Zuize 7:1-25
7 Tawamhã Zerubau, Gidiã na isisi amo, isibꞌaꞌuwẽ aibâ norĩ ihâimana zaꞌra me robzaꞌrã ré utu zaꞌra wamhã, ma tô oto aiꞌabaꞌré. Siꞌabaꞌréi wamhã, Harodi na â nhanaꞌrata nhisi ꞌratamhã ma tô sima ꞌri nhoré zaꞌra. Tawamhã midiãnita norĩ te te sima iꞌri nhoré zaꞌra hã hâiwa nhimiꞌe niwĩ ẽtẽ nhiꞌriti wa romharé, ẽne Moré na isisi ꞌre ihâimana mono ꞌrata te tihâiba, ꞌri hã.
2 Tawamhã Uburé Danhibꞌapito, te Gidiãhã ma tinha ãne:
— Ate aibâ norĩ ahâ uptabi di. Tahawa midiãnita norĩ ãma aiꞌuté zaꞌra waꞌaba da, te aima saꞌré waihuꞌu zaꞌra waꞌaba õ di za. Te aima saꞌré zaꞌra waꞌaba wamhã, te za asina irosaꞌrata zaꞌra waꞌwa, te aipawaptob zaꞌra waꞌaba õ nherẽ, asiꞌuihâ na ãma iꞌaiꞌuté zaꞌra waꞌaba na hã.
3 Tahawa maꞌãpé ãne aꞌuwẽ norĩ ma nharĩ zaꞌra na: “Niꞌwam norĩ hã pahi sina hâimana zaꞌra wamhã, te za ẽne Ziliadi na isisi hawimhã aiꞌabaꞌré apâ, ꞌri u hã.”
Tawamhã ãne na Gidiã te te tãma rowasuꞌu zaꞌra wa, ma tô 22 miu na dahâiba na apâ hã dasina siri zaꞌra ni. Tane nherẽ, 10 miu na dahâiba na te zahadu isiré tahâimana zaꞌra ni.
4 Tawamhã Uburé Danhibꞌapito, Gidiãhã ma te duré tãma tinha ãne:
— Zahadu daꞌahâ uptabi di. Maꞌãpé tahawa, uburé â u hã danhimroi mono. Tawamhã tame wa za aime isiꞌabaꞌré da hã ãma aipoꞌo zaꞌra. Tawamhã duré wa hã niꞌwa asiré morĩ da, te nharĩ wamhã, te za tô ta hã asiré mo. Duré niꞌwa asiré morĩ dai õ wamhã, ta hã duré asiré imorĩ da hã, mare di za.
5 Tawamhã Gidiã, âi ba isibꞌaꞌuwẽ te te siꞌra zaꞌra da hã, ma tô te te simro. Tahawa, Uburé Danhibꞌapito te duré tãma tinha ãne:
— Uburé aibâ norĩ, wapsã te te ꞌre iꞌâhuri mono ne, tizoto na te te iꞌâhuri hã te za ãma iꞌaipoꞌo zaꞌra, hiꞌrãtitõ tãma isiꞌubumro norĩ nhiti.
6 Tawamhã aibâ norĩ 300 na ma tô tinhibꞌrata na hã âhu. Duré uburé isiré norĩ hã ma tô hiꞌrãtitõ tãma asimro, te te âhuri da.
7 Tawamhã Uburé Danhibꞌapito, te Gidiãhã ma tinha ãne:
— Aibâ norĩ 300 na tinhibꞌrata na te te iꞌâhuri norĩ me hã, wa za wa hã asõꞌreptu zaꞌra waꞌwa, midiãnita norĩ ãma iꞌaiꞌuté zaꞌra waꞌaba zém na hã. Tahawa maꞌãpé isiré norĩ ma tãma nharĩ zaꞌra na, apâ tinhorõwa u siꞌabaꞌré da.
8 Tawamhã Gidiã, Izaraéu nhihudu norĩ ipoꞌo hâiba amo hã ma tô satõrĩ zaꞌra, apâ tinhorõwa u siꞌabaꞌré da, 300 na ihâiba zaꞌra si iꞌratamhã siꞌubumro da. Ta norĩ hã sai ré, duré simnhihârâzéb ré, ma tô uburé asimro. Tahawa, midiãnita norĩ, ta norĩ zahâpâ te romharé ãma ꞌri hã tãma sisõré.
9 Tawamhã tô taha mara na Uburé Danhibꞌapito, ma tô duré Gidiãhã ma tinha ãne:
— Maꞌãpé aiꞌutu, midiãnita norĩ te ꞌri u siꞌra da, aꞌwapé da. Asibꞌrata wa za oto aima sõmri zaꞌra.
10 Aꞌwapé da, tãma aipahi zaꞌra wamhã, maꞌãpé ite zaꞌra ꞌri u hã siꞌra na, aima romhuriꞌwa Puraha me.
11 Tawamhã a hã te te sima irowasuꞌu zaꞌra zé wapari wamhã, te za aipẽꞌẽ nhiptete sina aihâiba za, aꞌwapé da, ite zaꞌra ꞌri ãma.
Tawamhã Gidiã norĩ, tipawaptoꞌwai me, isitobꞌru norĩ te romhâ ꞌmanharĩ na ꞌri isisõré mono ꞌri mana u hã ma tô oto siꞌra zahuré, te te sina rotété zahuré da.
12 Midiãnita norĩ, amalequita norĩ, duré aꞌuwẽ rop si ꞌre irosaꞌwari mono ãma romharé wa, ꞌre hâimana zaꞌra mono da, te te sima iropéi mono norĩ hã, ahâ uptabi di, hâiwa nhirõno ꞌriti ne we ꞌre isiꞌréi mono ne. Ta norĩ hã tite awaru baꞌõmore norĩ me hã iꞌahâ uptabi, supara ꞌré â zadaꞌré na ꞌre ihâimana zaꞌra mono ne.
13 Tawamhã Gidiã oto wisi wamhã, aibâ tisiwaihuꞌu ma, tinhimirosawẽrẽ te te iwasuꞌu hã, ma tô wapa. Ta hã te ãne tãma wasuꞌu, te te irosawẽrẽzé hã:
— Ãne wa tô rosawẽ. Cewada ꞌmanharĩ iꞌuꞌẽtẽ wapu hã ma tô wanhorõwa zaꞌra ꞌri nhoré u hã we sipizari. Tawamhã isipizari mono hã ma tô saꞌẽtẽ ꞌmaiꞌri naꞌrata wĩ. Tahawa, ma tô ꞌri hã waptãrã. Waptãꞌã wamhã, ma tô tiꞌai wam haré nomro.
14 Tawamhã isiwaihu, ma te ãma sadaꞌâ ãne:
— Zoasihi ꞌra, Gidiãhã nhiꞌwa pa, te wasuꞌu, Izaraéu nhihudu hã! Ã hã te wasuꞌu, õhõ ma, za wanhibꞌaꞌuwẽ norĩ, duré wa te dasiꞌwapéi ꞌmanharĩꞌwa norĩ, ꞌRe ihâimana uꞌâsi mono te te tãma ihâiba nhomri zaꞌra zé.
15 Tawamhã Gidiã, rosawẽrẽ te te wapari wamhã, ma tô waihuꞌu, za marĩ iwatobrozé te te iwasuꞌuzém na hã. Tahawa hiꞌrãtitõ sãmra sina, ma tô ꞌRe ihâimana uꞌâsi mono ãma tiwata. Taha pari ma tô Izaraéu nhihudu norĩ isiꞌubumrozéb u apâ sina siri. Tahawa, ma tô ãne tãma nharĩ zaꞌra:
— Aiwahutu zaꞌra waꞌaba! Uburé Danhibꞌapito, midiãnita norĩ te dasiꞌwapéi ꞌmanharĩꞌwa norĩ hã ma tô asibꞌratamhã aima hâiba nhomri zaꞌra waꞌwa.
16 Tawamhã Gidiã, 300 na dahâiba na hã ma tô siꞌubdatõ dawaꞌõtõ na daꞌãma sipoꞌo. Tawamhã aibâ hâiba mono bâ ma tô danhimizama õmo na danhimnhihârâzé hã te te tãma sõmri, duré pizaꞌa wata ꞌrãzaꞌitire zéꞌa ꞌmanharĩ wa, ꞌrãsitõ iwa ihâimana zaꞌra zama.
17 Taha pari te ãne tãma nharĩ zaꞌra:
— Asiwi ĩꞌmadâꞌâ aba mono za! Ĩnhitobꞌru norĩ te ꞌri u te ĩsina rotété wamhã, te za asiwi iꞌmanharĩ ꞌwa, za marĩ hã wa hã te iꞌmanharĩzéb zarina.
18 Tawamhã wa hã, ĩte dawaꞌõtõ me, danhimizama õmo na danhimnhihârâzé wa te hâsi wamhã, te za uburé a norĩ waꞌwa romhâ ꞌmanharĩ na ꞌri, asiwi uirĩ zaꞌra waꞌaba mono sina asimnhihârâzé hã ihãsi aba mo za. Tawamhã hâsi aba mono sina, te za ãne aihârâ ꞌrãihâ na aihãsi ꞌwa za: “Uburé Danhibꞌapito ma, duré Gidiãhã ma!”
19 Tawamhã Gidiã, 100 na tisiré aibâ norĩ hâiba me, imara waꞌwabzéb ãma robꞌmadâꞌâꞌwa norĩ hã sisaprĩ pari, ma tô ꞌri nhoré u hã sina tété zaꞌra. Tawamhã ma tô tinhimnhihârâzé hã te te hãsi. Ma tô duré pizaꞌa wata ꞌrãzaꞌitire tinhibꞌrata te te iꞌwasari hã prub zaꞌra.
20 Tawamhã siꞌubdatõ dawaꞌõtõ norĩ, ma tô danhimnhihârâzé hã te te hãsi. Ma tô duré pizaꞌa wata ꞌrãzaꞌitire hã te te prub zaꞌra. Tahawa, ꞌrãsitõ ma tô tinhibꞌrata nhimiꞌe niwĩmhã te te tété zaꞌra. Duré tinhibꞌrata nhimire niwĩmhã, ma tô danhimnhihârâzé hã te te tété zaꞌra. Ãhã wa, te ãne hãsi, hârâ ꞌrãihâ na: “Sibꞌézé ꞌwa pa, Uburé Danhibꞌapito ma, duré Gidiãhã ma!”
21 Tawamhã hâiba mono bâ ꞌri mana wi, ma tô tisimaꞌwarazé mono bâ simasa, sirési ãna. Tawamhã uburé isitobꞌru norĩ dasiꞌwapéi ꞌmanharĩꞌwa, ma tô sadari sina tãma sisaꞌre.
22 Tahawa, 300 na aibâ norĩ danhimnhihârâzé te te hãsi wamhã, ma tô Uburé Danhibꞌapito, aibâ norĩ ma robꞌmanharĩ zaꞌra, tite sibꞌézé ꞌwa pa na ꞌrâwi siꞌwapé zaꞌra da hã. Tawamhã Zerera niwĩ sisaꞌrei mono wamhã, ma tô Bete-Sita na romnhisi niwĩ aiꞌabaꞌré, Abéu-Meora na ꞌri waꞌõtõ nhisi zadaꞌré u, Tabate na rowamri ꞌratab u.
23 Tawamhã Naftalihi nhihudu siꞌaibâ norĩ zô, Aséhé nhihudu siꞌaibâ norĩ zô, duré Manaséhé nhihudu siꞌaibâ norĩ zô, ma tô tahãsi ni. Tawamhã ma tô midiãnita norĩ zarina sisaꞌre.
24 Tawamhã Gidiã, ma tô romreme ꞌwapéiꞌwa norĩ hã satõrĩ zaꞌra, Efraĩhĩ nhiptiꞌai wa ẽne ꞌre isimasa mono ãma uburé ꞌre idahâimana zaꞌra mono norĩ ma, te te dama nharĩ zaꞌra da ãne:
— Mo oto siꞌra zaꞌra waꞌaba, midiãnita norĩ ꞌwapé zaꞌra waꞌaba da hã. Duré maꞌãpé panhoꞌu Zodã pa duré isipti norĩ isõꞌreb zaꞌra hã asiwi âri aba, õ Bete-Bara na romnhisi u, te te ãma ꞌmazaprĩ tõ da.
Tawamhã Efraĩhĩ nhihudu siꞌaibâ norĩ zô, ma tô tahãsi ni. Tahawa, ma tô panhoꞌu, isipti norĩ me hã siwi tiꞌâ, Bete-Bara u.
25 Tawamhã ta norĩ hã ma tô midiãnita norĩ te maparane dama iꞌrãnhoꞌõmo norĩ hã, Orebe norĩ, Zeꞌebehe me hã siwi timra. Ãhã wa, Orebe na ẽtẽ tõmo wawẽ nhisi ãma ma tô Orebe hã siwi tiwĩ. Duré Zeꞌebe hã ma tô siwi tiwĩ, uwa iwaꞌu zô, da te ꞌre iꞌrãiwati zaꞌra mono zéb ꞌre. Tawamhã midiãnita norĩ zarina isisaꞌrei mono na te te ãma uzusi zaꞌra wamhã, ma tô Orebehe ꞌrã hã, duré Zeꞌebehe ꞌrã hã siré siwi timra, Gidiã panhoꞌu Zodã pa zara niwĩ isãmrazéb u.
