Atus 16:1-40
16 Tawamhã Paulu hã ma tô wi Dérbi u duré Listra u. Listra ãma hã te ꞌre sãmra, isazeiꞌwa Timotiu na isisi hã. Ina hã isazeiꞌwa. Ta hã Zudeu nhipiꞌõ. Tane nherẽ, imama hã Zudeu õ di.
2 Uburé isazeiꞌwa norĩ hã Listra ãma duré Iconiu ãmab zama ꞌre isiꞌubumroi mono hã te te siwi wasuꞌu wẽ di, Timotiu hã.
3 Tawamhã Paulu hã ma tô sima wẽ, Timotiu te te siré saprõni da. Tahawa ma tô tiꞌru, da te sihâiwata nhizâri da, Timotiu hã tame tiꞌai waꞌõtõ mono ꞌremhã, Zudeu norĩ ꞌre ihâimana zaꞌra mono hã te te waihuꞌu pese zaꞌra wa, Timotiuhu mama gregu na hã.
4 ꞌRi waꞌõtõ na te te iroꞌrahâri zahuré mono zém na isazeiꞌwa norĩ ma, ma tô te te awasuꞌu zahuré, Zezusihi zadawa wasuꞌuꞌwa norĩ hã duré isazeiꞌwa norĩ ꞌmadâꞌâꞌwa norĩ hã Zeruzalẽ ꞌre, te te iwaihuꞌu zaꞌra zé hã. Ma tô duré te te apawaptob zahuré, te te ꞌre ꞌmadâꞌâ pese zaꞌra mono da, te te iwaihuꞌu zaꞌra zé hã.
5 Ãne zarina, isazeiꞌwa norĩ ma, ma tô isimiꞌumnhasizé hã tãma saꞌẽtẽ uꞌâsi zaꞌra. Duré bâtâ sidâpâ ma tô sina hâꞌâ uꞌâsi, isazeiꞌwa norĩ hã.
Paulu hã Troadi ãma marĩ sõtõ ꞌrowim ne te te iꞌmadâꞌâzé
6 Tawamhã Paulu duré tisiré norĩ me ma tô aiꞌabaꞌré, Frizia na duré Galasia na tiꞌa nhisi waꞌwaibaba, ꞌRe ihâimana uꞌâsi mono Pẽꞌẽzani hã te te tiwi sawi zaꞌra wa, Azia na tiꞌa nhisi ãma iwasuꞌuwẽ na te te dama rowasuꞌu zaꞌra tõ da.
7 Mizia te, tiꞌa nhizâri u sihutu wamhã, ma tô aré pibu zaꞌra, sisisi da, Bitinia na danhiptiꞌa nhoꞌõmo nhisi u. Tane nherẽ, Zezusihi Pẽꞌẽzani hã te tiwi sawi zaꞌra.
8 Tahawa, Mizia na ma tô roꞌrahâri waré zaꞌra. Troadi na ꞌri nhoꞌõmo nhisi u, ma tô aihutu.
9 Taha mara na hã, Paulu ma tô marĩ hã sõtõ ꞌrowim ne ꞌmadâ. Aibâ hâiwi isa, Masédonia na danhiptiꞌa nhoꞌõmo nhisi ãma ꞌre isãmra mono hã te ꞌmadâ. Ta hã te ãne ꞌmahâ: “Wei aimorĩ, Masédonia u. Waꞌãma aime zaꞌra na.”
10 Tawamhã Paulu hã ãne hã sõtõ ꞌrowim ne marĩ te te ꞌmadâꞌâ parimhã, wa tô wasima roꞌubumro zaꞌra ni, Masédonia u wasiꞌabaꞌré da, Zezusihi wasuꞌuwẽ na tame wa te dama rowasuꞌu zaꞌra da, wa te ãma uwaimrami zaꞌra da, ꞌRe ihâimana uꞌâsi mono, wazô hârâ zaꞌra wa.
Filipu ãma Lidia te te isazezé
11 Tawamhã Troadi hawi, wa tô wawairébé ni. Õne haré ubaꞌre na wa tô wasisaꞌre, Samotrasia na robꞌré zaꞌiti nhisi u. Ta hawimhã awẽm na wa tô aihutu ni, ubaꞌre nhimizahârizéb u Neapolis ãma.
12 Ta hawimhã wa tô aiꞌabaꞌré ni ꞌri nhoꞌu dama iꞌrãnhoꞌu Filipu u hã Masédonia ꞌremhã. Tame te romanu norĩ hã ꞌre siꞌubumro. Tamemhã bâtâ ahâ na wa tô wahâimana zaꞌra ni.
13 Sabadu na hã ꞌri nhoꞌõmo hawi wa tô wawairébé ni pa zaihâ u, wa te rosaꞌrata zaꞌra wa, tame Zudeu norĩ te rowaptẽrẽzé, wa te wasiwi ꞌmanhopẽtẽ da. Wa tô asimro ni. Wa robzanhamri zaꞌra ni, tame piꞌõ norĩ isiꞌubumro norĩ ma.
14 Piꞌõ dasiré te te iwawapari zaꞌra hã Lidia na isisi hã, zazahâ ihâpré wedeꞌwa, Tiatira na ꞌri nhoꞌõmo nhisi hawimhã. Ta hã ꞌRe ihâimana uꞌâsi mono ãma te ꞌre wata. Uburé Danhibꞌapito hã ma tô ipẽ hã tãma ꞌridawa, Paulu te te irowasuꞌuzé hã te te sadaihuꞌu da.
15 Tahawa, â dawabzuri hã ma tô ꞌmanha duré isõrõwa ꞌre, ꞌre isiꞌubumroi mono norĩ zama. Taha parimhã ma tô wazô tihârâ zaꞌra:
— Wanhibꞌapito zazeiꞌwa na asiwi ĩꞌmadâꞌâ aba wamhã, we aiꞌabaꞌréi waꞌaba, ĩnhorõwa ãma asimroi waꞌaba da.
Ãne wa, ma waꞌãma aiꞌuté zaꞌra, isõrõwa ꞌre, wasiꞌubumro da hã.
Paulu norĩ Silaha me dazazéb ꞌre, da te izazé
16 Tawamhã nimahã bâtâ na, da te ꞌre irowaptẽrẽ zaꞌra mono zéb u wasiꞌabaꞌréi ré, wa wasiwi sõpẽtẽ ni, azarudu pawaꞌâbâ ãna dama romhuriꞌwa hã, waꞌuburé ré ꞌre hâimana mono wa, marĩ hã romhâ ré te te ꞌre iꞌawaihuꞌu siromo mono hã. Taha na robꞌuiprazé hã ma tô saꞌẽtẽ na te te ꞌre waibu, isibꞌapito norĩ hã.
17 Tawamhã azarudu hã Pauluhu zarina ma tô mo duré wazarina zama. Mreme ꞌrãihâ na te nasi waꞌmahârâ zaꞌra, ãne:
— Ã hã aibâ norĩ hã, ꞌRe ihâimana uꞌâsi mono Danhipai u ꞌre ihâimana mono ma, romhuriꞌwa norĩ. Te aima wasuꞌu zaꞌra waꞌwa, danhoꞌreptuzé da te ꞌre sõpẽtẽ zaꞌra mono da, ꞌre idanomro mono zé hã.
18 Ãne hã bâtâ ahâ na te nasi te te waꞌabꞌmahârâ. Tawamhã Paulu hã ma tô oto ãma tiwaꞌa. Ma tô sô aipiꞌra. Waꞌuburé ma, ma tô tinha, ãne:
— Zezu Cristuhu nhisi na, wa aima robꞌru. Mo oto aiwatobro, azarutu hawi!
Tawamhã awaꞌawi pesere, waꞌuburé hã ma tô watobro, azarutu hawi.
19 Azarutu nhibꞌapito norĩ hã marĩ te te ꞌre iꞌawaihuꞌu siromo mono na, za oto robꞌuiprazé te te ãma ꞌre iwaibu zaꞌra mono õ na te te waihuꞌu zaꞌra wamhã, ma tô siwi timra, Paulu norĩ Silaha me hã. Ma tô siwi sari zahuré, da te dasina ꞌre iꞌubumroi mono zéb u, dama ipire norĩ nhoꞌre u.
20 Tawamhã dama ipire norĩ nhoꞌre te te siwi simizusi wamhã, ma tô ãne wasuꞌu zaꞌra:
— Ã hã aibâ norĩ hã, Zudeu norĩ. Te roꞌwaꞌrutu zahuré ãme, wate zaꞌra ꞌri waꞌõtõ ꞌremhã.
21 Te te nasi rowasuꞌu zahuré, wate roti zahi upana. Wa norĩ romanu hã, ãne hã dahâimanazéb zô watobꞌuzu zaꞌra õ di za, ãma ꞌre iwahâimana zaꞌra mono da hã.
22 Tawamhã daꞌahâ uptabi na ma tô sô atom ni, da te tãma robꞌmanharĩ wasété zaꞌra da, Pauluhu ma duré Silaha ma zama. Dama ipire norĩ hã ma tô dama ꞌru zaꞌra, iꞌuza da te tiwi sani da, duré wede waré na da te ꞌre préꞌé zahuré mono da.
23 Tawamhã saꞌẽtẽ na da te ahâri zahuré parimhã, dazazéb ꞌre, ma tô za zahuré ni. Dazazé ꞌmadâꞌâꞌwai ma, ma tô roti pese zaꞌra, te te ꞌmadâꞌâ pese zahuré da.
24 Te te tãma roti pese zaꞌra parimhã, dazazé ꞌmadâꞌâꞌwa hã ma tô tiza dazazéb ꞌre, ꞌriꞌre waꞌwa daꞌrowi uptabi u. Ma tô duré para tété zahuré, wedepoꞌo zapuꞌu ꞌre.
Dazazé ꞌmadâꞌâꞌwa te te isazezé
25 Niwamhã mara waꞌwa, Paulu duré Silaha me hã ma tô rowaptẽrẽ zahuré. ꞌRe ihâimana uꞌâsi mono ãma te duré tiwata zahuré, tinhoꞌre na. Isiré dazazéb ꞌre isimasam norĩ hã te wapari zaꞌra.
26 Tawamhã rosaꞌrese õ ré waptu na, tiꞌa hã saꞌẽtẽ ma tô popo. Tahawa ma tô dazazé ꞌri naꞌrata nhanaꞌrada hã sãsãꞌã. Awaꞌawi uburé ꞌridawa norĩ hã ma tô siꞌridawa zaꞌra. Duré isiꞌuwazi nhorõ rudu cohẽti dazazéb ꞌre isimasam norĩ para wasisizé hã ma tô asisina.
27 Tawamhã dazazé ꞌmadâꞌâꞌwa hã ma tô oto udu. Dazazéb ꞌre ꞌriꞌre waꞌwa nhitobzé ꞌridawa haré isimasam na te te ꞌmadâꞌâ wamhã, ma tô rosaꞌrata, dazazéb ꞌre isimasa iwairébé na hã. Tahawa tinhiꞌwa sibꞌézé ꞌwapa hã ma tô sisada waze, aré siwĩrĩ da.
28 Tane nherẽ, Paulu hã ma tô ꞌmahâ hârâ ꞌrãihâ na, ãne:
— Tôꞌã. Tane hã ꞌmanharĩ tõ! Uburé wa ãme aimasam ni.
29 Tawamhã dazazé ꞌmadâꞌâꞌwa hã robꞌuiwẽzéb zô te hâ. Wara sina, ma tô ãzé. Hiꞌrãtitõ ma tô aime Paulu duré Silas norĩ papara, pahi te, rẽrẽꞌẽ sina.
30 Taha pari, ma tô rob u sani zahuré. Tame te ãne sadanharĩ zahuré:
— E marĩ wa za ꞌmanha, danhoꞌreptuzé te ĩsina uwaimrami da hã.
31 Tawamhã ma ãma sadaꞌâbâ zahuré, ãne:
— Saze na, Wanhibꞌapito Zezusi hã. Tawamhã asõꞌreptuzé hã te za asina iꞌuwaimra duré asõrõwa ꞌre asiré ꞌre isiꞌubumroi mono norĩ zama.
32 Tawamhã Wanhibꞌapito zadawa wasuꞌu na ma tô tãma rowasuꞌu zahuré, dazazé ꞌmadâꞌâꞌwai ma, duré isõrõwa ꞌre, isiré ꞌre isiꞌubumroi mono norĩ ma zama.
33 Tô taha bâtâ pibuzém na mara na, dazazé ꞌmadâꞌâꞌwa hã ma tô iꞌwaꞌre hã tãma upsõ zahuré. Taha pari ma tô â dawabzuri hã ꞌmanha duré uburé isiré isõrõwa ꞌre ihâimana zaꞌra norĩ zama.
34 Taha pari, tinhorõwa u ma tô saprõni zahuré. Isa hã ma tô tãma a zahuré. Tawamhã uburé isõrõwa ꞌre isiꞌubumro norĩ me, toi uptabi zaꞌra di, ꞌRe ihâimana uꞌâsi mono hã te te saze zaꞌra wa.
Paulu norĩ Silaha me dazazém hawi ipusizé
35 Tawamhã awẽ wamhã oto, danhibꞌapito romanu norĩ, ma tô dasiꞌwapéi ꞌmanharĩꞌwa norĩ hã ꞌmazatõrĩ zaꞌra, dazazé ꞌmadâꞌâꞌwai u, ãne romreme ré: “Sani zahuré na, ã hã aibâ norĩ hã.”
36 Tawamhã dazazé ꞌmadâꞌâꞌwa hã ma tô Pauluhu ma tinha, ãne:
— Danhibꞌapito norĩ hã te we aiꞌrui waꞌwa, te asani waꞌaba da. Mo oto ane waꞌaba, rowẽ sina.
37 Tane nherẽ, Paulu hã te dasiꞌwapéi ꞌmanharĩꞌwa norĩ ma tinha, ãne:
— Wa norĩ hã Roma ꞌre iwapoto nherẽ, ma tô danhoꞌa te te ꞌre wapréꞌé zaꞌra, rowairébé hã waꞌãma hâimana õ nherẽ. Taha pari dazazéb ꞌre, ma tô siwi waza. E niha te ãne nherẽ, ãhã na hã sima wẽ zaꞌra, piꞌuriwi te te siwi wazani da. Mare di. Siꞌuihâ na we siꞌabaꞌré, te te siwi wazani da hã.
38 Tawamhã dasiꞌwapéi ꞌmanharĩꞌwa norĩ hã ma tô ãne hã rowasuꞌu zaꞌra, danhibꞌapito norĩ ma. Ta norĩ hã Paulu duré Silaha me romanu, ꞌre ihâimana zahuré mono na te te waihuꞌu zaꞌra wamhã, ma tô tipahi pese zaꞌra.
39 Tahawa, ma tô itẽme aiꞌabaꞌré. Ma tô tiwi waptẽrẽ zaꞌra, te te ꞌruiwapari zaꞌra tõ da. Tawamhã dazazé hawi ma tô siwi sani. Ma tô tãma nharĩ zaꞌra, ꞌri waꞌõtõ hawi neb da.
40 Tawamhã dazazém hawi da te sani wamhã, ma tô tineb zahuré, Lidia nhorõwa u. Tame isazeiꞌwa norĩ me ma tô sisõpẽtẽ zaꞌra. Tawamhã tinhimirowasuꞌu na ma tô siptete zaꞌra. Taha pari, ma tô oto tineb zahuré, Filipu hawi.
