Zuize 1:1-36
1 Tawamhã Zozué dâꞌâ parimhã, ma tô Izaraéu nhihudu norĩ, ꞌRe ihâimana uꞌâsi mono Uburé Danhibꞌapito hã siwi sadanha ãne:
— E mahã nhihudu aꞌuwẽ waꞌreb zaꞌra hã te za imorĩꞌrata na siwi ꞌwapé, cananeu norĩ hã.
2 Tawamhã Uburé Danhibꞌapito ma tô ãma sadaꞌâbâ zaꞌra ãne:
— Zudaha nhihudu norĩ te za imorĩꞌrata na ꞌwapé zaꞌra. E marĩ wa. Tiꞌa hã ta norĩ ma, wa hã te tãma sõmri siromo zaꞌra wa.
3 Tahawa te Zudaha nhihudu norĩ, Simiã nhihudu norĩ ma nharĩ zaꞌra ãne:
— Oto tiꞌa, da te wama ipisutu zaꞌra tẽme wasiré wasiꞌabaꞌréi waꞌaba, wa te ꞌwapé zaꞌra da, cananeu norĩ hã. Taha parip si wa za wasiré hã aiꞌabaꞌré ni, za tiꞌa da te aima ipisutu zaꞌra waꞌaba u.
Ãne wa, Simiã nhihudu norĩ,
4 Zudaha nhihudu norĩ me, siré simisutu ma tô aiꞌabaꞌré, te te ꞌwapé zaꞌra da. Tawamhã Uburé Danhibꞌapito, cananeu norĩ ãma, duré perizeu norĩ ãma te te ãma iꞌaiꞌuté zaꞌra zé te te tãma sõmri zaꞌra wamhã, ma tô ta norĩ hã siwi uprosi, 10 miu na ꞌrinhoꞌu Bezequi na isisi ãma aibâ norĩ ꞌre ihâimana zaꞌra mono hã.
5 Tawamhã tame Adoni-Bezequi ma tô siwi sõpẽtẽ. Te te siwi sõpẽtẽ wamhã, ma tô siwi ꞌwapé. Tahawa, cananeu norĩ ãma, duré perizeu norĩ ãma, ma tô ãma aiꞌuté zaꞌra.
6 Tahawa Adoni-Bezequi hã ma tô tiwi aimani zaꞌra. Tane nherẽ, isarina sisaꞌrei mono wa, ma tô siwi tiꞌâ. Tahawa, ma tô siwi siptõmohi naꞌrata nhihâ. Ma tô duré siwi paradubꞌrã naꞌrata nhihâ.
7 Ãhã wa, te Adoni-Bezequi hã tinha ãne:
— Wa hã wa tô tiꞌru, 70 na apito norĩ nhiptõmohi naꞌrata zaꞌra hã, duré iparadubꞌrã naꞌrata zaꞌra hã, da te tiwi sihâri zaꞌra da. Ta norĩ hã ma tô ĩte wedeza zahâpâ dasaiꞌaꞌa hã te te ꞌre waibu. Tahawa, ãhã na awaꞌawi na hã ꞌRe ihâimana uꞌâsi mono, ma tô ãne hã ĩma ꞌmanha, ta norĩ ma, te ꞌre iꞌabꞌmanharĩ mono zém ne hã.
Tawamhã Adoni-Bezequi, ꞌrinhoꞌu Zeruzalẽ u ma tô dasiwi saprõni ni. Tahawa, tame ma tô oto dârâ.
Zeruzalẽ ãma, Hebrõ na ꞌri nhoꞌõmo nhisi me, da te ãma iꞌaiꞌuté zahuré zé wasuꞌu
8 Tawamhã Zudaha nhihudu siꞌaibâ norĩ, ma tô Zeruzalẽ hã siwi rési. Tahawa, ma tô ãma aiꞌuté zaꞌra. Ma tô duré iwa ꞌre ihâimana zaꞌra mono norĩ hã siwi uprosi. Ãhã wa, ma tô duré ꞌri nhoꞌõmo na hã ãma siwi sazu.
9 Taha pari, ma tô aiꞌabaꞌré, cananeu norĩ, ẽtẽ ãma, hâiwa nhimiꞌe niwĩ rop si marĩ ãna ꞌre isaꞌwari mono wa, duré Sefela na romharé nhisi ãma ꞌre ihâimana zaꞌra mono norĩ, te te ꞌwapé zaꞌra da hã.
10 Tawamhã ꞌrinhoꞌu Hebrõ na isisi, aré imorĩꞌrada Quiriate-Arba na isisi ãma ꞌre ihâimana zaꞌra mono norĩ zama, ma tô siwi wanoꞌõ, cananeu norĩ hã. Tahawa, Anaquihi ꞌra norĩ ãma, Sesai ãma hã, Aima ãma hã, duré Taumaꞌi ãma hã ma tô ãma aiꞌuté zaꞌra.
Débi na ꞌri nhoꞌõmo nhisi ãma, da te duré iꞌaiꞌutézé wasuꞌu
11 Tawamhã ta hawi, ma tô te te ropãrĩ zaꞌra mono sina sisõré pese na oto aiꞌabaꞌré, Débi na ꞌri nhoꞌõmo nhisi ãma ꞌre ihâimana zaꞌra mono norĩ te te ꞌwapé zaꞌra da hã, imorĩꞌrata na Quiriate-Sefe na isisi ãma.
12 Tawamhã Calebi, te ãne tinha:
— Ĩꞌra Aquisa hã wa za nimahã ma aibâ ma tisõ, ãma mro da, Quiriate-Sefe za te te ĩma iꞌâri da ma.
13 Tawamhã Otonié ma tô ꞌri nhoꞌõmo ãma hã oto aiꞌuté. Ta hã Quenazihi ꞌra, Calebihi no sipodo. Tahawa Calebi ma tô tiꞌra hã tô tãma tisõ, ãma mro da.
14 Tawamhã Aquisa, Otoniéhé siré oto ꞌre hâimana mono wamhã, ma tô wati, imama wi, tiꞌa hã te te tiwi ꞌmaiwaptẽrẽ da. Ãhã wa, ma tô Aquisa hã imama Calebi ꞌre ihâimana mono zéb u ĩtẽme mo. Tawamhã awaru poꞌrepore na te te siꞌrai wamhã, ma tô imama hã sadanha ãne:
— E marĩ te asima iwẽ.
15 — Wa tô ĩsima wẽ, asõprubzé hã! A hã tiꞌai ꞌré si ma tô ĩma isõ. Tahawa maꞌãpé oto u siro ꞌre ihâimana mono ré hã ĩma ꞌmanhomri.
Tahawa ma tô Calebi, saꞌa nhisi tiꞌa, saꞌa zahâpâ tiꞌai me, u siromo ré hã tãma sõmri zahuré.
Zudaha nhihudu norĩ, Bẽzamihĩ nhihudu norĩ me, te te daꞌãma iꞌaiꞌuté zaꞌra zé wasuꞌu
16 Tawamhã queneu norĩ siré Mozésihi maprebaba nhihudu norĩ hã ma tô Zudaha nhihudu norĩ siré wairé, ꞌrinhoꞌu Zerico norõwede ahâ na iwa ꞌre isimasa mono hawimhã, Zuda na rop si ꞌre irosaꞌwari mono nhisi u, siꞌabaꞌré da, Arade hâiwa nhimire niwĩb u. Tawamhã tame ma tô amalequita norĩ waꞌwamhã ꞌre siꞌubumro.
17 Tawamhã Zudaha nhihudu norĩ, Simiã nhihudu norĩ me, sina sihâibatob zaꞌra wamhã, ma tô cananeu norĩ ꞌrinhoꞌu Zefate na isisi ãma ꞌre irob zaꞌra mono hã ꞌwapé zaꞌra. Tawamhã ꞌRe ihâimana uꞌâsi mono nhisi na, ma tô uburé ꞌri nhoꞌu hã siwi uprosi. Tahawa ma tô ꞌri nhoꞌõmo nhisi hã oto sisaprĩ, Horma* na isisi hã ꞌre hâimana mono da oto.
18 Tane nherẽ, ta norĩ iwaptoma ꞌre ihâimana zaꞌra mono, Gaza na romnhisi tiꞌa hã te te siwi âri õ di, Asquerõ na romnhisi tiꞌa hã, duré Ecrõ na romnhisi tiꞌa hã.
19 Tawamhã Uburé Danhibꞌapito, aꞌuwẽ Zudaha nhihudu norĩ te te pawaptob zaꞌra wa, ma tô ta norĩ hã ẽtẽ ꞌrãihâ niwĩ tiꞌa ꞌre ihâimana mono ãma, ãma aiꞌuté zaꞌra. Tane nherẽ, aꞌuwẽ tiꞌa zadaꞌré ãma ꞌre ihâimana zaꞌra mono norĩ hã te te siwi sani zaꞌra õ di. E marĩ wa. Ta norĩ te isiꞌuwazi tete ꞌmanharĩ na wedewara dasiꞌwapézé tãma ꞌre hâimana zaꞌra mono wa.
20 Tawamhã Mozési te te iꞌruzéb zarina, ma tô Calebihi ma ꞌrinhoꞌu Hebrõ na isisi hã tãma sõmri ni. Duré taha si, ma tô Anaquihi ꞌra siꞌubdatõ ihâimana zaꞌra hã ta hawi oto sani zaꞌra.
21 Tane nherẽ, aꞌuwẽ Bẽzamihĩ nhihudu norĩ, zebuzeu na aꞌuwẽ iwamri norĩ ꞌrinhoꞌu Zeruzalẽ ãma ꞌre ihâimana zaꞌra mono norĩ hã te te ta hawi sani zaꞌra õ di. Tahawa te tame zahadu zebuzeu norĩ, Bẽzamihĩ nhihudu norĩ siré ꞌre hâimana uꞌâsi zaꞌra, ã bâtâ u hã.
Zuzéhé nhihudu norĩ, Bétéu ãma te te iꞌaiꞌuté zaꞌra zé wasuꞌu
22 Tawamhã Zuzéhé nhihudu norĩ siꞌaibâ, ma tô Bétéu hã siwi ꞌwapé. Taha ré, ma tô Uburé Danhibꞌapito duré ta norĩ siré tihâiba.
23 Tahawa, ma tô Bétéu duréihã Rowaꞌa na isisi u hã, dama wapsãiꞌaꞌwa norĩ hã siwi ꞌmazatõrĩ zaꞌra.
24 Tawamhã ta norĩ, ꞌri nhoꞌõmo hawi aibâ iwatobro te te siwi iꞌmadâꞌâ ma hã, ma tô tãma nharĩ zaꞌra ãne:
— E niha ꞌri nhoꞌõmo u, dazasizé hã. Maꞌãpé wama wasuꞌu zaꞌra na. Tahawa, niha na wa te aima robꞌmanharĩ wasété zaꞌra õ di za.
25 Tawamhã ꞌri nhoꞌõmo tẽme ꞌre idanhisisi mono zé hã, ma tô tãma hâiꞌré zaꞌra. Ãhã wa, ta norĩ oto sisisi wamhã, ma tô uburé ꞌri nhoꞌõmo ꞌre, ꞌre ihâimana zaꞌra mono norĩ hã siwi uprosi. Ãhã wa, õhõ si aibâ te te siwi wĩrĩ õ di, ime ihâimana zaꞌra me.
26 Tawamhã ta hã ma tô hitita norĩ nhiptiꞌai u hã mo. Morĩ wamhã, tame ꞌrinhoꞌu te te iꞌri hã ma tô sisi, Rowaꞌa na. Ta hawim haré te zahadu ãhã na zama õhõ na si da te ꞌre sisi zaꞌra.
Nima norĩ aꞌuwẽ, irom hawi da te isani õ zaꞌra zé wasuꞌu
27 Tane nherẽ, Manaséhé nhihudu norĩ, ꞌrinhoꞌu Bete-Sã na isisi ãma aꞌuwẽ ꞌre ihâimana zaꞌra mono hã, Taꞌanaqui na isisi ãma hã, Dori ãma hã, Ibreꞌã ãma hã, Megido ãma hã, duré ꞌri nhoꞌõmo waptoma ꞌri waꞌõtõ mono na ꞌre ihâimana zaꞌra mono hã te te siwi sani zaꞌra õ di. E marĩ wa. Cananeu norĩ iwa ꞌre hâimana uꞌâsi zaꞌra mono da hã te te sima rowairébé zahi zaꞌra wa.
28 Tawamhã Izaraéu nhihudu norĩ siptete na oto ꞌre hâimana zaꞌra mono wamhã, ma tô cananeu norĩ ma, romhuri te te tãma ꞌre sõmri zaꞌra, te te tãma ꞌre romhuri pese zaꞌra mono da. Tane nherẽ, uburé hã te te siwi sani zaꞌra õ di.
29 Tawamhã aꞌuwẽ Efraĩ nhihudu norĩ, cananeu norĩ Geze na ꞌrinhoꞌu isisi ãma ꞌre ihâimana zaꞌra mono norĩ hã, te te siwi wanoꞌõ mono õ di. Ãne wa, ma tô cananeu norĩ hã õ norĩ siré tô õhõ ꞌre, ꞌre hâimana uꞌâsi zaꞌra.
30 Tawamhã Zébulõhõ nhihudu norĩ, ꞌrinhoꞌu Quitrõ na isisi ãma, duré Naꞌaro na isisi ãma aꞌuwẽ ꞌre ihâimana zaꞌra mono norĩ hã te te siwi wanoꞌõ mono õ di. Tahawa ma tô cananeu norĩ duré õ norĩ me hã siré ꞌre hâimana uꞌâsi zaꞌra. Tane nherẽ, õ norĩ ma, te te tãma ꞌre romhuri zaꞌra mono da hã, ma tô te te ꞌre wadaꞌuri pese zaꞌra.
31 Tawamhã Aséhé nhihudu norĩ, ꞌrinhoꞌu Aco na isisi ãma ꞌre ihâimana zaꞌra mono norĩ hã te te siwi wanoꞌõ mono õ di, Sidõ na isisi ãma, Alabe na isisi ãma, Aczibe na isisi ãma, Helba na isisi ãma, duré Afeca na isisi ãma, duré Reobe na isisi ãma hã.
32 Tawamhã Aséhé nhihudu norĩ, cananeu norĩ õme ꞌre ihâimana zaꞌra mono norĩ siré, ma tô ꞌre hâimana zaꞌra, te te siwi wanoꞌõ mono õ wa.
33 Nafitalihi nhihudu norĩ, ꞌrinhoꞌu Bete-Semesi ãma, duré Bete-Anate na isisi ãma ꞌre ihâimana zaꞌra mono norĩ hã te te siwi wanoꞌõ mono õ di. Tahawa, te cananeu norĩ hã Nafitalihi nhihudu norĩ siré õhõ ꞌre, ꞌre hâimana uꞌâsi zaꞌra. Tane nherẽ, ma tô romhuri hã tãma pisutu zahi zaꞌra, õ norĩ ma, te te tô ꞌre romhuri pese zaꞌra mono da hã.
34 Tawamhã Dãhã nhihudu norĩ da hã, ma tô amoreu norĩ hã sada tinhiptede ꞌmanharĩ zaꞌra, ẽtẽ u sisiti te te wanoꞌõ mono da. Tahawa, ẽtẽ nhiꞌriti wa romharé ihâimana u te te siꞌra zaꞌra tõ da, ma tô tiwi rosawi zaꞌra.
35 Tawamhã amoreu norĩ, ẽne Heresi na isisi ãma ma tô ꞌre hâimana zaꞌra, Aizarõ na ꞌri waꞌõtõ nhisi ãma, duré Saꞌalabi na ꞌri waꞌõtõ nhisi ãma. Tane nherẽ, Zuzéhé nhihudu norĩ, siptete na sada hâimana zaꞌra wamhã, ma tô siptete sina te te tãma ꞌre romhuri zaꞌra mono da hã, romhuri hã tãma pisutu zahi zaꞌra.
36 Tawamhã amoreu norĩ nhiptiꞌa zadaꞌré hã, ma tô tinhanaꞌrata, apaꞌapa ꞌwa nhiꞌoto na rowamri ihâimana hawi, Sela na ꞌri waꞌõtõ nhisi na tiꞌa inomro u, hâiwa nhimiꞌe niwĩ tiꞌa hã inomro na.
Ĩwaꞌõtõ piꞌreba watsuꞌu mono
^ 1:17 Horma hã Ebreu norĩ mreme na hã “da te dasiwi iꞌuprosi pe” te wasuꞌu.
