Zuize 20:1-48
20 Tawamhã ãne wa, uburé Izaraéu nhihudu norĩ, hâiwa nhimiꞌe niwĩ Dãhã nhihudu ꞌre ihâimana zaꞌra mono hawimhã, Beseba, hâiwa nhimire niwĩ ꞌre ihâimana zaꞌra mono hawim norĩ me, duré Ziliadi, bâtâ pusizém niwĩ ꞌre ihâimana zaꞌra mono hawim norĩ me, ma tô Mispa na ꞌri waꞌõtõ nhisi ãma siꞌrãꞌõtõ. Misi dahâiba ne ma tô Uburé Danhibꞌapito nhoꞌremhã siꞌubumro.
2 Tawamhã uburé Izaraéu nhihudu nhibꞌihâꞌa norĩ hã ma tô ꞌRe ihâimana uꞌâsi mono nhibꞌaꞌuwẽ norĩ isiꞌrãꞌõtõzéb ãma dame tihâimana zaꞌra. Tame te duré 400 miu na aibâ norĩ hã dame tihâimana zaꞌra, sibꞌézé ꞌwa pa ré.
3 (Tawamhã Bẽzamihĩ nhihudu norĩ, Izaraéu nhihudu hâiba amo norĩ, uburé Mispa u te te isaiꞌuri zaꞌra zém na ma tô waihuꞌu zaꞌra.) Tawamhã Izaraéu nhihudu norĩ te anharĩ zaꞌra ãne:
— E niha, ma tô dapãrĩ danhimiꞌmanharĩ wasété uptabi hã watobro.
4 Tawamhã levita, imro piꞌõ, da te tiwi iwĩrĩ, te ãne tãma ãma rowasuꞌu zaꞌra:
— Zibea u, ĩmro prã me wa tô aimasisi ni, Bẽzamihĩ nhihudu norĩ nhiptiꞌai ãma aꞌâ wanhotõ da.
5 Tawamhã Zibea ãma aibâ norĩ, ma tô bara na we ĩzô aiꞌabaꞌré, te te siwi ĩrési da. Tahawa, ma tô ꞌri hã siwi uirĩ, ĩré. Ta norĩ hã ma tô sima wẽ zaꞌra, te te duré siwi ĩwĩrĩ da. Tane nherẽ, ĩmro prã ĩma ꞌre ihâimana mono da si, ma tô tinhiptede hã sada ꞌmanharĩ zaꞌra. Ãne wa, ma tô taha si ĩꞌupana sina rosõꞌõtõ, dâꞌâ da hã.
6 Tawamhã wa hã wa tô ihâiba tiꞌâ. Te âri wamhã, wa tô te hâiba waꞌõtõ. Taha pari, wa tô duré 12 na ihâiba waꞌõno hã Izaraéu nhihudu norĩ wamri mono bâ ãma te tãma ropé zaꞌra. Ã hã aꞌuwẽ norĩ ma tô wate aꞌuwẽ ꞌremhã iwasété uptabi hã siwi tãma ꞌmanha.
7 A norĩ waꞌwa hã te uburé ãme Izaraéu nhihudu norĩ si aihâimana zaꞌra waꞌwa. Tahawa oto wa te wasima rowairébé zaꞌra waꞌaba, marĩ wa te wasiwi iꞌmanharĩ zaꞌra zéb da hã.
8 Tawamhã Izaraéu nhihudu norĩ, misi aibâ iwahutu ne ma tô aihĩni pese misi haré tiwahutu zaꞌra. Tahawa, te simisutu nharĩ zaꞌra ãne, aiwapsi:
— ꞌRi u apâ iwasiꞌabaꞌré da hã mare di za. Duré niꞌwam norĩ wanhorõwa u iwaꞌmaimorĩ da hã mare di za.
9 Tahawa oto niꞌwam norĩ aibâ wa te wasiwi pisutu zaꞌra waꞌaba, Zibea te te siwi iꞌwapé da hã.
10 100 na aibâ norĩ hã 10 na iwaꞌõtõ na, duré niha wamhã, miu na aibâ norĩ hã 100 na iwaꞌõtõ na, duré niha wamhã, 10 miu na aibâ norĩ hã miu na iwaꞌõtõ na wa za Izaraéu nhihudu norĩ hawimhã wasiwi pisutu zaꞌra ni, dasa norĩ hã te te siwi ubumro da, dasiꞌwapéi ꞌmanharĩꞌwa norĩ ma da hã. Tawamhã dasiꞌwapéi ꞌmanharĩꞌwa norĩ te za Zibea ãma ꞌre ihâimana zaꞌra mono norĩ ma, niha hã tãma robꞌmanharĩ wasété zaꞌra za, marĩ Izaraéu nhihudu norĩ nhiptiꞌai ꞌre, siséb ãna te te iꞌmanharĩ wasété uptabi zaꞌra norĩ ma hã.
11 Tawamhã uburé Izaraéu nhihudu norĩ, ma tô misi dahâiba ne siꞌrãꞌõtõ, ꞌrinhoꞌu Zibea te te siwi ꞌwapé da hã.
12 Tawamhã Izaraéu nhihudu norĩ, romreme ꞌwapéiꞌwa norĩ hã ma tô ꞌmazatõrĩ zaꞌra, Bẽzamihĩ nhihudu norĩ tẽme siꞌabaꞌré da hã tiꞌai mono bâ. Tawamhã ma tô tãma nharĩ zaꞌra, ãne:
— E niha hã ma tô aiꞌreb zaꞌra waꞌaba nima norĩ iwasété uptabi hã siwi ꞌmanha.
13 Tahawa ãhã na aibâ iwasété norĩ hã te za wama ihâiba nhomri zaꞌra waꞌwa, wa te wasiwi uprosi da. Ãne wamhã, Izaraéu nhihudu norĩ ma robꞌmanharĩ wasétézé hã wa za wasiwi wazere ni.
Tane nherẽ, Bẽzamihĩ nhihudu norĩ hã, tisiré Izaraéu nhihudu norĩ mreme hã te te wapari zaꞌra õ di.
14 Tawamhã ta norĩ hã ma tô tite zaꞌra ꞌri nhoꞌõmo hawimhã uburé wairé. Ãhã wa, ma tô Zibea u sitẽme sito, Izaraéu nhihudu norĩ siꞌmairẽme hã te te siwi ꞌwapé da.
15 Tawamhã tô taha bâtâ na ma tô tite zaꞌra ꞌri nhoꞌõmo ãma 26 miu na ihâiba na dasiꞌwapéi ꞌmanharĩꞌwa norĩ hã siwi waibu, isiꞌwa iꞌwa pa ré hã. Taha pari Zibea ãma ꞌre ihâimana zaꞌra mono norĩ hã ma tô duré 700 na ihâiba na da te ipisutu zaꞌra norĩ si siꞌrãꞌõtõ,
16 isimiꞌe norĩ si hã. Ta norĩ hã siwaꞌru powawẽ hâ ꞌmanharĩ ꞌre ẽtẽ na te za õne uꞌâ misi dazéré hã te te ãma ꞌre uwaimrami zaꞌra, niwamhã te te ãma ꞌre simini zaꞌra mono ãna.
17 Tawamhã Izaraéu nhihudu norĩ, Bẽzamihĩ nhihudu norĩ te te iꞌwapé zaꞌra da hã, ma tô duré 400 miu na dasiꞌwapéi ꞌmanharĩꞌwa norĩ, dasiꞌwapé tãma iwaihuꞌu pese norĩ hã siꞌrãꞌõtõ, siꞌwa ré.
18 Tawamhã Izaraéu nhihudu norĩ, Bétéu ãma Uburé Danhibꞌapito ãma ꞌre iwata zaꞌra mono zéb u ma tô aiꞌabaꞌré. Siꞌabaꞌréi wamhã, ma tô ãne ꞌRe ihâimana uꞌâsi mono hã siwi sadanha:
— E ma hã te za wate aꞌuwẽ norĩ imorĩꞌrata na, Bẽzamihĩ nhihudu norĩ hã siwi ꞌwapé.
Tawamhã Uburé Danhibꞌapito, ma te ãma sadaꞌâbâ zaꞌra ãne:
— Zudaha nhihudu norĩ.
19 Tawamhã awẽm na Izaraéu nhihudu norĩ oto siꞌabaꞌréi wamhã, ma tô Zibea ꞌrata romhâ ꞌmanharĩ na ꞌri hã sima sõré.
20 Tahawa Izaraéu nhihudu norĩ, Bẽzamihĩ nhihudu te te ꞌwapé zaꞌra da iwairébé norĩ hã, ma tô Zibea nhoꞌremhã oto simasa, te te siwi isahui ma ropibu ma.
21 Tawamhã Bẽzamihĩ nhihudu norĩ dasiꞌwapéi ꞌmanharĩꞌwa ꞌri nhoꞌõmo hawimhã ma tô tãma watobro. Tahawa mara simei õ ré, ma tô ta norĩ hã, Izaraéu nhihudu norĩ te, dasiꞌwapéi ꞌmanharĩꞌwa norĩ hã 22 miu na siwi uprosi.
22 20:22-23 Tawamhã Izaraéu nhihudu norĩ, Uburé Danhibꞌapito ãma ꞌre idawata zaꞌra mono zéb u apâ siꞌabaꞌréi wamhã, ma tô isõꞌremhã tiꞌruꞌru, ãma ihâiwahâ pese zaꞌra tẽme. Tahawa ma tô ãne Uburé Danhibꞌapito hã siwi sadanha:
— E wa za duré apâ wasina siri zaꞌra ni, wasisãnawã Bẽzamihĩ nhihudu norĩ, wa te ꞌwapé zaꞌra da hã.
— Ĩhe. — Ãne ma te ꞌRe ihâimana uꞌâsi mono hã ãma sadaꞌâbâ zaꞌra.
Tawamhã Izaraéu nhihudu norĩ dasiꞌwapéi ꞌmanharĩꞌwai ma hã, ma tô apâ tãma rowẽ wairé. Tahawa ite dasiꞌwapéi ꞌmanharĩꞌwa norĩ, ma tô apâ tizabzé mono bâ simasa, imorĩꞌrata na siꞌwapé zaꞌra da, isimasa mono zéb ãma.
23 ꞌMadâꞌâ 20:22
24 Tawamhã Izaraéu nhihudu norĩ, Bẽzamihĩ nhihudu norĩ maparane ãma te te ꞌwapé zahu zaꞌra da hã, te te ropãrĩ zaꞌra mono sina, sisõré pese na ma tô tãma mo.
25 Tawamhã dasiꞌwapéi ꞌmanharĩꞌwa Bẽzamihĩ nhihudu norĩ, Zibea hawimhã ma tô tiwairébé na sahu zaꞌra. Ãhã wa, dasiꞌwapéi ꞌmanharĩꞌwa norĩ dasiꞌwapé tãma iwaihuꞌu pese norĩ hã isiꞌwa ré hã ma tô 18 miu na siwi uprosi.
26 Tahawa uburé Izaraéu nhihudu norĩ, ma tô Bétéu u apâ aiꞌabaꞌré, ꞌruꞌru da hã. Tawamhã tame Uburé Danhibꞌapito nhoꞌre hâimana zaꞌra wamhã, saihuri ãna, ma tô tihâimana zaꞌra, ãma ihâiwahâ pese zaꞌra zéb u. Tawamhã tinhimizama zata na ma tô tãma tinhoprub zaꞌra, ꞌRe ihâimana uꞌâsi mono ma, danhoprubzé ãma irowẽ zaꞌẽtẽ na.
27 Ãhã wa, Izaraéu nhihudu norĩ ma tô Uburé Danhibꞌapito hã siwi sadanha. (Taha ré, te Bétéu ãma wedehâꞌre hã za, ꞌRe ihâimana uꞌâsi mono ẽtẽpoꞌo na te te ãma irobꞌuiꞌéré ré hã.
28 Tawamhã Finéa, Eriazaha ꞌra, Arãhã nhihudu hã ma tô dasiwi pisutu ni wedehâꞌre te te ꞌre iꞌmadâꞌâ mono da hã.)
Tawamhã ta norĩ te te siwi isadanharĩzé hã ãne:
— E wa za duré wawairébé na sahu zaꞌra ni, wasisãnawã Bẽzamihĩ nhihudu norĩ wa te ꞌwapé zaꞌra da hã. Niha wamhã, e wa za oto mazahâri zaꞌra ni.
Tawamhã Uburé Danhibꞌapito, ma te ãma sadaꞌâbâ zaꞌra ãne:
— Ma! Te za iꞌwapé zaꞌra waꞌwa. E marĩ wa. Wa hã wa za oto asibꞌrata aima hâiba nhomri zaꞌra waꞌwa.
29 Tawamhã Izaraéu nhihudu norĩ, ma tô nima norĩ tite dasiꞌwapéi ꞌmanharĩꞌwa, ꞌrinhoꞌu Zibea zadaꞌréi baba simaꞌuri sina hâimana zaꞌra da hã, sõré zaꞌra.
30 Tahawa siꞌubdatõ bâtâ ãma ma tô Bẽzamihĩ nhihudu norĩ te, dasiꞌwapéi ꞌmanharĩꞌwa norĩ da hã te te ropãrĩ zaꞌra mono sina, sisõré pese na apâ tãma mo, te te ꞌwapé zaꞌra da. Tawamhã dasiꞌwapéi ꞌmanharĩꞌwa imorĩꞌrata na siꞌwapé zaꞌra da isimasam ne, ma tô Zibea nhoꞌremhã simasa.
31 Tawamhã Bẽzamihĩ nhihudu norĩ dasiꞌwapéi ꞌmanharĩꞌwa, ma tô oto dazô wairé, romhâ prã na ꞌri ahâ nhiti siꞌwapé zaꞌra da. Duré imorĩꞌrata na te te siwi iꞌmanharĩ ne, ma tô Bétéu nhoꞌõmo bâdâdi inomro na nima norĩ pãrĩ na ãma sãnaꞌrata zaꞌra, duré Zibea nhoꞌõmo bâdâdi inomro na duré sõꞌawi itehudu ꞌre isaꞌwari mono na. Ãhã wa, ma tô duré 30 na siwi uprosi Izaraéu nhihudu hã.
32 Tahawa te Bẽzamihĩ nhihudu norĩ nharĩ zaꞌra ãne:
— Iwana wa te ãma iꞌaiꞌuté zaꞌra ne, wa tô duré ãhã na hã ãma aiꞌuté zaꞌra ni.
Tane nherẽ, te Izaraéu nhihudu norĩ hã sima nharĩ zaꞌra ãne:
— Oto sena ne hã taré waꞌuni niwĩ tãma wasiꞌré zaꞌra waꞌaba mono, wei wazarina ꞌri ahâ nhiti sina pahâ zaꞌra da, bâdâdi u.
33 Tawamhã ta hawi dasiꞌwapéi ꞌmanharĩꞌwa Izaraéu nhihudu norĩ isõꞌuma tãma siꞌré zaꞌra mono wamhã, ma tô Baau-Tama ãma sitẽme ubumro. Tane nherẽ, aibâ norĩ ꞌrinhoꞌu te te siwi iꞌuirĩ norĩ, ma tô taha ré Zibea ꞌrata romharé wa isimaꞌuri zaꞌra zém hawimhã siꞌabaꞌré na wairé.
34 Tawamhã Izaraéu nhihudu norĩ dasiꞌwapéi ꞌmanharĩꞌwa isiptete si 10 miu na ihâiba na, ma tô Zibea hã siwi ꞌwapé, tete uptabi na. Tane nherẽ, Bẽzamihĩ nhihudu norĩ te te sina waihuꞌu zaꞌra õ di, za da te dasiwi iꞌuprosizém na hã.
35 Tawamhã Uburé Danhibꞌapito, ma tô Izaraéu nhihudu norĩ hã pawaptob zaꞌra, Bẽzamihĩ nhihudu norĩ dasiꞌwapéi ꞌmanharĩꞌwai ãma te te aiꞌuté zaꞌra da hã. Tahawa tô taha bâtâ na ma tô Izaraéu nhihudu norĩ, tinhitobꞌru norĩ hã 25.100 na siwi uprosi.
36 Tawamhã Bẽzami nhihudu norĩ, ma tô oto sina waihuꞌu zaꞌra, da te ãma iꞌaiꞌuté zaꞌra zém na hã za. Izaraéu nhihudu norĩ hã ma tô tãma siꞌré zaꞌra, Bẽzamihĩ nhihudu norĩ ma hã. E marĩ wa. Aibâ norĩ Zibea zadaꞌréi baba isimaꞌuri zaꞌra hã te te umnhasi zaꞌra wa.
Izaraéu nhihudu norĩ ma tô tãma siꞌré zaꞌra, Bẽzamihĩ nhihudu norĩ te te siwi iꞌwapé zaꞌra da hã. E marĩ wa. Aibâ norĩ Zibea zadaꞌréi baba isimaꞌuri zaꞌra hã te te umnhasi zaꞌra wa.
Izaraéu nhihudu norĩ te te daꞌãma iꞌaiꞌuté zaꞌra zé wasuꞌu
37 Tawamhã ta norĩ hã ma tô Zibea nhoꞌõmoi baba saꞌẽtẽ sisaꞌre. Ta norĩ te te sima ropéi wamhã, ma tô ꞌri nhoꞌõmo ãma ꞌre idahâimana zaꞌra mono hã uburé siwi daꞌuprosi.
38 Tawamhã Izaraéu nhihudu norĩ dasiꞌwapéi ꞌmanhariꞌwa, aibâ norĩ isimaꞌuri zaꞌra norĩ me, ma tô pibui pese na za marĩ iwatobrozé te te iwasuꞌuzém na hã ãma sima rowasuꞌu pese zaꞌra ãne: Romnhizé ꞌri nhoꞌõmo nhisiwi hâimo isiꞌréi mono te te ꞌmadâꞌâ zaꞌra wamhã,
39 Izaraéu nhihudu norĩ aꞌubuni wi rom na ihâimana zaꞌra hã te za we apâ sina siri zaꞌra, siꞌwapé zaꞌra da. Taha siwaprã Bẽzamihĩ nhihudu norĩ, Izaraéu nhihudu norĩ 30 na te te siwi simroi wẽ te, te ãne nharĩ zaꞌra tô:
— Ĩhe. Wa tô duré ãma aiꞌuté zaꞌrare ni, imorĩꞌrata na nimahã na wa te ãma iꞌaiꞌuté zaꞌra ne hã.
40 Tawamhã za marĩ oto ihâimanazéb da iwasuꞌuzé hã, ma tô oto watobro. ꞌRi nhoꞌõmo hawimhã romnhizé ma tô ꞌre isiꞌréi mono na hã oto tinhanaꞌrata. Tawamhã Bẽzamihĩ nhihudu norĩ sibabarãi u te te ꞌmadâꞌâ zaꞌra wamhã, ma tô tãma tipẽꞌẽwara pese zaꞌra, uburé ꞌri nhoꞌõmo ꞌre, ꞌri norĩ uzâ te te waibui mono wa.
41 Tawamhã Izaraéu nhihudu norĩ apâ te te sina siri zaꞌra wamhã, ma tô Bẽzamihĩ nhihudu norĩ hã tãma tipẽꞌẽwara pese zaꞌra, za ropire tãma ihâimana zaꞌra zé hã te te sina waihuꞌu siromo zaꞌra wa.
42 Tahawa, ma tô sisaꞌre aꞌubuni wi, rop si ꞌre isaꞌwari mono nhoꞌõmoi baba. Tane nherẽ, dawi simani waihuꞌu zaꞌra õ di. E marĩ wa. Izaraéu nhihudu norĩ sõꞌuma tiwi sito wa, duré ꞌri nhoꞌõmo hawi we isiꞌabaꞌré norĩ zama tiwi sito wa. Tahawa, ma tô siwi uprosi.
43 Tawamhã Izaraéu nhihudu norĩ tinhitobꞌru te te siwi uirĩ zaꞌra wa, ma tô duré isarina aiꞌabaꞌré, simizahâri zaꞌra ãna. Tahawa tãma wapu na ma tô sasãmri zaꞌra, Zibea bâtâ pusizém niwĩ ro ꞌre isaꞌwari mono ãma.
44 Tawamhã dasiꞌwapéi ꞌmanharĩꞌwa Bẽzamihĩ nhihudu norĩ iwẽ isiptete norĩ hã ma tô aiꞌutõ, 18 miu na.
45 Tawamhã isiré norĩ, ma tô sisaꞌre, aꞌubuni wi ropsi ꞌre isaꞌwari mono waꞌwaibaba Rimo na ẽtẽ tõmo zaꞌẽtẽ nhisi u. Tane nherẽ, ma tô bâdâdi na hã 5 miu na aiꞌutõ. Tawamhã Izaraéu nhihudu norĩ ma tô isiꞌmairẽme zarina aiꞌabaꞌré. Ãhã wa, 2 miu na ma tô siwi uprosi.
46 Tawamhã Bẽzamihĩ nhihudu norĩ tô taha bâtâ na ma tô 25 miu na aiꞌutõ, uburé dasiꞌwapéi ꞌmanharĩꞌwa isibꞌru si hã.
47 Tane nherẽ, 600 na aibâ norĩ, aꞌubuni wi ropsi ꞌre isaꞌwari mono u ma tô aimani zaꞌra, ẽtẽ tõmo wawẽ Rimo na isisi u. Tahawa, maparane siꞌuiwa na aꞌamo na ma tô aꞌâ tame tihâimana zaꞌra.
48 Tawamhã Izaraéu nhihudu norĩ, ma tô Bẽzamihĩ nhihudu norĩ nhiptiꞌai u apâ sina siri zaꞌra. Tahawa, ma tô ꞌri waꞌõtõ mono bâ tinhiꞌwa na hã daꞌuprosi zaꞌra. Ãhã wa, ma tô duré abaze zama te te tiwi simro, uburé marĩ te te isõpẽtẽ zaꞌra mono norĩ hã. Tawamhã ꞌri waꞌõtõ na te te roꞌrahâri zaꞌra mono sidâpâsi, ma tô uburé te te siwi ãma sazu zaꞌra mono.