Apocalipsi 1:1-20
1 1:1-2 Duréihã, ꞌRe ihâimana uꞌâsi mono hã ma tô Zezu Cristuhu ma awaihuꞌu siro, tô sena na za romhutu na ꞌre iromhâimana mono zém na, tinhibꞌaꞌuwẽ norĩ ma, te te duré waihuꞌu siromo zaꞌra da.
Tahawa, Zezusi hã ma tô hâiwa ãma romhuriꞌwa hã we satõ Zuwãhã u, marĩ te te tãma waihuꞌu da. Tawamhã ma tô itẽme wi. Itẽme wisi wamhã, Zezusihi ma, ꞌRe ihâimana uꞌâsi mono hã sõꞌawi te te oto tãma iromhâiꞌrézém na ma tô Zuwãhã ma waihuꞌu. Ãhã wamhã, sõtõ ꞌrowim ne, ma tô marĩ hã ꞌmadâ, da te ꞌre irosawẽrẽ zaꞌra mono ne. Tahawa, tô sena na te za oto Zuwã hã ãne aima ãma robꞌuiꞌéré zaꞌra waꞌwa, waihuꞌu zaꞌra waꞌaba da, uburé marĩ hã te te iꞌmadâꞌâzém na, tô sena ꞌRe ihâimana uꞌâsi mono nhimiwaihuꞌuzém na hã, Zezusi hã sena na te te iwaihuꞌuzém na.
2 ꞌMadâꞌâ 1:1
3 Tawamhã ãhã wasuꞌu hã za ꞌre iromhâimana mono zém na niꞌwa te te dama ꞌre sõré mono wamhã, tãma ꞌre rowẽ uꞌâsi mono di za. Duré, ãhã wasuꞌu hã niꞌwa te te ꞌre wapari pese mono wamhã, ãma tãma ꞌre rowẽ uꞌâsi mono di za. Ãma ronomro õ ré, te za ꞌre romhâimana, ꞌRe ihâimana uꞌâsi mono te te iwaihuꞌuzém na hã. Tahawa, niꞌwa hã hâimana nhimizaꞌrese sina, te te ꞌre wapari pese mono wamhã, tãma hã ꞌre rowẽ uꞌâsi mono di za ãma.
Azia na tiꞌa nhisi ãma isazeiꞌwa norĩ, Zuwã te te isawi zaꞌra zé wasuꞌu
4 Wa hã, Zuwã. Ĩnhimiꞌuiꞌéré na wa ãma asawi zaꞌra waꞌwa, Azia na danhiptiꞌa nhoꞌõmo nhisi ãma, Zezusihi zazeiꞌwa, asiré ꞌre asiꞌrãꞌõtõ uꞌâsi aba mono norĩ hã, 7 na dazaꞌrui mono bâ ꞌre iꞌaiꞌrãꞌõtõ aba mono norĩ hã.
ꞌRe ihâimana uꞌâsi mono nhimizawi pese zé hã duré ihawi rowẽ uꞌâsi zé hã aiꞌãma ꞌre ihâimana uꞌâsi zaꞌra waꞌaba mono da si. Ta hã duréihã marĩ õ uptabi ré, ma tô ꞌre hâimana uꞌâsi. Õne uꞌâsi te za duré ãhã mono na zama hã ꞌre hâimana. Hâiwa ãma te ta hã ꞌre sãmra uꞌâsi, danhibꞌapito simasisizém na. Duré Ipẽꞌẽzani zama te te ꞌre aipawaptob uꞌâsi zaꞌra waꞌaba mono da, wa duré aiꞌãma te ꞌre rosaꞌrata uꞌâsi zaꞌra waꞌwa. Ta hã te ꞌRe ihâimana uꞌâsi mono simasisizé uiwada ꞌre hâimana uꞌâsi. Taha pẽꞌẽzani hã 7 na isimiromhuri hã.
5 Zezu Cristuhu zama te te ꞌre aipawaptob uꞌâsi zaꞌra waꞌaba mono da, wa duré aiꞌãma te ꞌre rosaꞌrata uꞌâsi zaꞌra waꞌwa. Ta hã dama iꞌumnha, te simiꞌẽ na ꞌre hâimana, ꞌRe ihâimana uꞌâsi mono zadawa wasuꞌuwẽ ꞌwa da hã. Ta hã ma tô dawana tihâiwaꞌutu ꞌrata, ihâiba siꞌutõrĩ waihuꞌu õ na. Uburé tiꞌai ãma danhibꞌapito norĩ nhipai u, Zezusi hã te ꞌre hâimana. Misi Danhibꞌapito uptabi na, te tô ꞌre hâimana.
Ta hã te te ꞌre waꞌazawi pese. Tahawa, ma tô wazada dârâ. Wazada dâꞌâ wamhã, iwapru ma tiwi puru. Tawamhã wawasété na ꞌre wanomro mono ré, ma tô tiwapru na tidâꞌâzém na te te ꞌre waꞌaꞌupsõ, wawasété ãna ãma ꞌre wanomro mono da oto.
6 Ma tô duré te te ꞌre waꞌapisutu, Imama ma, wa te daꞌãma ꞌre romhuri uꞌâsi zaꞌra mono da, sasedoti norĩ ne, Isibꞌapito ma hã. Ma tô duré te te ꞌre waꞌapisutu, isadawa para, wapire na ꞌre wahâimana zaꞌra mono da. Ta hã Zezusi hã wẽ uptabi wa, duré waihuꞌu pese uptabi wa, wa za tô ãma ꞌre wawata uꞌâsi zaꞌra.
7 Maꞌãpé, asiwi waihuꞌu pese zaꞌra waꞌaba. Zezusi hã te za wei mo, hâiwaꞌa na. Wei morĩ wamhã, uburé te za dasiwi ꞌmadâꞌâ zaꞌra ni. Iꞌaꞌre wi, siwi iwaꞌréꞌwa norĩ hã te za duré ꞌmadâꞌâ zaꞌra, siwi iwĩrĩꞌwa norĩ hã. Tawamhã daꞌupsãtã mono bâ te za sô aiwaꞌõ zaꞌra ni, daro mono bâ. Tô sena te za ãne hã tiromhâiba.
8 Uburé Danhibꞌapito ꞌRe ihâimana uꞌâsi mono, dama isiwaihuꞌuzé hã, ãne: “Wa hã imorĩꞌrata na, wa tô ꞌre ĩhâimana uꞌâsi. Õne uꞌâ, wa za duré ꞌre ĩhâimana uꞌâsi. Uburé marĩ hã siꞌutõrĩ pese nherẽ, duré wa hã isarina zaꞌra ĩsiꞌutõrĩ da hã mare di za.”
Zuwã hã Zezusi te te isabuzé wasuꞌu, sõtõ ꞌrowim ne
9 Wa hã Zuwã, asisãnawãi waꞌwa. A norĩ waꞌwa hã Zezusihi ãma si ꞌre anomro aba mono wa, danhimirobꞌmanharĩ wasédé, ꞌre isépata zaꞌra waꞌaba mono ne, wa duré te ꞌre robzépata, asine zaꞌra waꞌaba, Zezusihi ãma si ꞌre ĩmorĩ wa. Zezusihi ãma si wasiré ꞌre wanomro mono wa, wa duré ꞌRe ihâimana uꞌâsi mono nhibꞌaꞌuwẽ ꞌre wahâimana zaꞌra. Ta hã te za duré te te ꞌre waꞌapawaptob uꞌâsi, da te ꞌre waꞌruiwapari zaꞌra mono wa, wa te ꞌre robzépata zaꞌra mono nherẽ, wawasété u tiwi ꞌre wasipizari zaꞌra mono tõ da, wanhiptete uꞌâsi ãma ꞌre wanomro mono da.
Wa hã wa tô te dama ꞌre sadawa wasuꞌu, ꞌRe ihâimana uꞌâsi mono hã. Tô sena na Zezusihi zazeiꞌwa na wa tô duré dama ꞌre ĩsiwasuꞌu uꞌâsi. Tahawa, ma tô dasiwi ĩꞌâri ni. Ma tô duré dasiwi ĩzatõrĩ ni, Patemusi na robꞌré zaꞌiti nhisi u.
10 Tawamhã tame ĩnhamra ré, Uburé Wanhibꞌapito nhibâtâ na ꞌRe ihâimana uꞌâsi mono Pẽꞌẽzani hã ma tô ĩꞌuihâ piꞌra. Te te ĩꞌuihâ piꞌrai wa, wa tô aimawi ĩhâiba, ĩhâiba waihuꞌu õ na. Tawamhã ĩhâiba waihuꞌu õ na ĩhâimana ré, wa tô niꞌwai mreme hã wapa, ĩbabarãi hawi. Mreme ꞌrãihâ na te ĩma tinha, danhimnhihârâzé hârâ ꞌrãihâ na ne.
11 Ãne te tawamhã ĩma tinha:
— Ãhã na marĩ hã te za iꞌaꞌmadâꞌâ mo. Tawamhã uburé iꞌaꞌmadâꞌâ mono hã te za ibaihâ na ãma irobꞌuiꞌé. Ãma robꞌuiꞌéré parimhã, Zezusihi zazeiꞌwa norĩ, ꞌri nhoꞌõmo mono bâ siré ꞌre isiꞌrãꞌõtõ mono norĩ ma, te za ibaihâ hã isõmri zaꞌra, ꞌRi nhoꞌõmo nhisi mono bâ, ãne isisi norĩ ma: Éfézu, duré Esmina, duré Pegamu, duré Tiatira, duré Sadési, duré Filadéufia, duré Laudiséa. Ã norĩ ma, te za asimiꞌuiꞌéré hã tãma isõmri zaꞌra, isazeiꞌwa norĩ ma, 7 na ꞌri nhoꞌõmo ãma ꞌre isiꞌrãꞌõtõ mono norĩ ma hã.
12 Tawamhã wa tô ĩsibabarãi u ꞌrãihaipiꞌra, ĩma inharĩꞌwa zô. Sô ĩsipiꞌrai wamhã, robꞌuiwẽzé simaꞌwarazé hã 7 na ihâiba zaꞌra hã duré isisiwimhã iroꞌo ré hã wa tô ꞌmadâꞌâ zaꞌra. Robꞌuiwẽzé simaꞌwarazé mono hã, ẽtẽ waipo pré oru ꞌmanharĩ. Te robꞌmadâꞌâ nherẽ, ĩnhotõ ꞌrowi te irosawẽrẽ ne, wa tô robꞌmadâ.
13 Tawamhã robꞌuiwẽzé waꞌwa, te niꞌwa hã za, aibâ ne hã. Iꞌuza hâpa, ipara u te tiwi hâihaipra. Duré sõꞌutu wasisi ré, te za. Isõꞌutu wasisizé hã, oru ꞌmanharĩ na.
14 Duré iséré hã, rã uptabi di. Poneꞌẽrebâ zéré ne, tô sena irã uptabi, iséré hã. Duré, ito hã, unhama roꞌo siꞌubuzi ne te ꞌre siꞌubuzi zahuré.
15 Duré ipara hã ẽtẽ topsada brõzi ne, te ꞌre siꞌubuzi zahuré. Duré imreme hã, âꞌaꞌa ꞌrãihâ ruruꞌu ne.
16 Wasi hã 7 na te tété zaꞌra, tinhibꞌrata nhimire niwĩ. Duré isadaiꞌré hawimhã, sibꞌézé ꞌwa siꞌuiwa ꞌwa pa te daꞌo, iꞌwa pe hã. Duré iꞌubu hã te rowaꞌa zaꞌẽtẽ. Abzuma bâdâ te te ꞌre irowaꞌa mono ne, te rowaꞌa zaꞌẽtẽ.
17 Tawamhã õ hã te ꞌmadâꞌâ wamhã, wa tô ipapara aime saꞌẽtẽ, ĩdâꞌâ ne, ĩpahi te. Tane nherẽ, ma tinhibꞌrata nhimire niwĩ ĩꞌupi, ĩpahi tõ da. Ãne te ãhã wamhã ĩma tinha:
— Ĩma aipahi tõ. Wa hã romnaꞌrada duré robꞌrãsudu.
18 Wa tô dârâ aré. Ĩdâꞌâ nherẽ, wa oto tô ꞌre ĩhâimana uꞌâsi. Duré oto ĩdâꞌâ waihuꞌu õ di za. Maꞌãpé, ãne na hã awaihuꞌu pese. Te ĩsima ipisutuzéb zarina, wa te te ꞌre daꞌanhoꞌreptu, adâ ꞌre ihâimana zaꞌra mono zém hawi, ꞌRe ihâimana uꞌâsi mono ꞌrata, oto ꞌre dahâimana uꞌâsi zaꞌra mono da.
19 Tahawa, uburé marĩ hã iꞌabꞌmadâ hã te za iꞌaꞌuiꞌéré mo, ãhã na ipusi mono hã, duré nimahã na za ipusi mono da hã.
20 Ãhã na wa za duré aima waihuꞌu. Wasi hã ĩnhibꞌrata nhimire niwĩ te itété zaꞌra iꞌmadâ hã, te ãma isimiréꞌézé hã waihuꞌu õ di, a hã. Duré robꞌuiwẽ uparizé iꞌmadâꞌâ zaꞌra hã te ãma isimiréꞌézé hã, waihuꞌu õ di tô duré aima. Tahawa, wa za oto aima waihuꞌu, te ãma isimiréꞌé zahuré zém na hã, waihuꞌu da. Wasi hã 7 na ihâiba zaꞌra hã, ĩnhibꞌrata nhimire niwĩ te itété zaꞌra hã, isazeiꞌwa norĩ ꞌmadâꞌâꞌwai mono, te wasuꞌu, tô 7 na ihâiba zaꞌra hã. Duré robꞌuiwẽzé simaꞌwarazé hã, duré isisiwimhã iroꞌo ré hã 7 na ihâiba zaꞌra hã, isazeiꞌwa norĩ te wasuꞌu, ꞌri nhoꞌõmo mono bâ siré ꞌre isiꞌrãꞌõtõ mono norĩ. Ãne te ãma isimiréꞌé zahuré zé hã.
