Zuize 3:1-31
3 Tawamhã Uburé Danhibꞌapito, nima norĩ aꞌuwẽ tiꞌai hawi te te sani zaꞌra õ di, Izaraéu nhihudu norĩ te te aꞌâ pibu zaꞌra da, Canaꞌã ãma dasiꞌwapé na zahadu dame ihâimana zaꞌra õ norĩ hã.
2 Dasiꞌwapé na uburé Izaraéu nhihudu norĩ ma, nasi aꞌâ ãma tãma sisanho zaꞌra da, ma tô ãne hã ꞌmanha, zahadu dasiꞌwapé na ãma dame ihâimana zaꞌra õ norĩ ma.
3 Tawamhã aꞌuwẽ norĩ, tiꞌai hawi da te isate mono õ norĩ hã, ãne: Filisteu norĩ te, 5 na ꞌri nhoꞌõmo ãma ꞌre ihâimana zaꞌra mono norĩ hã, uburé cananeu norĩ hã, Sidõniu norĩ hã, duré heveu norĩ ẽtẽ nhisi Libanu ãmamhã, Baau-Hermona na ẽtẽ nhisi hawi, Hamati na romnhisi hâimo inomro u hã.
4 Aꞌuwẽ mono bâ te tô tiꞌai wa ꞌre siꞌubumroi uꞌâsi, Izaraéu nhihudu norĩ ma, niha na ipibu zaꞌra zé tãma hâimana zaꞌra da, Uburé Danhibꞌapito te te ꞌmadâꞌâ zaꞌra da, Mozésihi ma tinhimiroti te te tãma isõmri hã te te ꞌre wapari pese zaꞌra mono zô, niha wamhã mare zô.
5 Ãne ma tô Izaraéu nhihudu norĩ, cananeu norĩ waꞌwamhã, hitita norĩ waꞌwamhã, amoreu norĩ waꞌwamhã, perizeu norĩ waꞌwamhã, heveu norĩ waꞌwamhã, duré zebuzeu norĩ waꞌwamhã ꞌre hâimana zaꞌra.
6 Tawamhã Izaraéu nhihudu norĩ, ã hã aꞌuwẽ norĩ na oto ꞌre mro zaꞌra mono wamhã, ma tô ite zaꞌra ihâibaꞌõ ãma isiré oto ãma ꞌre wata zaꞌra.
Otoniéhé wasuꞌu
7 Tawamhã Izaraéu nhihudu norĩ, ma tô Uburé Danhibꞌapito, tite ꞌRe ihâimana uꞌâsi mono na oto ꞌre poꞌre simrami pese zaꞌra. Duré tiwi ꞌre wasété zaꞌra mono wamhã, ma tô cananeu norĩ te ihâibaꞌõ norĩ ãma dame ãma ꞌre wata zaꞌra oto, Asera na ihâibaꞌõ nhisi ãma zama.
8 Tahawa, Uburé Danhibꞌapito, sada sahi zaꞌra wamhã, ma tô Mezopotãmia ãma apito Cuchã-Risataꞌihi ma, hâiba zaꞌré zaꞌra, te te ãma aiꞌuté zaꞌra da. Tahawa Izaraéu nhihudu norĩ nhisiwip si, ma tô apito hã ꞌre hâimana, 8 na wahub ꞌremhã.
9 Tawamhã Izaraéu nhihudu norĩ, ma tô Uburé Danhibꞌapito wi mreme ꞌrãihâ na te te ꞌre rowaptẽrẽ zaꞌra. Tahawa, ma tô aibâ itẽme ꞌmazatõrĩ zaꞌra, te te sõꞌreptu zaꞌra da hã. Aibâ Otonié, Quenazihi ꞌra, Calebihi no sipodo hã.
10 Tawamhã Uburé Danhibꞌapito pẽꞌẽzani iwa sébré wa, ma tô Izaraéu nhihudu norĩ ma siꞌiꞌrãnhoꞌu. Tawamhã Otonié, ma tô dasiꞌwapéi u watobro. Watobro wamhã, ma tô Uburé Danhibꞌapito hã pawapto, Mezopotãmia ãma apito na te te aiꞌuté da hã.
11 Tawamhã 40 na wahub ꞌre, ma tô rowẽ si ro hã daré nomro, Otonié Quenazihi ꞌra idâꞌâzéb u.
Eudihi wasuꞌu
12 Tawamhã Otonié dâꞌâ parimhã, Izaraéu nhihudu norĩ hã ma tô duré apâ Uburé Danhibꞌapito wi tiwi ꞌre wasété zaꞌra. Ãhã wa, ma tô Uburé Danhibꞌapito, Moabi ãma apito Égrõhõ ma, isiptetezé tãma tisõ, siptete uptabi na isipai u zaꞌra ꞌre hâimana mono da.
13 Tawamhã Égrõ, ma tô amonita norĩ hã duré amalequita norĩ hã sima ꞌrãꞌõtõ. Ãhã wa, ma tô Izaraéu nhihudu norĩ hã ꞌwapé zaꞌra. Tahawa, ma tô Zerico hã siwi tiꞌâ, ꞌrinhoꞌu norõwede ré hã.
14 Tawamhã Izaraéu nhihudu norĩ, ma tô Égrõhõ nhibꞌratamhã ꞌre hâimana zaꞌra, 18 na wahub ꞌre.
15 Tahawa Uburé Danhibꞌapito wi, Izaraéu nhihudu norĩ, mreme ꞌrãihâ na duré apâ te te tiwi rowaptẽrẽ na sahu zaꞌra wa, ma tô aimawi aibâ hã duré itẽmemhã ꞌmazatõrĩ zaꞌra, te te ꞌre iꞌanhoꞌreptui mono da hã. Aibâ, Eudi, Geraha ꞌra, Bẽzamihĩ nhihudu hawi aꞌuwẽ hã. Eudi hã isimiꞌe. Tawamhã Izaraéu nhihudu norĩ, ma tô dapawaꞌâbâzé sipoꞌore tãma ꞌru zaꞌra, Moabi ãma apito Égrõhõ ma, te te âri da hã.
16 Tawamhã Eudi dasiꞌwapézé iꞌwa pa iꞌwa siꞌuiwa hã ma tô ꞌmanha, 1 metru aiwa ãma isipoꞌo na iꞌwa pibuzém na. Tawamhã ta hã ma tô tiꞌuza ꞌrowi tiꞌawasisizém na ãma wasisi, tiꞌaꞌre nhimire niwĩ.
17 Taha pari, ma tô robꞌuiprazé dama iꞌrãnhoꞌõmo ma, da te ꞌre ipoꞌo zaꞌra mono hã tãma tiꞌâ, apito Égrõ aibâ ihâipese ma.
18 Tawamhã te te tãma sõmri pari, ma tô Eudi, roꞌwapéiꞌwa norĩ oto satõrĩ zaꞌra apâ.
19 Tane nherẽ, Eudi apâ ma tô sina siri ẽtẽ ꞌmanharĩ na romhâiba Gilga na romnhisi ꞌrata ꞌre isimasa mono zéb u. Tahawa, tame ma tô apito ma tinha ãne:
— Apito, marĩ iwaihuꞌuꞌõ te aima iwasuꞌu da hã te ĩma tihâiba.
Tawamhã apito ite ꞌriꞌre waꞌwa hawi uburé dawairébé da hã, ma tô dama robꞌru. Tahawa isadawa para ma tô uburé pese tawairébé ni, rob u hã.
20 Tawamhã apito rowaꞌro wa, te ꞌri zahâpâ ꞌre isimasisi mono zéb ãma nhamra. Tawamhã Eudi ꞌrâwi itẽme wisi wamhã, te ãne tãma tinha:
— ꞌRe ihâimana uꞌâsi mono mreme te aima iwasuꞌu da hã te ĩma tihâiba.
Tawamhã apito ma tô hâiwi za.
21 Tahawa, Eudi tinhimiꞌe niwĩ dasiꞌwabꞌézé iꞌwa pa, ma tô tiꞌaꞌre nhimire niwĩ tisiꞌawasisizém na te te ãma iwasi hã waze. Tawamhã taha na ma tô Égrõ hã ãma nomozapuꞌu. Ãhã wa, ma tô tãma ꞌwaꞌmazébré pese.
22 Tawamhã duré te te ãma waꞌréi wamhã, ma tô sibꞌézé ꞌwapa iséme u hã ãzé. Tahawa iꞌwa hã ma tô ꞌwa upsi, Eudi, apito diꞌi hawimhã te te ꞌwa wazere õ wa. Sibꞌézé ꞌwapa, ma tô izaiꞌu hã ꞌwa ꞌrãsutu watobro.
23 Tawamhã õne haré, ma tô ꞌridawa hã iré tété, Eudi hã. Taha pari zanela ꞌri zadazâri na oto watobro wamhã,
24 ma tô oto mo. Tawamhã romhuriꞌwa norĩ, morĩ zaꞌu isihudu hã ma tô ꞌridawa tété haré isam na siwi ꞌmadâ. Tahawa apito tisaiꞌrada te te saꞌwari da, dasaiꞌrata zaꞌwarizéb u isébré na ma tô ãma romnomri zaꞌra.
25 Tahawa ma tô taré sô mapari hâ zaꞌra. Tane nherẽ, te te sô ꞌridawa suꞌu zaꞌra õ wa, ma tô ꞌridawazé hã siwi tiꞌâ oto. Tawamhã ma tô taha na oto siwi ꞌridawa. Ãhã wa, apito dâꞌâ siromo tiꞌai u waptãꞌã haré inomro na hã ma tô siwi ꞌmadâ.
26 Tawamhã Eudi, zahadu apito zô simipari zaꞌra ré, ma tô aimani. Tawamhã ẽtẽ ꞌmanharĩ na romhâibarĩ waꞌwaibaba te te roꞌrazâri wamhã, ma tô mo, Seira na ꞌri waꞌõtõ nhisi u.
27 Tawamhã Efraĩ ãma ẽne ihâimana zaꞌra u oto wisi wamhã, ma tô poneꞌẽrebâire zéré mapure siꞌaibâ õmo na danhimnhihârâzé hã sô hârâ zaꞌra, Izaraéu nhihudu siꞌaibâ norĩ, te te idaꞌwapé zaꞌra da zô. Tahawa, ẽtẽ na te te ãma siꞌra zaꞌra sina,
28 ma tô ãne tãma nharĩ zaꞌra, Eudi hã:
— We! We ĩzarina aiꞌabaꞌréi waꞌaba. Uburé Danhibꞌapito hã ma tô aima sõmri zaꞌra waꞌwa, asitobꞌru moabita norĩ ãma iꞌaiꞌuté zaꞌra waꞌaba zéb da hã.
Tawamhã Izaraéu nhihudu norĩ ime isiꞌabaꞌré hã ma tô moabita norĩ panhoꞌu Zodã pa â na te te ꞌre isaprĩ pese zaꞌra mono zé ro hã siwi tiꞌâ. Tahawa da te ãma isaprĩ zaꞌra da hã mare di, te te dama saꞌré zaꞌra õ wa.
29 Tawamhã dasiꞌwapéi wamhã, ma tô moabita norĩ dasiꞌwapéi ꞌmanharĩꞌwa hã dasiwi uprosi ni 10 miu na, uburé pese isiptete norĩ hã, duré isibꞌru norĩ hã. Ãhã wa, niꞌwa hã dawi simani waihuꞌu õ di.
30 Ãne ma tô Izaraéu nhihudu norĩ hã moabita norĩ ãma taha bâtâ na hã ãma aiꞌuté zaꞌra. Ãhã pari, ma tô 80 wahum na Izaraéu nhihudu norĩ nhiptiꞌai ꞌremhã rowẽ si oto ꞌre ropsaꞌwari.
Sãga dama iꞌrãnhoꞌõmo wasuꞌu
31 Tawamhã Eudihi zaꞌu ma tô Sãga dama iꞌrãnhoꞌu Anatehe ꞌra hã te te ꞌre daꞌaꞌmadâꞌâ. Ta hã ma tô filisteu norĩ 600 na uprosi, isiꞌuwazi ꞌmanharĩ na powawẽ zusizém na. Ãne ma tô õhõ zama Izaraéu nhihudu norĩ hã te te ꞌre anhoꞌreptu.
