Apocalipsi 4:1-11
4 Taha zaꞌu si, wa tô duré marĩ hã te aꞌmadâꞌâ, ĩnhotõ ꞌrowim ne. Hâiwa u wa tô robꞌmadâ. Te robꞌmadâꞌâ wamhã, wa tô ꞌmadâ, hâiwa ꞌridawa hã. Õne haré ꞌridawa uꞌâsi na ihâiba hã.
Tawamhã niꞌwai mreme, mreme ꞌrãihâ na isimnhihârâzém hârâ ne te iwapari ꞌrata ne hã wa tô duré wapa. Ãne te ĩꞌmahâ:
— We ãwa aimorĩ hâimo, te aima awasuꞌu mono da, za ꞌre iromhâimana mono zéb da hã aꞌmadâꞌâ mono da.
2 Tawamhã ꞌRe ihâimana uꞌâsi mono Pẽꞌẽzani hã ma tô duré ĩꞌuihâ piꞌra, awaꞌawi. Te te ĩꞌuihâ piꞌrai wa, wa tô duré aimawi ĩhâiba, ĩhâiba waihuꞌu õ na. Tawamhã ma tô ĩzaprõ, hâiwa u. Hâiwa u, te te ĩzaprõni wamhã, danhibꞌapito simasisizé hã wa tô ꞌmadâ. Niꞌwa hã te ãma nhamra.
3 Tawamhã ãma isãmra hã te nasi hâibahaiꞌubuzi, ẽtẽꞌubuzi zarobꞌa uptabi ne hã. Duré ẽtẽꞌubuzi itobroꞌo préroꞌo ne hã te nasi aiꞌubuzi. Tawamhã isimasisizé mana wawi, te tãiwaipo ne hã nasi aiꞌubuzi, ẽtẽꞌubuzi roꞌo uzé ne hã.
4 Tawamhã danhibꞌapito simasisizé mana wawi te dasimasisizé hã aimasa, 24 na danhibꞌapito norĩ te ne hã. Taha na te asimro, dama ipire norĩ 24 na ihâiba zaꞌra norĩ hã, ꞌRe ihâimana uꞌâsi mono nhimiroti na si ꞌre isõpré pese mono norĩ hã. Uza hâpa hâirã ré te asimro. Ẽtẽ waipo pré oru ꞌmanharĩ na daꞌrãzaza ré zama te asimro.
5 4:5-6 Duré danhibꞌapito simasisizém hawi te tã siꞌubuzi ne hã nasi aiꞌubuzi, iwapsaꞌa zama, duré irãrãꞌã zama. ꞌRãsitõ hã te duré isõꞌre tiroꞌo zaꞌra, 7 na ihâiba hã, iroꞌo hâ hã. Ta norĩ hã ꞌRe ihâimana uꞌâsi mono Pẽꞌẽzani nhimiromhurizéb zarina hã 7 na. Â poré hã te duré isõꞌre nomro. Â hã isarobꞌa uptabi, simhi isarobꞌa uptabi ne hã.
Maparane siꞌuiwa na ropoto na ihâiba norĩ hã te duré ꞌrâwi imana wawi siꞌuiwada zaꞌra. Ã norĩ hã ihâiba nhoꞌre niwĩ itob ahâ. Duré ibabarã niwĩmhã tob ahâ di duré. Ã norĩ hã tob ahâ wa, ihâiba upsibi ré norĩ hã wa tô ꞌmadâꞌâ zaꞌra.
6 ꞌMadâꞌâ 4:5
7 4:7-8 Imorĩꞌrada hã, huꞌu zérépa ꞌrã ne iꞌrã hã. Duré isãnaꞌremhã powawẽ ibaꞌõmo ꞌrã ne iꞌrã hã. Duré siꞌubdatõ ãma hã daꞌrã ne iꞌrã hã. Duré maparane siꞌuiwa na ãma hã siꞌõmo ꞌrã ne iꞌrã hã, hâiwi ꞌre sisaꞌrei mono wa, iꞌrã ne hã. Ã norĩ hã 6 na ipaihi zaꞌra hã, ihâiba mono bâ. Duré ã norĩ hã ihâiba upsibi ré norĩ, tob ahâ wa, ihâiba na hã.
Tawamhã bâtâ bâre duré mara bâre te tinhoꞌre zaꞌra, tinhoꞌre te te ꞌre sahâri zaꞌra mono ãna, ãne:
“Uburé Danhibꞌapito ꞌRe ihâimana uꞌâsi mono hã, wazé pese na ꞌre ihâimana mono, wazé pese na ꞌre ihâimana mono, wazé pese na ꞌre ihâimana mono. E niꞌwa hã isipai u waihuꞌu pese na ꞌre hâimana mono bâ. Õhõ si, siwaprosi iwaihuꞌu pese uptabi hã. Duréihã marĩ õ uptabi ré, ma tô ꞌre hâimana uꞌâsi. Te za duré ꞌre hâimana uꞌâsi, ãhã na zama, siꞌutõrĩ waihuꞌu ãna.”
8 ꞌMadâꞌâ 4:7
9 Ãne te ã norĩ hã maparane siꞌuiwa na ropoto na ihâiba norĩ hã nasi ãma tiwata zaꞌra, danhibꞌapito simasisizém na isãmra ãma, ꞌRe ihâimana uꞌâsi mono ãma. Waihuꞌu pese uptabi wa, te nasi ãma tiwata zaꞌra, duré sõpru uptabi wa.
10 Nasi ãma wata zaꞌra siré, te nasi 24 na dama ipire zaꞌra norĩ hã danhibꞌapito simasisizém na isãmra nhoꞌre hiꞌrãtitõ ana, siré ãma wata zaꞌra da. Te duré nasi hiꞌrãtitõ siꞌubumro sina, tiꞌrãzaza sani zaꞌra isõꞌre, tãma pire zaꞌra wa, ãma wata zaꞌra da.
11 Ãne te nasi ãma tiwata zaꞌra:“Uburé Wanhibꞌapito, wate ꞌRe ihâimana uꞌâsi mono, a hã aiwẽ uptabi di. Aiwaihuꞌu pese di. Aiwaihuꞌu pese na ma tô iꞌaropoto mo. Asima iwẽ zarina ma tô uburé pese iꞌaropoto mo. Asima iwẽ zarina te oto uburé marĩ hã ꞌre hâimana zaꞌra, asimipoto mono bâ. Tahawa, uburé iꞌaropoto mono zéb zarina tô ibâre, wa aiꞌãma si ꞌre wawata uꞌâsi zaꞌra.”
