Zuize 11:1-40
11 Tawamhã Zépté, Ziliadi tiꞌai ãma ꞌre isãmra mono hã, dasiꞌwapéi ꞌmanharĩꞌwa isibꞌru duré ipahi waihuꞌuꞌõ. Taha mama nhisi hã Ziliadi na. Duré taha na hã tisiwaꞌâbâ zô ꞌre isisõmri mono.
2 Tawamhã Ziliadihi mro uptabi ma zama ma tô duré iséꞌre hawimhã iꞌra norĩ tãma tiꞌmaipoto zaꞌra. Tawamhã ta norĩ oto prédub zaꞌra wamhã, ma tô Zépté hã sihawib zaꞌra oto siwi waze. Tahawa, te tãma nharĩ zaꞌra ãne:
— Wamama nhimarĩ hã iꞌuirĩ na ãma wasima iwasipoꞌo mono hã aima iꞌmaihâimana da hã mare di za. E marĩ wa. A hã aimawi piꞌõi ꞌra na aihâimana wa.
3 Tahawa Zépté, ma tô tisisãnawã norĩ hawimhã aimani. Simani wamhã, ma tô Tobi na tiꞌa nhisi u mo, tame ꞌre sãmra mono da oto. Tawamhã niꞌwam norĩ aibâ niha na siwaꞌru ꞌre inomro mono hã ma tô tamemhã ãma sihâibatob zaꞌra. Ma tô duré siré si ꞌre nomro oto.
4 Tawamhã we ropsaꞌwari mono pari, nimahã na ma tô amonita norĩ hã siwi ꞌwapé, Izaraéu nhihudu norĩ hã.
5 Tawamhã Ziliadi ãma danhibꞌihâꞌa norĩ hã ma tô Zéptéhé zô aiꞌabaꞌré, Tobi hawi te te ãma siwi siri da apâ.
6 Tahawa, ma tô ãne ta norĩ ma nharĩ zaꞌra:
— Maꞌãpé ãma wasiré aimorĩ zaꞌra na, amonita norĩ wa te ꞌwapé zaꞌra wa, wate dasiꞌwapé nhibꞌihâꞌa na wama aihâimana zaꞌra da.
7 Tawamhã Zépté ma te ãne ãma tãma waꞌrãmi zaꞌra:
— Oro a norĩ waꞌwa hã asiwi ĩꞌruiwapari aba wa, ĩmama nhorõwa hawi asiwi ĩwazere aba za. E niha te ãne nherẽ we ĩzô aiꞌabaꞌréi waꞌwa, ropire aima hâimana zaꞌra waꞌaba wapsi.
8 Tane nherẽ, ma te duré ãne ãma sadaꞌâbâ zaꞌra:
— Tane nherẽ, wa asô aipizari zaꞌra ni, wa te wasima aiwẽ zaꞌra wa, uburé Ziliadi ãma ꞌre idahâimana zaꞌra mono norĩ nhibꞌihâꞌa na aihâimana da, amonita norĩ, za wa te ꞌwapé zaꞌra ma ropibu ma!
9 Tawamhã Zépté te duré tãma nharĩ zaꞌra ãne:
— Amonita norĩ te aꞌwapé da, apâ ꞌri u ĩꞌãma siri zaꞌra waꞌaba wa, duré Uburé Danhibꞌapito, ta norĩ hã te te ĩma sõmri zaꞌra wamhã, wa za duré wa hã aima ĩsiꞌĩꞌrãnhoꞌõmo zaꞌra waꞌwa. E wẽ di za ãne hã tawamhã aima zaꞌra waꞌaba hã.
10 Tawamhã ma te duré ãne ãma sadaꞌâbâ zaꞌra:
— Ĩhe, tane hã wẽ di za. Inharĩzéb zarina, wa za tô wasiwi ꞌmanharĩ ni za. Uburé Danhibꞌapito nhoꞌa wa ãne na hã aima ropisutu zaꞌra ni.
11 Tawamhã Zépté, ma tô Ziliadi ãma iꞌrãnhoꞌõmo norĩ me oto mo apâ. Ãhã wa, aꞌuwẽ norĩ dama iꞌrãnhoꞌõmo na, duré uburé danhibꞌihâꞌa na te te ꞌre daꞌaꞌmadâꞌâ mono da, ma tô siwi tisẽ. Tawamhã Mispa ãma, ma tô te te inharĩzéb ꞌrata zarina duré timreme na ãma dama sahu, Uburé Danhibꞌapito nhoꞌa hã.
12 Tawamhã Zépté ma tô romreme ꞌwapéiꞌwa norĩ, amonita norĩ nhibꞌapito u hã satõrĩ zaꞌra. Ta norĩ hã ma tô tawamhã ãne tãma sadawa wasuꞌu zaꞌra:
— E marĩ bâ, te wazada aihâimana zaꞌra waꞌwa, wate tiꞌai waꞌõtõ nhoꞌõmo u we iꞌasisisi aba zéb na hã.
13 Tawamhã amonita norĩ nhibꞌapito, ma te ãne ãma tãma waꞌrãmi zaꞌra:
— Izaraéu nhihudu norĩ, nimahã na Ezitu hawi we wairébé wamhã, ĩte tiꞌa, panhoꞌu Arno na isisi hawi, panhoꞌu Zaboqui na isisi u, duré Zodã pa panhoꞌõmo u hã ma tô uburé ĩwi âri zaꞌra. Tahawa ãma wasiꞌwapé zaꞌra ãna te za apâ ĩnhiptiꞌa hã asiwi ĩma isõmri ꞌwa.
14 Tawamhã Zépté, romreme ꞌwapéiꞌwa norĩ hâiba amo hã ma tô duré amonita norĩ nhibꞌihâꞌa u hã satõrĩ zaꞌra,
15 ãne timreme na te te ãma tãma iwaꞌrãmi ré:
— Izaraéu nhihudu norĩ, moabita norĩ nhiptiꞌa, amonita norĩ nhiptiꞌai me te te siwi mrami zahuré õ di.
16 Nimahã na Izaraéu nhihudu norĩ, Ezitu hawi we wairébé wamhã, ma tô rop si ꞌre irosaꞌwari mono waꞌwaibaba, Âpré na â poré nhisi u hã aiꞌabaꞌré. Ta hawimhã ma tô Cadi na romnhisi u oto aihutu.
17 Tawamhã Izaraéu nhihudu norĩ, ma tô duré romreme ꞌwapéiꞌwa edomita norĩ nhibꞌihâꞌa u satõrĩ zaꞌra, ãne timreme zaꞌra ré: “Asiptiꞌa na wa te aꞌâ roꞌrahâri zaꞌra da hã wama saꞌré zaꞌra na.” Tane nherẽ, apito hã te te tãma rowairébé zaꞌra õ di. Tahawa moabita norĩ nhibꞌapito wi, tô timreme na te te irowaptẽrẽ zaꞌra zém ne, ma tô aré duré tiwi rowaptẽrẽ zaꞌra. Tane nherẽ, taha zama te te tãma saꞌré zaꞌra õ di. Tahawa te te ãne taré tiwi rowaptẽrẽ baba zaꞌra wa, ma tô Cadi ãmap si aꞌâ oto ꞌre hâimana zaꞌra.
18 Tawamhã Zépté ma tô duré robꞌrãzarõtõ na ãma uzusi, ãne:
— Taha pari, Izaraéu nhihudu norĩ hã ma tô rop si ꞌre irosaꞌwari mono waꞌwaibaba hã zâmo. Tahawa, edomita norĩ nhiptiꞌa, moabita norĩ nhiptiꞌai me ma tô taré te te saꞌoto zaꞌra. Ãhã wa, ma tô Moabi tiꞌa bâtâ pusizém niwĩb u oto aihutu, Arno na panhoꞌõmo zara niwĩ. Tahawa, tame ma tô oto sima ꞌri nhoré zaꞌra. Tane nherẽ, taha â na te te saprĩ zaꞌra õ di, moabita norĩ nhiptiꞌa zadaꞌré na simizazâri zaꞌra wa.
19 Tawamhã Izaraéu nhihudu norĩ, romreme ꞌwapéiꞌwa norĩ, ma tô Seõ na amoreu norĩ nhibꞌapito nhisi u satõrĩ zaꞌra, Hesbõ na ꞌri waꞌõtõ nhisi u, te te tiwi waptẽrẽ zaꞌra da, õ hã tiꞌai waꞌõtõ nhoꞌõmo na te te ãma roꞌrahâri zaꞌra da hã, za isiptiꞌa zaꞌra na tãma ihâimana zaꞌra u sihutu da.
20 Tane nherẽ, apito Seõ tãma iꞌumnhasi zaꞌra õ zarina, te te ãma saze zaꞌra õ di, isiptiꞌa na te te ãma iroꞌrahâri zaꞌra da hã. Tahawa apito, uburé tite dasiꞌwapéi ꞌmanharĩꞌwa norĩ te te sima ꞌrãꞌõtõ wamhã, ma tô ta norĩ hã sima ꞌri nhoré zaꞌra, Zasa na ꞌri nhoꞌõmo nhisi ãma. Tahawa, ma tô Izaraéu nhihudu norĩ hã duré siwi ꞌwapé.
21 Tane nherẽ, Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono, apito Seõ ãma duré uburé ite aibâ norĩ ãma te te aiꞌuté zaꞌra da hã, ma tô isibꞌrata tãma hâiba nhomri zaꞌra. Tawamhã Izaraéu nhihudu norĩ, ma tô uburé amoreu norĩ iwa ꞌre ihâimana zaꞌra mono zé tiꞌa hã siwi tiꞌâ.
22 Ãne uburé tiꞌa norĩ hã amoreu norĩ wi te te siwi iꞌâri hã: Hâiwa nhimire niwĩ panhoꞌu Arno na isisi hawi, hâiwa nhimiꞌe niwĩ panhoꞌu Zaboqui na isisi u hã, duré bâtâ pusizém niwĩ rop si ꞌre irosaꞌwari mono hawi, bâtâ zasizém niwĩ panhoꞌu Zodã pa â ꞌre ihâimana mono u hã ma tô siwi tiꞌâ.
23 E Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono, tinhibꞌaꞌuwẽ norĩ ma, amoreu norĩ te te tãma ꞌre sate mono nherẽ, te niha hã a hã bété asima iwẽ, apâ âri da, tiꞌa hã.
24 Camo na ihâibaꞌõ nhisi ate zaꞌra waꞌwa, tiꞌa te te aima ꞌre isõmri zaꞌra waꞌaba mono hã e asima ꞌre waibui waꞌaba mono õ di za bété. Tane wa za duré wa norĩ hã, Uburé Danhibꞌapito, wate ꞌRe ihâimana uꞌâsi mono, tiꞌa te te wama ꞌre isõmri zaꞌra mono hã wa te wasima ꞌre waibu zaꞌra.
25 E a hã ma tô asina irosaꞌra Baraqui, Zipoho ꞌra, moabita norĩ te apito nhipai u iꞌaihâimana na hã. Duré e ta hã, ma tô nimahã na Izaraéu nhihudu norĩ zada tihâiba. E niwa ma tô wa aꞌwapé.
26 Izaraéu nhihudu norĩ hã 300 wahum na ma tô Hesbõ ꞌri waꞌõtõ ãma, duré Aroꞌe ꞌri waꞌõtõ ãma ꞌre hâimana zaꞌra. Duré ꞌri waꞌõno iwaptoma ꞌre ihâimana zaꞌra mono ãmab zama ma tô ꞌre siꞌubumro, duré uburé ꞌrinhoꞌu ihâiba amo panhoꞌu Arno na isisi zaihâ na zama. E marĩ wa, bété a norĩ waꞌwa ãne na romhâimana mono ré hã apâ ꞌri nhoꞌõmo norĩ asiwi waibui aba õ di.
27 Mare di, wa hã! Marĩ te ꞌmanharĩ õ di, taha uꞌâbâ asada ĩhâimana zaꞌra waꞌaba da hã. Aiwétési ma iwasédé hã iꞌmanha, ĩꞌwapé da, asima iwẽzéb zarina. Uburé Danhibꞌapito si, daꞌãma rowairébéꞌwa hã. Tahawa, te za taha si nimahã iꞌuwaibaba ma, tãma rowairébé zahuré, niha wamhã, Izaraéu nhihudu norĩ ma, niha wamhã duré amonita norĩ ma hã.
28 Tane nherẽ, amonita norĩ nhibꞌapito hã te te sima wẽ õ di, Zépté romreme te te tãma isõmri, te te iwapari da hã.
29 Tawamhã Uburé Danhibꞌapito pẽꞌẽzani, ma tô Zéptéhé wamhã ãzé. Tahawa Ziliadi tiꞌa waꞌwaibaba duré Manasé tiꞌa waꞌwaibaba ma tô roꞌrazâ. Tahawa, ma tô Ziliadi ãma Mispa u apâ sina siri. Tawamhã duré ta hawi Amo tiꞌai u oto morĩ wamhã,
30 ma tô Uburé Danhibꞌapito ma ropisutu ãne:
— Amonita norĩ, ĩnhibꞌrata ĩma sõmri zaꞌra wamhã,
31 dasiꞌwapéi hawi apâ ĩwisi wa, niꞌwa te te ĩnhopẽtẽ da, imorĩꞌrata na ĩnhorõwa hawi iwatobro hã wa za wa hã ãma aima ĩnhoprubzéb da hã zata za.
32 Tawamhã Zépté pa nhoꞌõmo na ma tô saprĩ, amonita norĩ te te aꞌwapé da hã. Ãhã wa, ma tô Uburé Danhibꞌapito te te daꞌãma iꞌaiꞌutézé hã tãma tisõ.
33 Tawamhã 20 na uburé ꞌri nhoꞌõmo ãma, ma tô ãma aiꞌuté zaꞌra, Aroꞌe hawi, Minite tiꞌai ꞌrata ꞌre ihâimana zaꞌra mono u, duré taha nhipai u, Abéu-Querami na ꞌri nhoꞌõmo nhisi u hã. Ãne ma tô Izaraéu nhihudu norĩ, amonita norĩ hã we te te aꞌuprosi.
Zéptéhé ꞌra sipiꞌõi wasuꞌu
34 Tawamhã Zépté apâ Mispa ãma tinhorõwa u te te sina siri wamhã, ma tô iꞌra sipiꞌõ te te sõpẽtẽ da, itẽme watobro, siꞌrẽne mono sina, duré roptaꞌazé tãborĩ na te te roptaꞌa mono sina. Ta hã õhõ sire iꞌra hã. Aimawi iꞌra sipiꞌõ hã, duré iꞌra siꞌaibâ hã tãma ꞌre ꞌmaihâimana mono õ di.
35 Tawamhã Zépté tiꞌra te te ꞌmadâꞌâ wa, isabâdâ tiwi robzeiꞌõ pese wa, ma tô tiꞌuza te te hâiwazui mono sina duré sadari sina tinha ãne:
— E niha ĩꞌra! Ĩma ropire uptabi di ãhã na hã, aihâiba uꞌâbâmhã. E marĩ wa. Wa hã wa tô Uburé Danhibꞌapito ma ropisudu ipire hã ꞌmanha. Tahawa te ãma sipai waihuꞌu õ di, te tãma iropisutuzém na hã.
36 Tawamhã iꞌra, ma te ãne ãma tãma waꞌrã:
— Ĩmama, tô Uburé Danhibꞌapito ma, ropisudu hã ꞌmanharĩ wamhã, maꞌãpé tiha hã ĩꞌãma ꞌmanharĩ, tô tãma iropisutuzéb zarina. E tihai wa. Uburé Danhibꞌapito hã ma tô asitobꞌru amonita norĩ na hã aiꞌruiwaꞌâbâ zaꞌra waꞌwa.
37 Te duré tawamhã zahadu tãma tinha ãne:
— Misi tiha hã wa za aiwi waptẽ ãne: Maꞌãpé ĩsiwaihuꞌu norĩ me, ẽtẽ ꞌrãihâ norĩ u ĩmorĩ da hã ĩma rowairébé, tame maparane aꞌamo na ĩsiwaꞌõ sina aꞌâ ĩhâimana da. E tihai wa. Niwamhã za dana na hã ĩhâimana õ wa.
38 Tawamhã imama ma tô tãma rowairébé, morĩ da hã, maparane aꞌamo na aꞌâ hâimana da. Tahawa tisiwaihuꞌu norĩ me oto ẽtẽ ꞌrãihâ norĩ u siꞌabaꞌréi wamhã, ma tô tame nasi aiwaꞌõ zaꞌra, niwamhã za dana na hã hâimana õ wa.
39 Tawamhã maparane aꞌamo ãma siꞌutõrĩ pari, ma tô apâ hã mo, timama u. Ãhã wa imama, ꞌRe ihâimana uꞌâsi mono ma, te te iropisutuzé hã ma tô tãma ãma uwaimra. Ãne ma tô tawamhã hâiba ubuni ré dârâ. Ãne hawi te oto Izaraéu nhihudu norĩ hâimanazéb ꞌremhã
40 isipiꞌõ norĩ wahup sidâpâsi maparane siꞌuiwa na bâtâ na hã ꞌre wairébé nimomo, Zéptéhé ꞌra sipiꞌõi ãma ꞌre ꞌruꞌru mono da, Ziliadi norĩ siré ãma hã.
