Zozué 7:1-26
7 ꞌRe ihâimana uꞌâsi mono ma tô aré tãma roti siromo zaꞌra, Izaraéu nhihudu norĩ ma, ꞌri nhoꞌõmo ꞌre uburé marĩ za te te iprub zaꞌra hã niꞌwa te te sima ꞌmaihiri tõ da. Tane nherẽ, aihĩni pese te te ãne hã sima tété zaꞌra õ di. Acã hã ma tô marĩ simiꞌu. Tahawa ma tô Izaraéu nhihudu norĩ zada Uburé Danhibꞌapito hã tinhitiꞌru zaꞌra. Acã hã, Carmihi ꞌra, Zabdihi nhihudu, duré Zeraha nhihudu, Zudaha nhihudu norĩ hawi aꞌuwẽ.
2 Tawamhã Zozué ma tô aibâ norĩ hã satõrĩ zaꞌra, Zerico hawi siꞌabaꞌré da, Ai na ꞌri nhoꞌõmo nhisi u, Bétéu bâtâ pusizém niwĩ ꞌre ihâimana mono niwĩ, Bete-Awé na romnhisi ꞌratamhã. Tiꞌa te te siwi ꞌmadâꞌâ da, ma tô satõrĩ zaꞌra. Tawamhã oto ta norĩ hã siꞌabaꞌréi wamhã, ma tô ꞌri nhoꞌu siwi waihuꞌu wẽ.
3 Tawamhã oto apâ sihutu wamhã, ma tô ãne Zozuéhé ma rowasuꞌu zaꞌra:
— Uburé aihĩni pese iwasiꞌabaꞌré da hã mare di za. Tahawa te za 2 miu na wahâiba zaꞌra na si iwazatõrĩ zaꞌra, aibâ norĩ hã, niha wamhã duré 3 miu na wahâiba zaꞌra na, Ai hã te te siwi iꞌwapé da hã, õmemhã daꞌumrore na ꞌre dahâimana zaꞌra mono wa.
4 Tahawa ma tô 3 miu na aiꞌabaꞌré, aibâ norĩ hã. Tane nherẽ, Ai ãmamhã aibâ norĩ hã ma tô Izaraéu nhihudu norĩ hã te te wanoꞌõ.
5 Tahawa, ma tô aiwétési siwi uprosi, 36 na. Tawamhã ꞌri nhoꞌõmo te, ꞌridawa zaꞌẽtẽ hawi ma tô Izaraéu nhihudu norĩ zarina sisaꞌre, ẽtẽ nhihârizéb u. Tawamhã ẽtẽ na siꞌrazé rowahâpâ na ma tô te te pãrĩ. Tahawa, ma tô aꞌuwẽ norĩ wi hã tirobzeiꞌõ pese zaꞌra. Ma tô duré siptete haiꞌutõrĩ zaꞌra.
6 Tawamhã Zozué, tiꞌuza ma tô hâiwazu, robzeiꞌõ zé te. Tiꞌai u, ma tô duré sime. Tiꞌubu na ma te tiꞌai u ropto, Uburé Danhibꞌapito nhimiroti ré wedehâꞌre ꞌmanharĩ nhoꞌre. Tawamhã tô õne Zozuéhé siré ma tô Izaraéu nhihudu norĩ ma iꞌrãnhoꞌõmo norĩ hã siwi ꞌmanha. Tahawa ma tô hâiwahâ u ime tihâimana zaꞌra. Duré isine ma tô siwi ꞌmanha: Tiꞌa na ma tô siꞌrãzazub zaꞌra, robzeiꞌõ na tihâimana zaꞌra zém na siwasuꞌu zaꞌra da.
7 Tahawa te Zozué tinha, ãne:
— Uburé Danhibꞌapito, ĩte ꞌRe ihâimana uꞌâsi mono, e marĩ da, ma tô bété ã hã aꞌuwẽ panhoꞌu Zodã pa na te te isaprĩ zaꞌra da hã isaꞌré. E amoreu norĩ ma, wanhomri zaꞌra wa, duré ta norĩ hã te te siwi wanhimro da. E marĩ wa bété, Zodã pa zara niwĩmhã wahâimana uꞌâsi zaꞌra õ di.
8 Ĩnhibꞌapito, Izaraéu nhihudu norĩ hã tinhitobꞌru norĩ ma sisaꞌre mono wa, niha hã te aima nharĩ waihuꞌu õ di.
9 Cananeu norĩ hã duré uburé ã hã tiꞌai ꞌre, ꞌre idahâimana zaꞌra mono norĩ hã ãne na te te waihuꞌu zaꞌra wamhã, te za siwi waꞌuirĩ. Duré te za tawamhã uburé siwi waꞌuprosi za. Ãne wamhã, e marĩ te za asisi zaꞌẽtẽ ma ropibu ma hã iꞌmanha.
10 Tawamhã Uburé Danhibꞌapito, ma te Zozué sadaꞌâ, ãne:
— Aiwahutu! E marĩ wa, te bété tane tiꞌai u aiꞌubu na roptom haré asã.
11 Izaraéu nhihudu norĩ hã ma tô tiwasété zaꞌra. Te te sima ꞌre tété zaꞌra mono da, ĩnhimiroti te iꞌmanharĩzé hã ma tô siwi tirẽ. Te te siwi prub da, te tãma iꞌru zaꞌra ꞌremhã ma tô marĩ hã tãma tihâimana zaꞌra. Ã hã ma tô ta norĩ hã simiꞌuri zaꞌra. Ma tô sadawa hapese zaꞌra. Tinhimarĩ wazari ma tô saꞌra zaꞌra.
12 Ãne wa, tinhitobꞌru norĩ da, Izaraéu nhihudu norĩ, sada hâimana waihuꞌu zaꞌra õ di tô oto. Tãma sisaꞌrei zei mono di. E marĩ wa. Ta norĩ hã isiꞌutõrĩ da si, te tãma pisutu zaꞌra wa. Marĩ te te isimiꞌuri zaꞌra hã asiwi uprosi aba õ wamhã, wa hã asiré zaꞌra waꞌaba ĩhâimana da hã mare di za.
13 Tahawa maꞌãpé aiwahutu, aꞌuwẽ norĩ ma, waihuꞌu zaꞌra da aimorĩ da, ta norĩ hã sipese zaꞌra da, ĩnhoꞌre simasab da, awẽmhã. Tawamhã te za wa hã Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono, tãma ĩzadawa wasuꞌu zaꞌra, ãne: “Izaraéu nhihudu norĩ, ma tô marĩ asisa isaꞌra waꞌwa, prub zaꞌra waꞌaba da, wa hã te iꞌrui ꞌremhã. Tawamhã marĩ ma, tãma rowairébé zaꞌra waꞌaba õ wamhã, asitobꞌru norĩ da, asiptete na iꞌaihâimana zaꞌra waꞌaba da hã mare uptabi di za.
14 Awẽmhã te za Izaraéu nhihudu norĩ aiꞌupsãtã mono bâ asihâiꞌré zaꞌra waꞌwa, dapisutuzé ihâimana u. Tawamhã wa hã nimahã nhihudu upsãna te pisutu wamhã, te za imorĩꞌrata na dama tihâimana zaꞌra, danhoꞌre u, dasisãnawã siwadi iwaꞌõtõ mono bâ. Tawamhã te iꞌmaipisudu hã te za danhowamhã sihâiꞌré zaꞌra, dahawi aꞌuwẽ mono bâ upsãtã pese na. Tame te za iꞌrãsutu ãma dahawi aꞌuwẽ upsãna hã sihâiꞌré zaꞌra, te ipisutu zaꞌra hã, tô aibâ norĩ hã.
15 Tawamhã niꞌwa te ipisudu hã marĩ te te isimiꞌuri hã te za prémhã dasiwi ꞌrãmi ni za, duré uburé pese marĩ tãma ihâimana zaꞌra zama. Ã hã aibâ marĩ te te iꞌmanharĩ hã, wasété uptabi di. Ta hã ma tô ĩnhimiroti hã upa. Taha zarina ma tô sina roꞌwaꞌrutu, Izaraéu ꞌremhã.”
16 Tawamhã Zozué ma tô robzaꞌrã ré aꞌuwẽ norĩ ma waihuꞌu zaꞌra, Izaraéu nhihudu upsãtã mono bâ sihâiꞌré zaꞌra da. Tahawa, Zudaha nhihudu norĩ ma tô wasuꞌu zaꞌra.
17 Taha pari Zudaha nhihudu norĩ ma, te te tãma ꞌru zaꞌra wamhã, ma tô sihâiꞌré zaꞌra. Tahawa, Zeraha sisãnawã siwadi upsãna hã ma tô wasuꞌu zaꞌra, dapisutuzé hã. Tawamhã Zeraha sisãnawã siwadi upsãna te te ꞌmahârâ wamhã, ma tô duré wasuꞌu zaꞌra, Zabdihi sisãnawã upsãna hã.
18 Tawamhã oto iꞌrãsutu ãma ma tô Zabdihi sisãnawã upsãna hã ꞌmahârâ zaꞌra, aibâ mono bâ. Tawamhã ma tô Acã wasuꞌu. Ta hã Carmihi ꞌra, Zabdihi nhihudu, duré Zeraha nhihudu, Zudaha nhihudu norĩ hawimhã.
19 Tawamhã Acãhã ma, te Zozué tinha, ãne:
— Ĩꞌra, sena na te za asiwẽꞌõ, Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono nhoꞌre. Ĩma wasuꞌu na, marĩ iꞌmanharĩzé hã; duré rosaꞌrata tõ, asima iꞌudâ da hã.
20 Tawamhã Acã, ma tô sadaꞌâ, ãne:
— Ĩhe, tô sena wa tô ĩwasété, Uburé Danhibꞌapito Izaraéu nhihudu norĩ te ꞌRe ihâimana uꞌâsi mono wi. Tahawa wa za tô aima wasuꞌu, marĩ te iꞌmanharĩzé hã.
21 Marĩ hã te iwaibu zaꞌra ꞌremhã, wa tô Babilonia hawi daꞌuza ihâpa iwẽ hã ꞌmadâ. Duré ẽtẽ waipo prã prata zama wa tô 200 na iwaꞌõtõ waré hã ꞌmadâ, duré ẽtẽ waipo pré oru n iwaꞌõtõ waré hã aiwa ãma isipoꞌo na ipire pibuzém na hã. Ã norĩ hã ĩma ꞌruiwapari zaꞌẽtẽ wa, wa tô ĩsima saꞌra zaꞌra. Ĩte romhâ ꞌmanharĩ na ꞌri ꞌre, te dabaꞌwara simiꞌuri pese na, tiꞌai ꞌrowi. Daꞌrowimhã prata hã te duré dabaꞌwara.
22 Tawamhã Zozué, Acãhã nhorõwa u saꞌẽtẽ sisaꞌrei mono da hã, ma tô niꞌwam norĩ aibâ ma hã, robꞌru zaꞌra. Tahawa, ta norĩ hã ma tô sena na marĩ tiꞌai ꞌrowi isimiꞌwara hã siwi tisã, duré daꞌrowi prata isimiꞌwara hã.
23 Tawamhã romhâ ꞌmanharĩ na ꞌri hawi te te siwi sani zaꞌra wamhã, Zozuéhé ma, duré uburé Izaraéu nhihudu norĩ ma, te te siwi ꞌwasari wamhã, ma tô siwi saꞌra, ꞌRe ihâimana uꞌâsi mono Uburé Danhibꞌapito nhoꞌremhã.
24 Tawamhã Zozué, uburé Izaraéu nhihudu norĩ me hã ma tô siwi paꞌubumro, Acã hã. Duré ẽtẽ waipo prã prata, daꞌuza ihâpa, ẽtẽ waipo pré oru na iwaꞌõtõ waré, iꞌra siꞌaibâ norĩ, iꞌra sipiꞌõ norĩ, duré ite powawẽ norĩ, awaru poꞌre pore norĩ, poneꞌẽrebâire norĩ, isibꞌri, duré uburé pese isimarĩ norĩ hã ma tô siwi ꞌwasa, Aco na romharé nhisi u hã.
25 Tawamhã te Zozué tãma tinha, ãne:
— E marĩ da, ropire hã wanhisiwi waptãꞌã zaꞌra da, ma tô bété ã hã iwẽꞌõ hã iꞌmanha, a hã. Tahawa, ãhã na te za Uburé Danhibꞌapito ropire hã asisiwi iwaptãꞌã da hã aima ꞌmanha!
Tawamhã õne haré ma tô Acã hã uburé pese dasiwi wĩrĩ ni, ẽtẽ na. Taha pari isõrõwa ꞌre, ihâimana zaꞌra norĩ hã ẽtẽ na te te siwi simroi wamhã, ma tô siwi sãmra, unhama wa, zata zaꞌra da hã. Duré uburé pese isimarĩ zama ma tô siwi sãmra, siꞌunhama da unhama wa.
26 Taha parimhã ma tô isisiwimhã ẽne siwi saꞌra ꞌrãihâ pese. Zahadu te ãhã na tamemhã ẽtẽ zaꞌra ꞌrãihâ hã ꞌre hâimana. Tahawa taha romnhisi hã, “Dama marĩ ꞌmanharĩ wasétézém na Romharé” te zahadu ãhã na da te ãma ꞌre rowamri zaꞌra.
Tawamhã Uburé Danhibꞌapito nhitiꞌruzé hã ma tô oto saꞌre.
