Zuize 16:1-31
16 Tawamhã Sãsã, nimahã bâtâ na ma tô mo, ꞌrinhoꞌu Gaza na isisi u hã. Tahawa, tame ma tô piꞌõ siwaꞌâbâ zô ꞌre isisõmri mono hã ꞌmadâ. Taha ré ma tô nomro.
2 Tawamhã Gaza ãma ꞌre idahâimana zaꞌra mono, ma tô siwi waihuꞌu, Sãsã õhõ ꞌre, ihâimana na hã. Tahawa isãmrazé ma tô iré siwi uirĩ. Ma tô duré mara bâre sô mapari zaꞌra Sãsãhã zô, ꞌri nhoꞌõmo te ꞌridawa zaꞌẽtẽ ãma. Duré ariꞌiwi pese ma tô sô tihâimana zaꞌra, te te ãne rosaꞌrata zaꞌra sina:
— Awẽb u sô wanhimipari zaꞌra waꞌaba. Tawamhã wa za wasiwi wĩrĩ ni za.
3 Tane nherẽ, Sãsã mara aiwa ãma isipoꞌo u si ma tô nomro. Taha pari oto utu wamhã, ma tô ꞌri nhoꞌõmo te ꞌridawa zaꞌẽne hã tita, siꞌuiwa na ꞌridawa uparizéb ré, duré ꞌridawa tétézéb ré. Tahawa, tinhisé te te sima hiri wamhã, ma tô tiꞌâ, ẽtẽ nhisi u, ꞌrinhoꞌu Hebrõ nhoꞌrei waꞌwaibaba.
Sãsã norĩ wasuꞌu, Dalilaha me
4 Tawamhã ãma ronomro pari, Sãsã, piꞌõ Dalila na isisi ma tô sawi â, romharé Sorequi na isisi ãma ꞌre ihâimana mono hã.
5 Tawamhã imrotõ na ꞌri nhoꞌõmo ꞌre, filisteu norĩ ma iꞌrãnhoꞌu ꞌre ihâimana zaꞌra mono norĩ hã ma tô piꞌõ tẽmemhã aiꞌabaꞌré, te te tãma nharĩ zaꞌra da. Ãne te tãma nharĩ zaꞌra:
— Maꞌãpé niha hã aiꞌrã nhipese na Sãsãhã ma, marĩ hã ꞌmanharĩ, nima hawim na tinhiptetezé te te aima wasuꞌu da, taha zarina wa te waihuꞌu zaꞌra wa, oto sô wanhisisi wa, wa te wasiwi paihi wasisi da, siꞌwawimhã simapa ãna. Ãne sena ꞌmanharĩ wamhã, wahâiba mono bâ wa za ẽtẽ waipo prã prata 1.100 na isapotore na aima sõmri zaꞌra ni za.
6 Tawamhã Dalila te Sãsãhã wi waptẽ ãne:
— Ĩzawi na hã maꞌãpé asiptetezé aima ihâiba ĩma wasuꞌu na. Niꞌwa sima iwẽ na te te aipawasisi da wamhã, sada asapẽtẽ ãna aihâimana da wamhã, e tiha te za ãne wamhã sima iwẽ na aiꞌãma ꞌmanha.
7 Tawamhã Sãsã ma te asa ãne ãma sadaꞌâ:
— Niꞌwa hã abaze ihâi wazere tém hânhorõ na 7 na ihâi waré na te te ãma ĩhâiba wapre mono wamhã, wa hã za ĩnhibꞌuware di, siwaꞌru aibâ norĩ sibꞌuware na ꞌre ihâimana zaꞌra mono ne hã.
8 Tawamhã filisteu dama iꞌrãnhoꞌõmo norĩ, ma tô Dalilaha ma 7 na wede nhorõ isõrõ té hã tãma ꞌwasa. Taha na Dalila, ma tô Sãsã hã oto te te ãma hâiba wasisi.
9 Tawamhã aibâ norĩ, ꞌriꞌre waꞌõno ihâiba amoi ãma ma tô aimaꞌuri zaꞌra. Tahawa ma tô Dalila ꞌmahâ ãne:
— Sãsã! Filisteu norĩ ma we asô aihutu!
Tawamhã Sãsã õne haré ma tô wedenhorõ hã te te sina sinarĩ, abazi isõrõ ꞌrare unhama ꞌrata, da te ihiri ne hã tãma. Ãhã wa, niha na Sãsãhã nhiptetezé tãma ihâiba hã te te zahadu siwi waihuꞌu õ di.
10 Tahawa Dalila, te duré ãne tãma tinha, Sãsãhã ma:
— E niha ma te ĩma asadawa nhipe, ĩꞌãma aiwaꞌẽ sina. Maꞌãpé ĩzawi na hã ĩma wasuꞌu na, niha tiha na da te dasiwi iꞌaiwasisi mono zéb da hã.
11 Tawamhã Sãsã, ma te duré ãne ãma sadaꞌâ asa:
— Wedenhorõ isõrõ té zahadu marĩ hã da te ãma iwasisi õ na da te ĩwasisi mono wamhã, wa hã za ĩnhibꞌuware di, uburé aibâ norĩ ma, isiptede ꞌre ihâimana zaꞌra mono ne hã.
12 Tawamhã Dalila, wedenhorõ isõrõ té te te sada iꞌâri na, ma tô ãma pawasisi. Taha pari te duré tãma robꞌmahâ ãne:
— Sãsã! Filisteu norĩ, ma we asô aihutu!
Tawamhã aibâ norĩ, ma duré aimaꞌuri zaꞌra, ꞌriꞌre waꞌõno ihâiba amoi ãma simipari zaꞌra sina hâimana zaꞌra da. Tane nherẽ, Sãsã ma tô duré wedenhorõ hã sina sõrõ nhinarĩ zaꞌra, abazi nhorõ isõrõ suru pesere ne tãma hã.
13 16:13-14 Tahawa te Dalila duré tãma tinha ãne:
— E niha te zahadu asadawa nhipese na ãma ĩma iꞌuzusi mo, ĩꞌãma atoi mono sina. Ĩma wasuꞌu na, niha tiha na, da te dasiwi iꞌaiwasisi mono zém na hã.
Tawamhã ma te ãma sadaꞌâ duré ãne:
— A hã abazi zanhamrizém na, ĩzéré para na ãma awaibui mono wamhã, abazi nhamri ahârizé, wede umo ꞌrãꞌwa na ĩzéré tété mono wamhã, wa hã za ĩnhibꞌuware di, uburé aibâ norĩ ma, isiptede ꞌre ihâimana zaꞌra mono ne hã.
Tawamhã Dalila, Sãsã sõtõ ré, ma tô sima iséré hã te te awaibu. Taha pari, ma tô 7 na séré para, abazi isipra zaꞌra na. Taha pari ma tô duré abazi zanhamri ahârizém na wede umo ꞌrãꞌwa na te te séré tété. Ãhã pari te duré ꞌmahâ ãne:
— Sãsã! Filisteu norĩ, ma we duré asô aihutu!
Tane nherẽ, Sãsã duré oto topoꞌo wamhã, ma tô tizéré tétézé hã sina waze. Ma tô duré tizéré para hã sina awasihu.
14 ꞌMadâꞌâ 16:13
15 Tahawa te duré ãne tãma tinha:
— E niha bâ te taré nasi ĩzawi wapti, asadawa nhipese na. E asina ĩꞌumnhasi õ wa. Ã hã oto siꞌubdatõ ãmamhã te siwaꞌru nasi ĩma iromnhoré, ĩnhimizaꞌreseꞌõ newa. Tahawa zahadu ĩma wasuꞌu õ di, tihai hawi asiptetezé aima ihâiba hã.
16 Tawamhã bâtâ bâre isadanharĩ na te te ãma tãma uzusi uꞌâsi. Tahawa Sãsã, piꞌõ timreme na te te iwasutuzé wi hã oto siptete waihuꞌu õ di, ãma waꞌa wa.
17 Tahawa sena na ma tô oto tãma wasuꞌu ãne:
— Niwamhã ĩzéré hã isihâri waihuꞌu õ!
Te duré tãma siwasuꞌu ãne:
— Wa hã Nazire norĩ siré ꞌRe ihâimana uꞌâsi mono te na, wa tô ꞌre ĩhâimana, ĩpoto zém hawim haré. Tahawa ĩzéré hã te sihâri wamhã, wa za ĩnhiptetezé hã simini. Ĩnhibꞌuware di za oto, uburé aibâ norĩ ma, isiptede ꞌre ihâimana zaꞌra mono ne hã.
18 Tawamhã Dalila sena na te te ãma tãma irowasuꞌuzé te te waihuꞌu wamhã, ma tô ãne romreme hã tãma me zaꞌra, filisteu norĩ dama iꞌrãnhoꞌõmo norĩ ma:
— We apâ asina siri zaꞌra waꞌaba. E tihai wa. Sena na te oto ĩma wasuꞌu, we ꞌre isiptete mono zé iwaihuꞌuꞌõ hã.
Tahawa apâ duré oto itẽme siꞌabaꞌréi wamhã, ma tô robꞌuiprazé hã siré tãma âri zaꞌra.
19 Tawamhã Dalila, Sãsã ipa sõtõ da hã, ma tô ꞌrãihi. Tahawa, sõtõ ré, ma tô aibâ zô hã hâ. Tawamhã ta hã ma tô 7 na Sãsãhã zéré para siro hã tiwi sihâ. Tahawa Dalila, ma tô oto niha hã nasi tãma robꞌmanha, tinhiptetezé hã te te oto tãma simini wẽ te.
20 Tawamhã te oto duré ꞌmahâ ãne:
— Sãsã! Filisteu norĩ, ma we duré asô aihutu na sahu!
Tawamhã utu wamhã, te duré ãne rosaꞌrata: “Wa za duré tiwi ĩsiwazere zaꞌra, tiwi ꞌre ĩsisani uꞌâsi zaꞌra mono ne.” Ãhã wa, Sãsã hã te te sina waihuꞌu õ di, ꞌRe ihâimana uꞌâsi mono tãma isiꞌrézém na hã oto.
21 Tawamhã filisteu norĩ ma tô oto siwi tiꞌâ. Te te siwi âri wamhã, ma tô siwi topuꞌu zahuré. Tahawa, duré oto Gaza u te te siwi saprõni wamhã, ma tô ẽtẽ topsada brõzi nhorõ rutu na te te siwi wasisi. Tawamhã dazazéb ꞌre amnho zubzém na te te nasi ãma isaꞌoto mono na te te ꞌre romhuri mono da hã, ma tô siwi tisẽ.
22 Tane nherẽ taha ré, ma tô duré apâ iséré hã tãma tipa.
Sãsã idâꞌâzé wasuꞌu
23 Tawamhã filisteu dama iꞌrãnhoꞌõmo norĩ hã ma tô siꞌrãꞌõtõ, dato isaꞌẽne te te siwi ꞌmanharĩ da, duré tite Dagõ na ihâibaꞌõ nhisi ma danhimizama zata na tãma sõprub zaꞌra da. Tawamhã ta norĩ hã ma tô tinhoꞌre zaꞌra ãne: “Wate zaꞌra ihâibaꞌõ, ma tô wanhitobꞌru Sãsã hã wanhibꞌrata wama sõmri zaꞌra!”
24 Tawamhã Sãsã da te dasiwi ꞌmadâꞌâ wamhã, ma tô tite ihâibaꞌõ Dagõ ãma tanhoꞌre zaꞌra ni ãne: “Wate zaꞌra ihâibaꞌõ, wanhitobꞌru wanhiptiꞌa te te wawi ꞌre iwamnarĩ zaꞌra mono hã, duré wasiré norĩ ahâ uptabi na te te ꞌre iꞌmapãrĩ mono hã, wanhibꞌratab zaꞌra ma tô oto wama sõmri zaꞌra.”
25 Tawamhã dapẽꞌẽ ꞌre dama irowẽ zaꞌẽtẽ zaꞌra zarina, te ãne dasima nharĩ zaꞌra ni:
— Maꞌãpé Sãsãhã zô aihârâ aba, wa te ãma wasima romhuꞌu zaꞌra da.
Tawamhã dazazém hawi Sãsã te te siwi wazere wamhã, ma tô oto dasima ãma rowẽ zaꞌra ni. Taha parimhã ma tô oto ẽtẽ nhoré na ꞌri uparizém norĩ waꞌwamhã dasiwi sãrĩ ni.
26 Tawamhã iprédupté isibꞌrata na te te isaprõni ma, te ãne Sãsã hã tãma tinha:
— Maꞌãpé ꞌri uparizém na ãma ĩnhibꞌrata nomri siꞌuiwa na, te ĩsina roptob da ãma itẽme.
27 Tawamhã taha bâtâ na te ꞌriꞌre dasiwazari aibâ norĩ, piꞌõ norĩ me daꞌmasisi tâ na tahâimana zaꞌra ni. Tahawa, te duré filisteu dama iꞌrãnhoꞌõmo norĩ 5 na tame dame asimro. Duré te ꞌri zahâpâ ãma aibâ norĩ, piꞌõ norĩ me 3 miu na dahâiba na hã tahâimana zaꞌra ni, Sãsã te te siwi ꞌmadâꞌâ da hã, duré te te sima ãma rowẽ zaꞌra da, ãma waꞌẽ zaꞌra sina.
28 Tawamhã Sãsã, Uburé Danhibꞌapito ma te ãne mre:
— Uburé Danhibꞌapito iꞌaiwaihuꞌu pe, maꞌãpé ĩꞌãma aipoꞌre puꞌu ãhã na hã. Maꞌãpé ĩzawi na ĩnhiptetezé ãhã na si ĩma sõmri, filisteu norĩ te te siwi ĩtopuꞌu zaꞌra norĩ hâiba na misi haré ꞌrâwi ãma ĩsiꞌruiwaꞌâbâ da.
29 Tawamhã ꞌriꞌre waꞌwa nhoꞌõmo ꞌri uparizém norĩ siꞌuiwa na isimaꞌwara hã ma tô oto tinhibꞌrata na hã tété zahuré. Tahawa, tinhibꞌrata nhimire niwĩ ꞌri uparizé hâiba amo te te tété sina, duré tinhibꞌrata nhimiꞌe niwĩ ihâiba amo te te tété sina, ma tô sada asapẽtẽ oto.
30 Tawamhã taha sina te duré hârâ ꞌrãihâ na hâ, ãne:
— Filisteu norĩ siré, ĩdâꞌâre oto. Marĩ õre di!
Ãne pari, ma tô ꞌri uparizé hã te te saꞌré zahuré, tinhiptete na. Te te saꞌré zahuré mono wamhã, ma tô dama iꞌrãnhoꞌõmo norĩ nhisiwimhã, duré uburé aꞌuwẽ norĩ nhisiwimhã oto ꞌri hã asaꞌwa. Ãne ma tô Sãsã, daꞌahâ uptabi na tidâꞌâ siré hã daꞌaꞌuprosi, hâiba ré ꞌre hâimana mono ré, te te ꞌre idaꞌmapãrĩ mono zém nhipai u.
31 Tawamhã Sãsãhã sisãnawã norĩ, uburé isiré aꞌuwẽ norĩ me ma tô ihâiba zô hã aiꞌabaꞌré. Tawamhã ihâiba te te siwi âri wamhã, ma tô ãma siwi tiꞌa, Zora na ꞌri nhoꞌõmo nhisi norĩ waꞌwa, Estaꞌo na ꞌri nhoꞌõmo nhisi waꞌwa me, imama Manoa da te isẽrẽzéb ꞌre.
Sãsã hã 20 na ãma iwahum na ma tô Izaraéu nhihudu norĩ ma iꞌrãnhoꞌõmo na hã ꞌre hâimana.
