Zuize 5:1-31
5 Tawamhã tô taha bâtâ na Débora norĩ, Baraqui, Abinoꞌãhã ꞌra me ma tô ãne tinhoꞌre zahuré:
2 Uburé Danhibꞌapito ãma ꞌre wawata zaꞌra waꞌaba mono!Izaraéu nhihudu norĩ, siꞌwapé zaꞌra da, ma tô sima waprosi zaꞌra.Ma tô duré rowẽ sina ꞌre sipisutu zaꞌra.
3 Apito norĩ, duré dama iꞌrãnhoꞌõmo norĩ, maꞌãpé asiwi ĩwapari aba!Ãhã na wa za taꞌa, danhoꞌre wa roptaꞌazé hã.Wa za duré ĩnhoꞌre, Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono ma!
4 Uburé Danhibꞌapito, ẽne Seꞌi na isisi hawi we aiwatobro wamhã, duré Edõ tiꞌai hawi we aimorĩ wamhã, ma tô tiꞌa hã sãsã.Tã ma tô duré hâiwa hawi we asaꞌwa.Ĩhe, hâiwaꞌa hawimhã, ma tô tô â saꞌẽtẽ na we asaꞌwa.
5 Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono nhoꞌre, ma tô ẽtẽ ꞌrãihâ norĩ hã popo, Sinaꞌi ẽtẽ tedeꞌwa nhoꞌre.
6 Tawamhã Sãga, Anatehe ꞌra ꞌre morĩ ré hã, duré Zaéu ꞌre morĩ ré hã ma tô bâdâdi na ꞌre idanomro pese mono zé dasiwi rẽme pese ni.Tahawa we ãma ꞌre idanomro mono hã ma tô bâdâdi wãi wa, ꞌre dasipa zaꞌra, aimawi bâdâdi na ꞌre danomro mono da.
7 Tahawa, Izaraéu nhihudu norĩ te, ꞌri waꞌõtõ norĩ ãma hã niꞌwai õ di. Baba na ma tô ꞌre simasa, a hã Débora, Izaraéu nhihudu norĩ na ne, za ꞌre iꞌaihâimana mono da hã we iꞌasihâiꞌrézéb u.
8 Izaraéu nhihudu norĩ, ihâibaꞌõ norĩ si te te sima ipisutu zaꞌra zarina, ma tô ite zaꞌra tiꞌai waꞌõtõ nhoꞌõmo ꞌremhã dasiꞌwapé hã ꞌre pusi.Ãhã wa, Izaraéu nhihudu siꞌaibâ norĩ 40 miu na ihâiba zaꞌra hã, danhoꞌutu ubuzé hã duré isiꞌuwazi ꞌrãꞌwa hã te te siré ꞌre ꞌwasari mono õ di.
9 Izaraéu nhihudu norĩ wadaꞌuriꞌwai ãma wa ãma ꞌre ĩsiri uꞌâsi zaꞌra, duré aꞌuwẽ norĩ to sina ꞌre isipisutu zaꞌra mono norĩ ãma.Uburé Danhibꞌapito ãma si ꞌre wawata zaꞌra waꞌaba mono!
10 Tawamhã a norĩ waꞌwa, awaru poꞌrepore iꞌa na ꞌre iꞌasaꞌrei waꞌaba mono hã, ibazadâ na ꞌre iꞌasimroi waꞌaba mono hã, duré aipara na si ꞌre iꞌanomro aba mono norĩ hã maꞌãpé ãne na ãma dama ꞌre rowasuꞌu zaꞌra waꞌaba mono.
11 Maꞌãpé asiwi wapari aba! Robruruꞌuꞌwa norĩ, â zô abꞌre ihâimana zaꞌra te te siwi iꞌuirĩ, Uburé Danhibꞌapito te te daꞌãma iꞌaiꞌutézém na hã, te te sima robzanhamri zaꞌra, duré Izaraéu nhihudu norĩ te te daꞌãma iꞌaiꞌuté zaꞌra zém na hã.Tawamhã Uburé Danhibꞌapito nhibꞌaꞌuwẽ norĩ hã, ma tô siꞌra zaꞌra, ꞌri nhoꞌõmo ꞌridawa zaꞌẽtẽ u hã.
12 Aiwahutu, Débora. Maꞌãpé aiwahutu!Tô aiwahutu, asõꞌre da, danhoꞌre na!Baraqui, Abinoꞌãhã ꞌra, maꞌãpé aiwahutu! Airob u simroi mono, dasiꞌwapéi wa, da te aima iwaibu isimasam norĩ hã.
13 Tawamhã isiꞌmairẽme norĩ te te siꞌra zaꞌra wa, dama ipire zaꞌra norĩ u siꞌabaꞌréi wamhã, ma tô Uburé Danhibꞌapito nhibꞌaꞌuwẽ, we ĩtẽme aiꞌabaꞌré, isiptete uptabi norĩ da, hâimana zaꞌra da.
14 Tawamhã ta norĩ, Efraĩ hawi wairébé wamhã, ma tô aiꞌabaꞌré, ẽtẽ siwaꞌaba wa tiꞌai haré u, Bẽzamihĩ nhihudu norĩ zarina, duré isibꞌaꞌuwẽ zarina zama.Duré Maqui hawimhã ma tô dasiꞌwapéi ꞌmanharĩꞌwa ꞌmadâꞌâꞌwa norĩ hã siꞌra zaꞌra. Tawamhã duré Zébulõ hawimhã danhibꞌihâꞌa hã ma tô we aiꞌabaꞌré.
15 Tawamhã Isacaha hawi danhibꞌapito norĩ hã ma tô Déboraha siré aiꞌabaꞌré. Ĩhe, duré Isacaha nhihudu norĩ aꞌuwẽ hã ma tô Baraquihi siré zama aiꞌabaꞌré.Ta norĩ hã ẽtẽ nhiꞌriti wa romharé u ma tô isiré aiꞌabaꞌré.Tane nherẽ, Rubẽhẽ nhihudu norĩ sima isipo hã, ma tô timreme na hã siꞌwapé zaꞌra. Tahawa duré ta norĩ hã dame siꞌabaꞌréi õ di.
16 E marĩ da, ma tô poneꞌẽrebâ õme ꞌre simasa mono da hã ãma irowairébé zaꞌra waꞌwa.E te za tô te te ꞌre iꞌmadâꞌâ zaꞌra mono norĩ hârâ hã te te ꞌre wapari zaꞌra za. Ĩhe, Rubẽhẽ nhihudu norĩ sima isipo hã, ma tô timreme na siꞌwapé zaꞌra. Tahawa ta norĩ hã dame siꞌabaꞌréi õ di.
17 Gadihi nhihudu norĩ ma tô Zodã pa bâtâ pusizém niwĩ pa zara niwĩ tihâimana uꞌâsi zaꞌra.Duré Dãhã nhihudu norĩ, du si ro ꞌre isaꞌwari mono ãma ma tô tihâimana uꞌâsi zaꞌra.Tawamhã duré Aséhé nhihudu norĩ â poré ãma ma tô mazahâri zaꞌra. Tahawa ma tô supara zadaꞌré ãma tihâimana uꞌâsi zaꞌra.
18 Tane nherẽ, Zébulõhõ nhihudu norĩ, Nafitali nhihudu norĩ me ma tô romnhimimnhasi nherẽ, aꞌubuni wi dasiꞌwapé na tihâimana zaꞌra.
19 Tawamhã apito norĩ sô isiꞌabaꞌré norĩ hã, ma tô ꞌwapé zaꞌra, sipti Megido na isisi ꞌrata, Taꞌanaqui na ꞌri nhoꞌõmo nhisi ꞌre ihâimana mono ãma.Tawamhã Canaꞌã ãma apito norĩ ma tô ꞌwapé zaꞌra. Tane nherẽ, ta norĩ, tinhitobꞌru norĩ wi ẽtẽ waipo prã prata ꞌmanharĩ hã duré isimarĩ zaꞌra hã te te tiwi ꞌwasari õ di.
20 Wasi norĩ zama te ãhã wamhã, aiꞌwapé zaꞌra. Hâiwa na ꞌre siwaꞌrãmi zaꞌra mono ré, ma tô Sisera siwi ꞌwapé.
21 Panhoꞌu Quisõ na isisi, duréi pese ꞌre isaꞌwari mono â pré wa, iꞌâpusi mono ma tô danhitobꞌru norĩ hã te te sate.Ãhã wa, wa hã te ropãrĩ mono sina awaꞌawi na ĩpẽꞌẽ nhiptete na wa za ꞌre mo, wa za tô ꞌre mo!
22 Tawamhã awaru sisari na ꞌre sisaꞌrei mono wa, ma tô tinhimiꞌwa na hã te te tiꞌa zub zaꞌra.
23 Uburé Danhibꞌapito ma, hâiwa ãma romhuriꞌwa te tinha ãne:“ꞌRi nhoꞌu Merozi ꞌre, ꞌre ihâimana zaꞌra mono norĩ ma, ipipa si tãma pisutu zaꞌra na.E marĩ wa. Ta norĩ hã isiptete norĩ zada, Uburé Danhibꞌapito te te siwi pawaptob da hã, siꞌabaꞌréi õ wa.”
24 Piꞌõ Zaéu, Hébé queneu mro ma hã tãma rowẽ uptabi di, uburé piꞌõ norĩ tisiré nhipai u.Taha ma hã irowẽ uptabi tô, romhâ ꞌmanharĩ na ꞌri ꞌre, uburé piꞌõ norĩ ꞌre ihâimana zaꞌra mono nhipai u hã.
25 Tawamhã Sisera te â si waptẽ. Tane nherẽ, abaze hâiwaꞌu si ma te tawamhã tãma tisõ.Abaze hâiwaꞌu top si ma tô tãma tiꞌâ, hâsizé isaꞌẽne iwaipo iwẽ uptabi wa.
26 Tahawa, tinhibꞌrata hâiba amo niwĩ, ma tô wede ꞌrãꞌwa hã tiꞌâ.Tinhibꞌrata hâiba amo niwĩmhã ma duré romhuriꞌwa norĩ nhimiromhurizé matéru hã tiꞌâ.Tawamhã taha na Sisera te te ãma ꞌrã nhiptâꞌâ wamhã, ma tô ꞌrãi hâpâ pese. Ma tô uꞌrata ꞌrepuꞌu. Ma duré ꞌrãi pru pese.
27 Tawamhã ta hã piꞌõi para ãma ma hiꞌrãtitõ nhamra. Taha pari dâꞌâ siromo waptãꞌã wa, ma tô taha haré oto nomro.
28 Tawamhã Siseraha na tinhorõwa zanela ꞌri zadazâri hawi ma tô sô robꞌmadâ. ꞌRi zadazâri ꞌwawi waꞌra babarãi hawi taré te te sô robꞌmadâꞌâ baba wa, te tinha ãne:“E tihai wa, ma tô ite wedewara zapore zô tirowaptâꞌâ hâ upta, we ãwa iwisi da hã.E tihai wa, te duré ite awaru norĩ hã atãma hâire we aiꞌabaꞌré.”
29 Tawamhã ime ihâimana zaꞌra iꞌrãi waihuꞌu pese norĩ, nasi te te ãma sadaꞌâbâ zaꞌra wamhã, ma tô nasi timreme na ãma sima sahu ãne, te te ãma iromnomrizém na hã:
30 “Ãté tiha te te iwaibu zaꞌra na te ãma sima sipoꞌo zahadu ãhã na hã, dasiꞌwapéi ꞌmanharĩꞌwa siꞌaibâ norĩ ma misi piꞌõ hã, niha wamhã maparane aibâ mono bâ hã, duré Siseraha ma zazahâ ihâi waipo na hã, duré ihâ siwamnarĩ na hã piꞌõ dama iꞌrãnhoꞌõmo butu ubuzéb da hã.”
31 Uburé Danhibꞌapito, uburé asitobꞌru norĩ siꞌutõrĩ.Tane nherẽ, asiwaihuꞌu norĩ te te ꞌre irowaꞌa pese zaꞌra mono da si iwẽ hã, bâdâ ꞌre pusi mono wi roꞌo nhiptete na te te ꞌre irobꞌuiwẽ mono ne hã!
Tawamhã tiꞌai waꞌõtõ nhoꞌõmo ꞌremhã 40 na wahum na, rowẽ na si ma tô oto ꞌre romhâimana.
