Zuize 12:1-15
12 Tawamhã Efraĩhĩ nhihudu siꞌaibâ norĩ, ma tô siꞌrãꞌõtõ, siꞌwapé zaꞌra da hã. Tahawa panhoꞌu Zodã pa â na ma tô saprĩ zaꞌra, Zafõ na ꞌri nhoꞌõmo niwĩ. Tahawa, ma tô ãne Zéptéhé ma nharĩ zaꞌra:
— E marĩ da, ma tô amonita norĩ aꞌwapé da hã asiwaprosi aiwato, wa norĩ zama asiré wasiꞌabaꞌré da, wazô aihârâ zaꞌra ãna. Ãhã wa, wa za asõrõwa hã airé wasiwi ãma sazu ni!
2 Tawamhã Zépté, ma te ãne ãma tãma waꞌrãmi zaꞌra:
— Wa hã ĩnhibꞌaꞌuwẽ ré, amonita norĩ me wasisada iwahâimana zaꞌra zé watobro wamhã, wa tô aré asô ĩhârâ zaꞌra waꞌwa. Tane nherẽ, a norĩ waꞌwa hã tiwi ĩnhoꞌreptu zaꞌra waꞌaba õ di.
3 Tahawa wa hã asiwi ĩpawaptob zaꞌra waꞌaba õ zém na, te aiꞌmadâꞌâ zaꞌra waꞌaba wa, wa tô te ĩsima romnhimimnhasi nherẽ hã mo tô, ta norĩ te aꞌwapé da hã. Tawamhã ãne nherẽ, ma tô Uburé Danhibꞌapito ĩma tisõ tô, te daꞌãma iꞌaiꞌutézé hã. Ãne nherẽ, e marĩ da, te we bété ĩzô aiꞌabaꞌréi waꞌwa, asiwi ĩꞌwapéi waꞌaba da, ãhã na hã.
4 Tawamhã Zépté, uburé Ziliadi ãma aibâ norĩ ma tô ꞌrãꞌõtõ. Tahawa, ma tô Efraĩhĩ nhihudu siꞌaibâ norĩ hã ꞌwapé zaꞌra. Te te ꞌwapé zaꞌra wamhã, ma tô ãma aiꞌuté zaꞌra, Zépté norĩ hã. Efraĩhĩ nhihudu norĩ hã ma tô õne wana ré tãma nharĩ zaꞌra: “A norĩ waꞌwa Ziliadi norĩ, Efraĩhĩ nhiptiꞌai ãma, duré Manaséhé nhiptiꞌai ãma ꞌre iꞌaihâimana zaꞌra waꞌaba mono, ma tô Efraĩ hã irẽme zaꞌra waꞌwa.” Ãne na hã te te tãma nharĩ zaꞌra wa, ma tô ãne hã tãma robꞌmanharĩ zaꞌra.
5 Tawamhã Efraĩhĩ nhihudu norĩ te te ãma roꞌrahâri zaꞌra tõ da, ma tô Ziliadi norĩ panhoꞌu Zodã pa â na da te ãma ꞌre isaprĩ pese zaꞌra mono zé hã ro siwi tiꞌâ. Tahawa, duré Efraĩhĩ nhihudu norĩ siꞌudâ sina, panhoꞌõmo na te te saprĩ zaꞌra da, nasi sihutu sidâpâsi ma tô Ziliadi siꞌaibâ norĩ hã nasi sadanha zaꞌra ane:
— E a hã, Efraĩhĩ nhihudu.
Tahawa, duré ta norĩ sidâpâsi mare na te te ãma sadaꞌâbâ zaꞌra wa,
6 ma tô ãne damreme hã tãma ꞌru zaꞌra: “Maꞌãpé nharĩ ãne: Chiboléti na”. Tawamhã isadawa parab zaꞌra “Siboléti na”, damreme õhõ zarina si te te nasi nharĩ zaꞌra wamhã, ma tô nasi waibu ni. Ma tô duré nasi simro ni, tô tame â zaihâ na. Tahawa, Efraĩhĩ nhihudu norĩ, tô tamemhã ma tô aiꞌutõ, 42 miu na.
7 Tawamhã Zépté, Ziliadi hawi ꞌre ihâimana mono hã ma tô Izaraéu nhihudu ma iꞌrãnhoꞌõmo na hã ꞌre hâimana, 6 wahub ꞌre. Tawamhã dâꞌâ wamhã, ma tô ãma tiꞌa ni, ite ꞌri nhoꞌõmo ãma, Ziliadi na isisi ãma.
Ibsã norĩ wasuꞌu, Elõhõ wasuꞌu me, duré Abdõhõ wasuꞌu me
8 Tawamhã Zéptéhé parimhã, Ibsã, ꞌrinhoꞌu Belẽ ãma ꞌre ihâimana mono hã ma tô Izaraéu nhihudu norĩ ma siꞌiꞌrãnhoꞌu.
9 Iꞌra siꞌaibâ hã 30 na, duré tô iꞌra sipiꞌõ hã 30 na. Tawamhã tiꞌra sipiꞌõ 30 na ihâiba zaꞌra hã ma tô tisiré aꞌuwẽꞌõ norĩ ma, aibâ ma saꞌré zaꞌra, nasi ãma mro zaꞌra da hã. Duré tô 30 na tiꞌra siꞌaibâ norĩ ma, ma tô azarudu hã tãma ãwisi zaꞌra, taha na si mro zaꞌra da. Tawamhã Ibsã, ma tô Izaraéu nhihudu norĩ ma siꞌiꞌrãnhoꞌu, 7 wahub ꞌremhã.
10 Tawamhã duré oto dâꞌâ wamhã, ma tô Belẽ ãma dasiwi sẽrẽ ni.
11 Ibsãhã parimhã, ma tô Elõ, Zébulõhõ nhihudu norĩ hawi aꞌuwẽ hã Izaraéu nhihudu norĩ ma siꞌiꞌrãnhoꞌu 10 na wahub ꞌremhã.
12 Tawamhã duré ta hã dâꞌâ wamhã, ma tô Aizarõ, Zébulõhõ nhiptiꞌai ãma hã dasiwi ãma tiꞌa ni.
13 Elõhõ parimhã, ma tô Abdõ siꞌiꞌrãnhoꞌu, Izaraéu nhihudu norĩ ma. Ta hã Hileꞌuhu ꞌra, ꞌrinhoꞌu Piratõ na isisi ãma ꞌre ihâimana mono.
14 Abdõ hã 40 na iꞌra, duré 30 na isihudu, 70 na awaru poꞌrepore na ꞌre inomro mono. Ta hã Izaraéu nhihudu norĩ ma, 8 wahub ꞌremhã ma tô siꞌiꞌrãnhoꞌu.
15 Tawamhã duré dâꞌâ wamhã, ma tô ãma dasiwi tiꞌa ni, Piratõ na ꞌri nhoꞌõmo nhisi ãma, Efraĩ tiꞌa niwĩ ꞌre ihâimana mono ãma, amalequita norĩ nhiptiꞌai ãma ẽtẽ zaꞌwari ne niwĩ.
