Zuize 14:1-20
14 Tawamhã Sãsã, ma tô ꞌrinhoꞌu Timna na isisi u tihâimanazém hawimhã siꞌra. Te te siꞌrai wamhã, ma tô tame azarudu filisteu nhipiꞌõ hã ꞌmaiꞌmadâ.
2 Tahawa ꞌri u apâ te te sina siri wamhã, ma tô timama ma, duré tina ma wasuꞌu ãne:
— Timna ãma wa tô filisteu nhipiꞌõ azarudu iprédupté hã ꞌmadâ. Tahawa, maꞌãpé ĩma waptẽrẽ aba, ãma ĩmro da.
3 Tane nherẽ, imama norĩ, ina me hã ma tô ãne ãma sadaꞌâbâ zahuré:
— E marĩ da, ma tô filisteu nhipiꞌõ zô si asima iꞌaba mo, isihâiwata nhihâriꞌõ norĩ waꞌwab zô. E bété wasiré aꞌuwẽ norĩ ꞌremhã wasiwadi norĩ nhipiꞌõ asima ꞌmasãmri da hã asima ꞌmaiwẽ õ di, ãma iꞌaimro da hã.
Tawamhã Sãsã, te duré timama ma tinha ãne:
— Õ hã azarudu wa tô ĩsima wẽ pese. Õhõ si ĩma iwẽ uptabi hã.
4 Tawamhã imama norĩ, ina me hã te te waihuꞌu zahuré õ di, Uburé Danhibꞌapito te te tãma iwaihuꞌuzéb zarina, Sãsã za ãne na marĩ te te iꞌmanharĩzé hã. Tawamhã ꞌRe ihâimana uꞌâsi mono hã ma tô tãma rĩni, filisteu norĩ te te iꞌaꞌwapé da zô, tô taha bâtâ na Izaraéu nhihudu norĩ, nhibꞌrata ꞌre hâimana zaꞌra mono wa.
5 Tawamhã Sãsã, timama me, duré tina me, Timna u hã ma tô mo. Tahawa Timna ꞌrata uwa ꞌru robꞌre u te te sina rotété zaꞌra wamhã, ma tô huꞌu zérépa iprédupté isõꞌõmoi baba wairõ sina we sô tipraba.
6 Tane nherẽ, Uburé Danhibꞌapito pẽꞌẽzani, Sãsã siptete na hâimana da hã, ma tô tãma tisõ. Tahawa tinhibꞌrata na si nherẽ, ma tô Sãsã, huꞌu zérépa hã te te sinarĩ, poneꞌẽrebâ zéré uzé ꞌra nhi, da te ꞌre isinarĩ mono ne. Tane nherẽ, timama norĩ ma, tina me hã te te tãma wasuꞌu zahuré õ di, niha na tãma iromhâimana zarina te te iꞌmanharĩzé hã.
7 Tawamhã azarutu ma, te te robzanhamri da, ma tô mo. Tahawa, ma tô sima wẽ pese.
8 Tawamhã duré suru na bâdâ ãma morĩ pari, ma tô apâ isõrõwa u mo, ãma mro da hã oto. Tawamhã huꞌu zérépa te te iwĩrĩ te te ꞌmadâꞌâ da, ma tô bâdâdi hawimhã apa. Tahawa, te te iwĩrĩ hâiba nhisiwi, mohõnire ꞌre isisaꞌrei mono hã duré ipĩ ihâiba ꞌre te te ꞌmadâꞌâ wamhã, ma tô tãma aꞌrã.
9 Tawamhã tinhibꞌrata na ma tô ipĩ hã sima ꞌmaiwaze. Taha pari ma tô oto duré mo, bâdâdi na te te upsõmri mono sina. Tawamhã imama norĩ, ina me ihâimana zahuré zéb u oto wisi wamhã, ma tô ipĩ hã suru na tãma sõmri zahuré. Tahawa, ma tô duré imama norĩ, ina me hã upsõmri zahuré siꞌu. Tane nherẽ, te te tãma wasuꞌu zahuré õ di, huꞌu zérépa dâꞌâ hâiba hawi mohõnire pĩ te te iwazere na hã.
10 Tawamhã Sãsãhã mama, azarutu nhorõwa u ma tô mo. Tahawa, tame Sãsã dato isaꞌẽne hã ma tô ꞌmanha, ihâiba tém norĩ sina ꞌre mro zaꞌra mono wa, dasa isaꞌẽne te te sima ꞌre iꞌmanharĩ zaꞌra mono zéb zarina.
11 Tawamhã filisteu norĩ ãne na te te ꞌmadâꞌâ zaꞌra wamhã, ma tô aiꞌreputu norĩ 30 na itẽmemhã te te siwi simro, isiré dato isaꞌẽtẽ na te te sima rowẽ zaꞌra da.
12 Tawamhã ãne te Sãsã tãma nharĩ zaꞌra:
— Marĩ sõꞌawibꞌõ hã te ĩma tihâiba, te aima wasuꞌu zaꞌra waꞌaba wa, pé ãma ĩwi uwaimrami zaꞌra waꞌaba da, aimreme na hã. Tawamhã dato isaꞌẽne dasina damrozém na bâdâ hã 7 na siꞌutõrĩ õ ré, iꞌuwaibaba na ãma ĩzadaꞌâbâ zaꞌra waꞌaba wamhã, wa hã wa za aima sõmri zaꞌra waꞌwa za, 30 na daꞌuza ihâi wẽ hã, duré 30 na daꞌuza hâpa ihâi baihâire na hã, aihâiba mono bâ waꞌaba.
13 Tawamhã ãma ĩzadaꞌâbâ waihuꞌu zaꞌra waꞌaba õ wamhã, te za ĩma isõmri zaꞌra waꞌwa za, 30 na daꞌuza hã, duré 30 na daꞌuza hâpa ihâi baihâire na hã.
Tawamhã asa ma te ãma sadaꞌâbâ zaꞌra ãne:
— Pé tô wama wasuꞌu zaꞌra na, asiꞌrepsi marĩ isaꞌreseꞌõ aima ihâiba hã. Wa za ãma wasiwi aiwapari ni za, marĩ iwaihuꞌuzém na hã.
14 Tawamhã Sãsã te tãma nharĩ zaꞌra ãne:
“Te te ꞌre idaꞌmasi mono hawimhã, ma tô dasa hã watobro.Duré isiptete hawimhã ma tô marĩ isei uptabi hã watobro.”
Tane nherẽ, siꞌubdatõ bâdâ imorĩ ꞌremhã te te zahadu siwi upsibi mei õ di, marĩ te te iwasuꞌuzé hã.
15 Tawamhã maparane siꞌuiwa na bâtâ ãma te Sãsãhã mro ma hã tãma nharĩ zaꞌra ãne:
— Maꞌãpé aimro hã ꞌwapé na, te te aima wasuꞌu da, siꞌrep si isaꞌreseꞌõ ré ihâimanazé hã, te te aima hâiꞌré da. Ãne hã marĩ tãma ꞌmanharĩ õ wamhã, wa za aimama nhorõwa na airé ãma wasiwi sazu ni, aiꞌutõrĩ aba da. E taré bété waꞌãma asimisaihuri aba da si, ma tô wazô hã aihãsi ꞌwa.
16 Tawamhã Sãsãhã mro, te ãne wawa sina tãma tinha:
— Aima ĩzawi õ di! Ma tô ĩzada hã asitiꞌru! Duré a hã ĩsiwaihuꞌu norĩ ma, tiha sõꞌawi ihâimanaꞌõ isaꞌreseꞌõ na tãma nharĩ zaꞌra nherẽ, duré ĩma hâiꞌré õ di, tiha te te iwasuꞌuzé hã.
Tawamhã ma te ãma sadaꞌâ ãne:
— Ta hã duré ĩmama norĩ ma, ĩna me te tãma wasuꞌu zahuré õ di! E marĩ wa, te bété ĩꞌãma irosaꞌra, te aima wasuꞌu da hã.
17 Tawamhã 7 bâtâ ꞌremhã dato isaꞌẽtẽ ꞌrãsutu u hã ma tô duré nasi aiwaꞌõ. Tahawa, 7 bâtâ ãma piꞌõ te te nasi tãma ꞌru zadawa zaꞌréi õ wa, ma tô oto iwasuꞌuzé hã tãma hâiꞌré. Ãhã wa, awaꞌawi ma tô imro, tisiwaihuꞌu norĩ ma oto tãma wasuꞌu zaꞌra.
18 Tawamhã 7 bâtâ ãma bâdâ sébré wana ré, ꞌri nhoꞌõmo ãma aibâ ꞌre ihâimana zaꞌra mono norĩ hã ma tô Sãsãhã ma nharĩ zaꞌra ãne:
“E marĩ merẽ isei uptabi, ropĩni nhipai u hã.E marĩ duré isiptete uptabi, huꞌu zérépa nhipai u hã.”
Tawamhã Sãsã, ma te ãma sadaꞌâbâ zaꞌra ãne:
— Ĩte powawẽ sipiꞌõ na ãma asiwi tiꞌai hâipoꞌo zaꞌra waꞌaba õ ꞌwaꞌâhã, aré asiwi upsibi mei waihuꞌu aba õ di, aima iwaihuꞌu zaꞌra waꞌaba õ hã.
19 Tawamhã Uburé Danhibꞌapito pẽꞌẽzani, ma tô Sãsãhã nhiptetezé hã tãma tisõ, siptete na hâimana da. Taha pari, ma tô Asquerõ na ꞌri waꞌõtõ nhisi u hã siꞌra. Tamomo te te siꞌrai wamhã, ma tô tame 30 na aibâ norĩ hã uprosi. Tawamhã daꞌuza ihâi baihâire na ãma ꞌre isiꞌuza zaꞌra mono zé hã ma tô tiwi sani zaꞌra. Tahawa, ma tô ipréduptém norĩ marĩ isaꞌreseꞌõ na iꞌuwaibaba na te te ãma isadaꞌâbâ zaꞌra ma hã tãma sõmri zaꞌra. Taha pari ma tô timama nhorõwa u hã oto mo, marĩ tãma ihâimana zarina sahi sina.
20 Tawamhã Sãsã, mro da wa, isiré aibâ ihâimana uꞌâsi ma, ma tô imro hã tãma sõmri ni, taha ma.