Apocalipsi 18:1-24
18 Taha pari, wa tô duré ꞌmadâ, hâiwa ãma ꞌRe ihâimana uꞌâsi mono ma romhuriꞌwa aimawi hã. Hâiwa hawi te wei mo, isimiwadaꞌuri pire hã. Ihâiba hã te rowaꞌa zaꞌẽtẽ, tiꞌai mono bâ.
2 Tawamhã mreme ꞌrãihâ na te ꞌmahâ. Ãne te ꞌmahâ:
— Babilonia hã dahu nhoꞌu dama isaꞌrese zaꞌẽne hã ma tô daré aiꞌutõ. Ma tô uprosi ni. Ahâ uptabi na te oto iwasété norĩ hã iwa ꞌre hâimana zaꞌra, waꞌuburé norĩ hã. Sipahutu norĩ zama, duré siꞌõmo norĩ zama te oto ahâ uptabi na iwa ꞌre hâimana zaꞌra, uburé pese si iwasété norĩ hã.
3 Uburé dapoto wamri mono bâ ma tô uva nhoꞌu isé nhimiꞌrãiwamnarĩ ne, dawasété si da te iwa ꞌre ꞌmanharĩ zaꞌra. Ma tô duré daro mono bâ danhibꞌapito norĩ hã dama ipire zaꞌra hã siré ꞌre wasété uptabi zaꞌra. Aibâ hã timro upana piꞌõ aimawi zô si te te ꞌre irowasutu zaꞌra mono ne, ma tô ꞌRe ihâimana uꞌâsi mono upana, marĩ iwasété zô si da te ꞌre robꞌruiwapari zaꞌra. Duré Babilonia ãma marĩ zô si, da te ꞌre irobꞌruiwapari zaꞌẽtẽ uptabi zaꞌra mono zarina, ma tô marĩ hã da te ꞌre uipra zaꞌẽtẽ uptabi zaꞌra, siwaꞌru. Taha na da te tiwi ꞌre irobꞌuipra zaꞌra mono zém na, ma tô daro mono bâ dama rowedeꞌwa norĩ hã ꞌre sisibro pese uptabi zaꞌra. Ãne wa, ma oto Babilonia hã aiꞌutõ.
4 Tawamhã wa tô duré wapa, damreme hâiba amo hã hâiwa hawi te te inharĩ hã. Ãne te tinha:— Ĩnhibꞌaꞌuwẽ norĩ, maꞌãpé ta hawi aiwairébé aba, ꞌri nhoꞌõmo zaꞌẽtẽ hawi, dasine ꞌre aiwasété tõ zaꞌra waꞌaba mono da, duré dawasété norĩ hã za te te ꞌre irobzépata zaꞌra mono norĩ zu, ꞌre robzépata tõ zaꞌra waꞌaba mono da.
5 Marĩ hã da te ꞌre isibu ꞌrãihâ zaꞌra mono ne, ma tô Babilonia ãma ꞌre idawasété zaꞌra mono zé hã tinhibu ꞌrãihâ pese, hâiwa u. Tawamhã ꞌRe ihâimana uꞌâsi mono hã ma tô ãma sipoꞌre puꞌu, Babilonia ãma ꞌre idawasété uptabi zaꞌra mono zéb ãma.
6 Maꞌãpé Babilonia ãma ꞌre idahâimana zaꞌra mono norĩ ma, tãma ãma waꞌrãmi zaꞌra waꞌaba asa, aiwab da, ĩnhibꞌaꞌuwẽ norĩ ma, te te ꞌre irobꞌmanharĩ zaꞌra mono ne. Ta norĩ nhimirobꞌmanharĩzéb zarina ma tô ĩnhibꞌaꞌuwẽ norĩ hã te te ꞌre robzépata zaꞌẽtẽ zaꞌra. Tahawa, ĩnhibꞌaꞌuwẽ norĩ ma, te te tãma ꞌre irobꞌmanharĩ zaꞌra mono zém nhipai u, te za tãma ãma iwaꞌrãmi zaꞌra waꞌwa, Babilonia ãma ꞌre idahâimana zaꞌra mono norĩ ma, isipai u te te ꞌre robzépata zaꞌẽtẽ zaꞌra mono da.
7 Ta norĩ hã ma tô sina ꞌre wata pese zaꞌra. Tinhimirosaꞌrata wasété zarina ma tô sina ꞌre hâimana wasété uptabi zaꞌra. ꞌRe ihâimana wasété zaꞌra mono zarina, te za aiwab da, tãma ꞌre irobꞌmanharĩ wasété zaꞌra waꞌaba mo, te te ꞌre robzépata zaꞌẽtẽ zaꞌra mono da, duré tiwi ꞌre robzeiꞌõ pese zaꞌra mono da. Tawamhã piꞌõ te nasi siꞌãma tinha, ãne: Wa hã dama ĩpire na, wa ꞌre ĩnhamra. Duré imrotõ hã timro zô ꞌre isiwaꞌõ zaꞌra mono ne, ꞌre ĩhâimana mono õ di. Ĩsiré norĩ hã ahâ uptabi di. Niwamhã ĩwi robzeiꞌõ waihuꞌu õ di za. Ãne te piꞌõ hã siꞌãma nasi tinha, Babilonia ãma ꞌre idahâimana zaꞌra mono norĩ ãma isimiréꞌé na.
8 Ãne te te nasi siꞌãma nharĩ wa, te za niwapsi robꞌmanharĩ pipa hã bâtâ na õne haré sô watobro, dahâzé hã, duré dadâꞌâzé hã, duré mra hã. Tawamhã Uburé Danhibꞌapito ꞌRe ihâimana uꞌâsi mono hã iwasédé te te ãma ihiri hã waihuꞌu pese uptabi wa, te za uprosi unhama na, piꞌõ hã.
9 Tawamhã daro mono bâ danhibꞌapito norĩ hã dama ipire zaꞌra norĩ hã ã piꞌõ na ꞌre ihâimana wasété zaꞌra mono norĩ hã piꞌõ izata nhizé te te sãmri zaꞌra wamhã, te za ãma aiwaꞌõ zaꞌra.
10 Tawamhã piꞌõ te te irobzépata pipa te, te za romhâ na aimasa. Ãne te za ipibu ma ꞌre sadari zaꞌra:
— Ropipa uptabi hã ma tô asô tiwatobro ꞌwa, Babilonia ãma ꞌre iꞌaihâimana zaꞌra waꞌaba mono norĩ zô hã. Ropipa uptabi di. Misi bâtâ na ma ropipa uptabi hã õne haré asô tiwatobro ꞌwa, ꞌri nhoꞌõmo zaꞌẽtẽ ãma ꞌre iꞌaihâimana zaꞌra waꞌaba mono norĩ zô. Taha na ma tô irobzépata zaꞌẽtẽ zaꞌra waꞌwa.
11 Tawamhã daro mono bâ roptedeꞌwa norĩ hã dama rowedeꞌwa norĩ hã te za duré sô tiꞌruꞌru. Te za sô aiwaꞌõ zaꞌra, niꞌwa hã za oto te te tiwi ꞌre robꞌuipra zaꞌra mono dai õ wa.
12 Ãne aré rowedeꞌwa norĩ wi, da te ꞌre iꞌuipra zaꞌra mono hã; ẽtẽ waipo pré oru hã, duré ẽtẽ waipo prã prata hã, duré ẽtẽꞌubuzi iwaꞌâbâ zaꞌẽtẽ upsãtã mono bâ, duré aꞌé tõmo wawẽ ne itobꞌa ꞌmanharĩ hã, iwaꞌâbâ zaꞌẽne hã. Ãne duré, aré rowedeꞌwa norĩ wi, da te ꞌre iꞌuipra zaꞌra mono hã; zazahâ ihâi wẽ uptabi ꞌmanharĩ hã, ihâ prépe hã duré ihâ uzétâ iwaꞌâbâ zaꞌẽne hã. Duré wede hã iwaꞌâbâ zaꞌẽtẽ upsãtã mono bâ, te te dama ꞌre wede zaꞌra aré, duré wede waꞌâbâ zaꞌẽtẽ ꞌmanharĩ mono hã, duré uhâ nhisiꞌreti ꞌwaꞌratahi ꞌmanharĩ mono hã, duré ẽtẽ topsada brõzi ꞌmanharĩ mono hã, duré isiꞌuwazi tete ꞌmanharĩ mono hã, duré ẽtẽ suꞌu rã ꞌmanharĩ mono hã.
13 Ãne duré, rowedeꞌwa norĩ wi, aré da te ꞌre iꞌuipra zaꞌra mono hã; wedewaꞌu zadaze upsãtã mono bâ, dasai warĩrĩzéb da hã, duré ꞌri ꞌre zadazezéb da hã, duré dasihâibaꞌuꞌrézéb da hã, wedewaꞌu zadaze iwaꞌâbâ zaꞌẽtẽ mono hã. Ã hã rowedeꞌwa norĩ wi, aré da te ꞌre iꞌuipra zaꞌra mono hã; uva ꞌrãi waꞌu isé hã, duré azeitona ꞌrãi waꞌui wa hã, duré trigu iꞌrãi ré hã, duré isu pese uptabi hã, duré powawẽ hã, duré poneꞌẽrebâ hã, duré awaru hã, duré wede na wedewara hã, duré dapawaꞌâbâ ãna da te dama ꞌre iromhuri zaꞌra mono hã. Ãne te uburé marĩ hã da te ꞌre uipra zaꞌra aré, rowedeꞌwa norĩ wi hã.
14 Tawamhã rowedeꞌwa norĩ hã te za ꞌri nhoꞌõmo ma nharĩ zaꞌra, ãne:
— Uburé pese marĩ iwẽ hã sô ꞌre irobꞌruiwapari zaꞌra waꞌaba mono hã ma siꞌutõrĩ. Uburé asibro hã ma tô isimini pese zaꞌra waꞌwa. Oto sõpẽtẽ zahu zaꞌra waꞌaba õ di za.
15 Tawamhã roptedeꞌwa norĩ dama rowedeꞌwa norĩ hã danhibro pese na da te tiwi ꞌre irobꞌuipra zaꞌra mono zém na ꞌre isisibro pese uptabi zaꞌra mono norĩ hã te za duré romhâ na aimasa, ꞌri nhoꞌõmo nhiti. Babilonia ãma da te irobzépata zaꞌra pipa te, te za romhâ na aimasa. Te za duré sô aiwaꞌõ zaꞌra.
16 Sô siwaꞌõ zaꞌra sina, te za ãne sima ãma nharĩ zaꞌra:
— Ropipa uptabi hã ma tô dazô watobro, ꞌri nhoꞌõmo zaꞌẽtẽ ãma ꞌre idahâimana zaꞌra mono norĩ zô hã. Daꞌuza ihâiwẽ uptabi na te aré ꞌre dasiꞌuza zaꞌra, ihâpré pese na duré ihâpré dâꞌâ na iwaꞌâbâ zaꞌẽtẽ na si. Dasipesezém na iwaꞌâbâ zaꞌẽtẽ na ma tô aré ꞌre dasipese zaꞌra, oru ꞌmanharĩ na, duré ẽtẽꞌubuzi iwaꞌâbâ zaꞌẽtẽ na, duré aꞌé tõmo wawẽ ne itobꞌa ꞌmanharĩ na. Ãne aré marĩ na ꞌre idasipese zaꞌra mono zé hã.
17 Tane nherẽ, ma tô õne haré ropsiꞌutõrĩ, siꞌabaꞌréi waré na danhibro hã.
Tawamhã â poré mono bâ ubaꞌre na ꞌre idahâimana zaꞌra mono hã te za duré romhâ na aimasam ni, ubaꞌre na rotiꞌwa norĩ hã, duré ãma iromhuriꞌwa norĩ hã, duré ubaꞌre na ꞌre idanomro mono dama rowedeꞌwa norĩ hã.
18 Tawamhã ã norĩ hã ꞌri nhoꞌõmo nhizé, te te sãmri zaꞌra wamhã, te za duré ꞌre sadari zaꞌra. ꞌRe sadari zaꞌra mono sina, te za ãne sima nharĩ zaꞌra:
— Õ hã ꞌri nhoꞌu hã iwẽ uptabi aré. Isine hã ꞌri nhoꞌu hã iꞌmaihâimana waihuꞌu õ.
19 Tawamhã robꞌru te, te za duré robzapru hã tiꞌrã nhisiwi saꞌwari zaꞌra. Siwaꞌõ zaꞌra sina, te za duré ãne sima nharĩ zaꞌra:
— Ropipa uptabi hã ma tô sô tiwatobro zaꞌra, ꞌri nhoꞌõmo zaꞌẽtẽ ãma ꞌre idahâimana zaꞌra mono zô hã. Ropipa uptabi di. Danhibro pese na iwa da te wawi ꞌre irobꞌuipra zaꞌra mono zém na, wa tô aré ꞌre wasisibro pese zaꞌra, ubaꞌre na ꞌre iwahâimana zaꞌra mono hã. Tane nherẽ, ma tô siꞌabaꞌréi waré na ropsiꞌutõrĩ õne haré.
20 Ãne te iꞌawapari mono hã, ĩnhotõ ꞌrowim ne, ĩpoꞌre na.
Tahawa, maꞌãpé hâiwa ãma ꞌre aihâimana zaꞌra waꞌaba mono hã ãma ꞌre atoi uꞌâsi zaꞌra waꞌaba mono, ꞌri nhoꞌõmo zaꞌẽne hã isiꞌutõrĩzém na. Duré ꞌRe ihâimana uꞌâsi mono nhibꞌaꞌuwẽ norĩ, maꞌãpé ꞌre atoi uꞌâsi zaꞌra waꞌaba mono, isadawa wasuꞌuꞌwa norĩ zama, duré Cristuhu zadawa wasuꞌuꞌwa norĩ zama. E marĩ wa. Babilonia ãma da te aima ꞌre robꞌmanharĩ wasété zaꞌra waꞌaba mono wa, ꞌRe ihâimana uꞌâsi mono hã te te daꞌuprosi wa oto. Tahawa, te za ãma ꞌre atoi uꞌâsi zaꞌra waꞌaba mo.
21 Tawamhã ãne, wa tô duré te azabu. Hâiwa ãma romhuriꞌwa isimiwadaꞌuri pire hã ma tô ẽtẽ tõmo wawẽ uptabi hã sarõtõ. Te te sarõtõ wamhã, ma tô âi ba time, â poré ãma. Te te me sina, te ãne tinha:
— Ãne te za Babilonia hã ꞌri nhoꞌõmo zaꞌẽne hã saꞌẽtẽ uptabi daré uprosi, siꞌutõrĩ da. Tawamhã rop si hã te za oto sô nomro.
22 Tawamhã rowamreme õ di za oto. Duré danhimnhihârâzé hã baba di za oto. Duré danhimnhihârâzé isurure hã robaba di za oto. Duré rowamremeꞌwai õ di za oto, duré isõꞌreꞌwai õ di za oto, da te aré ꞌre iwapari zaꞌra mono hã. Robꞌéꞌé uptabi di za. Duré romhuri nhipeseꞌwa norĩ hã robaba uptabi di za. Duré ẽtẽ tõmo wawẽ ꞌmanharĩ na amnho, da te ꞌre isub zaꞌra mono zé ruru hã da te ꞌre wapari zaꞌra mono õ di za. Robꞌéꞌé uptabi di za.
23 Duré robꞌuiwẽzé hã te te oto dama ꞌre robꞌuiwẽ zaꞌra mono õ di za, Babilonia ãma hã. Duré dasina ꞌre damro zaꞌra mono õ di za oto.
Babilonia ãma dama rowedeꞌwa norĩ hã ma tô aré danhipai u sibro pese na ꞌre hâimana zaꞌra, dama pire na. Iwa ꞌre idahâimana zaꞌra mono norĩ hã ma tô simiꞌâ na te te daꞌãma ꞌre romhuri zaꞌra, ꞌRe ihâimana uꞌâsi mono upana, isine marĩ zô si da te ꞌre robꞌruiwapari pese zaꞌra mono da, õhõ na dama ꞌre rowẽ zaꞌra mono da newa.
24 Babilonia ãma iwa ꞌre idahâimana wasété zaꞌra mono norĩ hã ma tô ꞌRe ihâimana uꞌâsi mono nhibꞌaꞌuwẽ te te ꞌre simro, isadawa wasuꞌuꞌwa norĩ zama. Babilonia norĩ zadawa para, ma tô duré daro mono bâ dasiwazari da te ꞌre danhimro. Tahawa, ma tô Babilonia hã daré uprosi ni.
