Zuize 17:1-13
17 Tawamhã Mica na aibâ nhisi hã te ꞌre hâimana, Efraĩ tiꞌai ãma ẽne ꞌre ihâimana mono ãma.
2 Tawamhã ta hã te tina ma tinha ãne:
— Nimahã na ate 1.100 na ẽtẽ waipo prã prata isapotore, da te aiwi simiꞌuri zaꞌra wamhã, ma tô a hã isimisaihuri ma, iwẽꞌõ hã tãma ipisu. Ãne na wa hã wa tô wapa. Tane nherẽ, iꞌuptabi na hã te ẽtẽ waipo prã prata ĩꞌratamhã nomro. Wa hã wa tô tiꞌâ.
— Ĩꞌra, Uburé Danhibꞌapito iwẽ si te te tô aima ꞌre ipisutu mono da si, ĩma wẽ di!
3 Tawamhã tina ma apâ 13 kilu na ipire pibuzém na prata isapotore te te tãma sõmri wamhã, te ãne ina tãma tinha:
— Ĩꞌra, iwẽꞌõ pisudu asisiwi hâimana tõ da hã, wa za ã hã prata na Uburé Danhibꞌapito ma ãma ĩnhopru. Tawamhã taha na te za wede na romhâibarĩ hã iꞌmanha za. Duré ã hã ẽtẽ waipo prã prata na te za tô ãma ihâiba ꞌmanharĩ upsibi mo, hâ suꞌu da. Tahawa wa za ãhã na apâ prata hã aima tisõ.
4 Tane nherẽ, iꞌra ma te apâ prata tina ma hã tisõ. Tawamhã ina ma tô 200 na isapotore hã isiꞌuwazi na marĩ ꞌmanharĩꞌwai ma hã tisõ. Tawamhã ta hã wede na romhâibarĩ hã ma tô ꞌmanha. Taha pari, ma tô duré tô ẽtẽ waipo prã prata na te te ãma hâiba ꞌmanharĩ upsibi, hâ suꞌu da. Tawamhã ta hã Micaha nhorõwa ãma te oto za, romhâibarĩ hã.
5 Tawamhã Mica, ꞌri marĩ na ꞌre iwata mono zéb da hã ma tô ꞌmanha. Tawamhã romhâibarĩ ihâiba amo norĩ ma tô duré ꞌmanharĩ zaꞌra. Duré sasedoti siꞌuzazé ihâ pa zama ma tô ꞌmanha. Tahawa, tiꞌra ite sasedoti na tãma ꞌre hâimana mono da hã, ma tô pisutu.
6 Tawamhã Izaraéu nhihudu norĩ nhibꞌapito hã ꞌre ꞌmaihâimana mono õ di. Tahawa, hâiba mono bâ marĩ, te te sima ꞌre iwẽ zaꞌra mono zéb zarina si, ma tô te te sima ꞌre ꞌmanharĩ zaꞌra.
7 Tahawa, aibâ iprédupté te Belẽ ãma niha bâtâ na hã aꞌâ tihâiba, Zuda tiꞌai ꞌremhã. Ta hã levita.
8 Tawamhã ta hã ma tô oto ta hawimhã watobro, za ꞌre isãmra mono zéb zô, sima ꞌre rĩtĩ mono da. Tawamhã ta hawi oto morĩ wamhã, ma tô oto Micaha nhorõwa u hã wi, Efraĩ tiꞌai ãma ẽne ꞌre ihâimana mono u.
9 Tawamhã te Mica sadanha ãne:
— E ma hawi te we aimo.
Tawamhã aibâ iprédupté ma te ãne sadaꞌâ:
— Wa hã levita norĩ siré hã, Belẽ hawimhã, Zuda na danhiptiꞌa nhoꞌõmo nhisi hawimhã, wa tô rob zô hã we ĩsima ꞌre ĩrĩtĩ, iwa ꞌre ĩhâimana mono zéb da hã.
10 Tawamhã Mica te tãma tinha ãne:
— Ãme ĩꞌrata ꞌre asãmra mono, ĩma rotiꞌwa na duré sasedoti na ĩma ꞌre aihâimana mono da. Tawamhã 10 na ẽtẽ waipo prã prata, daꞌuza hã duré dasa hã wahup sidâpâsi wa za te aima ꞌre anhomri.
11 Tawamhã levita norĩ siré iprédupté, ma tô Mica hã sina saze, za isiré ꞌre ihâimana mono zém na. Tawamhã iꞌra ne ma tô oto tãma hã ꞌre hâimana.
12 Ãne Mica tite sasedoti da, te te pisutu wa, ma tô oto iprédupté isõrõwa ãma ꞌre sãmra.
13 Tawamhã te ãne Mica hã tinha:
— Ĩma waihuꞌu di awaꞌawi na hã, Uburé Danhibꞌapito za marĩ iwẽ te te ĩma ꞌre iꞌmanharĩ mono zéb na hã, ĩte sasedoti levita norĩ siré hã ĩma ꞌre ꞌmaihâimana mono wa oto.