Zuize 13:1-25
13 Tawamhã Izaraéu nhihudu norĩ, Uburé Danhibꞌapito wi, ma tô tiwasédé hã apâ te te ꞌre ꞌmanharĩ zaꞌra. Tahawa 40 wahum na filisteu norĩ nhibꞌrata te te ꞌre robzépata zaꞌra mono da hã, ma tô tãma pisutu zaꞌra.
2 Tawamhã aibâ te ꞌre hâimana ꞌrinhoꞌu Zora na isisi ãma, Manoa na isisi hã Dãhã nhihudu hawi aꞌuwẽ. Imro hã iꞌrazéb ꞌré.
3 Tawamhã Hâiwa ãma Romhuriꞌwa ma tô itẽme wi. Ta hã itẽme wisi wamhã, ma tô ãne tãma tinha:
— Aiꞌra waihuꞌu ãna te aré ꞌre aimo. Tahawa aré niwamhã dana na hã ꞌre aihâimana waihuꞌu mono õ di. Tane nherẽ, te za ãhã na hã oto aiwasã, aiꞌra aima poto da.
4 Tahawa uwa ꞌrãi waꞌu isé ꞌre hâsi mono õ di za, â zaipro zama. Duré dasa iprã hã ꞌre ꞌmaiꞌrẽne mono õ di za.
5 E marĩ wa. A hã za aiwasã wa, aiꞌra aima poto da hã. Duré niwamhã séré nhihâri õ di za. E marĩ wa. Ta hã, ipotozém hawim haré, ꞌRe ihâimana uꞌâsi mono te na, za tãma ꞌre hâimana mono wa, Nazire norĩ siré ꞌre hâimana mono da hã. Tahawa te za filisteu norĩ nhiptetezé wi, Izaraéu nhihudu norĩ te te ꞌre iꞌanhoꞌreptui mono zém na ãma sãnaꞌrata za.
6 Tawamhã piꞌõ, timro zô ma tô rĩni, te te tãma rowasuꞌu da ãne:
— ꞌRe ihâimana uꞌâsi mono ãma aibâ ꞌre imorĩ hã ma tô we ĩtẽme wi, te te ĩma rowasuꞌu da. Ta hã aiwa ꞌRe ihâimana uꞌâsi mono ma hâiwa ãma romhuriꞌwa ne. Tahawa ma tô sina ĩpẽꞌẽwara. Tahawa, wa hã te sadanharĩ õ di, nima hawi we imorĩzéb zô hã. Duré ĩma sisisi õ di.
7 Tane nherẽ, ma tô ĩma ropisutu, za ĩwasã na hã, ĩꞌra ĩma ꞌmaipoto da. Ma tô duré ĩma waihuꞌu, wa hã te zâꞌrẽne tõ da uwa ꞌrãi waꞌu isé hã, duré â zaipro hã. Duré dasa iprã te ꞌmaiꞌrẽne tõ da hã, ma tô ĩma waihuꞌu. E tihai wa. ꞌWatébrémi hã za, ꞌRe ihâimana uꞌâsi mono te na tãma ꞌre hâimana mono wa Nazire norĩ siré ꞌre hâimana mono da.
8 Tawamhã Uburé Danhibꞌapito ma, Manoa mreme wamhã, ma tô ãne tãma tinha:
— Ĩte ꞌRe ihâimana uꞌâsi mono, aibâ aiꞌãma ꞌre ihâimana mono hã we isatõrĩ hã wa ãma aiwi waptẽ, we apâ watẽme satõrĩ da, te te ãma wama rowasuꞌu da, ꞌwatébrémi poto wa, za marĩ wa te ãma iꞌmanharĩzém na hã.
9 Tawamhã ꞌRe ihâimana uꞌâsi mono, Manoa te te iwaptẽrẽzé hã ma tô ꞌmanha. Tahawa ꞌRe ihâimana uꞌâsi mono ma, Hâiwa ãma Romhuriꞌwa ma tô apâ piꞌõ tẽmemhã wi, rom na sãmra ré. Ãhã wa, imro hã ꞌrâwi iꞌratamhã hâimana õ di.
10 Tahawa imro ihâimanazéb u hã, ma tô saꞌẽtẽ wara. Tawamhã ma tô ãne tãma rowasuꞌu:
— Aibâ nimahã na we ĩtẽme iwi hã, apâ ma tô duré we ĩtẽmemhã sihâiꞌré.
11 Tawamhã Manoa ma tô wahudu. Wahutu wamhã, ma tô timro siré hã mo, aibâ isabzéb u. Tawamhã ma tô ãne sadanha:
— E a hã ĩmro ma, nimahã bâtâ na inharĩ.
— Ĩhe! Ta hã, wa hã. — Ãne ma te ãma tãma waꞌrã.
12 Tawamhã Manoa te ãne duré tãma tinha:
— Niwa ãne inharĩzé te te sina uwaimrami wamhã, e niha te za ꞌwatébrémi hã ꞌre hâimana. E marĩ te za duré tawamhã te te ꞌre ꞌmanharĩ.
13 Tawamhã Uburé Danhibꞌapito ma, Hâiwa ãma Romhuriꞌwa, ma te ãne ãma sadaꞌâ:
— Aimro si te za uburé marĩ na te ãma tãma irowaihuꞌuzé hã te te ꞌre abꞌmanharĩ.
14 Tahawa, uwa ꞌru ꞌrã hã te te ꞌre ꞌmasi mono õ di za. Uwa ꞌrãi waꞌu isé hã te te ꞌre hâsi mono õ di za, â zaipro hã. Duré dasa iprã norĩ hã te te ꞌre aꞌmasi mono õ di za. Marĩ na te ãma tãma irowaihuꞌuzé hã, uburé te za te te ꞌre abꞌmanharĩ.
15 13:15-16 Tane nherẽ, Manoa te te waihuꞌu õ di, Uburé Danhibꞌapito ma Hâiwa ãma Romhuriꞌwa na, õ hã. Tahawa te ãne tãma tinha:
— Ĩzawi na hã aꞌâ aimorĩ tõ. Poneꞌẽrebâ zéré uzé ꞌra na aima iwanhipi hã aꞌâ sapari.
— Ĩnhamra wamhã, te ꞌrẽne dai õ di, asai waꞌwa hã! — Ãne Hâiwa ãma Romhuriꞌwa ma te ãma tãma waꞌrã.
Te duré tãma tinha ãne:
— Tane nherẽ, asima iwẽ zarina dasa ꞌmanharĩ da wamhã, maꞌãpé Uburé Danhibꞌapito ma asõprubzéb da hã tãma zata.
16 ꞌMadâꞌâ 13:15
17 Tawamhã Manoa te isisi zô sadanha ãne:
— E niha asisi. Asisi wa te waihuꞌu da, wa wasima wẽ ni, niwa aimreme na ãma uwaimrami wa, aiꞌãma iwawatazéb da hã.
18 — E marĩ da, te ĩnhisi waihuꞌu da hã asima iwẽ. — Ãne te Hâiwa ãma Romhuriꞌwa asa ãma sadanha.
— Ĩnhisi hã uburé marĩ dama isaꞌreseꞌõ zéb ré ꞌre ihâimana mono na.
19 Tawamhã Manoa, poneꞌẽrebâ zéré uzé ꞌra siꞌaibâ hã duré amnho hã ma tô ꞌmaiꞌâ. Tahawa, taha na ma tô ẽtẽ nhisiwimhã Uburé Danhibꞌapito ma ãma tãma tinhopru. Tawamhã Manoa norĩ timro me te te ꞌmadâꞌâ zahuré ré, ma tô Uburé Danhibꞌapito hã marĩ aimawi dama isaꞌreseꞌõ hã ꞌmanha:
20 Ẽne danhoprubzé zatazém hawi unhama ro hâimo nasi roꞌo pusi ré, ma tô Manoa norĩ, timro me hã Hâiwa ãma Romhuriꞌwa, hâiwa u unhama roꞌo waꞌwamhã morĩ ré, te te ꞌmadâꞌâ zahuré. Ãhã wa, hiꞌrãtitõ ma tô aimasisi. Duré tiꞌubu na tiꞌai u hã ma tô roptob zahuré.
21 Tawamhã Manoa norĩ, timro me niwamhã Hâiwa ãma Romhuriꞌwa hã te te oto ꞌmadâꞌâ na sitéb zahuré õ di. Tahawa Manoa, ma tô oto waihuꞌu, õ hã tô aibâ, Uburé Danhibꞌapito ma Hâiwa ãma Romhuriꞌwa na hã.
22 Tahawa Manoa te timro ma tinha ãne:
— Wa za tô wadâꞌâ ni. E marĩ wa. ꞌRe ihâimana uꞌâsi mono hã wa te ꞌmadâꞌâ wa, watõmo na.
23 Tane nherẽ, ma te piꞌõ ãma sadaꞌâ ãne:
— Uburé Danhibꞌapito te te wapãrĩ da ꞌwaꞌâhã, aré wanhoprubzé hã te te wẽsãmri õ di. Duré aré ãne hã te te wama romhâiꞌré õ di. Duré aré tiha na hã uburé te te wama rowaihuꞌu mono õ di.
24 Tawamhã Manoaha mro zéꞌre hawimhã oto aiꞌuté poto wamhã, ma tô sisi ꞌwatébrémi hã Sãsã na. Duré ꞌwatébrémi oto prédu wamhã, ma tô Uburé Danhibꞌapito iwẽ na hã te te ꞌre pawapto.
25 Tawamhã Sãsã, Maꞌane-Dã ãma Zora na ꞌri waꞌõtõ nhisi norĩ waꞌwamhã, Estaꞌo na ꞌri waꞌõtõ nhisi ꞌre me ꞌre hâimana mono ré, ma tô Uburé Danhibꞌapito pẽꞌẽzani iwa ihâimana na hã duré ãma sãnaꞌrata, niha marĩ te te ꞌre iꞌaꞌmanharĩ mono zéb da hã.
