Zuize 8:1-35
8 Tawamhã Efraĩhĩ nhihudu siꞌaibâ norĩ, te Gidiãhã ma ãne nharĩ zaꞌra:
— E marĩ da, midiãnita norĩ aꞌwapé da wamhã, wazô aihârâ zaꞌra õ di. E marĩ da, ma tô ãne wama iꞌmanharĩ zaꞌra.
Ãne ma tô Gidiãhã ma, timreme pẽtẽ zaꞌẽtẽ zaꞌra.
2 Tane nherẽ, Gidiã te ãne tãma nharĩ zaꞌra:
— Midiãnita norĩ ma, marĩ wa hã te iꞌmanharĩzé hã marĩ dai õ di, niha na marĩ ꞌre iꞌmanharĩ zaꞌra waꞌaba mono zé ma hã. E bété wasété di, uwa ꞌrã, Efraĩhĩ nhihudu norĩ te te ꞌre isinarĩ zaꞌra mono siꞌatarẽme hã. Ta hã wẽ uptabi di tãma hã, uburé Abiꞌézéhé te aibâ norĩ te te siwi ꞌre isinarĩ mono nhipai u hã.
3 ꞌRe ihâimana uꞌâsi mono, midiãnita norĩ ma iꞌrãnhoꞌu, Orebe norĩ, Zeꞌebehe me ma tô aima zaꞌra waꞌaba hâiba nhomri zahuré. Ãne wa, e marĩ, wa tô bété wa hã ꞌmanha, asimiꞌmanharĩ zaꞌra waꞌaba zé ma ipire hã. Baba di.
Tawamhã ãne na Gidiã te te tãma nharĩ zaꞌra wa, ma tô Efraĩhĩ nhihudu siꞌaibâ norĩ hã suru na tiꞌrãiwahâ zaꞌra.
4 Tawamhã Gidiã tite aibâ norĩ 300 na ihâiba zaꞌra norĩ siré, wasutu uptabi zaꞌra nherẽ, õne haré tinhitobꞌru zarina isisaꞌrei mono na te te ãma uzusi zaꞌra wa, ma tô oto panhoꞌu Zodã pa u hã aihutu. Sihutu wamhã, ma tô taha pa na oto saprĩ zaꞌra.
5 Tawamhã Gidiã, ãne ma tô ꞌrinhoꞌu Sucoti na isisi ãma aibâ norĩ ꞌre ihâimana zaꞌra mono wi rowaptẽrẽ hã ꞌmanha:
— Wa hã wa tô midiãnita norĩ nhibꞌihâꞌa Zebaha zarina, Salmunahã me hã we isarina ꞌre ĩmorĩ zahuré. Ta norĩ zarina wa, ĩte aibâ norĩ hã ma tô ãma wazere pese zaꞌra. Tahawa wasutu uptabi zaꞌra di. Tahawa maꞌãpé ĩzawi na hã ã norĩ ma, isa hã tãma sõmri zaꞌra na.
6 Tane nherẽ, Sucoti ãma danhibꞌihâꞌa norĩ hã ma tô ãne ãma sadaꞌâbâ zaꞌra:
— E marĩ da, wa za ate dasiꞌwapéi ꞌmanharĩꞌwa norĩ ma isa hã tãma sõmri zaꞌra ni. Zahadu a hã, Zeba norĩ, Salmunahã me hã mrami zahuré õ di!
7 Tawamhã Gidiã, ma te ãma tãma waꞌrãmi zaꞌra ãne:
— Wẽ di tô, marĩ õre di. Taré oto nimahã na, Uburé Danhibꞌapito, Zeba norĩ, Salmuna hã me te te ĩma hâiba nhomri zahuré wamhã, wa hã wa za, rop si ꞌre irosaꞌwari mono ãma robꞌre na ꞌwabzéré ꞌwapa ꞌre isimasa mono na hã te aiꞌanhiwazui waꞌwa za.
8 Tawamhã Gidiã, Penué u ma tô mo. Morĩ wamhã, te te aré irowaptẽrẽzém ne ma tô tame aibâ norĩ wi duré aré rowaptẽ. Tane nherẽ, Penué ãma aibâ norĩ, Sucoti ãma te te ãma isadaꞌâbâ zaꞌra zém ne, ma tô ãma sadaꞌâbâ zaꞌra.
9 Tahawa Gidiã, te ta norĩ ma ãne nharĩ zaꞌra:
— Nimahã na niwa te daꞌãma aiꞌuté pari, rowẽ na we apâ te ĩsina siri wamhã, wa za ꞌri ꞌrãihâ na dasipapara da te ꞌre irobꞌmadâꞌâ zaꞌra mono zé hã pru za.
10 Tawamhã Zeba norĩ, Salmunahã me, Carcu na romnhisi ãma ma tô tite zahuré dasiꞌwapéi ꞌmanharĩꞌwa norĩ ré hã tihâimana zahuré. Tahawa, dasiꞌwapéi ꞌmanharĩꞌwa norĩ rop si ꞌre irosaꞌwari mono ãma aꞌuwẽ isiꞌmairẽme dazaꞌu hã, ma tô asimro, 15 miu na. Tahawa 120 miu na hã ma tô simro ni, dasiꞌwapéi wamhã.
11 Tawamhã Gidiã, bâdâdi rop si ꞌre irosaꞌwari mono zadaꞌréi baba ma tô mo, Noba na ꞌri nhoꞌõmo nhisi bâtâ pusizém niwĩ, duré Zobea na ꞌri nhoꞌõmo nhisi bâtâ pusizém niwĩ. Tahawa, tinhitobꞌru dasiꞌwapéi ꞌmanharĩꞌwa norĩ hã simizaꞌrese ãna siꞌubumroi ré, ma tô susi zaꞌra.
12 Tawamhã midiãnita norĩ nhibꞌihâꞌa Zeba norĩ, Salmunahã me hã ma tô tãma asamro zahuré, Gidiãhã ma. Tane nherẽ, isarina zahuré wara wamhã, ma tô oto mrami zahuré. Ãhã wa, dasiꞌwapéi ꞌmanharĩꞌwa norĩ ãma ma tô uburé pese ãma aiꞌuté zaꞌra oto.
13 Tawamhã Zoasihi ꞌra Gidiã, dasiꞌwapéi hawi ma tô apâ oto mo, Heresi na romnhisi waꞌwaibaba bâdâdi sõꞌa ꞌrãihâ na inomro na.
14 Tahawa aibâ iprédupté Sucoti hawi aꞌuwẽ ma tô tiꞌâ. Ta hã ma tô mreme nhitiꞌru na sadanharĩ pese. Tawamhã ta hã ma tô Gidiãhã ma, Sucoti ãma 77 na danhibꞌihâꞌa norĩ nhisi na ãma tãma robꞌuiꞌéré.
15 Tahawa Gidiã, Sucoti ãma aibâ norĩ ꞌre ihâimana zaꞌra mono norĩ ma, te te tãma nharĩ zaꞌra da hã, ma tô mo. Ãhã wa, te ãne tãma nharĩ zaꞌra:
— E ma tô aipoꞌre puꞌu zaꞌra waꞌwa, nimahã na ĩꞌãma iꞌato zaꞌra waꞌaba zém na hã. Ma tô ĩma inharĩ zaꞌra waꞌwa, ĩte dasiꞌwapéi ꞌmanharĩꞌwa norĩ te te ãma iꞌãpusi zaꞌra norĩ ma, mra hã tãma sõmri zaꞌra waꞌaba tõ da. E marĩ wa. Zahadu wa hã Zeba norĩ, Salmunahã me hã te mrami õ wa. Wẽ di. Marĩ õre di. Ãhãta te oto ãme wasiré aimaꞌwara zahuré.
16 Tawamhã rop si ꞌre irosaꞌwari mono ãma robꞌre na ꞌwabzéré ꞌwapa ꞌre ihâimana zaꞌra mono hã, ma tô ꞌmaiꞌâ. Taha na ma tô Sucoti ãma danhibꞌihâꞌa norĩ ma hã ãma tãma robꞌmanharĩ zaꞌra.
17 Tawamhã ma tô Penué ãma ꞌri ꞌrãihâ zama hã pru. Ma tô duré ꞌri nhoꞌõmo ãma aibâ norĩ ꞌre ihâimana zaꞌra mono norĩ hã uprosi.
18 Tawamhã Gidiã, ma tô Zeba norĩ, Salmunahã me sadanharĩ zahuré ãne:
— E ꞌwa sine hã ma tô Tabo ãma aibâ norĩ asiwi iꞌuprosi ꞌwa.
— Asine hã ta norĩ hã. Duré danhibꞌapito ꞌra sine hã, uburé ta norĩ hã. — Ãne ma te asa ãma tãma waꞌrãmi zahuré:
19 Tawamhã Gidiã, te tãma nharĩ zaꞌra ãne:
— Ta norĩ hã ĩsisãnawã, ĩna uptabi ꞌra norĩ. Tahawa ãhã na awaꞌawi na hã wa za ropisutu, Uburé Danhibꞌapito nhisi na. A norĩ waꞌwa hã ĩsisãnawã norĩ asiwi uprosi aba õ ꞌwaꞌâhã, aré duré ĩzama te aiꞌuprosi aba õ di.
20 Tahawa ma tô tiꞌra potoꞌrada Zétéhé ma tinha ãne:
— Aiwahutu, pãrĩ da, ã norĩ hã.
Tane nherẽ, aiꞌrepudu tite sibꞌézé wapa te te sada wazere zahuré õ di, pahi wa, duré zahadu hâiba tébre wa.
21 Tawamhã te Zeba norĩ Salmunahã me tãma siꞌru zahuré ãne:
— Maꞌãpé tô a hã we wazô aiꞌré na, wapãrĩ da. E marĩ wa. Aibâ isibꞌru si ãne da hã tô ꞌre siꞌaibâ zaꞌra mono wa.
Ãne wa, Gidiã, ma tô Zeba norĩ zô Salmunahã me hã sô aiꞌré zahuré. Tahawa, ma tô õne haré tipã. Taha pari ma tô duré ite zahuré awaru baꞌõmore nhoꞌrebzu hã tiwi sani zahuré.
22 Tawamhã Izaraéu nhihudu siꞌaibâ norĩ hã ma tô Gidiãhã ma nharĩ zaꞌra ãne:
— A hã ma tô midiãnita norĩ wi hã iwanhoꞌreptu zaꞌra. Tahawa te za tô wama iꞌrãnhoꞌõmo na ꞌre aihâimana zaꞌra mo. Duré aiꞌuirĩ na hã aiꞌra, duré asihudu te za tô iꞌrãnhoꞌõmo na wama ꞌre ꞌmaihâimana zaꞌra.
23 Tawamhã Gidiã, ma te ãne ãma tãma waꞌrãmi zaꞌra:
— Aima zaꞌra waꞌaba isiꞌĩꞌrãnhoꞌõmo da hã, duré ĩꞌra zama aima zaꞌra waꞌaba isiꞌiꞌrãnhoꞌõmo da hã, waihuꞌu õ di. Uburé Danhibꞌapito si, te za ate zaꞌra waꞌaba na iꞌrãnhoꞌõmo na hã aima ꞌre hâimana zaꞌra waꞌwa.
24 Ma duré tawamhã timreme na ãma tãma uzusi zaꞌra ãne:
— Tane nherẽ, wa za misi haré aiwi rowaptẽrẽ zaꞌra waꞌwa ãne: Aihâiba mono bâ waꞌaba te za dapoꞌre zaꞌruzé, ãma iꞌaiꞌuté zaꞌra waꞌaba na isani zaꞌra waꞌwa hã ĩma isõmri zaꞌra waꞌwa.
(Midiãnita norĩ, ẽtẽ waipo pré oru ꞌmanharĩ na isiꞌuwazi nhiꞌoto na hã, ma tô ãma ꞌre sipoꞌre zaꞌru zaꞌra, ta norĩ hã rop si ꞌre irosaꞌwari mono ãma ꞌre hâimana zaꞌra mono wa.)
25 Tawamhã ma te duré ãne ãma sadaꞌâbâ zaꞌra:
— Marĩ õre di. Wapẽꞌẽ to sina wa za tô aima sõmri zaꞌra ni.
Tawamhã daꞌuza hâpa te te siwi ihâ parapo wa, ma tô hâiba mono bâ dapoꞌre zaꞌruzé midiãnita norĩ wi te te siwi isani zaꞌra hã nasi iwa siwi saꞌra tãma.
26 Tawamhã Gidiã, ẽtẽ waipo pré oru ꞌmanharĩ na dapoꞌre zaꞌruzé te te iwaptẽrẽ pire pibuzé hã, ma aré watobro, 30 kilu na ipire pibuzéb u. Ãhã wa, duré ãne da te ipire pibu zaꞌra õ hã daꞌmadâꞌâ wẽ zô danhoꞌrebzuzé hã, midiãnita norĩ nhibꞌihâꞌa zazahâ hâiwaré na ãma ꞌre isiꞌubu zaꞌra mono zé hã, duré awaru baꞌõmore ma isõꞌrebzu te te ãma ꞌre isasõmri zaꞌra mono hã.
27 Tawamhã Gidiã, taha oru na ma tô sasedoti nhoꞌutuꞌu ubuzéb da hã ꞌmanha. Tahawa, ma tô tite ꞌrinhoꞌu Opra na isisi ãma marĩ na sasõ. Ãhã zarina ma tô uburé Izaraéu nhihudu norĩ, ꞌRe ihâimana uꞌâsi mono ãma ꞌre inomro mono zé hã siwi tirẽ. Tahawa, ꞌRe ihâimana uꞌâsi mono upana si ma tô taha na ꞌre iwata zaꞌra mono zéb u si oto ꞌre nomro. Ã hã Gidiãhã ma, duré isibꞌaꞌuwẽ norĩ ma, abaze da te ãma ꞌre iwaibui mono zém ne ꞌrâwi ãma ꞌre isisitob zaꞌra mono zé hã ma tô tãma ꞌre hâimana zaꞌra.
28 Tawamhã ma tô midiãnita norĩ hã Izaraéu nhihudu norĩ nhiptete zahâpâmhã ꞌre hâimana zaꞌra. Tahawa apâ ꞌre ꞌrãiwahutu waihuꞌu zaꞌra mono õ di oto. Tawamhã Gidiã ꞌre hâimana mono ré hã, ma tô 40 wahum na tiꞌai ꞌremhã rowẽ na si ꞌre romhâimana.
Gidiã idâꞌâzé wasuꞌu
29 Tawamhã Gidiã tinhorõwa u apâ te te oto sina siri wamhã, ma tô tamemhã oto ꞌre sãmra.
30 Taha ꞌra hã 70 na ihâiba na, imro norĩ piꞌõ ahâ na tãma ꞌre hâimana zaꞌra mono wa.
31 Tawamhã Siquẽ ãma imro prã ꞌre ihâimana mono ma zama, ma tô iꞌra hã duré tãma podo. Ta hã Gidiã ma tô sisi, Abimelequi na.
32 Tawamhã Zoasihi ꞌra Gidiã, siꞌihi pese uptabi wapsi, ma tô oto dârâ. Dâꞌâ wamhã, ma tô imama da te isẽrẽzéb ãma dasiwi sẽrẽ ni, Opra na ꞌri nhoꞌõmo nhisi Abiꞌézéhé nhibꞌaꞌuwẽ norĩ nhiptiꞌai ãma.
33 Tawamhã Gidiã dâꞌâ parimhã, Izaraéu nhihudu norĩ, ꞌRe ihâimana uꞌâsi mono ãma ꞌre inomro mono zé hã ma tô apâ rẽme zahi zaꞌra, cananeu norĩ te romhâibarĩ norĩ ãmap si ꞌre wata zaꞌra mono da. Tahawa ta norĩ hã ma tô ihâibaꞌõ Baau-Berite na isisi hã te te sima ꞌre pisutu zaꞌra, tite ihâibaꞌõ na si ãma ꞌre nomro mono da.
34 Tahawa Uburé Danhibꞌapito tite ꞌRe ihâimana uꞌâsi mono ãma ꞌre sipoꞌre puꞌu zaꞌra mono õ di, isitobꞌru norĩ te te iꞌuirĩ zaꞌra wi te te isõꞌreptu zaꞌra ãma hã.
35 Tawamhã Zerubau, Gidiã na isisi hâiba amo nhibꞌaꞌuwẽ norĩ ma hã, wẽ na tãma ꞌre hâimana zaꞌra mono õ di, Izaraéu nhihudu norĩ hã. E marĩ wa. Uburé iwẽ te te tãma ꞌre iꞌmanharĩ zaꞌra mono zé hã te te sina ꞌre saꞌrata waihuꞌu zaꞌra mono õ wa oto, ta norĩ hã.
