Zuize 10:1-18
10 Tawamhã Abimelequi dâꞌâ parimhã, Puaha ꞌra Tola, Dodoho nhihudu hã ma tô Izaraéu nhihudu norĩ te te anhoꞌreptu da hã watobro. Ta hã Isacaha nhihudu norĩ siré aꞌuwẽ, ꞌrinhoꞌu Sami na isisi ãma ꞌre ihâimana mono, Efraĩ tiꞌa niwĩ ẽtẽ zaꞌra ahâ ãma.
2 Tawamhã Tola Izaraéu nhihudu norĩ ma iꞌrãnhoꞌõmo na ma tô ꞌre sa, 23 na ãma iwahum na. Taha pari oto dâꞌâ wamhã, ma tô Sami ãma dasiwi ãma tiꞌa ni.
3 Taha pari, Zai na isisi hã ma tô duré watobro, Ziliadi na rowamri hawimhã. Ta hã ma tô Izaraéu nhihudu norĩ, iꞌrãnhoꞌõmo na hã te te ꞌre aꞌmadâꞌâ, 22 na ãma iwahum na.
4 Taha ꞌra hã 30 na awaru poꞌrepore na ꞌre isisaꞌrei mono. Duré iꞌra norĩ te ꞌrinhoꞌu hã 30 na Ziliadi na rowamri niwĩmhã. Ta hã ꞌri nhoꞌõmo norĩ nhisi, te zahadu ãhã na zama “Zaihi te” na da te ꞌre sisi zaꞌra.
5 Tawamhã Zai oto dâꞌâ wamhã, ma tô ãma tiꞌa ni, Camo na ꞌri waꞌõtõ nhisi wa.
Amonita norĩ, Izaraéu nhihudu norĩ te te ꞌre iwadaꞌuri pese zaꞌra mono zé wasuꞌu
6 Tawamhã Izaraéu nhihudu norĩ, ma tô apâ Uburé Danhibꞌapito wi tiwasédé te te ꞌre ꞌmanharĩ zaꞌra. Ma tô ihâibaꞌõ Baauhu ãma, ꞌri nhoꞌõmo mono bâ ꞌre wata zaꞌra, ihâibaꞌõ Asitaroti ãma, Siria norĩ te ihâibaꞌõ ãma, Sidõ norĩ te ãma, moabita norĩ te ãma, Amo norĩ te ãma, duré filisteu norĩ te ãmamhã. Tahawa ta norĩ, Uburé Danhibꞌapito te te siwi rẽme pese wa, ãma ꞌre wata zaꞌra mono õ di oto.
7 Tahawa Uburé Danhibꞌapito, Izaraéu nhihudu norĩ zada sahi zaꞌra wa, ma tô filisteu norĩ nhibꞌrata, duré amonita norĩ nhibꞌrata te te ꞌre robzépata zaꞌra mono da tãma hâiba zaꞌré zaꞌra.
8 Tahawa, tô taha wahum na Izaraéu nhihudu norĩ ãma te te ãma aiꞌuté zaꞌra wamhã, ma tô tinhimiwadaꞌuri na te te ꞌre wati pese zaꞌra. Tawamhã ma tô 18 wahum na uburé Izaraéu nhihudu norĩ Ziliadi ãma ꞌre ihâimana zaꞌra mono, Zodã pa bâtâ pusizém niwĩ ãne zarina te te ꞌre robzépata zaꞌra, amoreu norĩ nhiptiꞌai ãmamhã.
9 Tawamhã amonita norĩ zama ma tô panhoꞌu Zodã pa â na hã saprĩ zaꞌra, Zudaha nhihudu norĩ, Bẽzamihĩ nhihudu norĩ, duré Efraĩ nhihudu norĩ, te te ꞌwapé zaꞌra da hã. Ãne ma tô Izaraéu nhihudu norĩ te te ꞌre irobzépata zaꞌẽtẽ zaꞌra mono zém na hã ꞌre hâimana zaꞌra.
10 Tahawa Izaraéu nhihudu norĩ, mreme ꞌrãihâ sina Uburé Danhibꞌapito wi te te rowaptẽrẽ zaꞌra wamhã, ma tô ãne tãma siwẽꞌõ zaꞌra:
— Uburé Danhibꞌapito, wa norĩ hã wa tô wawasédé hã wa te aiwi ꞌre ꞌmanharĩ zaꞌra. Duré wate ꞌRe ihâimana uꞌâsi mono, wa te wasiwi airẽme wa, wa tô ihâibaꞌõ norĩ Baau na iwamri ãmap si ꞌre wawata zaꞌra.
11 Tawamhã Uburé Danhibꞌapito, ma te ãne ãma sadaꞌâbâ zaꞌra:
— Nimahã na hã ezipsiu norĩ, amoreu norĩ, amonita norĩ, duré filisteu norĩ,
12 Sidõniu norĩ, amalequita norĩ, duré Maoni norĩ, tinhimiwadaꞌuri pese na te te ꞌre aiwati zaꞌra waꞌaba mono wamhã, ma tô ĩwi irowaptẽrẽ zahi zaꞌra waꞌwa, te aipawaptob zaꞌra waꞌaba da hã. E tawamhã wa hã te asõꞌreptu zaꞌra waꞌaba õ di bété. Wa tô, tô asõꞌreptu zaꞌra waꞌwa.
13 Tane nherẽ, ma tô a norĩ waꞌwa duré asiwi ĩrẽme ꞌwa, aimawi ihâibaꞌõ norĩ ãmap si ꞌre aiwata zaꞌra waꞌaba mono da hã. Tahawa, wa hã te iꞌaipawaptob zaꞌra waꞌaba na te isahu da hã mare di za.
14 Tahawa maꞌãpé ihâibaꞌõ norĩ asima ipisutu zaꞌra waꞌaba wi si, tiwi rowaptẽrẽ zaꞌra waꞌaba, ropire ꞌre, aihâimana zaꞌra waꞌaba ré, pé ta norĩ si te te aipawaptob zaꞌra waꞌaba da.
15 Tawamhã Izaraéu nhihudu norĩ, ma duré ãne ãma tãma waꞌrãmi zaꞌra:
— Tô sena, wa norĩ hã wa tô wawasété zaꞌra ni tô. Tahawa maꞌãpé asima iwẽzéb zarina, niha na wama robꞌmanharĩ zaꞌra na. Tane nherẽ, maꞌãpé wazawi na hã ãhã na wanhoꞌreptu zaꞌra na.
16 Tahawa Izaraéu nhihudu norĩ, tisiré aꞌuwẽꞌõ norĩ te ihâibaꞌõ norĩ hã ma tô oto siwi sãmra, Uburé Danhibꞌapito ãma si oto ꞌre wata zaꞌra mono da. Tahawa ma tô oto duré itõmo na ãma aiwamri pese zaꞌra, ropire tãma ꞌre ihâimana zaꞌra mono zém na.
17 Tawamhã amonita norĩ te, dasiꞌwapéi ꞌmanharĩꞌwa zô dahãsi wamhã, Ziliadi ãma te te sima ꞌri nhoré zaꞌra wa, ma tô duré Izaraéu nhihudu norĩ hã siꞌubumro, Mispa ãma te te sima iꞌri nhoré mono zéb ãma hã.
18 Tawamhã Ziliadi ãma iꞌrãnhoꞌõmo norĩ, ma tô ãne sima nharĩ zaꞌra: “Niꞌwa, amonita norĩ ꞌwapé na te te sãnaꞌrata wamhã, te za Ziliadi ãma ꞌre idahâimana zaꞌra mono norĩ ma hã siꞌapito za”.
