Provébiu 4:1-27
4 Ĩꞌra norĩ, aimama nhimiroti hã ꞌre wapari pese zaꞌra waꞌaba mono. ꞌRe asimipari pese zaꞌra waꞌaba mono wamhã, te za asimirowaihuꞌuzé iwẽ hã ꞌre iwaihuꞌu zaꞌra waꞌaba mo.
2 Aima ĩnhimiroti zaꞌra waꞌaba zé hã wẽ uptabi di. Tahawa, maꞌãpé ãma ꞌre aipoꞌre puꞌu uꞌâsi zaꞌra waꞌaba mono, ĩnhimiroti na hã.
3 Wa hã zahadure ré ĩmama ꞌra misi na ꞌre ĩhâimana mono ré, ĩna ma ĩzawi uptabi na ꞌwatébrémi na ꞌre ĩhâimana mono ré hã,
4 ma tô ĩmama hã te te ĩma ꞌre roti ãne:
— Maꞌãpé uburé aipẽꞌẽ na ĩmreme hã asima ꞌre tété uꞌâsi mono, niwamhã ãma aipoꞌre siꞌâri ãna. Ãne na ãma ꞌre aihâimana mono wamhã, te za rowẽ na si ꞌre aihâimana mo.
5 Maꞌãpé asimirowaihuꞌu wẽ na, duré asimizaꞌrese wẽ na ꞌre iꞌaihâimana mono zô si, te za asima ꞌre airĩtĩ mo. Te aima irowaihuꞌu mono zém na hã ãma aipoꞌre siꞌâri tõ. Rẽme tõ.
6 Rowaihu iwẽ hã rẽme tõ tô. Ãne wamhã, te za aiꞌwawimhã ꞌre simapa. Duré ꞌre sawi pese mono wamhã, te za asima iwẽ na ꞌre iꞌaihâimana mono zé hã aima te ꞌre anhomri.
7 Rowaihu iwẽ hã danhipai u iwẽ uptabi, da te ꞌre iwaihuꞌu zaꞌra mono da hã. Duré asimizaꞌrese wẽ waꞌâbâzéb da hã tô ibâre aré, uburé marĩ aima ꞌre ihâimana mono waꞌâbâzém na ãma asima iwaꞌâbâ da hã.
8 Rowaihu iwẽ hã asima ꞌre sawi pese mono wamhã, ta hã te za iwaꞌrãmi aipire na ꞌre iꞌaihâimana mono zéb da hã te te aiꞌãma ꞌre hâimo. Duré iré ꞌre aipasito mono wamhã, te za dama aiwazém na ꞌre aihâimana mo.
9 Asimirowaihu iwẽ hã te za danhoprezé iwẽ uptabi ne aima ꞌre hâimana, aiꞌrãiwaptoꞌwa na.
10 Ĩꞌra, maꞌãpé ĩwapari pese. Marĩ na te aima inharĩzé mono na hã ãma ĩzaze na. Taha wamhã, te za ꞌre aihâimana hâ mo.
11 Wa hã wa tô te ꞌre asaprõni, rowaihu iwẽ te, bâdâdi awaꞌawi na hã, iꞌuwaibaba na si tô ꞌre aihâimana mono da hã.
12 Asimirowaihuꞌu wẽ na si ꞌre aimorĩ wamhã, niwamhã ate bâdâdi iwẽ hã asiwi iꞌwaꞌrutu da hã mare di. Duré niwa ꞌre asamroi mono wamhã, ꞌre iꞌaiꞌmarõpãrĩ mono da hã mare di za.
13 Õne uꞌâ ãma ꞌre aipoꞌre puꞌu mono, iꞌawaihuꞌu mono zém na hã. Asima ꞌre tété wẽ uꞌâsi mono, ta hawim na za ꞌre aihâimana wẽ mono wa.
14 Iwasété norĩ ꞌre inomro mono zém ne hã ꞌre aimorĩ tõ. Duré ꞌre ihâimana zaꞌra mono zém na hã, ãma ꞌre aihâimana mono tõ.
15 Ta norĩ te te ꞌre iꞌmanharĩ zaꞌra mono zé hã, duré ꞌre ꞌmanharĩ mono tõ. Tiwi ꞌre asaꞌo hâ zaꞌra mono. Duré tiwi hã ꞌre apa zaꞌra mono, nima niwĩ ꞌre ane mono da.
16 Iwasété norĩ hã ꞌre sõtõ waihuꞌu zaꞌra mono õ di, marĩ iwasédé te te ꞌre ꞌmanharĩ zaꞌra mono õ ré hã. ꞌRe sõpré mono haré, te za tô ꞌre simiꞌwara, te te daꞌãma ꞌre irobꞌmanharĩ wasété zaꞌra mono zéb u.
17 E marĩ wa. Ta norĩ ma hã marĩ ꞌmanharĩ wasétézé hã, duré daꞌãma rowamnarĩzé hã tãma zaꞌra hã isa zaꞌra ne hã, duré uva ꞌrãi waꞌu isé te te ꞌre iꞌâhuri mono ne hã.
18 Iꞌuwaibaba na si ꞌre inomro mono norĩ nhibâdâdi hã te tãma ꞌre hâimana zaꞌra, bâtâ ro te te ꞌre irowapré mono wim ne, te te ꞌre irowaꞌa pese mono zéb u hã.
19 Tane nherẽ, iwasété norĩ nhibâdâdi, iꞌrãdâꞌâ ra, ꞌre imara ꞌrã pese mono ne hã. Ta norĩ hã te te ꞌre iꞌmarõpãrĩ zaꞌra mono zé hã te te ꞌre ꞌmadâꞌâ waihuꞌu zaꞌra mono õ di, duré te te sina ꞌre ꞌmadâꞌâ waihuꞌu zaꞌra mono õ di.
20 Ĩꞌra, ĩwapari pese, te aima inharĩ mono zém na hã.
21 Niwamhã aima ĩnhimirotizé ꞌre ꞌmadâꞌâ mono ãna ꞌre aihâimana mono tõ. Duré aipẽꞌẽ ꞌremhã asima ꞌre tété uꞌâsi mono.
22 Rowaihu iwẽ hã niꞌwam norĩ te te ꞌre waihuꞌu zaꞌra mono wamhã, te za ꞌre ihâimana hâ zaꞌra mono zé hã te te tãma ꞌre sõmri zaꞌra, duré hâzé ãna ꞌre ihâimana zaꞌra mono zé hã.
23 Maꞌãpé marĩ na asimirosaꞌrata na hã ãma ꞌre pibui pese mono. E marĩ wa. Asimirosaꞌrada hã aihâimanazé zaprõniꞌwai wa.
24 Niwamhã asadawa nhipese na hã ꞌre nharĩ mono tõ. Duré aimreme siꞌahâ na iwasété na zama ꞌre nharĩ mono tõ.
25 Asisõwap si ꞌre robꞌmadâꞌâ uꞌâsi mono, ꞌre irobꞌumnhasi mono zéb zarina.
26 Marĩ hã ꞌre iꞌmanharĩ mono da hã asima ꞌre rosaꞌrata wẽ mono. Tawamhã asima ꞌre irowaꞌõtõ mono zé hã te za iꞌuwaibaba na si te te ãma aima ꞌre uwaimrami.
27 Tiwi ꞌre aiꞌaꞌre nhiꞌoto mono tõ õwamhã, duré ãwamhã. Iwasété ma hã, duré ꞌre asaꞌo hâ mono.
