Zuize 21:1-25
21 Tawamhã Izaraéu nhihudu norĩ, ma tô aré Mispa ãma ꞌRe ihâimana uꞌâsi mono ma, ãne tinhimiropisudu hã ꞌmanharĩ zaꞌra:
— Bẽzamihĩ nhihudu norĩ siꞌaibâ ma, wa norĩ, waꞌra sipiꞌõ wa te tãma ꞌre isaꞌré zaꞌra mono da hã mare di za, ãma ꞌre mro zaꞌra mono da hã.
2 Tawamhã aꞌuwẽ norĩ Bétéu u ma tô aiꞌabaꞌré, tame ꞌRe ihâimana uꞌâsi mono nhoꞌre daꞌãma ihâiwahâ pese zaꞌra zéb u dasiꞌubumro da. Tawamhã ta norĩ hã robzé te, wawa ꞌrãihâ na ꞌruꞌru wa,
3 ma tô ãne nharĩ zaꞌra:
— Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono, e marĩ wa, ma tô ãne hã wama tiromhâimana zaꞌra. E marĩ wa, te za wasiré aꞌuwẽ norĩ zô wawi sô tiroꞌwanhiꞌriti zaꞌra.
4 Tawamhã Izaraéu nhihudu norĩ awẽm na awẽ wi utu zaꞌra wamhã, ma tô tame ẽtẽ zaꞌra hã siwi ꞌmanha, ꞌRe ihâimana uꞌâsi mono ma. Tahawa ma tô duré tinhimizama zata na tinhoprubzém na ãma tinhoprub zaꞌra, danhoprubzé ãma irowẽ zaꞌẽtẽ na.
5 Tawamhã te anharĩ zaꞌra ãne:
— Uburé Izaraéu nhihudu norĩ waꞌõtõ ꞌremhã, e ma norĩ dame isiꞌabaꞌréi õ, Uburé Danhibꞌapito nhoꞌa, Mispa ãma dasiꞌrãꞌõno ihâimanazéb u hã.
(Ta norĩ hã sena na ropisudu hã ma tô aré siwi ꞌmanha, ãne: Niꞌwa sô Mispa ãma dasiꞌrãꞌõno ihâimana ãma robaba wamhã, te za dasiwi wĩrĩ ni.)
6 Tawamhã Izaraéu nhihudu norĩ, Bẽzamihĩ nhihudu norĩ ãma siwamri zaꞌra wa, ma tô ãne nharĩ zaꞌra:
— Ã bâtâ na Izaraéu nhihudu norĩ, misi tite aꞌuwẽ wamri hã ma tô simini zaꞌra.
7 E niha wa za Bẽzamihĩ nhihudu norĩ siꞌaibâ isiꞌmairẽme zaꞌra ma hã, piꞌõ hã tãma ꞌmaiꞌâri zaꞌra ni, Uburé Danhibꞌapito ma, wa te ropisutu zaꞌra nherẽ, za waꞌra sipiꞌõ norĩ, wa te tãma ꞌre isõmri zaꞌra mono õ na hã.
8 Tawamhã te sisadanharĩ zaꞌra ãne:
— Izaraéu nhihudu norĩ ꞌremhã, e ꞌwam norĩ Mispa ãma Uburé Danhibꞌapito ꞌre ihâimana mono zéb ãma hã isihâiꞌré zaꞌra õ.
Tawamhã ma tô siwi waihuꞌu, Zabesi-Ziliadi ãma hã dasiꞌrãꞌõtõ u idaꞌmaimorĩ õ na hã.
9 Dahâiba hã da te saꞌrata zaꞌra wamhã, niꞌwa hã Zabesi-Ziliadi hawimhã sihâiꞌré õ di.
10 Tawamhã uburé ma tô ãma sisaze zaꞌra, 12 miu na aibâ norĩ hâiba na isiptete norĩ ãne rowaihuꞌu ré te te satõrĩ zaꞌra da hã:
— Mo oto aiꞌabaꞌréi waꞌaba, Zabesi-Ziliadi ãma ꞌre ihâimana zaꞌra mono norĩ hã asiwi uprosi aba da aibâ norĩ hã, piꞌõ norĩ hã, duré aiꞌuté norĩ hã.
11 Ãne te za iꞌmanharĩ zaꞌra waꞌwa za: Uburé aibâ norĩ hã te za asiwi iꞌuprosi ꞌwa, duré uburé pese piꞌõ ihâiba ubuniꞌõ norĩ hã.
12 Tawamhã Zabesi-Ziliadi ãma azarudu ihâiba ubuni ꞌre ihâimana zaꞌra mono norĩ, ma tô 400 na ihâiba na ta norĩ hã sõpẽtẽ zaꞌra. Tahawa, ma tô Silo na ꞌri nhoꞌõmo nhisi ãma te te sima iꞌri nhoré zaꞌra u te te simro, Canaꞌã tiꞌai ãma ꞌre ihâimana mono u.
13 Taha pari uburé norĩ, ma tô romreme wẽ hã Bẽzamihĩ nhihudu norĩ ma, sõmri zaꞌra, ẽtẽ tõmo wawẽ Rimo na isisi ãma ihâimana zaꞌra norĩ ma hã, rowẽ na si siꞌwapéi ãna apâ siré ꞌre hâimana zaꞌra mono da.
14 Tawamhã Bẽzamihĩ nhihudu norĩ, ma tô apâ sina siri zaꞌra. Tahawa, Izaraéu nhihudu norĩ, Zabesi-Ziliadi hawimhã azarudu 400 na ihâiba na ma tô tãma sõmri zaꞌra, da te isimroi õ hã dazu. Tane nherẽ, uburé piꞌõ norĩ zaꞌrada hã aibâ hâiba zaꞌrata wab õ di.
15 Ãhã wa, Bẽzamihĩ nhihudu norĩ ãma hã ma tô aiwamri pese zaꞌra, Uburé Danhibꞌapito nhimiꞌmanharĩzém hawim na Izaraéu nhihudu norĩ ꞌremhã misi aꞌuwẽ wamri zô roꞌwanhiꞌriti wa, dawi.
16 Tahawa te Izaraéu nhihudu norĩ nhibꞌihâꞌa hã nharĩ zaꞌra ãne:
— Bẽzamihĩ nhihudu norĩ nhipiꞌõ hã ꞌmaihâimana õ di. E marĩ, wa za tawamhã ꞌmanharĩ zaꞌra ni, aibâ isiꞌatarẽme norĩ ma, nima hawi piꞌõ wa te we tãma iꞌmaiꞌãwisi zaꞌra da hã, ãma mro mono da.
17 Izaraéu nhihudu norĩ ꞌremhã 12 na tite aꞌuwẽ wamri hâimana zaꞌra nherẽ, te te siwi iꞌmanhimini da hã mare di. Tahawa Bẽzamihĩ nhihudu norĩ siꞌutõrĩ tõ da wa za niha hã wasiwi ꞌmanharĩ ni.
18 Tane nherẽ, waꞌra norĩ sipiꞌõ na ꞌre mro zaꞌra mono da, wa te tãma ꞌre isõmri zaꞌra mono da hã, mare di za.
E marĩ wa, ma tô ãne hã sima nharĩ zaꞌra. Ta norĩ hã ma tô aré ãne ropisudu hã siwi ꞌmanha: Niꞌwa hã Bẽzamihĩ nhihudu ma, piꞌõ te te tãma isõmri ma hã te za ropire hã niha na hã da te tãma ꞌre pisutu.
19 Tahawa te duré ãne nharĩ zaꞌra:
— Wahup sidâpâsi Uburé Danhibꞌapito te, dato isaꞌẽne hã ꞌrinhoꞌu Silo ãma ꞌre ihâimana mono zéb u hã romhuture di oto.
(Silo hã Bétéu hâiwa nhimiꞌe niwĩ te ꞌre hâimana, Rebona hâiwa nhimire niwĩmhã, duré bâdâdi bâtâ pusizém niwĩ Bétéu hawi Siquẽ u inomro hã.)
20 Tawamhã Izaraéu nhihudu norĩ nhibꞌihâꞌa, te Bẽzamihĩ nhihudu norĩ ma nharĩ zaꞌra ãne:
— Mo oto aiꞌabaꞌréi waꞌaba, uwa ꞌru ãma aimaꞌuri zaꞌra waꞌaba da,
21 ta hawi asimizaꞌrese sina robꞌmadâꞌâ zaꞌra waꞌaba da. Tawamhã Silo ãma azarudu ꞌre ihâimana zaꞌra mono, dato isaꞌẽtẽ siwaprã siꞌrẽne sina wairébé wamhã, a norĩ waꞌaba zama te za duré uwa ꞌru hawimhã aiwairébé ꞌwa za. Ãhã wa, aihâiba mono bâ azarudu waibui aba mono wamhã, te za asima isimroi waꞌaba mo za, õne haré Bẽzamihĩ nhihudu norĩ nhiptiꞌai u hã.
22 Tawamhã ãne zarina imama norĩ, duré isisãnawã norĩ wama siwapsari zaꞌra da, we siꞌabaꞌréi wamhã, wa za ãne tãma nharĩ zaꞌra ni za: “Maꞌãpé wazawi zaꞌra na hã ãma wama rowairébé zaꞌra waꞌaba, siꞌubumro da. E marĩ wa. Zabe-Ziliadi wa te ꞌwapé zaꞌra wamhã, uburé Bẽzamihĩ nhihudu norĩ ma da hã, piꞌõ norĩ ibâ na wa te wasiwi waibui õ di. Duré a norĩ waꞌwa hã ropisudu ihâimanazém na hã ãma upa zaꞌra waꞌaba dai õ di. E marĩ wa. A norĩ waꞌwa hã õ norĩ ma, aiꞌra tãma sõmri zaꞌra waꞌaba õ wa. Õ norĩ hã aima saꞌrese zaꞌra waꞌaba õ di. Piꞌuriwi ma tô dasiwi waibu zaꞌra ni.”
23 Ãne ma tô, Bẽzamihĩ nhihudu norĩ hã siwi ꞌmanha. Hâiba mono bâ azarutu norĩ siwapsisi mono ré, timro da hã ma tô te te sima pisutu. Taha pari, ma tô oto te te simro apâ. Tawamhã tirob u apâ te te sina siri zaꞌra wamhã, ma tô apâ ꞌrinhoꞌu hã te te ꞌri téb zaꞌra, tizaꞌrui mono bâ iwa ꞌre ihâimana zaꞌra mono zéb da hã.
24 Taha ré, ma tô Izaraéu nhihudu norĩ hâiba amo hã wairé. Tahawa, tite aꞌuwẽ wamri mono bâ ꞌre ihâimana zaꞌra mono zéb u ma tô apâ aiꞌabaꞌré õne haré, tiꞌra norĩ u, duré tinhiptiꞌa zaꞌra u.
25 Tawamhã tô taha mono na hã, Izaraéu nhihudu norĩ nhibꞌapito hã tãma ꞌre hâimana zaꞌra mono õ di. Hâiba mono bâ ma tô te te sima ꞌre iwẽ zaꞌra mono zéb zarina si uburé marĩ hã te te sima ꞌre ꞌmanharĩ zaꞌra.
