Atus 14:1-28
14 Tawamhã Iconiu ãma hã, Paulu norĩ Barnabéhé me ꞌre ihâimana zahuré mono zéb zarina, ma tô tizasi zahuré, Zudeu norĩ te rowahutuzéb u hã. Tame ma tô duré rowasuꞌu zahuré, iwẽ uptabi na. Tahawa daꞌahâ uptabi na Zudeu norĩ hã duré zudeuꞌõ norĩ zama ma tô saze zaꞌra.
2 Tane nherẽ, Zudeu norĩ te te isaze zaꞌra õ norĩ hã ma tô zudeuꞌõ norĩ hã wadaꞌuri wasété zaꞌra, sada hâimana zaꞌra da, uburé isazeiꞌwa norĩ zada.
3 Tawamhã Paulu norĩ Barnabéhé me hã bâtâ ahâ na ma tô aimasisi zahuré, Iconiu ãma hã. Pahi ãna te Wanhibꞌapito Zezusi hã dama wasuꞌu wẽ zahuré. Wanhibꞌapito hã, Paulu norĩ ma, iwaihuꞌu pe hã ma tô tãma sõmri zahuré, marĩ dama iꞌmanharĩ waihuꞌuꞌõ hã te te ꞌre abꞌmanharĩ zahuré mono da, da te waihuꞌu zaꞌra da, te te ꞌre irowasuꞌu zahuré mono zé, tô sena uptabi na.
4 Tane nherẽ, ꞌri nhoꞌõmo ꞌremhã ma tô dasima aipoꞌo ni. Niꞌwam norĩ hã Zudeu norĩ niwĩ duré niꞌwam norĩ hã Zezusihi zadawa wasuꞌuꞌwa norĩ niwĩ.
5 Tawamhã zudeuꞌõ norĩ duré Zudeu norĩ hã tinhibꞌapito norĩ me ma tô ãma sisaze zaꞌra, Paulu norĩ ma, te te robꞌmanharĩ wasété zaꞌra da, duré ẽtẽ na te te siwi pãrĩ da.
6 Ãne hã te te sina waihuꞌu zahuré wamhã, ma tô dawi aimani zahuré, Licaonia na tiꞌa nhoꞌõmo nhisi u, ꞌri waꞌõno Listra u duré Dérbi u duré isababa daro isimasa mono u.
7 Tame ma tô rowasuꞌu zahuré dama, Rowasuꞌuwẽ itém na.
Paulu norĩ hã Listra ãma duré Derbi ãma te te iromhuri zahuré zé
8 Tawamhã Listra ãma hã aibâ te ꞌre hâimana, tiꞌa ꞌre isãmra uꞌâsi mono hã, ipotozém hawim haré imorĩꞌõ. Paraꞌõtõ uwa zahuré wa, niwamhã morĩ õ di.
9 Ta hã aibâ hã ma tô wapa, Paulu te te dama rowasuꞌu ré hã. Tawamhã Paulu ma tô ꞌmadâꞌâ pese. Ma tô ꞌmadâꞌâ waihuꞌu, aibâ ma isimiꞌumnha tãma ihâimana na hã, ipesezéb da hã.
10 Tahawa, mreme ꞌrãihâ na te tãma tinha, ãne:
— Aiwahutu! Hâiwi asa na, aipara na!
Tahawa aibâ hã ma tô hâimo sime. Timorĩ na ma tô oto sãnaꞌrata.
11 Tawamhã Paulu hã te te iꞌmanharĩzé, da te dasiwi ꞌmadâꞌâ wamhã, ma tô ꞌre idamreme zusi mono zém na tahãsi ni, dahârâ ꞌrãihâ na ãne:
— Ihâibaꞌõ norĩ hã ma tô wei watẽme siꞌra zahuré, aꞌuwẽ hâiba na.
12 Tawamhã Barnabé hã ma tô siwi sisi, Zupite na. Duré Paulu hã Mercuriu* na ma tô siwi sisi. E marĩ wa. Paulu hã te te dama rowasuꞌu wa.
13 Zupite te hã ꞌri ãma ꞌre idawata zaꞌra mono zé hã ꞌri nhoꞌõmo ꞌwawi waꞌra ꞌridawa ꞌrata rowi niwĩ te za. Sacedoti, Zupite ãma ꞌre idawata zaꞌra mono zéb ãma romhuriꞌwa hã ma tô ãwisi zaꞌra powawẽ ibaꞌõmo norĩ hã duré romnhirãrã na danhoꞌrebzu hã, ꞌri nhoꞌõmo ꞌwawi waꞌra ꞌridawa u hã. Ta hã aꞌuwẽ norĩ hã ma tô duré sima wẽ zaꞌra, powawẽ hã danhoprubzém na da te tãma zata zaꞌra da, Paulu norĩ ma, ihâibaꞌõ zahuré newa.
14 Tawamhã Paulu norĩ, ãne hã te te waihuꞌu zahuré wamhã, tiꞌuza ma tô hâiwazu zahuré. Wara sina ma tô dawaꞌwa u asamro. Hârâ ꞌrãihâ na ma tô daꞌmahârâ zahuré, ãne:
15 — Aibâ norĩ, e marĩ da, te ãne hã asiwi iꞌmanharĩ ꞌwa. Wa norĩ hã tiꞌai ãma aꞌuwẽ, asine zaꞌra waꞌaba hã. Rowasuꞌuwẽ ité hã wa te aima wasuꞌu zaꞌra waꞌaba da, wa ãmemhã wahâimana ni, ãne hã aihâimanazé, rẽme zaꞌra waꞌaba da, marĩ dai õ hã. ꞌRe ihâimana uꞌâsi mono u aipizari zaꞌra waꞌaba, hâiwa ꞌmanharĩꞌwai u, tiꞌa, â poré duré uburé marĩ iwa ꞌre ihâimana zaꞌra mono te te iꞌapoto mono u.
16 Duréihã ꞌRe ihâimana uꞌâsi mono hã ma tô rowairébé, dapoto mono ꞌre idahâimana zaꞌra mono hã date bâdâdi na dasima iwẽ na ꞌre danomro uꞌâsi mono da.
17 Tane nherẽ, ꞌRe ihâimana uꞌâsi mono hã ma tô ꞌre siwaihuꞌu uꞌâsi, marĩ iwẽ te te ꞌre iꞌabꞌmanharĩ mono zém na hã. Õ hã tãi ma, te te ꞌre robꞌru hâiwa hawimhã duré amnho hã ꞌre iꞌrãi ꞌré zaꞌra mono da hã bâdâ iꞌuwaibaba na. Õ hã te dasa hã te te aima ꞌre sõmri zaꞌra waꞌwa. Te duré aipẽꞌẽ ꞌre, rowẽ isaꞌẽne hã te te aima ꞌre sõmri zaꞌra waꞌwa.
18 Tawamhã ãne hã te te dama rowasuꞌu zahuré nherẽ, pire di te te idaꞌanhowada zahuré da hã, abaze, da te simro tõ da hã ãma dawata zahuré da, Paulu norĩ ãma hã.
19 Tawamhã nima norĩ Zudeu norĩ hã Ãtioquia hawi isihudu hã duré Iconiu hawib zama ma tô dawadaꞌuri wasété zaꞌra, uburé sada danhibꞌru zaꞌra da hã. Tahawa, ẽtẽ na ma tô dasiwi hâ ni, Paulu hã. Ma tô da te ãma robâdâ, ꞌri ahâ nhiti, da te ãma rosaꞌrata zaꞌra wa, dâꞌâ newa.
20 Tane nherẽ, isazeiꞌwa norĩ hã te te siwi uirĩ wamhã, ma tô wahudu. Taha pari ma tô duré ãzé apâ, ꞌri waꞌõtõ u. Tawamhã awẽm na hã Paulu norĩ Barnabéhé me, ma tô oto Dérbi u tineb zahuré.
Paulu norĩ hã Ãtioquia u, apâ ineb zahuré zé
21 Tame Derbi ꞌremhã ma tô Rowasuꞌuwẽ itém na dama rowahutu zahuré. Tawamhã daꞌahâ na ma tô saze zaꞌra ni, Zezusihi nhirã zarina oto ꞌre danomro mono da. Taha pari, ma tô apâ tineb zahuré, Listra u, Iconiu u duré Ãtioquia u hã.
22 Isazeiꞌwa norĩ hã ma tô te te ꞌre apawaptob zahuré, robze na duré siptete sina ãma ꞌre nomro mono da, tinhimiꞌumnhasizém na hã, ãne:
— Tô iꞌru zahi, marĩ iwasédé hã ahâ na da te wama ꞌre iꞌmanharĩ zaꞌra mono zéb zarina, wa te ꞌre irobzépata zaꞌra mono da hã, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb u ꞌre wanhisisi mono da.
23 Isazeiꞌwa norĩ hã siré ꞌre isiꞌrãꞌõtõ zé mono na hã, ma tô te te apisutu zahuré, daꞌmadâꞌâꞌwa da hã. Ma tô te te ꞌre rowaptẽrẽ zahuré. Sai ãna ma tô duré aꞌâ ꞌre hâimana zahuré. Wanhibꞌapito ma, ma tô isibꞌrata daꞌmadâꞌâꞌwa norĩ hã te te ꞌre anhomri zahuré, marĩ iwasété wi te te ꞌre abꞌmadâꞌâ pese mono da, te te iꞌumnhasi zaꞌra hã.
24 Tawamhã Pisidia na tiꞌa nhisi waꞌwaibaba, te te roꞌrahâri zahuré wamhã, ma tô aimasisi zahuré Paulu norĩ hã, Pãfilia na tiꞌa nhisi u.
25 Perze ãma, Zezusihi wasuꞌuwẽ na te te dama rowahutu zahuré parimhã, ma tô tineb zahuré, Atalia u.
26 Atalia hawimhã ma tô apâ tineb zahuré rowaꞌuꞌu na ubaꞌre inem na, Ãtioquia u hã. Tame isazeiꞌwa norĩ hã ma tô ãma zahuré ꞌre mreme zusi, ꞌRe ihâimana uꞌâsi mono ma, te te ꞌre ꞌmadâꞌâ pese zahuré mono da, duré te te ꞌre pawaptob uꞌâsi zahuré mono da.
27 Tawamhã Ãtioquia u apâ simasisi zahuré wamhã, isazeiꞌwa norĩ hã ma tô ꞌrãꞌõtõ zahuré. Ma tô uburé tãma rowasuꞌu pese zaꞌra, ꞌRe ihâimana uꞌâsi mono uburé marĩ te te iꞌaꞌmanharĩ mono zé hã ihâiba na zahuré. Ma tô duré wasuꞌu zahuré, ꞌridawa te te iꞌridawa na hã zudeuꞌõ norĩ zama te te saze zaꞌra da hã.
28 Tame ma tô aimasisi hâ zahuré, Zezusihi nhirã zarina ꞌre inomro mono norĩ ꞌratamhã.
Ĩwaꞌõtõ piꞌreba watsuꞌu mono
^ 14:12 Romanu norĩ nhimizaze na hã Zupite hã ihâibaꞌõ norĩ nhibꞌihâꞌa, duré Mercuriu hã ihâibaꞌõ norĩ mreme ꞌwapéiꞌwa.
