Zuize 15:1-20
15 Tawamhã wahu siꞌutõrĩ mono pari, Sãsã, amnho trigu, da te itehâri mono siré, ma tô timro te te sabu da hã mo. Tahawa, ma tô poneꞌẽrebâ zéré uzé ꞌra siꞌaibâ hã tãma tiꞌâ. Tawamhã te imama ma tinha ãne:
— Ĩmro nhimiwaptâ u ĩzébré da wa ĩsima wẽ.
Tane nherẽ, imama hã te te tãma saꞌré õ di.
2 Tahawa, ma te ãne ãma sadaꞌâ:
— Wa tô aré aiꞌãma rosaꞌrata zahi, ĩꞌra hã asiwi wẽꞌõ pese newa. Duré tahawa, wa tô aré asiwaihuꞌu ma tãma tisõ, ãma mro da. Tane nherẽ, ino si isipai u hã iwẽ uptabi, duré iꞌmadâꞌâ zei uptabi. Tahawa, õhõ si asima wẽ wamhã, tô aima hâimana isõwaꞌreꞌre.
3 Tawamhã Sãsã te asa tãma tinha ãne:
— Ãhã na hã niꞌwa niha na marĩ na te te ĩꞌuptob da mare di, za filisteu norĩ nhimiꞌmanharĩzé waꞌrãmi iꞌuwaibaba na, wa hã te tãma iꞌmanharĩ zaꞌra zém na hã.
4 Tahawa 300 na wapsã wawẽre zô, ma tô te te aba. Tawamhã te te awaibui mono wamhã, maparane siꞌuiwa na ma tô isamo mono bâ te te ãma awasisi. Taha pari ma tô duré ꞌrãsitõ tô ta isamo mono na hã te te ãma awasisi.
5 ꞌRãsitõ na hã ma tô oto te te ãma azazu. Tahawa, ma tô wapsã wawẽre norĩ hã iré te te wanoꞌõ oto, filisteu norĩ amnho trigu te te ꞌre izuri mono u iré sisaꞌrei mono da. Tawamhã trigu te te itehâri zaꞌra mono na si te te ãma tiwi roꞌo zaꞌra mono õ di. Zahadu daburu na hâiwi isimasa mono na zama ma tô te te ãma tiwi sazu zaꞌra. Tahawa, olivera wede na robꞌre zama ma tô te te ãma tiwi roꞌo zaꞌra.
6 Tawamhã filisteu norĩ te ãne ãma sisadanharĩ zaꞌra:
— E ꞌwa, ma tô ãne hã ꞌmanha.
Tawamhã Sãsãhã wi, imaprewa, imro te te apâ tiwi iꞌâri, isiwaihuꞌu ma, te te tiwi tãma isõmri zarina, te te ãne iꞌmanharĩzém na hã ma tô siwi waihuꞌu, filisteu norĩ hã. Tahawa ta norĩ hã ma tô Sãsãhã mro na aré tãma ihâiba hã imama me unhama na siwi ãma roꞌo zahuré, hâiba ré.
7 Tawamhã Sãsã te tãma nharĩ zaꞌra ãne:
— Ãne hã ꞌmanharĩ zaꞌra waꞌaba ze te bâ, ĩsima iwẽ na ĩzahâ na ĩwaꞌutu da hã mare di za, aihâiba zaꞌra waꞌaba na te ꞌruiwaꞌâbâ zahuré õ ré hã.
8 Tawamhã sahi sina ma tô aꞌwapé. Ãhã wa, ma tô ahâ uptabi na uprosi. Taha pari oto watobro wamhã, ma tô mo, ẽtẽ na abꞌre Etã na romnhisi ãma ihâimana u.
Sãsã, Filisteu norĩ ãma te te iꞌaiꞌuté zaꞌra zé wasuꞌu
9 Ãhã wa, filisteu norĩ ma tô aiꞌabaꞌré, Zuda u, tame te te sima ꞌri nhoré mono da. Tahawa, ma tô Lei na ꞌri nhoꞌõmo nhisi hã siwi rési.
10 Tawamhã aibâ Zuda ãma ꞌre ihâimana zaꞌra mono, te filisteu norĩ hã sadanharĩ zaꞌra ãne:
— E marĩ da, te wei wazô aiꞌabaꞌréi waꞌwa, asiwi wawanoꞌõ aba da hã.
Tawamhã ma te ãma sadaꞌâbâ zaꞌra ãne:
— Wa we sô aiꞌabaꞌré ni Sãsãhã zô, pawasisi ré, wa te wasiwi saprõni da, marĩ te te wama iꞌmanharĩ zaꞌra zém ne, asa marĩ hã wa te tãma ꞌmanharĩ zaꞌra da.
11 Tawamhã aibâ Zuda ãma hã 3 miu na Sãsãhã ma, te te nharĩ zaꞌra da hã, ma tô itẽmemhã aiꞌabaꞌré, Etã ãma ẽtẽ na abꞌre ihâimana u. Tahawa, te ãne tãma nharĩ zaꞌra:
— E aima waihuꞌu ã bâ, filisteu norĩ te te wama ꞌre irobꞌru zaꞌra mono na hã. E marĩ wa, ma tô ãne hã wama iꞌmanharĩ zaꞌra.
Tawamhã Sãsã, ma te ãne ãma tãma waꞌrãmi zaꞌra:
— Õ norĩ hã marĩ te te ĩma iꞌmanharĩ zaꞌra zéb zarina si, wa tô tãma ꞌmanharĩ zaꞌra asa.
12 — Taré, wa te tô wasiwi aipaihi wasisi da si, wa we ãwamhã asô aiꞌabaꞌré ni, taha pari filisteu norĩ ma, wa te wasiwi asõmri da, isibꞌratab zaꞌra. — Ãne te duré tãma nharĩ zaꞌra asa.
Tawamhã Sãsã, ma te ãne duré ãma sadaꞌâbâ zaꞌra:
— Maꞌãpé a norĩ waꞌwa asiwi ĩwĩrĩ aba tõ da hã ĩma ropisutu zaꞌra waꞌaba.
13 — Wa za tô ropisutu zaꞌra ni aima!
Ãne ma te duré ãma sadaꞌâbâ zaꞌra.
— Taré wa za tô wasiwi aipaihi wasisi ni, filisteu norĩ ma, wa te wasiwi asõmri da isibꞌratab zaꞌra. Wa te wasiwi aiwĩrĩ õ di za tô.
Tawamhã maparane wedenhorõ isõrõ tém na ma tô siwi pawasisi. Taha pari ẽtẽ na abꞌre hawimhã ma tô oto siwi waze.
14 Tawamhã Sãsã, Lei u oto te te siwi ãwisi wamhã, ma tô filisteu norĩ hârâ ꞌrãihâ sina itẽmemhã aiꞌabaꞌré, te te siwi sõpẽtẽ da. Tane nherẽ, Uburé Danhibꞌapito pẽꞌẽzani, ma tô Sãsã siptete na hâimana da hã iwa tihâiba. Tahawa ma tô wedenhorõ tinhimizu wasisizé hã duré tinhibꞌrata waprezé hã sina sõrõ rĩ zahuré, unhama na abazi nhorõ ꞌrare zata ne tãma hã.
15 Tahawa, ma te duré tame awaru poꞌrepore idâꞌâ ꞌwaꞌratahi ité inomro hã tisã. Tawamhã taha ꞌwaꞌratahi te te sada iꞌâri zaꞌra na ma tô miu na aibâ norĩ hã uprosi.
16 Taha pari te duré ãne tinha:“Awaru poꞌrepore ꞌwaꞌratahi na wa tô miu na aibâ norĩ hã uprosi.Duré tô awaru poꞌrepore ꞌwaꞌratahi na wa tô dahâiba isaꞌwari ꞌrãihâ pe hã ꞌmanha.”
17 Tawamhã ãne te te nharĩ pari, ma tô oto awaru poꞌre pore ꞌwaꞌratahi hã time. Tahawa ta hã ro hã Ramate-Lei na ma tô dasiwi sisi ni.*
18 Tawamhã Sãsãhã ma ꞌrubu uptabi di. Tahawa ma tô Uburé Danhibꞌapito ma mre ãne:
— A hã ma tô ĩma isõ, te daꞌãma iꞌaiꞌutézé iwẽ uptabi hã. E ãhã nherẽ, ꞌrubu te, ĩdâꞌâ da hã te za ĩrẽ, ã hã aꞌuwẽ isihâiwata nhihâriꞌõ norĩ nhibꞌrata duré ĩwaptãꞌã da hã.
19 Tawamhã ꞌri nhoꞌu Lei na isisi ãma ꞌRe ihâimana uꞌâsi mono, ma tô abꞌre hã ꞌridawa. Tawamhã ta hawi, ma tô â hã puru tãma. Tawamhã Sãsã, ta hã â te te zâꞌrẽne wamhã, ma tô apâ tãma iꞌrem nomro. Duré siptete di apâ. Tawamhã ta â puꞌuzém nhisi hã En-Hacoré* na ma tô da te ꞌre wamri zaꞌra. Ta hã te ãhã na zama zahadu ꞌre puꞌu uꞌâsi.
20 Tawamhã Sãsã, Izaraéu nhihudu norĩ ma, 20 na ãma iwahum na iꞌrãnhoꞌõmo na ma tô ꞌre sa, tiꞌa filisteu norĩ nhimiꞌmadâꞌâ na ꞌre hâimana mono ré.
