Apocalipsi 9:1-21
9 Taha pari, ma tô imrotõ ãma hã amnhihârâ duré, hâiwa ãma romhuriꞌwa hã, tinhimnhihârâzém na. Simnhihârâ wi, wa tô ꞌmadâ wasi hã, hâiwa hawi tiꞌai u iwaptã hã. ꞌRidawazé hã ma tô wasi ma sõmri ni, abꞌre ꞌrehâ ꞌridawazé hã. (Abꞌre ꞌrehâ hã, waꞌuburé norĩ ꞌre ihâimana zaꞌra mono zé).
2 Tawamhã wasi hã ma tô abꞌre ꞌrehâ hã ꞌridawa. Te te ꞌridawa wamhã, ma tô isizé hã watobro, abꞌre ꞌrehâ hawi. Isizé hã unhama roꞌo zaꞌẽtẽ nhizédé ne hã. Tawamhã watobro wamhã, ma tô bâdâ hã tõmo utõ. Ma tô duré hâiwaꞌutõ, abꞌre ꞌrehâ nhizé hã. Tahawa, ma tô daro mono bâ tirobra.
3 Tawamhã isizédé hawimhã ma tô ꞌridi hã wairé, tiꞌai u. Tawamhã ta norĩ ma, ma tô pisutu zaꞌra ni, apaꞌapa ꞌwa nhiꞌoto nhipsari ne isé uptabi ne, te te dama ꞌre robꞌmanharĩ zaꞌra mono da, ꞌRe ihâimana uꞌâsi mono nhimiꞌmanharĩ waihuꞌu pese zém na.
4 Ãne te niꞌwa hã tãma nharĩ zaꞌra:
— Dui ma, ꞌre robꞌmanharĩ wasété zaꞌra waꞌaba mono õ di za, duré wesuirã ma zama hã, duré wede ma zama hã.
Te duré tãma daꞌru zaꞌra, ãne:
— ꞌRe ihâimana uꞌâsi mono nhibꞌaꞌuwẽꞌõ, uihâ uiꞌéré ãna ꞌre inomro mono norĩ ma si, te za ꞌre irobꞌmanharĩ wasété zaꞌra waꞌaba mo.
5 Tane nherẽ, ꞌre danhimroi waꞌaba mono õ di za. Aꞌamo imrotõ na si te za dama ꞌre irobꞌmanharĩ wasété zaꞌra waꞌaba mo. Apaꞌapa ꞌwa nhiꞌoto nhipsari na ne isé pire na, te za dama ꞌre irobꞌmanharĩ wasété zaꞌra waꞌaba mo, da te ãma ꞌre robzépata zaꞌẽtẽ uptabi zaꞌra mono da.
6 Tawamhã aꞌamo imrotõ na da te ꞌre robzépata zaꞌẽtẽ zaꞌra mono wa, te za ꞌrâwi da te dasima ꞌre rosaꞌrata wasété zaꞌra, dasiꞌuihâ na ꞌrâwi ꞌre dasisimroi mono da. ꞌRe dasisimroi mono da nherẽ, ꞌre dasisimroi waihuꞌu mono õ di za. Te za aꞌâ tô da te ꞌre robzépata hâ zaꞌra.
7 Tawamhã ꞌridi hã te asõré, awaru hã dasiꞌwapé da, da te ꞌre ipese zaꞌra mono ne. Ẽtẽ waipo pré oru ꞌmanharĩ na daꞌrãzaza ne ré, te asõré. Duré tawamhã awaru hã, daꞌubu ne iꞌubu mono hã.
8 Duré iséré mono hã aiwa piꞌõ zéré ne. Duré iꞌwa mono hã, aiwa huꞌu zérépa ꞌwa ne.
9 Tawamhã isiꞌuwazi tete ꞌmanharĩ ne ré, te sõꞌutu ubu ré aimasa. Duré isaripi ruru hã ruruꞌu zaꞌẽtẽ uptabi di. Aiwa awaru na wedewarare tete ꞌmanharĩ ruruꞌu ne hã, dasiꞌwapé zô ãma ꞌre idasisaꞌrei mono ruruꞌu ne, isaripi ruru hã.
10 Duré inaꞌre ꞌwamhi mono hã apaꞌapa ꞌwa nhiꞌoto naꞌre ꞌwamhi ne. Taha nhipsari ne, sé pire di, isimiwaꞌrézé hã. Tawamhã tinaꞌre ꞌwamhi na te za tô te te dama ꞌre robꞌmanharĩ wasété zaꞌra. Aꞌamo imrotõ ãma te za te te ꞌre dahâzub uꞌâsi.
11 Duré isibꞌapito zaꞌra hã te ꞌre hâimana, abꞌre ꞌrehâ ꞌmadâꞌâꞌwa hã. Ebreu norĩ nhiminhisizém na hã, Abadõ na. Duré gregu norĩ nhiminhisizém na hã Apoliã na. Isisi hã Daꞌuprosiꞌwa, te wasuꞌu.
12 Tawamhã ropipa hã imorĩꞌrata na iwatobro hã ma tô aiꞌutõ. Tane nherẽ, te za duré ropipa hã maparane dazô pu.
13 Tawamhã hâiwa ãma ꞌRe ihâimana uꞌâsi mono ma romhuriꞌwa hã imropâ ãma hã ma tô duré tinhimnhihârâzém na amnhihârâ. Simnhihârâ wi, wa tô duré niꞌwai mreme hã wapa. Oru ꞌmanharĩ na wedeza ne na ꞌRe ihâimana uꞌâsi mono ma, danhoprubzéb da, wedewati isadaze, da te tãma ꞌre izata zaꞌra mono zé uꞌrãꞌwa mono hawi, imreme hã.
14 Hâiwa ãma romhuriꞌwai ma, imropâ ãma isimnhihârâ ma, te te inharĩ hã wa tô duré ĩpoꞌre na wapa. Ãne tawamhã imreme hã:
— Maꞌãpé, waꞌuburé maparane siꞌuiwa na ipawasisi ré norĩ ma, ipawasisizé hã wasihu zaꞌra na, Eufrati na pa nhoꞌõmo nhisi ãma ꞌre isiꞌubumroi mono norĩ ma.
15 Tawamhã ãhã wamhã, ma tô oto tãma wasihu zaꞌra. Duréihã ma tô ꞌRe ihâimana uꞌâsi mono hã ãma ropisutu siromo zaꞌra, niwa bâdâ te te ipisutuzé hã, iwa waptãꞌã wapsi, te te daꞌuprosi mono da. Tô ã bâtâ na iwa waptãꞌã wa, ma tô ipawasisizé hã tãma wasihu zaꞌra. Tawamhã daro mono bâ daꞌahâ uptabi prã na te za waꞌuburé norĩ hã te te daꞌuprosi, dazaꞌratazé wãiwa prã na.
16 Tawamhã wa tô wapa, dazaꞌratazé ꞌmahârâ hã, dasiꞌwapé zô awaru na idasisaꞌrei mono norĩ zaꞌratazé hã. Ãne dazaꞌratazé ꞌmahârâ hã, te iwapari hã, 200.000.000 na. Daꞌahâ uptabi di.
17 Tawamhã awaru, wa tô ꞌmadâꞌâ zaꞌra, dasiꞌwapé zô ãma ꞌre idasisaꞌrei mono zé hã. Ĩnhotõ ꞌrowim ne, wa tô ꞌmadâꞌâ zaꞌra, isisiwi isiꞌubumroi mono norĩ zama. Ta norĩ hã isiꞌuwazi tete ꞌmanharĩ ne ré, te sõꞌutu ubu ré isisiwi asimro. Isõꞌutu ubu mono hã unhama roꞌo pré ne na, iwamnarĩ mono hã. Duré sõté uzé ne na isõꞌutu ubu zé wamnarĩ mono hã. Duré ꞌrẽnhipré nhoꞌutu uzé ne na, isõꞌutu ubu zé wamnarĩ mono hã. Duré awaru ꞌrãi mono hã, aiwa huꞌu zérépa ꞌrã ne. Isadaiꞌré hawi mono hã te unhama roꞌo mono ne hã nasi wairé, duré isizédé hã, ẽtẽ roꞌo nhizédé uzé pire zama. Duré isizédé uzé pire hã te duré nasi wairé, dapãrĩzé hã.
18 Tawamhã ã hã, unhama roꞌo ne hã duré isizé hã duré ẽtẽ roꞌo nhizédé uzé pire hã ma tô te te daꞌuprosi, awaru zadaiꞌré hawi, iwairébé mono hã. Daro mono bâ daꞌahâ uptabi prã na ma tô te te daꞌuprosi, dazaꞌratazé wãiwa prã na.
19 Ãne ma tô tizadaiꞌré roꞌo nhipãrĩ na te te daꞌuprosi, tizamo na zama. Isamo mono hã wahi zamo ne hã. Tô wahi ꞌrã ne na isamo ꞌrãsutu mono hã. Taha na ma tô te te dahâzu.
20 Tawamhã dahâiba ré idasiꞌatarẽme mono hã idadâꞌâ mono õ hã, ꞌrâwi dasiꞌuihâ na ꞌre dasisãmri zaꞌra mono õ di. Zahadu te waꞌuburé norĩ ãma si ꞌre dawata zaꞌra. Te duré zahadu ropoto hâiba ꞌmanharĩ ãma si ꞌre dawata zaꞌra, danhibꞌmanharĩ nhipese na da te ꞌre irobꞌmanharĩ zaꞌra mono ãma, ẽtẽ waipo pré oru ꞌmanharĩ ãma, duré ẽtẽ waipo prã prata ꞌmanharĩ ãma, duré ẽtẽ topsada brõzi ꞌmanharĩ ãma, duré ẽtẽ ꞌmanharĩ ãma, duré wede ꞌmanharĩ ãma. Zahadu da te rẽme mono õ di. Ropoto hâiba ꞌmanharĩ hã te te robꞌmadâꞌâ õ nherẽ, duré simipari õ nherẽ, duré morĩ õ nherẽ, te zahadu ãma ꞌre dawata zaꞌra, ꞌRe ihâimana uꞌâsi mono upana.
21 Duré zahadu danhipãrĩ na hã ꞌre dasiwẽꞌõ zaꞌra mono õ di, duré simiꞌâ na, duré dahâiba na dasina ꞌre danhimisaihuri zaꞌra mono na hã, duré dasiwi romnhimiꞌuri na hã. Zahadu dawasété wi ꞌre dasipizari zaꞌra mono õ di. Õne uꞌâsi te marĩ iwasété na si ꞌre dahâimana zaꞌra.
