Zuize 19:1-30
19 Tawamhã taha wahu mono na Izaraéu nhihudu norĩ siꞌapito ãna hã te ꞌre hâimana zaꞌra. Tahawa, te nimahã levita siꞌaibâ romhâ na Efraĩhĩ te tiꞌai ãma ẽne ꞌre ihâimana mono niwĩmhã ꞌre sãmra. Ta hã ma tô Belẽ hawimhã, Zuda na rowamri hawimhã imro prã za tãma ꞌre ihâimana mono da hã sima ꞌmaiꞌãwisi.
2 Tane nherẽ, ma tô piꞌõ hã aibâ aimawi na tiwi ꞌre hâimana. Tahawa Belẽ ãma timama nhorõwa u, ma tô apâ tiwi mo. Morĩ wamhã, tame ma tô maparane siꞌuiwa na aꞌamo na tiwi nhamra aꞌâ.
3 Tawamhã aibâ Belẽ u isarina morĩ da, ma tô sima rowairébé, te te sadawa pibu da, apâ isiré morĩ da. Tahawa, tite romhuriꞌwai me oto ne wamhã, ma tô awaru poꞌrepore hã siré saprõni zahuré. Ãhã wa, azarudu ma tô timama nhorõwa u hã timro si ꞌmazé. Tawamhã azarutu mama hã levita te te ꞌmadâꞌâ wamhã, ma tô pẽꞌẽ to sina tiꞌâ.
4 Tahawa isõrõwa ꞌre, hâimana da, ma tô tãma tinha. Tawamhã tame siꞌubdatõ bâtâ na ma tô iꞌratamhã tihâiba. Ãne ma tô timro me nasi oto iré tisa zahuré. Ma tô duré nasi siré ãma tiꞌawẽ zahuré.
5 Tawamhã maparane siꞌuiwa na bâdâ ãma imorĩ ãma awẽ wi utu zahuré wamhã, ma tô oto aibâ sima robꞌubumro, morĩ da apâ. Tane nherẽ, te azarutu mama hã levita ma tinha ãne:
— Aiwatobro wana ré, aꞌâ marĩ hã ꞌmaiꞌrẽne, asiptete na aimorĩ da, mrab ãna. Taha parip si te za oto aimo.
6 Tawamhã aibâ norĩ, sa da duré siré te te simihâri zahuré da ma tô siré aimasisi. Tahawa, azarutu mama te duré ãne tãma tinha:
— Ĩzawi na hã maꞌãpé duré aꞌâ aiꞌãma mara zahu, asima romhuꞌu da.
7 Tawamhã aibâ ma tô oto wahudu, watobro da hã. Tane nherẽ, azarutu mama ma tô nasi tãma tinha, aꞌâ sãmra da tô. Ãne wa, ma tô levita ãma hã duré aꞌâ tiꞌawẽ zahu.
8 Tawamhã imrotõ bâtâ ãma, ma tô robzaꞌrã ré aré duré udu, morĩ da hã. Tane nherẽ, azarutu mama ma tô duré ãne tiwi waptẽ:
— Ĩzawi na hã aꞌâ duré asa na, bâtâ u si aimorĩ da.
Ãhã wa, ma tô duré aꞌâ siré tisa zahuré, aibâ norĩ hã.
9 Tawamhã aibâ, azarutu me duré tãma iromhuriꞌwai me siꞌabaꞌré da, oto wairébé wamhã, ma tô imaprewa hã tãma tinha ãne:
— Maꞌãpé ꞌmadâꞌâ! Te za oto timara. Tahawa wẽ di, aꞌâ duré aiꞌãma iꞌawẽ da hã. Aimorĩ da wamhã, ãhã na zahadu ré te za aiwi timara. Aꞌâ duré aihâimana, asima romhuꞌu zahu da. Awẽpsi te za robzaꞌrã ré aiꞌu, apâ asõrõwa u aimorĩ da hã.
10 19:10-11 Tane nherẽ, levita ãma imara zahu da hã te te oto sima wẽ õ di. Tahawa timro prãi me hã te oto tineb zahuré. Tahawa, te duré tite awaru poꞌrepore norĩ hã siré saprõni zahuré. Tawamhã oto imarazéb u, ma tô Zebusi na ꞌri nhoꞌõmo nhisi u hã aimasisi zahuré, Zeruzalẽ na isisi amo ihâimana u. Tawamhã te romhuriꞌwa tinhibꞌihâꞌa ma tinha ãne:
— E marĩ wa, ã hã ꞌrinhoꞌu zebuzeu norĩ te* ãma hã wanhimizahâri zaꞌra õ di, aꞌâ waꞌãma awẽ zaꞌra da ãme.
11 ꞌMadâꞌâ 19:10
12 Tane nherẽ, isibꞌihâꞌa ma te ãma sadaꞌâ ãne:
— Mare di, ãmemhã wanhimizahâri zaꞌra õ di za, Izaraéu nhihudu norĩ ꞌri nhoꞌõmo wa, ꞌre ihâimana zaꞌra mono õ ãma hã. Zibea na ꞌri nhoꞌõmo nhisi u si, wa za wamorĩ na hã ãma uzusi zaꞌra ni aꞌâ.
13 Tô wẽ di, aꞌâ suru na wasiꞌabaꞌré da hã Zibea ãma wanhotõ zaꞌra da, niha wamhã, Rama ãma wanhotõ zaꞌra da.
14 Tawamhã zebuzeu na te te roꞌrahâri zaꞌra wamhã, ma tô timorĩ na uzusi zaꞌra. Ãhã wa, ma tô oto bâdâ hã tiwi tizébré zaꞌra. Zibea u isihutuzéb ãma, Bẽzamihĩ nhihudu norĩ te ꞌri nhoꞌõmo u hã.
15 Tahawa, duré bâdâdi hawimhã ma tô apa zaꞌra, ꞌri nhoꞌõmo ãma aꞌâ ãma awẽ zaꞌra da. Tawamhã levita, ꞌre idasisõpẽtẽ pese zaꞌra mono zéb ãma ma tô nhamra. Tane nherẽ, niꞌwa hã sô hârâ zaꞌra õ di, isõrõwa ãma sõtõ zaꞌra da hã.
16 Tawamhã taha bâtâ na ihi hã ma tô roꞌrazâ, ꞌri u tiburu hawi imorĩ hã. Ta hã Efraĩhĩ nhiptiꞌai ãma ẽtẽ ãma aré ꞌre ihâimana mono. Tane nherẽ, te oto ta hã Zibea ãma ꞌre sãmra. (Tame te Bẽzamihĩ nhihudu norĩ hã ꞌre hâimana zaꞌra.)
17 Tawamhã ihi ꞌre idasisõpẽtẽ pese zaꞌra mono zéb ãma romhâ hawi we imorĩ te te ꞌmadâꞌâ wamhã, te sadanha ãne:
— E ma hawimhã a hã. E momo te duré aimo.
18 Tawamhã levita ma te sadaꞌâ ãne:
— Belẽ hawi, Zuda na rowamri hawimhã wa tô romhâ u wei mo wa hã, Efraĩhĩ nhiptiꞌai ãma ẽne ꞌre isa mono ãma ꞌre ĩhâimana mono zéb u. Wa tô aré mo, Belẽ u hã. Tane nherẽ, wa ãhã na oto apâ mo ĩnhorõwa u. Tane nherẽ, ã bâtâ ꞌremhã niꞌwa hã ĩzô hârâ õ di, aꞌâ isõrõwa ãma ĩꞌãma iꞌawẽ da hã.
19 Amnho teihi norĩ, dui me hã te wama tihâimana siromo zaꞌra, awaru poꞌrepore sazéb da hã. Iꞌuꞌẽtẽ wapu norĩ hã uwa ꞌrãi waꞌu isé me te duré wama tihâimana zaꞌra, ĩma da hã, ĩmro prã ma da hã, duré ĩma romhuriꞌwai ma da hã. Uburé te marĩ hã wama tihâimana zaꞌra, wawi sô robaba zaꞌra ãna.
20 Tawamhã te ihi tãma tinha ãne:
— We ĩsiré aiꞌabaꞌréi aba. Wa za aiwaibui wẽ waꞌwa wa hã, ĩnhorõwa u. Wa za duré aiꞌãma ĩsiꞌmadâꞌâ zaꞌra waꞌwa. Tahawa maꞌãpé ĩzawi na hã aiꞌãma awẽ zaꞌra waꞌaba tõ, ꞌre idasisõpẽtẽ pese zaꞌra mono zéb ãma hã.
21 Tawamhã tinhorõwa u te te oto simroi mono wamhã, ma tô awaru poꞌrepore ma isa hã tãma sõmri zahuré. Duré za isõrõwa ãma isimiꞌwara norĩ hã ma tô apara upsõ. Taha pari ma tô duré isihutu norĩ hã tisa tihu, te te simihâri zaꞌra sina.
22 Tawamhã pẽꞌẽ to sina te te sima robzanhamri zaꞌra ré, ma tô niꞌwam norĩ aibâ iwasédé ꞌri nhoꞌõmo ãma ꞌre ihâimana zaꞌra mono norĩ hã ꞌri siwi uirĩ, iré zaꞌra. Tahawa, ta norĩ ma tô nasi siwi ꞌridawa taꞌa. Taha sina ma tô ihi hã duré nasi siwi ꞌmahâ ãne:
— Wei wama wazere zaꞌra na rob u, aibâ asõrõwa u we isébré hã! Wa wasima wẽ zaꞌra ni, taha ãma wahâimana zaꞌra da.
23 Tawamhã ihi rob u ma tô itẽme tiwatobro zaꞌra. Watobro wamhã, ma tô ãne tãma nharĩ zaꞌra:
— Ĩsiwaihuꞌu norĩ, mare di! Ĩzawi na hã maꞌãpé iwasété uptabi hã ꞌmanharĩ zaꞌra waꞌaba tõ, aibâ ĩnhorõwa u iwisi ma, sõtõ da.
24 Niꞌã. Maꞌãpé asiwi ꞌmadâꞌâ aba, õ hã! Ãhãta te ĩꞌra sipiꞌõ hâiba ubuni ãmemhã tihâiba. Duré õhõ mro prã zama te ãmemhã tihâiba iꞌrata. Ã norĩ si wa za rob u ãma aima zaꞌra waꞌaba sani, a norĩ waꞌwa hã marĩ asima iwẽ na ãma ꞌmanharĩ zaꞌra waꞌaba da. Ãne nherẽ, aibâ ãma marĩ iwasédé hã rowazéb ãna asiwi ꞌmanharĩ aba õ di za!
25 Tane nherẽ, te te sima wẽ zaꞌra õ di, te te iwapari zaꞌra da hã. Tawamhã levita, timro prã te te paꞌâri wamhã, ma tô rob u tãma wazere zaꞌra, te te tãma hâiba nhomri zaꞌra da. Tahawa, tinhiptede te te sada ꞌmanharĩ zaꞌra wa, ma tô marabâre marĩ hã ãma ꞌmanharĩ zaꞌra. Awẽ u si ma tô tawamhã tãma marẽme zaꞌra.
26 Tawamhã awẽ wi oto piꞌõ morĩ wamhã, ma tô ꞌri ꞌre imro iwa inomrozé ꞌridawa nhoꞌremhã waptãrã. Tawamhã tamem haré ma tô nomro, ãma irowaꞌa pese zéb u.
27 Tawamhã imro awẽm na ma tô udu, timorĩ na te te oto duré ãma uzusi da. Tahawa te te oto ꞌridawa wamhã, ma tô imro prã aré tãma ihâiba hã ꞌridawa nhoꞌre iwaptã hã ꞌmadâ, sibꞌrata nomro haré ꞌridawa naꞌrata tétézé wede hã isimiꞌrãmi u.
28 Tawamhã te ꞌmahâ ãne:
— Aiwahutu! Wanem hâ!
Tane nherẽ, te te sadaꞌâbâ õ di. Tahawa ihâiba ma tô awaru poꞌrepore nhisiwi simiꞌrãmi na tihi. Taha pari ma tô oto tinhorõwa u iré saprõ.
29 Tawamhã tinhorõwa u oto wisi wamhã, ma tô sibꞌézé hã tiꞌâ. Taha na ma tô timro prã hã te te hâiba waꞌõtõ, 12 na ihâiba waꞌõtõ na. Taha pari ma tô ihâiba waꞌõno hã, Izaraéu nhihudu norĩ wamri mono bâ ãma ropé.
30 Tawamhã ãne hã uburé te te siwi ꞌmadâꞌâ wamhã, ma tô ãne sima nharĩ zaꞌra:
— Niwamhã ãne hã wa te wasiwi iꞌmadâꞌâ waihuꞌu õ! Duré niwamhã ãne hã ihâimana õ, Izaraéu nhihudu norĩ Ezitu hawi iwairébé naꞌrata zém hawimhã! Tahawa maꞌãpé ãma rosaꞌrata zaꞌra waꞌaba! E marĩ, wa za bété ãhã na awaꞌawi na hã wasiwi ꞌmanharĩ ni.
Ĩwaꞌõtõ piꞌreba watsuꞌu mono
^ 19:10 Taha ré, Izaraéu nhihudu norĩ hã zahadu Zeruzalẽ hã te te siwi âri õ di dawi.