Zuize 4:1-24
4 Tawamhã Eudi dâꞌâ parimhã, Izaraéu nhihudu norĩ, ma tô duré Uburé Danhibꞌapito wi apâ ꞌre wasété zaꞌra.
2 Tahawa Uburé Danhibꞌapito, Canaꞌã ãma apito Zabĩhĩ ma, ma tô tãma hâiba zaꞌré zaꞌra, te te ãma aiꞌuté zaꞌra da hã, Izaraéu nhihudu norĩ ãma. Ta hã Hazo na ꞌri nhoꞌõmo nhisi ãma dama iꞌrãnhoꞌu. Taha te dasiꞌwapéi ꞌmanharĩꞌwa norĩ nhibꞌihâꞌa Sisera na isisi, Harosete-Hagozĩ ãma ꞌre ihâimana mono.
3 Tawamhã Zabĩhĩ te isiꞌuwazi tete ꞌmanharĩ na wedewara zapore awaru te te ꞌre isari zaꞌra mono 900 na te tãma tihâimana zaꞌra. Duré 20 wahum na, ma tô Izaraéu nhihudu norĩ ma, wasété uptabi na sada ꞌre ihâimana zaꞌra mono zarina, te te tãma ꞌre abꞌmanharĩ wasété, ãma ꞌre siwamri zaꞌra mono ãna. Tahawa ma tô Izaraéu nhihudu norĩ, Uburé Danhibꞌapito wi mreme ꞌrãihâ na tiwi rowaptẽrẽ zaꞌra, te te ꞌre pawaptob zaꞌra mono da hã.
4 Tawamhã Débora, Lapidotihi mro, ꞌRe ihâimana uꞌâsi mono zadawa ꞌmahârâꞌwa na te ꞌre hâimana. Ta hã ma tô duré Izaraéu nhihudu norĩ ma, rowairébéꞌwa sipiꞌõ hã te te ꞌre aꞌmadâꞌâ, we iromhâimana mono zém na hã.
5 Tawamhã Rama norĩ waꞌwamhã, Bétéu me te norõsu ne hã iwaꞌwab zahuré ꞌre sa, Efraĩ ãma ẽtẽ niwĩmhã. Tawamhã taha zahâpâ Débora ꞌre simasisi mono wamhã, ma tô Izaraéu nhihudu norĩ itẽme ꞌre nomro, marĩ na romreme te te itẽme ꞌre iꞌwasari mono na te te tãma ꞌre arowairébé mono da hã.
6 Tawamhã nimahã bâtâ na ma tô Baraqui, Abinoꞌãhã ꞌra zô hâ, Naftalihi nhihudu norĩ nhiptiꞌai ãma ꞌrinhoꞌu Quedesi na isisi ãma ꞌre ihâimana mono zô. Sô hârâ wamhã, ma tô ãne tãma tinha:
— Ãne ma tô Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono we aima tiꞌru: “Maꞌãpé, Naftalihi nhihudu siꞌaibâ norĩ duré Zébulõhõ nhihudu siꞌaibâ norĩ zama 10 miu na pisutu zaꞌra na. Taha parimhã, te za isimroi mo, Tabo na ẽtẽ nhisi u.
7 Tawamhã wa hã wa za we saprõ, Zabĩ te dasiꞌwapéi ꞌmanharĩꞌwa norĩ nhibꞌihâꞌa Sisera hã, õ pa Quisõ na isisi u te te aiꞌwapé da, a hã. Tawamhã ta hã te za wei mo tô, tite wedewara zapore isiꞌuwazi tete ꞌmanharĩ norĩ na, tite dasiꞌwapéi ꞌmanharĩꞌwa norĩ me. Tane nherẽ, wa za wa hã asibꞌratamhã aima hâiba nho, ãma aiꞌuté da.”
8 Tawamhã Baraqui te Déboraha ma tinha ãne:
— Ĩme aimorĩ wapsi, wa za mo tô. Duré ĩme aimorĩ õ wamhã, ĩzama ĩmorĩ da hã mare di za.
9 Tawamhã Débora, ma te ãma sadaꞌâ ãne:
— Wẽ di tô! Wa za tô ãma asiré mo. Tane nherẽ, za wa te daꞌãma iꞌaiꞌutézé hã asiptete zarinai õ di za. E tihai wa. Uburé Danhibꞌapito, piꞌõ nhibꞌrata za Sisera te te tãma sõmri wa.
Tawamhã Débora, ma tô mo Baraquihi siré, Quedesi na ꞌri waꞌõtõ nhisi u.
10 Tawamhã Baraqui, Zébulõhõ nhihudu norĩ aꞌuwẽ, Naftalihi nhihudu norĩ aꞌuwẽ me Quedesi u da, te te pisutu zaꞌra wamhã, ma tô aibâ norĩ 10 miu na isiré aiꞌabaꞌré. Tawamhã Débora ma tô duré ime mo.
11 Tahawa, queneu Hébé, tisiré norĩ wi ma tô ãma aipoꞌo zaꞌra, Mozésihi ãrewa Hobabehe nhihudu norĩ na hã. Ta hã ma tô romhâ ꞌmanharĩ na ꞌri hã sima sõré, Zaꞌanani na romnhisi ãma carvariu na wede nhisi ꞌrata, Quedesi ꞌrata ꞌre ihâimana mono ãma.
12 Tawamhã Sisera hã ma tô dasiwi poꞌre puꞌu ni, Abinoꞌãhã ꞌra Baraqui, ẽne Tabo na isisi u imorĩ na hã.
13 Tawamhã Sisera, wedewara zapore 900 na itẽme ãma dasiꞌabaꞌré da hã, duré uburé pese aibâ norĩ, itẽme siꞌabaꞌré da hã, ma tô sô tihârâ zaꞌra. Tahawa, Harosete-Hagozĩ hawimhã, panhoꞌu Quisõ na isisi u ma tô te te danhimro.
14 Tawamhã Débora, te Baraquihi ma tinha ãne:
— Ãhã na awaꞌawi te za aimo. E tihai wa. Ãhã na te za Uburé Danhibꞌapito, asibꞌrata Sisera hã aima tisõ. Duré Uburé Danhibꞌapito te za asõwamhã tihâimana siro za!
Tawamhã Baraqui, tite aibâ norĩ 10 miu na ihâiba norĩ ré ma tô Tabo ẽtẽ hawimhã oto siꞌra.
15 Tawamhã Baraqui, tite daꞌwapéi ꞌmanharĩꞌwa norĩ ré te te oto susi zaꞌra wamhã, ma tô Uburé Danhibꞌapito, Siseraha te dasiꞌwapéi ꞌmanharĩꞌwa norĩ waꞌwamhã duré wedewara zapore na isisaꞌrei mono norĩ waꞌwamhã iꞌrãiwaihuꞌuꞌõ na tãma robꞌmanharĩ zaꞌra. Tahawa Sisera, tite wedewara zapore hawimhã ma tô siꞌabaꞌré na siꞌra. Te te siꞌrai wamhã, ma tô para na oto dawi wara, simani da.
16 Tane nherẽ, Baraqui wedewara na dasiꞌwapéi ꞌmanharĩzéb zarina, duré dasiꞌwapéi ꞌmanharĩꞌwa norĩ zarina ma tô Harosete-Hagozĩ u te te ꞌrãzaꞌõtõ pibu zaꞌra. Tahawa uburé Siseraha te dasiꞌwapéi ꞌmanharĩꞌwa norĩ hã ma tô dasiwi uprosi pese ni, sibꞌézé ꞌwapa na. Tahawa ꞌmasiꞌatarẽme õ di, ihâiba ré na hã.
17 Tane nherẽ, Sisera ma tô Zaéu, Hébé queneu mro nhorõwa u wara, Hazo ãma apito Zabĩ, Hébéhé nhibꞌaꞌuwẽ norĩ me rowẽ na siré ꞌre hâimana zaꞌra mono we te.
18 Tawamhã Zaéu, Sisera te te sõpẽtẽ da, ꞌri para hawi ma tô watobro. Watobro wamhã, ma tô ãne tãma tinha:
— Ĩnhibꞌapito, maꞌãpé asébré ꞌri para u. Aipahi tõ.
Tahawa oto romhâ ꞌmanharĩ na ꞌri para u sébré wamhã, ma tô Zaéu hã, waptâzém na suwa, Sisera hã.
19 Tawamhã Sisera te tiwi rowaptẽ ãne:
— Maꞌãpé ĩzawi na hã â suru na we ĩma aꞌâri. ꞌRubu uptabi di.
Tahawa romhâ ꞌmanharĩ na ubꞌrẽ abazei hâi waꞌui ré hã te te ꞌridawa wamhã, ma tô tãma tisõ, te te hâꞌrẽne da. Taha pari ma tô apâ hã upsi.
20 Tawamhã Sisera te duré ꞌri tedeꞌwa sadawa uwati ãne:
— Maꞌãpé ꞌridawa ãma asãmra, niꞌwa we te te iroꞌrazâri, ꞌripara idaꞌmaihâimana zô te te iꞌasadanharĩ ma, asimrami da, niꞌwa ihâimana õ na hã.
21 Tawamhã Sisera wasutu uptabi wa, ma tô aptâ hã azâri pese. Taha ré, ma tô Zaéu hã matéru tiꞌâ, duré romhâ ꞌmanharĩ na ꞌri nhanaꞌrata tétézéb zama. Taha pari ma tô para nhisutu atãma hâire ãzé, ꞌripara u. Tawamhã ma tô ãma uꞌrata nhiptâꞌâ. Tahawa, ma tô tiꞌai u ãma uꞌrata tété. Tahawa, ma tô õne haré oto dârâ.
22 Tawamhã Baraqui, Sisera zarina ꞌre iwara oto wisi wamhã, duré Zaéu te te sõpẽtẽ da, watobro wamhã, ma tô tãma tinha ãne:
— We aimorĩ, aibâ zô we iꞌairĩtĩ mono hã te aima hâiꞌré da.
Tawamhã Baraqui, isiré oto morĩ wamhã, ma tô Sisera tiꞌai wa dâꞌâ haré inomro hã sõpẽtẽ, wede ꞌrãꞌwa na uꞌrata nhiptâꞌâ haré.
23 Tawamhã tô taha bâtâ na ma tô ꞌRe ihâimana uꞌâsi mono, Izaraéu nhihudu norĩ ma sõmri zaꞌra, Zabĩ, cananeu norĩ nhibꞌapito ãma te te aiꞌuté zaꞌra da.
24 Tawamhã Izaraéu nhihudu norĩ, ma tô apito Zabĩhĩ ma, iꞌwapé na te te tãma ꞌrãpẽtẽ uꞌâsi zaꞌra, te te siwi iꞌuprosi pese zéb u.
