Zozué 8:1-35
8 Tawamhã te Uburé Danhibꞌapito hã tinha ãne, Zozuéhé ma:
— Aipahi tõ! Sada asibꞌru na! Uburé ate dasiꞌwapéi ꞌmanharĩꞌwa norĩ me, ꞌri nhoꞌu Ai zada, asõré pese na aiꞌabaꞌréi waꞌaba. Wa hã wa za ta norĩ nhibꞌapito ãma iꞌaiꞌuté zaꞌra waꞌaba zéb da hã aipawaptob zaꞌra waꞌwa. Tahawa asibꞌratab zaꞌra waꞌaba, wa za Ai ãma aꞌuwẽ norĩ hã duré ꞌri nhoꞌu hã, duré isiptiꞌa zaꞌra zama aima sõmri zaꞌra waꞌwa.
2 Tahawa te za ã hã ꞌri nhoꞌõmo ma, Zerico ma, iꞌmanharĩ zaꞌra waꞌaba ne hã tãma iꞌmanharĩ zaꞌra waꞌwa za. Tawamhã ãhã na uburé pese marĩ mono hã, powawẽ norĩ hã te za aima tihâimana zaꞌra waꞌwa. Tahawa maꞌãpé piꞌuriwi ꞌri nhoꞌõmo babarã u niꞌwam norĩ satõrĩ zaꞌra na, simizaꞌrese õ ré bâtâ pisutu zarina te te isusi zaꞌra da hã.
3 Tawamhã Zozué, uburé pese dasiꞌwapéi ꞌmanharĩꞌwa norĩ me ma tô oto sima robzaꞌra wẽ zaꞌra, te te ropãrĩ zaꞌra mono sina sisõré pese na siꞌabaꞌré da, Ai zada hã. Tawamhã aibâ norĩ 30 miu na isibꞌru norĩ te te ipisutu zaꞌra, ma tô bara na hã satõrĩ zaꞌra,
4 ãne te te tãma iwaihuꞌu zaꞌra ré:
— Aimaꞌuri zaꞌra waꞌaba za, ꞌri nhoꞌõmo babarã niwĩmhã. Romhâ na aihâimana zaꞌra waꞌaba tõ. Asimizaꞌrese sina te za sada aihâimana zaꞌra waꞌwa.
5 Tawamhã wa norĩ dasiꞌwapéi ꞌmanharĩꞌwa norĩ me hã wa za ꞌri nhoꞌõmo u wa te wasina rotété zaꞌra. Tawamhã Ai te, dasiꞌwapéi ꞌmanharĩꞌwa norĩ te te waꞌwapé zaꞌra da, wazô wairébé wamhã, wa za imorĩꞌrata na tãma iwasisaꞌrei mono ne aꞌâ duré sena ne hã tãma wasisaꞌre.
6 Tawamhã ta norĩ hã wazarina sisaꞌrei mono wamhã, te za ꞌri nhoꞌõmo nhiti wama sina tipahâ zaꞌra. Te za duré imorĩꞌrata na wapahi te, tãma iwasisaꞌrei mono ne hã, wasisaꞌrei mono newa, waꞌãma rosaꞌrata zaꞌra.
7 Tawamhã ãhã ré, iꞌaimaꞌuri zaꞌra waꞌaba zém hawimhã te za aiwairébé ꞌwa. Tawamhã te za ꞌri nhoꞌu asiwi iꞌâri ꞌwa. Tawamhã Uburé Danhibꞌapito, wate zaꞌra ꞌRe ihâimana uꞌâsi mono te za Ai hã aima sõmri zaꞌra waꞌwa.
8 Tawamhã ꞌri nhoꞌu asiwi âri aba parimhã, te za uzâ hã ãma isõré waꞌaba mo, siꞌunhama da, Uburé Danhibꞌapito te te iꞌruzéb zarina. Ãne wa aima ꞌru zaꞌra waꞌwa.
9 Tawamhã Zozué ma tô, tô dasiꞌwapéi ꞌmanharĩꞌwa norĩ hã satõrĩ zaꞌra. Te te satõrĩ zaꞌra wamhã, ma tô Ai norĩ waꞌwa Bétéu ꞌre me tame rowaꞌwa simaꞌuri zaꞌra da hã aiꞌabaꞌré, Ai ãma bâtâ zasizém niwĩ. Tane nherẽ, Zozuéhé ãma, romhâ ꞌmanharĩ na ꞌri nhoré ãma aꞌuwẽ norĩ siré hã ma tô ãma tiꞌawẽ.
10 Ãma awẽ wamhã, mararé uptabi ma tô udu. Ma tô duré dasiꞌwapéi ꞌmanharĩꞌwa norĩ hã ꞌrãꞌõtõ. Tawamhã Zozué hã, Izaraéu nhihudu norĩ ma iꞌrãnhoꞌõmo norĩ me hã ma tô aꞌuwẽ norĩ nhowamhã te te ropãrĩ zaꞌra mono sina sisõré pese na aiꞌabaꞌré, Ai nhoꞌõmoi waꞌwaibaba.
11 Tawamhã Zozuéhé siré dasiꞌwapéi ꞌmanharĩꞌwa, ꞌri ahâ u ꞌridawa zaꞌẽtẽ na ꞌre idanhisisi mono zé waꞌwaibaba te te ropãrĩ zaꞌra mono sina, sisõré pese na isiꞌabaꞌré norĩ hã, ma tô hâiwa nhimiꞌe niwĩ sima ꞌri nhoré zaꞌra, Ai norĩ waꞌwamhã romharé ihâimana wa.
12 Tawamhã Zozué, aibâ norĩ 5 miu na bâtâ zasizém niwĩ isimaꞌuri zaꞌra da hã ma tô sõré, Aihi ꞌrem norĩ me, Bétéu me.
13 Ãne te te daꞌwapé zaꞌra da, dasiꞌwapéi ꞌmanharĩꞌwa, da te isõré hã: niꞌwam norĩ hã romhâ ꞌmanharĩ na ꞌri nhoré hã, ꞌri nhoꞌu hâiwa nhimiꞌe niwĩ ihâimana ãma, duré ihâiba amo norĩ hã bâtâ zasizém niwĩ. Tawamhã Zozuéhé ãmamhã ma tô tiꞌawẽ, romharé ãma.
14 Tawamhã Ai te apito, Izaraéu nhihudu norĩ te te ꞌmadâꞌâ zaꞌra wamhã, ma tô waptu na asapẽtẽ. Uburé tite dasiꞌwapéi ꞌmanharĩꞌwa norĩ me hã ma tô robzaꞌrã ré wairé. Wairébé wamhã, ma tô, tô õme iwana Izaraéu nhihudu norĩ te te iꞌwapé zaꞌra zéb u aiꞌabaꞌré, te te duré ꞌwapé zaꞌra da hã, Zodã na romharé nhisi nhoꞌre ãma. Tahawa, za ibabarãi hawi te te iꞌwapé zaꞌra da hã te te waihuꞌu õ di.
15 Tawamhã Zozué, duré uburé Izaraéu nhihudu norĩ me da te ãma aiꞌuté zaꞌra newa, ma tô aꞌâ tãma sisaꞌre ꞌrãnhipese sina, isarina zaꞌra aꞌâ sisaꞌrei mono da. Tahawa, aꞌubuni wi supara ꞌré si ro ꞌre isaꞌwari mono u, ma tô aꞌâ tãma sisaꞌre, sena ne hã.
16 Tawamhã Ai ãma uburé aibâ norĩ zô ma tô sô tahãsi ni, Izaraéu nhihudu norĩ zarina isiꞌabaꞌré da hã. Tawamhã oto Zozuéhé zarina siꞌabaꞌréi wamhã, ma tô ꞌri nhoꞌõmo nhiti sina siꞌré zaꞌra.
17 Uburé pese ma tô aibâ norĩ hã Izaraéu nhihudu norĩ zarina wairé. Tahawa ma tô ꞌri nhoꞌu ꞌridawa haré siwi tirẽ, niꞌwa iꞌwawimhã isimapa da hã hâimana ãna.
18 Tahawa te Uburé Danhibꞌapito, Zozuéhé ma tinha, ãne:
— Maꞌãpé, Ai nhoꞌõmoi baba ate isiꞌuwazi ꞌrãꞌwa hã wẽ na. E marĩ wa. Ã hã ꞌri nhoꞌu hã za oto te aima sõmri wa.
Tawamhã te te tãma iwaihuꞌuzéb zarina ma tô ãma sama.
19 Tawamhã tinhibꞌrada oto hâimo te te wẽ wa, aibâ norĩ isimaꞌuri zaꞌra saꞌẽtẽ ma tô tiwahutu zaꞌra, ꞌri nhoꞌõmo u sisaꞌrei mono da. Tawamhã ꞌri nhoꞌu hã ma tô siwi tiꞌâ. Ma tô duré õne haré te te ãma siwi sõré, uzâ hã.
20 Tawamhã Ai ãma aibâ norĩ siwaꞌrãmi te te robꞌmadâꞌâ zaꞌra wamhã, ma tô hâiwa u unhama nhizé isiꞌréi mono hã siwi ꞌmadâ. Tane nherẽ, nima niwĩ sisaꞌrei waihuꞌu mono õ di. E marĩ wa. Izaraéu nhihudu norĩ, aꞌubuni wi supara ꞌré si ro ꞌre isaꞌwari mono u tãma isisaꞌrei mono hã apâ sitẽmeb zaꞌra hã sô sito mono wa, te te iꞌwapé zaꞌra da hã siwi.
21 Tawamhã Zozué norĩ, tite dasiꞌwapéi ꞌmanharĩꞌwa norĩ me hã ma tô siwi ꞌmadâ, isiré norĩ ꞌri nhoꞌu te te siwi iꞌâri hã, duré te te ãma siwi isõré mono zé, uzâ hã. Tahawa ma tô apâ sô aꞌãsi zaꞌra. Tahawa ma tô Ai ãma aibâ norĩ pãrĩ na sãnaꞌrata zaꞌra.
22 Tawamhã ꞌri nhoꞌõmo ãma Izaraéu nhihudu norĩ ihâimana zaꞌra zama ma tô wairé, Ai te, aibâ norĩ te te ꞌwapé zaꞌra da hã. Ãhã wa, aibâ norĩ ma tô uirĩ pese zaꞌra ni. Tahawa ma tô Izaraéu nhihudu norĩ nhibꞌrata aiꞌutõ.
23 Ai te, apito si, te dâꞌâ ãna hã siwaprosi tihâiba. Ta hã da te âri wa, ma tô Zozuéhé ma saprõni ni.
24 Tawamhã ma tô uburé tinhitobꞌru norĩ, Izaraéu nhihudu norĩ hã siwi uprosi pese rom na, aꞌubuni wi supara ꞌré si ro ꞌre isaꞌwari mono u isarina isisaꞌrei mono zéb ãma. Taha pari Ai u apâ siꞌabaꞌréi wamhã, niꞌwam norĩ ihâimana zaꞌra hã ma tô duré tamemhã siwi uprosi.
25 Ãne hã Ai ãma uburé ꞌre ihâimana zaꞌra mono norĩ hã tô taha bâtâ na ma tô aiꞌutõ, 12 miu na dahâiba na.
26 Zozué hã ma tô wẽ uꞌâsi isiꞌuwazi ꞌrãꞌwa hã, Ai nhoꞌõmoi babamhã te te ãma tiꞌawi ãna, ꞌri nhoꞌõmo ãmamhã uburé aꞌuwẽ norĩ isiꞌutõrĩ pese zéb u.
27 Tawamhã Izaraéu nhihudu norĩ hã ma tô marĩ te te sima waibu, ꞌri nhoꞌõmo ãma, Uburé Danhibꞌapito, Zozué te te ꞌmanharĩ da, te te tãma iwaihuꞌuzéb zarina.
28 Zozué hã ma tô duré Ai ãmamhã ãma sazu. Tahawa ma tô isiprubzé saꞌra ꞌrãihâ na ꞌre hâimana uꞌâsi. Tahawa, te ãhã na zama baba na hã ꞌre hâimana.
29 Tawamhã duré Ai ãma apito, wede ꞌre isa mono na ma tô sõꞌreti, hâiwi. Tawamhã hâiwi saꞌo ré, ãma hâiwahâ da ma tô tirẽ. Duré oto bâdâ sébré wamhã, ma tô ihâiba hã tiꞌru, da te siꞌra da, duré ꞌri nhoꞌõmo u ꞌridawa zaꞌẽtẽ na ꞌre idanhisisi mono zéb ãma da te dasiwi me da. Tawamhã ẽtẽ na ma tô dasiwi suwa ꞌrãihâ ni. Ta hã te zahadu ãhã na hã ꞌre hâimana.
Zozué, Uburé Danhibꞌapito nhimiꞌuiꞌéré, Izaraéu nhihudu norĩ ma, te te isõrézé wasuꞌu
30 Tawamhã Ebau na ẽtẽ nhisi ãma, ma tô Zozué ẽtẽ zaꞌra hã ꞌmanha, Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono ma.
31 Uburé Danhibꞌapito ma romhuriꞌwa Mozési, Izaraéu nhihudu norĩ ma, te te iwaihuꞌuzéb zarina, ma tô ꞌmanha, ãne na Mozésihi nhimiroti na hã: “Maꞌãpé, ẽtẽ tõmo wawẽ, isihâri zaꞌra õ na ẽtẽ zaꞌra ꞌmanharĩ, ꞌRe ihâimana uꞌâsi mono ma, ꞌre idanhoprub zaꞌra mono zatazéb da hã.” Tawamhã taha nhisiwi ma tô danhimizama da te izata pese na tãma ãma tinhoprub zaꞌra, Uburé Danhibꞌapito ma, duré aimawi da te dasima ipoꞌo hâiba amoi waꞌõtõ na hã danhoprubzéb ãma dama ꞌre irowẽ zaꞌẽtẽ zaꞌra mono nhisi na hã.
32 Tawamhã tame ma tô Zozué, Mozési te te irobꞌuiꞌéré na hã, Izaraéu nhihudu norĩ nhoꞌremhã ãma robꞌuiꞌéré, ẽtẽ na.
33 Tawamhã uburé Izaraéu nhihudu norĩ, ite zaꞌra iꞌrãnhoꞌõmo norĩ, dama ipire norĩ, daꞌãma rowairébéꞌwa norĩ, duré uburé isiré aꞌuwẽꞌõ norĩ, iwazari ꞌre ihâimana zaꞌra mono norĩ zama ma tô ꞌRe ihâimana uꞌâsi mono te, wedehâꞌre ꞌmanharĩ aꞌre siꞌuiwa na hã aimasa, levita sisasedoti norĩ te te siwi imrami mono nhowamhã. Duré aꞌuwẽ aiwa ãma isipoꞌo na ma tô ẽne Gerizi na isisi nhoꞌremhã, duré Ebau na ẽne isisi nhoꞌremhã aimasa, Mozési te te dama iwaihuꞌuzéb zarina, sasedoti norĩ, ꞌRe ihâimana uꞌâsi mono zadawa para rowẽ hã za te te tãma ipisutu zaꞌra da hã, Izaraéu nhihudu norĩ ma.
34 Tawamhã Zozué, te mreme ꞌrãihâ na uburé sõré ibaihâ na ãma irobꞌuiꞌérézéb zarina ꞌRe ihâimana uꞌâsi mono, rowẽ te te dama ꞌre iꞌapisutu mono zém na hã, ro iwasédé te te duré dama ꞌre iꞌapisutu mono zém na zama.
35 Mozésihi nhimiroti na ãma irobꞌuiꞌéré mono bâ, ma tô Zozué hã uburé pese sõré, Izaraéu nhihudu uburé norĩ ma, piꞌõ norĩ ma, aiꞌuté norĩ ma, duré isiré aꞌuwẽꞌõ iwazari ꞌre ihâimana zaꞌra mono norĩ ma. Te te ꞌmairẽme õ pese na ma tô uburé sõré, Zozué hã.
