Atus 1:1-26
1 Teofilu, imorĩꞌrata na te ãma irobꞌuiꞌéré na hã, wa ãma robꞌuiꞌéré, uburé pese marĩ hã Zezusi te te iꞌaꞌmanharĩ naꞌrata zém na duré te te ꞌre irowahutu naꞌrata mono zém na zama,
2 hâiwa u Imama te te iꞌârizéb u. Morĩ wana ré, ma tô tizadawa wasuꞌuꞌwa da, te te ipisutu zaꞌra norĩ ma roti pese zaꞌra, ꞌRe ihâimana uꞌâsi mono Pẽꞌẽzani zadawa para.
Zezusi hã tizadawa wasuꞌuꞌwa norĩ ma, nasi isihâiꞌrézé
3 Tawamhã te te robzépata zaꞌẽtẽ parimhã, Zezusi hã ma tô sihâiꞌré hâiba uptabi na, tizadawa wasuꞌuꞌwa norĩ ma. Ahâ na ma tô tãma sihâiꞌré zaꞌra, sena na hâiba ré ihâimana na, te te waihuꞌu zaꞌra da. 40 na bâdâ isiꞌutõrĩ ꞌremhã, ma tô nasi tãma sihâiꞌré zaꞌra. ꞌRe ihâimana uꞌâsi mono daꞌãma ꞌre isibꞌaꞌuwẽ mono zém na te nasi tãma rowasuꞌu zaꞌra.
4 Tawamhã nimahã bâtâ na hã isiré sa zaꞌra ré, te tãma roti pese zaꞌra, ãne:
— Aiwairébé aba tõ, Zeruzalẽ hawimhã. Aꞌâ sapari zaꞌra waꞌaba, Ĩmama te te ãma iropisutuzé, te aima iwasuꞌu zaꞌra waꞌwa hã.
5 Zuwã Batista hã â na si, ma tô â dawabzuri hã te te dama ꞌre abꞌmanharĩ. Tazahã, a norĩ waꞌwa hã bâtâ umro na te za oto ꞌRe ihâimana uꞌâsi mono hã Tipẽꞌẽzani na aihâiba ubu zaꞌra waꞌwa.
6 Tawamhã isadawa wasuꞌuꞌwa norĩ isiré isiꞌubumro hã te siwi sadanha, ãne:
— Wanhibꞌapito, e ãhã na Izaraéu nhihudu norĩ te te ꞌre idaꞌmadâꞌâ zaꞌra mono zé hã te za apâ para na isã.
7 Tawamhã Zezusi hã ma ãma sadaꞌâbâ zaꞌra, ãne:
— A norĩ waꞌwa hã sadai õ di, ꞌre iwaihuꞌu zaꞌra waꞌaba mono da hã, bâtâ zaꞌratazé duré wahu hã marĩ da, Ĩmama te te sima ꞌre iꞌapisutu mono hã tizadawa para.
8 Tane nherẽ, te za asimiroti nhiptede hã iwaibui waꞌwa, ꞌRe ihâimana uꞌâsi mono Pẽꞌẽzani we atẽme te te siꞌra zaꞌra waꞌaba wamhã. Tawapsi, te za ĩzadawa wasuꞌuꞌwa na ĩma ꞌre aihâimana zaꞌra waꞌaba mo, Zeruzalẽ ꞌremhã, ropâ Zudéa ãma duré Samaria ãmab zama. Uburé tiꞌai mono bâ te za duré dama ĩzadawa wasuꞌu zaꞌra waꞌaba mo.
Zezusi hã hâiwa u imorĩzé
9 Tawamhã ãne te te tãma rowasuꞌu zaꞌra pari, Zezusi hã ma tô Imama tiwi âri zaꞌra, isõꞌa zaꞌra. Te te siwi ꞌmadâꞌâ mono ré, ma tô hâiwaꞌa hã tiwi robꞌupsibi zaꞌra. Tahawa te te oto siwi ꞌmadâꞌâ waihuꞌu õ di.
10 Tawamhã Zezusi hã hâiwa u morĩ ré, hâimo te te siwi ꞌmadâꞌâ pese mono ré, ma tô rosaꞌrese õ ré, aibâ norĩ maparane iꞌuza ihâirã zahuré hã aimaꞌwa, isababab zaꞌra.
11 Ta norĩ hã te ãne tãma nharĩ zaꞌra:
— Galiléia ãma ꞌre iꞌaihâimana zaꞌra waꞌaba mono norĩ, e marĩ wa, te hâimo irobꞌmadâꞌâ zaꞌra waꞌwa. Tô ã hã Zezusi hã ꞌRe ihâimana uꞌâsi mono, hâiwa u te te aihawi iꞌâri zaꞌra waꞌwa hã te za we apâ mo, hâiwa u morĩ ré asiwi iꞌmadâꞌâ aba ne.
ꞌRe ihâimana uꞌâsi mono hã Matias te te ipisutuzé
12 Tawamhã Zezusihi zadawa wasuꞌuꞌwa norĩ hã, Olivera na ẽtẽ ꞌrãihâ nhisi hawi te te siꞌra zaꞌra wamhã, ma tô apâ aiꞌabaꞌré, Zeruzalẽ u. Ta hawimhã, Zeruzalẽ u hã misi quilometru na tiꞌai pibuzé hã.
13 Zeruzalẽ u sihutu wamhã, ꞌre idanhimiꞌwara mono zéb u te hâimo saiꞌuri zaꞌra, tinhimiꞌwarazéb u. Isadawa wasuꞌuꞌwa norĩ hã ãne isisi zaꞌra hã: Pedru, Zuwã, Tiagu, Ãdré, Filipi, Tome, Bartolomeu, Mateus, duré Afeuhu ꞌra Tiagu na isisi, Simau, zeloti norĩ niwĩ ꞌre ihâimana mono, duré Zudasi, Tiaguhu ꞌra.
14 Tawamhã te ꞌre siꞌrãꞌõtõ uꞌâsi uburé siré, te te nasi rowaptẽrẽ zaꞌra da, piꞌõ norĩ zama, Maria Zezusihi na duré ino norĩ zama.
15 Taha bâtâ ꞌremhã, Pedru hã ma tô hâiwi za, isazeiꞌwa norĩ waꞌwa, 120 na isazeiꞌwa norĩ hâiba hã. Ãne te tãma rowasuꞌu zaꞌra:
16 — Ĩsisãnawã norĩ, iꞌru zahi tô te te sina iꞌuwaimrami da hã duréihã ꞌRe ihâimana uꞌâsi mono Pẽꞌẽzani hã Davihi zadawa na ꞌRe ihâimana uꞌâsi mono mreme na Ibaihâ iwazé pese na ãma robꞌuiꞌéré siro, Zudasihi ãma te te iwaihuꞌuzé hã, dama rowasuꞌuꞌwa na ihâimanazém na hã, Zezusi te te siwi âri da, sô isiꞌabaꞌré norĩ ma hã.
17 Zudasi hã wasiré zaꞌra aré, wanhimiromhuri hã wasiré te te ꞌre iꞌmanharĩ mono.
18 (Robꞌuiprazé tiwasété waꞌâ te te iꞌâri na, ma tô tiꞌa hã ꞌmaiꞌuipra, Zudasi hã. Tame tiꞌai u ma tô waptãrã. Ma nomohaipoꞌo. Isaiꞌrada hã ma tô ropé.
19 Uburé Zeruzalẽ ꞌremhã ma tô waihuꞌu zaꞌra ni, te te sima irobꞌmanharĩzé hã. Tahawa tiꞌa hã ma tô dasiwi sisi ni “Aceldama” na. Imreme zaꞌra na hã te wasuꞌu “Ro dawaprui ré hã”.)
20 Tawamhã Pedru hã ma ãma uzusi, ãne:
— Ãne Salmu ãma, ãma robꞌuiꞌéré hã:
“Isõrõwa hã baba na sa. Duré niꞌwa iwa ꞌre isãmra mono da hã mare di za!”
— Ãne duré robꞌuiꞌéré hã:
“Niꞌwa hã isibrobꞌre sébré!”
21 1:21-22 — Tahawa, wa za niꞌwa aibâ hã wasiwi pisutu ni, wasiré zaꞌra ꞌre hâimana mono da, Wanhibꞌapito Zezusi siré ꞌre iwahâimana zaꞌra mono siré, Zuwã Batista, â dawabzuri te te tãma iꞌmanharĩzém hawi, hâiwa u imorĩzéb u, wasiré wa te ꞌre wasuꞌu zaꞌra mono da, ihâiwaꞌutuzém na hã.
22 ꞌMadâꞌâ 1:21
23 Tawamhã maparane aibâ norĩ isisi na ma tô pisutu zahuré ni, Zuzé, Barsaba na da te ꞌre isisi mono, Zustu na isisi amo hã. Duré Matias.
24 Taha pari, ma tô rowaptẽrẽ zaꞌra, ꞌRe ihâimana uꞌâsi mono wi, ãne:
— Wanhibꞌapito, uburé aima dawaihuꞌu pese di, dapẽꞌẽ ꞌremhã. Tahawa, maꞌãpé wama hâiꞌré zaꞌra na. E ꞌwa hã ma ipisu, ã hã maparane ihâimana zahuré hã,
25 wasiré te te ꞌre iromhuri mono da hã, Zezusihi zadawa wasuꞌuꞌwa na, Zudasi te te irẽmezé hã. Ta hã tô iꞌuwaibaba na ma tô mo, timorĩzéb u.
26 Taha pari ma tô marĩ hã sima me zaꞌra, te te siwi waihuꞌu da. Tawamhã ma tô waptãrã, Matiasihi nhisi u. Taha zarina, ta hã ma tô 12 na Zezusihi zadawa wasuꞌuꞌwa norĩ u oto ãzé.
