Zozué 9:1-27
9 Tawamhã Zodã pa bâtâ zasizém niwĩ, uburé apito ꞌre ihâimana zaꞌra mono norĩ hã ma tô ãne na Izaraéu nhihudu norĩ te te daꞌãma iꞌaiꞌuté zaꞌra zé hã waihuꞌu zaꞌra, ẽtẽ ãma ꞌre ihâimana zaꞌra mono norĩ hã duré romharé ãmam norĩ hã, duré uburé âporé Mediterãniu zaihâ ãmam norĩ zama, Libanu na romnhisi u hã. Ta norĩ te apito, hitita norĩ te hã, amoreu norĩ te hã, cananeu norĩ te hã, perizeu norĩ te hã, heveu norĩ te hã, duré zebuzeu norĩ te hã.
2 Tawamhã ã norĩ hã, Zozué, Izaraéu nhihudu norĩ me te te ꞌwapé zaꞌra da hã, ma tô uburé siꞌrãꞌõtõ.
3 Tawamhã heveu norĩ, ꞌri nhoꞌu Gibiã ãma ꞌre ihâimana zaꞌra mono norĩ, Zerico ma, Zozué te te iꞌmanharĩzé hã, duré ꞌri nhoꞌu Ai ma, te te iꞌmanharĩzé hã te te wapari zaꞌra wamhã,
4 ma tô sima waihuꞌu zaꞌra, Zozuéhé ma, niha na hâimana nhipese na te te tãma ꞌmanharĩ zaꞌra da. Tahawa dasa hã ma tô waibu zaꞌra. Te te waibu zaꞌra wamhã, ma tô tite awaru poꞌre pore norĩ ba nhisiwimhã siwi ꞌwasa, saꞌu idubꞌratare hã, duré romhâ ꞌmanharĩ na marĩ waꞌu nhemezé isitari norĩ inomo hâ babarĩ ré hã.
5 Daparaꞌuza wasisi zaꞌé iꞌrata na ma tô siparaꞌuza zaꞌra, isiꞌéré sipari na hã. Duré daꞌuza ihâ siwazu ahâ na ma siꞌuza zaꞌra. Tawamhã iꞌuꞌẽtẽ wapu iꞌréꞌa te te ihuri mono da hã ma tô duré ꞌwasa, iꞌumimire hã.
6 Tawamhã Gilga ãma romhâ ꞌmanharĩ na ꞌri nhoré u ma tô aiꞌabaꞌré. Siꞌabaꞌréi wamhã, ma tô Zozuéhé ma nharĩ zaꞌra, duré uburé aibâ Izaraéu nhihudu norĩ ma, ãne:
— Wa norĩ wa tô we aihutu ni, tiꞌai waꞌõtõ nhoꞌu romhâ uptabi hawimhã. Tahawa dasiꞌwapéi ãna dahâimanazém na dasisazezé hã maꞌãpé wama ꞌmanharĩ zaꞌra waꞌaba.
7 Tane nherẽ, te Izaraéu nhihudu norĩ aibâ norĩ hã tãma nharĩ zaꞌra, ãne:
— Ãté te ꞌrâwimhã ꞌre aihâimana zaꞌra waꞌaba mo, waꞌratab zaꞌra. E niha wa za wasiwapari pire zém na wasisazezé hã wasima ꞌmanharĩ zaꞌra ni.
8 Tawamhã ma tô ãne ãma sadaꞌâbâ zaꞌra:
— Wa norĩ hã aima zaꞌra waꞌaba romhuriꞌwa na ꞌre iwahâimana zaꞌra mono da si, wa wasima wẽ zaꞌra ni!
Tawamhã Zozué te sadanharĩ zaꞌra ãne:
— E ꞌwam norĩ hã bété, a norĩ waꞌwa hã. E ma hawi we iꞌaiꞌabaꞌréi waꞌwa bété.
9 Tawamhã Gibiã norĩ ma tô ãne ãma sadaꞌâbâ zaꞌra:
— Wa norĩ hã asibꞌaꞌuwẽ zaꞌra waꞌwa, romhâ na tiꞌai waꞌõtõ nhoꞌõmo ãma ꞌre iwahâimana zaꞌra mono, wa we ãwamhã aiꞌabaꞌré ni, Uburé Danhibꞌapito, ate ꞌRe ihâimana uꞌâsi mono wasuꞌu wa te wapari zaꞌra wa. Õ hã Ezitu ãma uburé te te iꞌmanharĩzé wasuꞌu hã wa tô wapari zaꞌra ni.
10 Zodã pa bâtâ zasizém niwĩ maparane apito amoreu ꞌre ihâimana zahuré mono ma, marĩ te te iꞌmanharĩzéb zama wa tô waihuꞌu zaꞌra ni; apito Seõ, Hesbõ norĩ nhibꞌapito ma, duré apito Ogue, Basã norĩ nhibꞌapito ma, Astarote ãma aré ꞌre ihâimana mono ma.
11 Tawamhã we wa te iꞌwasari da, dasa wa te ubumro zaꞌra da hã, ma tô wanhibꞌihâꞌa norĩ wama ꞌru zaꞌra, duré uburé warob ꞌre, ꞌre idahâimana zaꞌra mono norĩ hã. Ma tô wama ꞌru zaꞌra, wa te asõpẽtẽ zaꞌra waꞌaba wa, ãne wa te aima nharĩ zaꞌra waꞌaba da hã: “Wa norĩ hã aima zaꞌra waꞌaba romhuriꞌwa za oto! Tahawa maꞌãpé dasiꞌwapéi ãna dahâimanazém na dasisazezé hã wama ꞌmanharĩ zaꞌra waꞌaba.”
12 Maꞌãpé wate iꞌuꞌẽtẽ wapu hã asiwi ꞌmadâꞌâ aba! Aré waꞌro zaꞌra di, wanhorõwa hawi wawairébé na we oto wa te sãnaꞌrata zaꞌra wamhã ãwa. Tane nherẽ, ma tô oto ãhã na hã wawi tiꞌré tete zaꞌra. Ma tô duré wawi tiꞌumimi zaꞌra.
13 Ã hã romhâ ꞌmanharĩ wa, uwa ꞌrãi waꞌu isé hã wa te iwa iꞌmasisi zaꞌra mono hã aré nomo hâ téb zaꞌra di. Tane nherẽ, ma tô wawi nomohâ sisinarĩ zaꞌra. Duré waꞌuza norĩ hã, ma tô wawi hâ sisinarĩ zaꞌra. Duré waparaꞌuza hã ma tô wawi tihâpâ pese zaꞌra, romhâ na we iré iwasiꞌabaꞌré zarina.
14 Tawamhã aibâ norĩ Izaraéu nhihudu norĩ hã ma tô tisa te te iꞌwasari hã suru na siwi tẽꞌẽ zaꞌra.* Tane nherẽ, Uburé Danhibꞌapito wi, rowaihu iwẽ hã te te tiwi waptẽrẽ zaꞌra õ di.
15 Tawamhã Zozué, Gibiã norĩ ma, ma tô dasisazezé hã tãma ꞌmanharĩ zaꞌra, te te simro tõ da, te te tãma iropisutu zaꞌra zém na hã. Tahawa Izaraéu nhihudu norĩ ma iꞌrãnhoꞌõmo norĩ zama ma tô ropisutu zaꞌra, za te te ãma tãma iꞌuwaimrami zaꞌra zém na hã.
16 Tawamhã siꞌubdatõ bâtâ parip si, ma tô Izaraéu nhihudu norĩ hã siwi upsibi me, Gibiã norĩ ꞌrâwi ꞌre ihâimana zaꞌra mono zé hã.
17 Tahawa Izaraéu nhihudu norĩ ma tô ꞌri nhoré hawi wairé. Wairébé wamhã, ma tô siꞌubdatõ bâtâ parip si aihutu, Gibiã norĩ te ꞌri nhoꞌõmo u, ãne iwamri norĩ ꞌre ihâimana zaꞌra mono zéb u hã, Gibiã, Cefira, Beꞌerote, duré Quiriate-Zearĩ.
18 Tane nherẽ, dama iꞌrãnhoꞌõmo norĩ, Uburé Danhibꞌapito Izaraéu nhihudu norĩ te, ꞌRe ihâimana uꞌâsi mono nhisi na, ropisudu Gibiã norĩ ma, te te tãma ꞌmanharĩ zaꞌra wa, Izaraéu nhihudu norĩ hã te te siwi uprosi õ di. Tahawa ma tô tite iꞌrãnhoꞌõmo norĩ ma hã, uburé aꞌuwẽ norĩ hã tãma aiwapsari zaꞌra.
19 Tane nherẽ, te ãne ãma tãma rowasuꞌu zaꞌra:
— Wa norĩ hã wa tô ropisutu zaꞌra ni, Uburé Danhibꞌapito Izaraéu nhihudu norĩ te, ꞌRe ihâimana uꞌâsi mono nhisi na. Tahawa awaꞌawi na hã Gibiã norĩ hã wa te upi waihuꞌu zaꞌra õ di.
20 Wa te ropisutu zaꞌra wa, hâiba ré ꞌre hâimana zaꞌra mono da, wa za tãma sawi zaꞌra ni. Ãnei õ wamhã, ꞌRe ihâimana uꞌâsi mono hã te za wama robꞌmanharĩ zaꞌra.
21 ꞌRe hâimana zaꞌra mono tô. Tane nherẽ, te za mimi nhihâriꞌwa na duré â amramiꞌwa na wama ꞌre hâimana zaꞌra.
Ãne ma tô iꞌrãnhoꞌõmo norĩ hã dama nharĩ zaꞌra.
22 Tawamhã Zozué, Gibiã norĩ zô hârâ wamhã, te ãne sadanharĩ zaꞌra:
— E marĩ da, ma tô wama asadawa nhipese zaꞌra waꞌwa, romhâ hawi we iꞌaiꞌabaꞌréi waꞌaba na asiwasuꞌu zaꞌra waꞌaba na hã wama, sena na hã ãme ꞌre aihâimana zaꞌra waꞌaba mono nherẽ.
23 Ãne hã ꞌmanharĩ zaꞌra waꞌaba wa, te za oto ꞌRe ihâimana uꞌâsi mono nhimihâzéb ré ꞌre aihâimana uꞌâsi zaꞌra waꞌaba mo. Õne uꞌâ te za aipawaꞌâbâ ãna romhuriꞌwa na ꞌre aihâimana zaꞌra waꞌaba mo, wede nhihâriꞌwa na, duré ĩte ꞌRe ihâimana uꞌâsi mono nhorõwa ma, â amramiꞌwa na hã.
24 Tawamhã ma tô ãne ãma sadaꞌâbâ zaꞌra:
— Ãne hã wa tô, ꞌmanharĩ zaꞌra ni. E marĩ wa. Uburé Danhibꞌapito, ate ꞌRe ihâimana uꞌâsi mono hã wa te wasiwi waihuꞌu wa, tinhibꞌaꞌuwẽ Mozésihi ma te te iwaihuꞌuzém na uburé ã hã tiꞌa Izaraéu nhihudu norĩ ma, za te te isõmri na hã. Ma tô duré aima waihuꞌu zaꞌra waꞌwa, sasãmri zaꞌra waꞌaba mono sidâpâsi, za uburé nasi asiwi iꞌuprosi aba na hã, uburé iwa ꞌre ihâimana zaꞌra mono norĩ hã. Tahawa wa tô ãne hã ꞌmanharĩ zaꞌra ni, aima wapahi uptabi zaꞌra waꞌaba wa, za iwasiꞌutõrĩzém na hã.
25 Ãhã na hã wa asibꞌratab zaꞌra waꞌaba wahâimana zaꞌra ni. Tahawa aima iwẽ zaꞌra waꞌaba zéb zarina, marĩ wama ꞌmanharĩ zaꞌra waꞌaba.
26 Tawamhã Zozué hã ma te ꞌmaꞌrã, Gibiã norĩ ꞌwawimhã. Te te dama waprosi õ di, da te dasiwi iꞌuprosi da hã.
27 Tane nherẽ, tô taha bâtâ na ma tô tãma pisutu zaꞌra Gibiã norĩ ma, mimi nhihâriꞌwa na, â amramiꞌwa na, Izaraéu nhihudu norĩ ma, ꞌre hâimana zaꞌra mono da, duré danhimizama zatazéb da, ẽtẽ zaꞌra u, Uburé Danhibꞌapito, ꞌRe ihâimana uꞌâsi mono te u. Tawamhã ãhã na zama te ta norĩ hã ãne na romhuri hã te te ꞌre ꞌmanharĩ uꞌâsi zaꞌra, ꞌRe ihâimana uꞌâsi mono ãma ꞌre idawata zaꞌra mono zéb da, ro hã te te ipisutu ãma.
Ĩwaꞌõtõ piꞌreba watsuꞌu mono
^ 9:14 Duréihã dasiꞌwapéi ãna dasiré ꞌre dahâimana zaꞌra mono da, dasisazezé wasuꞌuzéb da hã ma tô dasa hã da te dasiwi ꞌre ꞌmanharĩ zaꞌra, dasiré.
