Atus 13:1-52
13 Tawamhã Ãtioquia ãma isazeiꞌwa norĩ wazarimhã te ꞌre hâimana zaꞌra, ꞌRe ihâimana uꞌâsi mono zadawa ꞌmahârâꞌwa norĩ duré dama rowahutuꞌwa norĩ hã: Barnabé, Simiã “Iꞌrãdâꞌâ” na isisi amo hã, duré Luciu, Cireni ãma aré ꞌre isãmra mono duré Manaé, apito Erodihi siré da te iprédu duré Saulu.
2 Tawamhã nimahã bâtâ na hã, Uburé Danhibꞌapito ãma wata zaꞌra ré, duré sai ãna aꞌâ siꞌubumroi ré, ꞌRe ihâimana uꞌâsi mono Pẽꞌẽzani hã ma tô ãne tãma nharĩ zaꞌra:
— Asisiti simizusi waꞌaba Barnabé norĩ hã Sauluhu me, romhuri te te ĩma ꞌmanharĩ zahuré da. Taha da, wa ĩsima pisutu zahuré.
3 Tawamhã ãne wa, sai ãna siꞌubumroi parimhã, duré te te rowaptẽrẽ zaꞌra parimhã, tinhibꞌrada ma tô ãma saꞌra zaꞌra. Taha pari ma tô siwi satõrĩ zahuré, tinhimiromhuri hã te te ꞌmanharĩ zahuré da.
Barnabé norĩ Sauluhu me Chipri ãma romhuri te te iꞌmanharĩ zahuré zé
4 Tawamhã Barnabé norĩ Sauluhu me ma tô tineb zahuré, ꞌRe ihâimana uꞌâsi mono Pẽꞌẽzani te te satõrĩ zahuré wa, Seleusia na ꞌri nhoꞌõmo nhisi u. Ta hawi, ma tô duré tineb zahuré, robꞌré zaꞌidi Chipri u.
5 Simasisi wamhã Salamina na ꞌri waꞌõtõ u hã, ꞌRe ihâimana uꞌâsi mono ma tô dama sadawa wasuꞌu zahuré, Zudeu norĩ te rowahutuzé mono na. Zuwã Marcu hã ma tô isiré timorĩ zahuré, ipawaptoꞌwa zahuré da.
6 Tawamhã uburé robꞌré zaꞌiti na te te roꞌrahâri zaꞌra wamhã, ma tô aihutu, Pafus na ꞌri nhoꞌõmo nhisi u. Tame ma tô siwi sõpẽtẽ, Zudeu simiꞌâ na romhuriꞌwa, Barzezusi na isisi hã, ꞌRe ihâimana uꞌâsi mono zadawa ꞌmahârâꞌwa senaiꞌõ hã.
7 Ta hã Sérgiu Paulu siwaihu, robꞌré zaꞌiti ãma danhibꞌapito na ꞌre ihâimana mono siwaihu. Danhibꞌapito hã, aibâ te te irowaihuꞌu pe. Ta hã ma tô hâ, Barnabé norĩ zô Sauluhu me, ꞌRe ihâimana uꞌâsi mono mreme te te wapari da, te te sima wẽ wa.
8 Tane nherẽ, romhõsiꞌwa Elima hã (ã hã isisi gregu mreme na hã) tãma wẽ õ di, Zezusihi zadawa wasuꞌuꞌwa norĩ hã. Duré, tãma wẽ õ di, danhibꞌapito te te isaze da hã.
9 *Tawamhã Saulu, Paulu na isisi amo hã, ꞌRe ihâimana uꞌâsi mono Pẽꞌẽzani ꞌmasisi na tãma hâimana wa, ma tô ꞌmadâꞌâ pese, Elima hã.
10 Tahawa te ãne tãma tinha:
— Waꞌuburé ꞌra! Duré uburé marĩ iwẽ nhitobꞌru! Aibâ iwasédé duré iꞌasadawa nhipe! E mahã bâtâ u te za isazâ, Uburé Danhibꞌapito nhimiroti hã wẽ nherẽ, dawi ãma ꞌre iꞌazaprĩ mono na hã, iwasété na.
11 Waihuꞌu, ãhã na hã! Uburé Danhibꞌapito hã te za aima robꞌmanharĩ wasété. Te za atobꞌa. Bâtâ ro hã ꞌmadâꞌâ õ di za, niha bâtâ na.
Tawamhã awaꞌawi pesere, Elima hã ma tô sina waihuꞌu, hunhizé iꞌrãdâ te te itõmo upsibi na hã. Ma tô nasi aipiza, niꞌwa hã te te patété mono da.
12 Tawamhã danhibꞌapito ãne hã te te ꞌmadâꞌâ wamhã, ma tô saze. Ma tô ãma titobꞌuzui pese, Wanhibꞌapito Zezusi wasuꞌu na rowahutu na hã.
Paulu norĩ hã Ãtioquia ãma ihâimana zaꞌra zé
13 Tawamhã Paulu norĩ hã ma tô aiꞌabaꞌré tisiré norĩ me, Pafus hawi, Perze na ꞌri nhoꞌõmo nhisi u, Pãfilia na danhiptiꞌa nhoꞌõmo nhisi ãma hã. Rowaꞌuꞌu na ubaꞌrenem na te sisaꞌre. Tane nherẽ, tame Zuwã Marcus hã ma tô rẽme zahuré. Apâ ma tô sina siri, Zeruzalẽ u.
14 Perze hawimhã ma tô duré tineb zahuré, Ãtioquia u Pisidia na danhiptiꞌa nhoꞌõmo nhisi u. Tawamhã romhuri ꞌrãsudu dawaꞌutuzé sabadu na hã ma tô tizasi zahuré, Zudeu norĩ te rowahutuzéb u hã. Zasi zahuré wamhã, ma tô aimasisi.
15 Tawamhã niꞌwa hã, ꞌRe ihâimana uꞌâsi mono nhimiroti zahi na Mozési te te irobꞌuiꞌérézé hã duré isadawa ꞌmahârâꞌwa norĩ nhimiꞌuiꞌéré hã te te dama sõré parimhã, rowahutuzéb ãma ꞌre daꞌanhimiꞌrui mono ꞌwa norĩ hã ma tô niꞌwa hã siwi satõ, Paulu duré Barnabé norĩ u, ãne romreme ré:
— Wasisãnawã norĩ, rowasuꞌu na danhiptete aba da iré wamhã, maꞌãpé wama rowasuꞌu waꞌaba, ãhã na.
16 Tawamhã Paulu hã hâiwi ma tô za. Tinhibꞌrada ma tô ꞌmanha, ariꞌiwi dasiꞌubumro da. Ãne ma tô ãma sãnaꞌrata:
— Izaraéu nhihudu norĩ duré zudeuꞌõ norĩ ꞌRe ihâimana uꞌâsi mono ãma ꞌre iꞌaiwata zaꞌra waꞌaba mono hã, maꞌãpé ĩwapari pese zaꞌra waꞌaba!
17 ꞌRe ihâimana uꞌâsi mono Izaraéu nhihudu norĩ nhibꞌapito hã ma tô wahiꞌrata norĩ hã sima pisutu zaꞌra, Ezitu ãma ꞌre siꞌubumroi mono ré hã. Ma tô ꞌmanha, ahâ uptabi da hã. Ta hawi ma tô duré sani zaꞌra, tiwaihuꞌu pe isaꞌẽtẽ uptabi na.
18 Tawamhã rop si ꞌre irosaꞌwari mono ãma hã simiꞌẽ na ma tô te te ꞌre ꞌwapé zaꞌra, 40 na wahub ꞌremhã.
19 Ma tô daꞌuprosi, 7 na dawamri hã Canaꞌã ꞌremhã. Tawamhã Izaraéu nhihudu norĩ hã isiptiꞌa na ma tô ãma ate zaꞌra.
20 Ãne hã romhâimana ré hã, ma tô tiwahu 450 na.
— Taha parimhã ꞌRe ihâimana uꞌâsi mono hã ma tô tãma pisutu zaꞌra, daꞌãma rowairébéꞌwa norĩ hã, isadawa ꞌmahârâꞌwa Samuéu ihâimanazéb u hã.
21 Izaraéu nhihudu norĩ hã apito te te siwi waptẽrẽ wamhã, ma tô tãma sõmri zaꞌra Sau hã, Quisihi ꞌra hã, Bẽzamihi nhihudu. Ta hã ma tô apito na tãma tihâimana zaꞌra, 40 na wahum na hã.
22 Tawamhã apito Sau te te wazere parimhã, ꞌRe ihâimana uꞌâsi mono hã ma tô pisutu Davi hã, apito da. Taha na ma tô ãne tinha: “Wa sõpẽtẽ Davi hã Zéséhé ꞌra, aibâ te ĩsima ꞌre iwẽ mono. Ta hã te za uburé marĩ te ĩsima iwẽzé hã te te ꞌre abꞌmanharĩ.”
23 Davihi nhihudu, Zezusi hã. Ta hã ꞌRe ihâimana uꞌâsi mono ma tô pisutu, Izaraéu nhihudu norĩ nhoꞌreptuiꞌwa da, te te ãma iropisutuzéb zarina.
24 Zezusi hã wei wisi wana ré, ma tô Zuwã Batista hã te te dama ꞌre rowahutu, â dawabzuri te te dama ꞌre iꞌabꞌmanharĩ mono na hã duré dawasété wi ꞌre idasipizari zaꞌra mono zém na zama, uburé Izaraéu nhihudu norĩ ma.
25 Tawamhã Zuwã hã tinhimiromhuri te te iꞌrãsutuzé hã roꞌrutu wamhã, te ãne dama siwasuꞌu: “E ꞌwa na te ĩꞌãma irosaꞌrata zaꞌra waꞌwa, wa hã. Wa hã sô ꞌre iꞌasimipari zaꞌra waꞌaba mono hãi õ di. Tahawa, maꞌãpé ĩwapari zaꞌra waꞌaba. Ta hã ĩzaꞌu si te za wei mo. Tahawa e wa hã ĩwẽ bâ, iparaꞌuza te tãma iwazere da hã.”
26 Tawamhã Paulu hã ma ãma uzusi, ãne:
— Ĩsisãnawã norĩ, Abraꞌãhã nhihudu norĩ duré a norĩ waꞌwa zudeuꞌõ norĩ, ꞌRe ihâimana uꞌâsi mono ãma si ꞌre iꞌaiwata zaꞌra waꞌaba mono norĩ zama, ĩwapari zaꞌra waꞌaba! Ã hã rowasuꞌuwẽ danhoꞌreptuzém na hã ma tô wei watẽme satõrĩ zaꞌra, uburé wama zaꞌra.
27 Zeruzalẽ ãma ꞌre isiꞌubumroi mono norĩ hã duré ta norĩ ma ipire norĩ zama, te te waihuꞌu zaꞌra õ di, Zezusi Danhoꞌreptuiꞌwa na hã. Duré te te sadaihuꞌu zaꞌra õ di sabadu nhidâpâ, ꞌRe ihâimana uꞌâsi mono zadawa ꞌmahârâꞌwa norĩ nhimiꞌuiꞌéré hã da te dasima ꞌre sõré zaꞌra mono nherẽ. Ãne nherẽ, Zezusi hã dâꞌâ da, te te ãma siwi roti wamhã, ma tô ãma uwaimra, ꞌRe ihâimana uꞌâsi mono zadawa ꞌmahârâꞌwa norĩ nhimirowasuꞌu hã.
28 Duré iꞌuwaibaba na da te iwĩrĩzéb da, te te siwi sãmri õ nherẽ, Pilatuhu wi ma tô waptẽrẽ zaꞌra, te te ꞌru da, da te dasiwi wĩrĩ da hã.
29 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã uburé te te ãma uwaimrami pari, ma tô siwi siꞌra, wedepoꞌo nhonhiꞌrãmi hawi. Taha pari ma tô sẽrẽ ni, abꞌre ꞌre.
30 Tane nherẽ, ꞌRe ihâimana uꞌâsi mono, ma tô apâ hâiwaꞌutu, dâꞌâ ãna ꞌre hâimana mono da.
31 Tawamhã bâtâ ahâ na ma tô nasi sihâiꞌré, Galiléia hawi Zeruzalẽ u, isiré ꞌre inomro mono norĩ ma. Ã norĩ hã te te oto ꞌre wasuꞌu zaꞌra Zezusi hã, uburé aꞌuwẽ norĩ ma hã.
32 — Duré wa norĩ hã wa aima wasuꞌu zaꞌra waꞌaba ni, Rowasuꞌuwẽ ité hã ꞌRe ihâimana uꞌâsi mono te te ãma iropisudu hã wahiꞌrata norĩ ma.
33 Ma tô oto ãma uwaimra wama zaꞌra, tô tiꞌra norĩ ma. Zezusi hã apâ ma hâiwaꞌutu, Salmu 2 ãma robꞌuiꞌéré zarina, ãne:“A hã ĩꞌra. Ã bâtâ na hã wa hã Aimama oto.”
34 — Ãne ꞌRe ihâimana uꞌâsi mono hã ma tô tinha, Zezusi apâ te te ihâiwaꞌutuzém na hã. Ma tô ãma roti, niwa dadâ hã za te te ãma iꞌaiꞌuté õ na hã, ãne:“Marĩ iwẽ uptabi iwazé pe hã, wa za aima sõmri zaꞌra, Davihi ma, te ãma iropisutuzé hã.”
35 Ãne te duré tinha, ihâiba amoi ãma robꞌuiꞌéré na hã:“A hã rẽme õ di za, ate romhuriꞌwa Iwẽ uptabi hã abꞌre ꞌre, ꞌro da hã.”
36 Tawamhã Paulu hã ma duré ãma uzusi, ãne:
— Davi hã tiꞌai ãma ꞌre hâimana mono ré hã ma tô ãma uwaimra, ꞌRe ihâimana uꞌâsi mono te, rowaꞌõno hã. Taha pari ma tô dârâ. Ma tô ãma tiꞌa ni, ihiꞌrata norĩ zababa. Tame ma tô tiꞌro.
37 Tazahã, ãne hã tãma romhâimana õ di, ꞌRe ihâimana uꞌâsi mono apâ te te ihâiwaꞌutu ma hã.
38 13:38-39 Ĩsisãnawã norĩ, iwaihuꞌu zaꞌra waꞌaba da si, Zezusihi nhimiꞌmanharĩzéb uꞌâbâ dawasété parizém na wa te aima irowasuꞌu zaꞌra waꞌwa hã. Waihuꞌu zaꞌra waꞌaba, niꞌwa hã te te sazei wamhã, iwasété wi te za sõꞌreptu. Mozésihi nhimiꞌuiꞌéré ꞌrada hã te te isõꞌreptui waihuꞌuꞌõ hã.
39 ꞌMadâꞌâ 13:38
40 Tahawa, maꞌãpé ãma pibui pese zaꞌra waꞌaba, hâimana tõ da, ꞌRe ihâimana uꞌâsi mono zadawa ꞌmahârâꞌwa norĩ te te inharĩ zaꞌra zé hã, ãne:
41 “ꞌRe ihâimana uꞌâsi mono ãma ꞌre iꞌato zaꞌra waꞌaba mono norĩ, ꞌmadâꞌâ zaꞌra waꞌaba!Aꞌrãmi zaꞌra waꞌaba. Duré aiꞌutõrĩ aba.Ãhã na hã wa za ꞌmanha marĩ hã, niwamhã niꞌwa hã te te aima ãma rowasuꞌu zaꞌra waꞌaba nherẽ, aré ãma iꞌasimizaze zaꞌra waꞌaba õ hã.”
42 Tawamhã Paulu norĩ Barnabéhé me hã, Zudeu norĩ te rowahutuzém hawi pusi wamhã, ma tô duré waptẽrẽ zahuré ni dazadawa zaꞌréi ãna, te te duré dama rowahutu zahuré da, sabadu amo na hã.
43 Tawamhã rowahutuzém hawi dawairébé wamhã, daꞌahâ na Zudeu norĩ hã duré zudeuꞌõ norĩ Zudeu norĩ hâimanazéb zarina ꞌre ihâimana zaꞌra mono norĩ hã ma tô Paulu norĩ siré aiꞌabaꞌré, Barnabéhé me. Ta norĩ hã ma tô te te tãma robzanhamri zaꞌra, ꞌRe ihâimana uꞌâsi mono nhimipawaptobzém na te te ãma uzusi zahuré da.
44 Tawamhã sabadu hã oto iwa waptãꞌã wamhã, daꞌahâ uptabi na uburé pese õ nherẽ, ꞌri waꞌõtõ ꞌremhã ma tô dasito, Uburé Danhibꞌapito zadawa wasuꞌu hã da te wapari zaꞌra da.
45 Tane nherẽ, Zudeu norĩ hã daꞌahâ na te te daꞌmadâꞌâ zaꞌra wamhã, ma tô sõꞌru zaꞌra. Tahawa Paulu hã ma tô siwi mreme wẽꞌõ. Imreme waꞌrãmi ma tô nasi nharĩ zaꞌra.
46 Tane nherẽ, Paulu norĩ hã Barnabéhé me ma tô pahi ãna ãma sadaꞌâbâ zaꞌra, ãne:
— Tô aré iꞌru zahi, ꞌRe ihâimana uꞌâsi mono mreme hã a norĩ waꞌwa Zudeu norĩ uimrehẽne iwapari zaꞌra waꞌaba da hã. Tane nherẽ, asima wẽ zaꞌra waꞌaba õ di. Duré te asina irosaꞌrata zaꞌra waꞌwa, sadai õ na, dahâimanazé isiꞌutõrĩꞌõ isõpẽtẽ zaꞌra waꞌaba zéb da hã. Tane ze te bâ, wa za oto warĩtĩ nhoꞌõmo ni, zudeuꞌõ norĩ ma, wa te oto rowasuꞌu da.
47 Uburé Danhibꞌapito hã ãne ma tô wama ꞌru zaꞌra:“Wa asõré waꞌwa, robꞌuiwẽꞌwa na zudeuꞌõ norĩ ma hã, danhoꞌreptuzé wasuꞌu hã dama ꞌwasari aba da, daro mono bâ.”
48 Tawamhã zudeuꞌõ norĩ hã, ãne hã te te wapari zaꞌra wamhã, tãma hã rowẽ uptabi zaꞌra di. Wanhibꞌapito mreme na ma tô duré tiwata zaꞌra, wẽ wa. Ma tô duré uburé saze zaꞌra, ꞌRe ihâimana uꞌâsi mono hã te te sima ipisutu zaꞌra norĩ hã dahâimanazé isiꞌutõrĩ hã te te sina iꞌuwaimrami zaꞌra da hã.
49 Tawamhã Wanhibꞌapito zadawa wasuꞌu hã ma tô ropé, tiꞌai waꞌõtõ mono bâ, dazaꞌrui mono bâ.
50 Tane nherẽ, Zudeu norĩ hã ma tô zudeuꞌõ norĩ nhipiꞌõ dama ipire norĩ ꞌRe ihâimana uꞌâsi mono ãma oto ꞌre iwata zaꞌra mono norĩ hã duré aibâ norĩ ꞌri nhoꞌõmo ꞌre, dama ipire norĩ hã wadaꞌuri wasété zaꞌra. Tawamhã ma tô oto ãma sãnaꞌrata zaꞌra, robꞌmanharĩ wasété na hã, Paulu duré Barnabé norĩ ma hã. Ma tô oto sani ni, taha tiꞌai waꞌõtõ hawimhã.
51 Tawamhã Paulu norĩ hã ma tô tipara zapru hã tataꞌa zahuré, daꞌãma dâꞌâ zahuré tõ da oto. Tahawa, ma tô oto tineb zahuré, Iconiu na ꞌri nhoꞌõmo nhisi u.
52 Tawamhã Ãtioquia ãma isazeiꞌwa norĩ ma hã rowẽ hã ꞌmasisi uꞌâsi zaꞌra di, duré ꞌRe ihâimana uꞌâsi mono Pẽꞌẽzani zama.
Ĩwaꞌõtõ piꞌreba watsuꞌu mono
^ 13:9 Paulu hã romanu norĩ mreme na isisi. Saulu hã hebraicu mreme na hã. Zudeu norĩ hâimanazé taha bâtâ mono na hã isisi maparane te tãma ꞌre hâimana zaꞌra.
