Zuize 2:1-23
2 Tawamhã Uburé Danhibꞌapito ma hâiwa ãma romhuriꞌwa Gilga na ꞌri nhoꞌõmo nhisi hawi ma tô mo, Boqui na romnhisi u. Morĩ wamhã, ma tô Izaraéu nhihudu norĩ ma nharĩ zaꞌra ãne:
— Wa hã wa tô Ezitu hawimhã asani zaꞌra waꞌwa, aihiꞌrata norĩ waꞌaba ma, tiꞌa na te tãma iropisutuzéb u, te asimroi waꞌaba mono da hã. Tahawa, wa tô tinha ãne: “Niwamhã te aima iropisutu zaꞌra waꞌaba zé hã te ĩsiwi sitob õ di za, ꞌridawa haré.
2 Tiꞌai ꞌre, aꞌuwẽ ꞌre ihâimana siromo zaꞌra mono norĩ me marĩ na ꞌre asisaze zaꞌra waꞌaba mono õ di za. Te za ihâibaꞌõ norĩ ma, isimizama zatazéb zaꞌra hã tiwi ꞌre iprub zaꞌra waꞌaba mo.” Tane nherẽ, ãne na te aima inharĩ zaꞌra waꞌaba zarina, marĩ asiwi ꞌmanharĩ aba õ di. E marĩ wa bété, ãne na ĩmreme hã asiwi ꞌmanharĩ aba õ di.
3 Tahawa wa za ãhã na aima nharĩ zaꞌra waꞌwa. Ã hã aꞌuwẽ norĩ aihawi zaꞌra waꞌaba te isani zaꞌra da hã, mare di za. Tahawa te za asitobꞌru na aima ꞌre hâimana zaꞌra waꞌwa. Te za duré ite zaꞌra ihâibaꞌõ norĩ, abazei mramizém ne na te te ꞌre iꞌaiwaibui waꞌaba mono da hã asada ꞌre hâimana zaꞌra waꞌwa.
4 Tawamhã Uburé Danhibꞌapito ma, hâiwa ãma romhuriꞌwa ãne na te te tãma waihuꞌu zaꞌra parimhã, ma tô uburé Izaraéu nhihudu norĩ hã tiꞌruꞌru.
5 Tahawa romnhisi hã Boqui* na. Tame ma tô Uburé Danhibꞌapito ma, danhimizama da te tãma ꞌre izata zaꞌra mono zém na hã, duré tãma tinhoprub zaꞌra.
Zozué idâꞌâzé wasuꞌu
6 Tawamhã Zozué, uburé Izaraéu nhihudu norĩ ma, oto siꞌabaꞌré da, te te robꞌrui wamhã, ma tô aibâ norĩ hã hâiba mono bâ misisi tite da tiꞌai waꞌõno hã te te sima waibu.
7 Tawamhã duré Izaraéu nhihudu norĩ, Zozué ꞌre hâimana mono ré, ma tô Uburé Danhibꞌapito ãma si ꞌre nomro. Duré oto dâꞌâ parim nherẽ, ma tô Uburé Danhibꞌapito ãma si ꞌre inomro mono na ãma uzusi zaꞌra, dama iꞌrãnhoꞌõmo norĩ zahadu ꞌre hâimana zaꞌra mono ré hã, Izaraéu nhihudu norĩ ma, Uburé Danhibꞌapito nhimiꞌmanharĩzé te te ꞌre iꞌmadâꞌâ zaꞌra mono norĩ hã.
8 Tawamhã Zozué, Nuhu ꞌra, ꞌRe ihâimana uꞌâsi mono nhibꞌaꞌuwẽ ma tô oto dârâ, 110 na ãma iwahum na.
9 Tahawa, ma tô ãma tiꞌa ni, isiptiꞌai waꞌõtõ wa, Timnate-Heré, Efraĩ na rowamri niwĩ ẽne ꞌre ihâimana mono ãma, Gaꞌasi na ẽtẽ nhisi ãma hâiwa nhimiꞌe niwĩ.
10 Tawamhã aꞌuwẽ norĩ hã ma tô duré uburé pese we siꞌutõrĩ. Tahawa, aꞌuwẽ ité ma tô duré Uburé Danhibꞌapito ãma ꞌre poꞌre simrami zaꞌra, Izaraéu nhihudu norĩ ma, uburé marĩ te te ꞌre iꞌabꞌmanharĩ mono zém na zama.
Izaraéu nhihudu norĩ, Uburé Danhibꞌapito wi isipizari zaꞌra zé wasuꞌu
11 Tawamhã Izaraéu nhihudu norĩ, Uburé Danhibꞌapito wi, ma tô tiwasédé hã te te ꞌre ꞌmanharĩ zaꞌra. Ma tô duré cananeu norĩ te ihâibaꞌõ norĩ na ãma ꞌre wata zaꞌra.
12 Uburé Danhibꞌapito, tihiꞌrata norĩ te ꞌRe ihâimana uꞌâsi mono, Ezitu hawi te te isani zaꞌra na ãma ꞌre iwata zaꞌra mono zém na hã, ma tô siwi tirẽ. Tahawa aꞌuwẽ iwaptoma ihâibaꞌõ norĩ ãma ꞌre iwata zaꞌra mono zém na, ma tô oto dame ãma ꞌre wata zaꞌra. Tawamhã ãne hã te te dame ꞌre ꞌmanharĩ zaꞌra mono wa, ma tô Uburé Danhibꞌapito sada ꞌre sitiꞌru zaꞌra.
13 Tahawa, Uburé Danhibꞌapito ãma ꞌre inomro mono zé hã ma tô misi haré siwi tirẽ. Ãhã wa, romhâibarĩ Baau ãma si, te oto ꞌre wata zaꞌra, Asitaroti na isisi ãma zama.
14 Tawamhã Uburé Danhibꞌapito, Izaraéu nhihudu norĩ zada hã, ma tô tinhitiꞌrui pese. Tahawa, Izaraéu nhihudu norĩ waptoma ꞌre ihâimana zaꞌra mono norĩ ma, ma tô saꞌré zaꞌra, te te nasi ꞌwapé zaꞌra da, duré te te nasi simiꞌuri zaꞌra da hã. Ma tô duré isitobꞌru norĩ nhibꞌratamhã tãma hâiba nhomri zaꞌra, aꞌuwẽ ibabarã na ꞌre ihâimana zaꞌra mono norĩ ma. Tahawa tihâiba na hã te te oto dama ãma ꞌre waꞌrãmi waihuꞌu zaꞌra mono õ di.
15 Tawamhã ꞌre siꞌwapé zaꞌra mono da, dazô ꞌre wairébé mono sidâpâsi, ma tô Uburé Danhibꞌapito hã sada ꞌre hâimana zaꞌra, te te ãma tãma iropisutu zaꞌra zéb zarina. Ãne wa, tãma ꞌre ropire uptabi zaꞌra mono di.
16 Tahawa, Uburé Danhibꞌapito ma tô Izaraéu nhihudu norĩ ma, dama iꞌrãnhoꞌu isiptede hã tãma sõmri zaꞌra, daꞌãma rowairébéꞌwa na isisi norĩ hã, te te ꞌre iꞌwapé zaꞌra mono norĩ wi, duré te te ꞌre isimiꞌuri zaꞌra mono norĩ wi, te te ꞌre isõꞌreptu zaꞌra mono ꞌwa da hã.
17 Tane nherẽ, iꞌrãnhoꞌõmo norĩ nhimiroti hã te te duré siwi ꞌre wapari zaꞌra mono õ di. Tahawa ꞌRe ihâimana uꞌâsi mono te te siwi ꞌre iwẽꞌõ zaꞌra mono zém na hã ma tô te te ãma uzusi zaꞌra, romhâibarĩ ãma si ꞌre wata uꞌâsi zaꞌra mono da. Imama zaꞌra mono si ma tô Uburé Danhibꞌapito mreme hã te te ꞌre wapari pese zaꞌra aré. Tane nherẽ, te te oto siwi ꞌre wapari pese zaꞌra mono õ di, isimiroti hã.
18 Tawamhã Uburé Danhibꞌapito, dama iꞌrãnhoꞌu te te dama ꞌre sõmri zaꞌra mono sidâpâsi, ma tô te te ꞌre pawaptob zaꞌra. Duré dama iꞌrãnhoꞌu we ꞌre hâimana zaꞌra mono sidâpâsi, ma tô Uburé Danhibꞌapito, danhitobꞌru norĩ wi hã te te ꞌre daꞌanhoꞌreptu. E marĩ wa, Izaraéu nhihudu norĩ ãma ꞌre siwamri mono wa, te te ꞌre irobzépata zaꞌra mono zém na hã, duré iwadaꞌuri pese na da te ꞌre iwati zaꞌra mono zém na.
19 Tane nherẽ, dama iꞌrãnhoꞌu ꞌre dâꞌâ zaꞌra mono sidâpâsi, ma tô we ꞌre ihâimana ꞌrata zaꞌra mono zéb u apâ ꞌre sipizari zaꞌra, timama norĩ hâimanazém nhipai u iwasété na. Tahawa ma tô romhâibarĩ ãma si ꞌre nomro mono da hã te te sima ꞌre wẽ zaꞌra. Ma tô duré ãma ꞌre wata zaꞌra, ihâibaꞌõ norĩ ãma hã. Tahawa tipẽꞌẽ tete na ꞌre ihâimana wasété zaꞌra mono zém na ma tô te te ãma ꞌre uzusi zaꞌra.
20 Tahawa Uburé Danhibꞌapito, Izaraéu nhihudu norĩ zada, sahi uptabi zaꞌra wa, te ãne tinha:
— Ã hã aꞌuwẽ norĩ, ma tô ĩnhimiroti hã siwi upto, ihiꞌrata zaꞌra norĩ ma, te tãma iꞌru zaꞌra hã te te siwi ꞌre nomri pese mono da. Ã norĩ, ĩnhimiroti te te siwi ꞌre wapari mono õ wa,
21 ã hã tiꞌai hawimhã aꞌuwẽ mono bâ te tãma isani zaꞌra da hã mare di za, Zozué dâꞌâ wa, te te isate mono õ hã.
22 Ãhã uꞌâbâmhã wa za Izaraéu nhihudu norĩ hã aꞌâ te ꞌre ꞌmadâꞌâ zaꞌra, sena na ĩte bâdâdi na ãma ꞌre inomro mono zô, ihiꞌrata norĩ hã ãma ꞌre inomro mono ne zô.
23 Ãne ma tô Uburé Danhibꞌapito, aꞌuwẽ norĩ ma, waprosi zaꞌra, tiꞌai ꞌre aꞌâ tô ꞌre hâimana zaꞌra mono da. Tahawa õne haré awaꞌawi te te sani zaꞌra õ di, Zozuéhé ma, aꞌuwẽ mono bâ te te tãma isõmri zaꞌra õ ãma hã.
Ĩwaꞌõtõ piꞌreba watsuꞌu mono
^ 2:5 Boqui hã hebreu norĩ mreme na “iꞌruꞌru norĩ” te wasuꞌu.
