꞌwa norĩ hã sõré pese na hã aiꞌabaꞌré.
8 Tawamhã Zozué te te tãma iwaihuꞌu zaꞌra zéb zarina, ma tô wedehâꞌre ꞌmanharĩ nhowa, sasedoti norĩ 7 na ihâimana zaꞌra tinhimnhihãsizé hârâ na hã ãma sãnaꞌrata zaꞌra.
9 Tawamhã sasedoti tinhimnhihãsizé te te ihãsi norĩ nhowamhã te dasiꞌwapéi ꞌmanharĩꞌwa norĩ hã aiꞌabaꞌré. Te duré wedehâꞌre ꞌmanharĩ zarina dasiꞌwapéi ꞌmanharĩꞌwa iwaꞌõtõ hâiba amo isarina aiꞌabaꞌré. Siꞌabaꞌré sina ma tô te te hãsi, tinhimnhihãsizéb zaꞌra hã.
10 Zozué hã ma tô aꞌuwẽ norĩ ma waihuꞌu siromo zaꞌra, aꞌâ sadari zaꞌra mono tõ da, duré aꞌâ robruru te te siwi ꞌmanharĩ tõ da, te te tãma iwaihuꞌu zaꞌra zé bâtâ u.
11 Tawamhã Zozuéhé nhimiwadaꞌuri zarina ma tô oto sasedoti norĩ hã ꞌRe ihâimana uꞌâsi mono te, wedehâꞌre ꞌmanharĩ te te siwi âri sina, misi haré ꞌrinhoꞌu hã siwi uirĩ. Taha pari ma tô apâ aiꞌabaꞌré, romhâ ꞌmanharĩ na ꞌri nhoré u, tame aꞌâ ãma awẽ zaꞌra da.
12 Tawamhã awẽ bâtâ na mara hâ ré, ma tô Zozué hã udu. Utu wamhã, wedehâꞌre ꞌmanharĩ ma tô sasedoti norĩ hã siwi tiꞌâ.
13 Tawamhã wedehâꞌre ꞌmanharĩ nhowa, te 7 na sasedoti norĩ tinhimnhihâsizéb ré aiꞌabaꞌré, te te hãsi mono sina, duré ihârâ hã te te sahâri zaꞌra ãna. Ta norĩ nhowa dasiꞌwapéi ꞌmanharĩꞌwa norĩ hã te aiꞌabaꞌré. Te duré wedehâꞌre ꞌmanharĩ zarina aiꞌabaꞌré, dasiꞌwapéi ꞌmanharĩꞌwa iwaꞌõtõ hâiba amo hã, dazaꞌu. Tawamhã danhimnhihãsizém hârâ hã simizahâri zaꞌra õ di.
14 Tawamhã oto maparane bâtâ ãmamhã ma tô te te ropãrĩ zaꞌra mono sina sõré pese na aiꞌabaꞌré, ꞌrinhoꞌu hã misi haré te te siwi uirĩ da. Taha pari ma duré apâ romhâ ꞌmanharĩ na ꞌri nhoré u hã sina siri zaꞌra. Tawamhã 6 bâtâ ꞌremhã ãne si ma tô nasi siwi ꞌmanha.
15 Tawamhã 7 bâtâ ãmamhã robzaꞌrã ré oto duré utu zaꞌra wamhã, ma tô ꞌrinhoꞌu tô taha bâtâ na 7 na te te ropãrĩ zaꞌra mono sina, sisõré pese na hã siwi uirĩ. Õhõ bâtâ na si ma tô, ꞌrinhoꞌu 7 na siwi uirĩ.
16 Tawamhã oto 7 na te te siwi iꞌuirĩ zahu zéb ãma sasedoti norĩ tinhimnhihãsizé te te siwi hãsi zahâri wamhã, ma tô aꞌuwẽ norĩ ma Zozué hã tãma nharĩ zaꞌra, ãne:
— Oto asadari na hã aihãsi aba! Uburé Danhibꞌapito ma tô oto Zerico hã aima sõmri zaꞌra waꞌwa.
17 Tahawa, uburé marĩ hã ꞌri nhoꞌõmo ꞌre, ihâimana zaꞌra mono hã te za asiwi iꞌuprosi ꞌwa, ꞌRe ihâimana uꞌâsi mono ma ꞌre idanhoprub zaꞌra mono ne. Piꞌõ Raabi, sihâiba waꞌâbâ zô ꞌre isisõmri mono si te za siwaprosi dâꞌâ ãna hã tihâiba, duré uburé isõrõwa ꞌre, ihâimana zaꞌra norĩ zama. E marĩ wa. Õ hã wapsãiꞌaꞌwa norĩ wa te isatõrĩ zaꞌra hã te te simiꞌuri zahuré wa.
18 Tane nherẽ, marĩ hã asiwi uprosi aba da, te aima iꞌru zaꞌra waꞌwa hã asiwi waibui waꞌaba õ di za. ꞌMaiꞌâri aba wamhã, te za ropire hã duré ropsiꞌutõrĩzé hã asina iꞌmaiꞌãwisi ꞌwa, Izaraéu nhihudu norĩ te ꞌri nhoré u hã.
19 Tane nherẽ, ẽtẽ waipo prã prata na, ẽtẽ waipo pré oru na, ẽtẽ topsada brõzi na, duré isiꞌuwazi tete na danhibꞌmanharĩ mono hã, uburé ã norĩ, Danhibꞌapito te hã za. Ta hã te za ite marĩ waꞌâbâ zaꞌẽtẽ nhimiꞌwarazéb ꞌre dasiwi saꞌra ni.
20 Tawamhã sasedoti norĩ hã tinhimnhihãsizé te te oto hãsi. Tawamhã ihârâ, Izaraéu nhihudu norĩ te te wapari zaꞌra wi, ma tô saꞌẽtẽ uptabi tihârâ zaꞌra. Ta hawi ma tô ꞌri ꞌwawi waꞌra ꞌrãihâ hã õne haré waptãrã. Tawamhã uburé ãma isite mono bâ ma sisisi. Tahawa, ma tô siwi tiꞌâ, ꞌri nhoꞌu hã.
21 Ma tô duré tinhiꞌwa na aibâ norĩ hã, piꞌõ norĩ hã, aiꞌuté norĩ hã duré ihi norĩ hã te te siwi simro, ꞌri nhoꞌõmo wa, uburé ꞌre ihâimana zaꞌra mono norĩ hã. Ma tô duré te te siwi simro, powawẽ norĩ zama hã, poneꞌẽrebâire, duré awaru poꞌre pore.
22 Tawamhã te Zozué, aibâ norĩ te te iwapsãiꞌa zahuré ma hã, tãma nharĩ zahuré, ãne:
— Maꞌãpé azasi aba, Raabi siwaꞌâbâ zô ꞌre isisõmri mono nhorõwa u, we wazere aba da rob u, isiré isõrõwa ꞌre, isiꞌubumro norĩ me, tãma iropisutu aba zéb zarina.
23 Ãne te te tãma nharĩ zahuré wamhã, ma tô wapsãiꞌaꞌwa norĩ hã Raabihi nhorõwa u tizasi zahuré. Tawamhã Raabi hã ma tô wazere zahuré, imama, ina, isisãnawã norĩ, duré uburé isõrõwa ꞌre, ꞌre ihâimana zaꞌra mono norĩ hã. Uburé pese isõrõwa ꞌre, ꞌre ihâimana zaꞌra mono norĩ, ꞌri hawi te te azani zahuré wamhã, ma tô duré Izaraéu nhihudu norĩ te, romhâ ꞌmanharĩ na ꞌri mana u hã daꞌaꞌãwisi zahuré.
24 Tawamhã ꞌri nhoꞌõmo ãma ma tô oto siwi roꞌo, duré uburé pese marĩ iwa ihâimana zaꞌra ãma. Tane nherẽ, ẽtẽ waipo pré oru ꞌmanharĩ norĩ hã, ẽtẽ waipo prã prata ꞌmanharĩ, ẽtẽ topsada brõzi ꞌmanharĩ, duré isiꞌuwazi tete ꞌmanharĩ norĩ hã da te ãma dasiwi roꞌo õ di. Ã norĩ si ma tô Uburé Danhibꞌapito nhorõwa ꞌre, marĩ iwaꞌâbâ zaꞌẽtẽ nhemezéb ꞌre dasiwi séme ni.
25 Tawamhã Zozué, ma tô Raabi siwaꞌâbâ zô ꞌre isisõmri mono si duré uburé pese isõrõwa ꞌre, ꞌre ihâimana zaꞌra mono norĩ hã rẽme zaꞌra hâiba ré, wapsãiꞌaꞌwa norĩ Zerico u te te isatõrĩ zahuré hã, te te simiꞌuri zahuré wa. Taha dâꞌâ sina te isihudu hã Izaraéu nhihudu norĩ siré ꞌre hâimana zaꞌra, ãhã na zama.
26 Tahawa, ma tô Zozué hã ꞌRe ihâimana uꞌâsi mono nhisi na ꞌri nhoꞌu ihâimana ãma ipire na ropisutu, ãne:— Niꞌwa, ꞌri nhoꞌu Zerico te te apâ ꞌri wahutu wamhã, te za Uburé Danhibꞌapito nhimirobꞌmanharĩ wasété zéb ré si ꞌre hâimana!Duré niꞌwa ꞌri nhanaꞌratazéb da, te te saꞌra wamhã, te za tiꞌra potoꞌrada hã simini!Duré niꞌwa hã ꞌridawa isaꞌẽne te te apâ ãma sasõmri zaꞌra wamhã, te za tiꞌra nhobabati hã simini!
27 Ãne ma tô Uburé Danhibꞌapito, Zozuéhé siré tihâiba. Tawamhã ma tô iwasuꞌu zaꞌẽne hã tiꞌai waꞌõtõ nhoꞌõmo mono bâ te te ropé.
