Zuize 18:1-31
18 Taha wahub ꞌremhã Izaraéu nhihudu norĩ nhibꞌapito, ꞌre ꞌmaihâimana mono õ di. Tawamhã taha ré, te Dãhã nhihudu norĩ hã tiꞌa zô sima sõpré, tite uptabi da, te te sima ꞌmasãmri zaꞌra wa, iwa ꞌre hâimana zaꞌra mono da. E marĩ wa. Zahadu Izaraéu nhihudu hâiba amo norĩ siré, tite tiꞌa da hã te te sima dame ꞌmaiꞌâri zaꞌra õ wa.
2 Tahawa Dãhã nhihudu norĩ, ma tô uburé tite zaꞌra aꞌuwẽ ꞌremhã 5 na aibâ isiꞌwapé waihuꞌu pese norĩ hã siwi pisutu zaꞌra. Tawamhã ta norĩ hã ma tô ꞌrinhoꞌu Zora hawi, duré ꞌrinhoꞌu Estaꞌo hawi siꞌabaꞌré da, satõrĩ zaꞌra, tiꞌa te te siwi waihuꞌu da, te te ꞌmaiwapsãiꞌa zaꞌra da hã. Tawamhã ta norĩ, Efraĩ tiꞌai ãma ẽne ꞌre ihâimana mono u oto sihutu wamhã, ma tô Micaha nhorõwa u aiꞌabaꞌré, tame ãma awẽ zaꞌra da.
3 Tawamhã siꞌubumroi ré, ma tô aibâ iprédupté levita norĩ siré tame ꞌre isãmra mono mreme te te iwapari zaꞌra hã, siwi mremei huꞌu. Tahawa ꞌrâwi itẽme te te sina rotété zaꞌra wamhã, ma tô ãne siwi sadanha:
— E marĩ te ãmemhã iꞌmanha. Duré e ꞌwa hã ma tô we ãwamhã asaprõ.
4 Tawamhã iprédupté, Mica te te tãma iꞌmanharĩzé hã ma tô tãma wasuꞌu zaꞌra ãne:
— Ta hã ma tô ĩnhe, ite sasedoti na tãma ꞌre ĩhâimana mono da.
5 Tahawa, te iprédupté ma nharĩ zaꞌra ãne:
— Maꞌãpé ꞌRe ihâimana uꞌâsi mono sadanharĩ, rowẽ na za iwasiꞌabaꞌréi wẽ zém na hã apâ bâdâdi na.
6 Tawamhã sasedoti, ma te ãma sadaꞌâbâ zaꞌra ãne:
— Asina aihâtâꞌâ zaꞌra waꞌaba tõ. Uburé Danhibꞌapito, apâ iꞌaiꞌabaꞌréi waꞌaba zé bâtâ na hã te za asiré tihâimana zaꞌra waꞌwa.
7 Tawamhã ãne pari 5 na aibâ norĩ ta hawimhã ma tô oto wairé. Tahawa, ma tô aiꞌabaꞌré, ꞌrinhoꞌu Laisi na isisi u. Tawamhã tamomo oto sihutu wamhã, ma tô tame dasima iwẽ na ꞌre idahâimana zaꞌra mono zém na hã ꞌmadâꞌâ zaꞌra, sidõniu norĩ ꞌre ihâimana zaꞌra mono sine hã. Ta norĩ hã te sima iwẽ na, atãma na, duré niꞌwa te te ꞌre ꞌwapé zaꞌra mono ãna ꞌre hâimana zaꞌra. Ta norĩ ma te uburé marĩ tãma ꞌre hâimana zaꞌra, marĩ zô tiwi ꞌre rowaptâꞌâ zaꞌra mono ãna. Te duré sidõniu norĩ nhiti romhâ na ꞌre hâimana zaꞌra. Duré tisiré aꞌuwẽꞌõ norĩ nhiti, te romhâ na ꞌre hâimana zaꞌra.
8 Tawamhã 5 na aibâ norĩ, Zora u, duré Estaꞌo u apâ te te sina siri zaꞌra wamhã, ma tô isiré aꞌuwẽ norĩ sadanharĩ zaꞌra, marĩ hã te te siwi iꞌupsibi me zaꞌra zém na hã.
9 Tahawa, ma te ãma sadaꞌâbâ zaꞌra ãne:
— Oto wa te wasiwi wanoꞌõ waꞌaba! Tiꞌa hã wa tô wasiwi ꞌmadâꞌâ ni, iwẽ uptabi na! Pra! E niha! Asirési suꞌu zaꞌra waꞌaba! Airési ãna aiꞌubumroi waꞌaba tõ! Saꞌẽtẽ waptu na maꞌãpé aiꞌabaꞌréi waꞌaba, tiꞌa hã asiwi âri aba hâ!
10 Õmemhã te za aꞌuwẽ isimiꞌumnhasi wẽ hã iꞌmadâꞌâ zaꞌra waꞌwa. Ta norĩ nhiptiꞌa hã saꞌẽtẽ uptabi di. Taha ꞌremhã marĩ zô rowaptâꞌâ waihuꞌu õ di. Ã hã ma tô ꞌRe ihâimana uꞌâsi mono hã asibꞌrata aima sõmri zaꞌra waꞌwa.
11 Tawamhã Dãhã nhihudu norĩ, Zora hawi duré Estaꞌo hawi, ma tô 600 na aibâ norĩ ihâiba na wairé, simnhiꞌãsi ré siꞌwapé zaꞌra da.
12 Oto siꞌabaꞌréi wamhã, ma tô ꞌri nhoꞌu Quiriate-Zearĩ bâtâ zasizém niwĩ sima ꞌri nhoré zaꞌra, Zuda tiꞌai ꞌre ihâimana ãma. Tahawa ta hã romnhisi te zahadu ãhã na zama da te ãma ꞌre rowamri zaꞌra, Maꞌane-Dã na.
13 Tawamhã ta hawi Efraĩ tiꞌai ꞌre ẽne ihâimana u siꞌabaꞌréi wamhã, ma tô oto Micaha nhorõwa u aihutu.
14 Tawamhã 5 na aibâ norĩ, Laisi ãma tiꞌa te te siwi sabu da, isiꞌabaꞌré norĩ hã te ãne tisiré norĩ ma nharĩ zaꞌra:
— E ma tô asiwi iwaihuꞌu ꞌwa, wede na romhâibarĩ ẽtẽ waipo prã prata na ihâiba upsibi ré, ã hã ꞌriꞌre ꞌre isa mono na hã, duré ihâiba amo norĩ romhâibarĩ iwa ꞌre isimasa mono na hã, sasedoti siꞌuzazé ihâ pa ihâimana na hã. E niha te bété ã norĩ na ãma irobꞌmadâꞌâ zaꞌra waꞌwa, za marĩ, wa te tãma iꞌmanharĩ zaꞌra zéb da na hã.
15 Tawamhã Micaha nhorõwa u, levita norĩ siré iprédupté ꞌre isãmra mono zéb u ma tô asisi. Sisisi wamhã, ma tô iprédupté hã siwi sawi.
16 Taha ré, Dãhã nhihudu norĩ 600 na dasiꞌwapéi ꞌmanharĩꞌwa norĩ ꞌridawa zaꞌẽtẽ ãma ma tô simire sina mapari zaꞌra.
17 Tawamhã 5 na ihâiba na robzabuiꞌwa norĩ hã ma tô ꞌri para u asisi. Tahawa, wede na romhâibarĩ ẽtẽ waipo prã prata na ihâiba upsibi hã ma tô siwi tiꞌâ. Tawamhã duré ihâiba amo romhâibarĩ norĩ hã ma tô siwi waibu, sasedoti siꞌuzazé me. Ãhã ré, ma tô 600 na dasiꞌwapéi ꞌmanharĩꞌwa norĩ simnhiꞌãsi ré, sasedoti siré hã ꞌridawa zaꞌẽtẽ ãma mapari zaꞌra.
18 Tawamhã aibâ norĩ, Micaha nhorõwa u sisisi wamhã, ma tô romhâibarĩ norĩ, tãma iwazéb zahi zaꞌra hã sasedoti siꞌuzazé me hã siwi waibu zaꞌra. Tahawa, te sasedoti sadanharĩ zaꞌra ãne:
— E marĩ te asiwi iꞌmanharĩ ꞌwa.
19 Tawamhã ma te asa ãma sadaꞌâbâ zaꞌra ãne:
— Ariꞌiwi asãmra. Nharĩ tõ. We wasiré aimorĩ zaꞌra na, sasedoti na duré wama rotiꞌwa na wama ꞌre aihâimana zaꞌra mono da. E aima hã wẽ õ di bété, nima norĩ Izaraéu nhihudu norĩ ma, misi haré sasedoti na ꞌre iꞌaihâimana mono da hã, misi aibâ nhibꞌaꞌuwẽ ma si sasedoti na ꞌre iꞌaihâimana mono zéb upana.
20 Tawamhã ãne te te tãma waihuꞌu wa, sasedoti ma hã rowẽ di. Tahawa romhâibarĩ norĩ iwazéb zahi zaꞌra hã sasedoti siꞌubuzé ihâ pa me ma tô waibu. Taha pari ma tô duré oto mo, dama wapsãiꞌaꞌwa norĩ siré, duré dasiꞌwapéi ꞌmanharĩꞌwa norĩ siré.
21 Tawamhã ta norĩ tirob u apâ siꞌãsi zaꞌra da hã, ma tô aiꞌuté norĩ, powawẽ norĩ hã duré tinhimarĩ hã danhowamhã sõré zaꞌra. Taha pari ma tô oto aiꞌabaꞌré.
22 Tawamhã oto Micaha nhorõwa ma sapriꞌi zaꞌra wi, ma tô Mica isõrõwa waptoma ꞌre idasiꞌubumroi mono norĩ hã sima ubumro, Dãhã nhihudu norĩ zada. Tahawa, isarina oto siꞌabaꞌréi wamhã ma tô siwi sasãmri zaꞌra.
23 Tawamhã Dãhã nhihudu norĩ we isarina isiꞌabaꞌréi hârâ te te wapari zaꞌra wa, ma tô sô aipizari zaꞌra. Tahawa, ma tô Mica siwi sadanha ãne:
— E niha romhâimana bâ. E marĩ da, ã hã idaꞌahâ hã.
24 Tawamhã Mica, ma te asa ãma sadaꞌâbâ zaꞌra ãne:
— E niha te romhâimanazéb zô asiwi ĩzadanharĩ ꞌwa. A norĩ waꞌwa, ma tô romhâibarĩ, te iꞌmanharĩ hã asiwi iꞌwasari ꞌwa. Duré sasedoti te te ĩma ꞌre iromhuri mono hã ma tô asiwi isaprõni ꞌwa. Ã norĩ zaꞌu hã e marĩ ma tô ĩma siꞌmairẽ.
25 Tawamhã Dãhã nhihudu aibâ norĩ, te ãne tãma nharĩ zaꞌra:
— Wẽ di, aimreme na waꞌupi zaꞌra tõ da hã. Ãnei õ wamhã, te za aibâ iꞌrãiwaꞌro suꞌu norĩ hã asada tizahi pese zaꞌra waꞌwa. Tawamhã te za ta norĩ airési zaꞌra waꞌwa za. Ãne wamhã, te za duré uburé asibꞌaꞌuwẽ norĩ me hã aiꞌutõrĩ ꞌwa.
26 Tawamhã ãne te te tãma nharĩ zaꞌra pari, ma tô Dãhã nhihudu norĩ hã timorĩ na uzusi zaꞌra oto. Ãhã wa, Mica, siptete uptabi na te te ꞌmadâꞌâ waihuꞌu zaꞌra wa, ma tô õne haré ꞌri u hã aipiꞌra.
27 Tawamhã Dãhã nhihudu aibâ norĩ, ma tô Mica marĩ te te iꞌmanharĩ zaꞌra hã siwi ꞌwasa. Sasedoti te te tãma ꞌre iromhuri mono zama ma tô duré siwi saprõ. Tawamhã ma tô oto aiꞌabaꞌré, Laisi u, tô õ hã ꞌri nhoꞌõmo ãma dasima iwẽ na, duré atãma ꞌre idahâimana zaꞌra mono zéb u. Tahawa, ma tô iwa ꞌre idarob zaꞌra mono norĩ hã siwi uprosi. Ma tô duré ꞌri nhoꞌõmo ãma hã siwi roꞌo.
28 Tahawa, niꞌwa hâimana õ di, ã hã aꞌuwẽ norĩ te te isõꞌreptu zaꞌra da hã. E marĩ wa. Laisi hã, Sidõ nhiti romhâ na ꞌre hâimana mono wa. Duré ta norĩ, aꞌuwẽ aimawi me hã ꞌre sisadawa pibu zaꞌra mono õ di. Taha ꞌrinhoꞌu hã, Bete-Reobe na ꞌri waꞌõtõ ꞌrata ẽtẽ nhiꞌriti wa romharé wamhã, ma tô ꞌre hâimana. Tawamhã Dãhã nhihudu norĩ, ma tô apâ Laisi na ꞌri nhoꞌõmo nhisi hã siwi ꞌri, tame iwa ꞌre hâimana zaꞌra mono da hã oto.
29 Tahawa, ma tô ꞌrinhoꞌu hã siwi sisi, Dã na. E marĩ wa. Ãne robꞌre puꞌuꞌwa norĩ hiꞌrata nhisi ꞌre hâimana mono wa, Zacoho ꞌra hã.
30 Tawamhã Dãhã nhihudu aibâ norĩ ma tô romhâibarĩ hã oto sima sãrĩ zaꞌra, hâiwi sab da, ãma ꞌre iwata zaꞌra mono zéb da hã. Tawamhã duré Zonata, Gésõhõ ꞌra, Mozésihi nhihudu ma tô sasedoti na Dãhã nhihudu norĩ ma tãma ꞌre hâimana zaꞌra. Ta hã isihudu norĩ me ma tô Dãhã nhihudu norĩ ma sasedoti na hã te te tãma ꞌre romhuri zaꞌra, ãma danhibꞌaꞌuwẽ zaꞌra da, da te waibui wa, isiptiꞌa zaꞌra hawi da te isimroi mono zéb u.
31 Tawamhã duré Mica, romhâibarĩ te te iꞌmanharĩ hã ma tô õ norĩ ꞌratamhã ꞌre sa, Silo ãma ꞌRe ihâimana uꞌâsi mono nhorõwa hã ꞌre sa mono ré.
