Atus 17:1-34
17 Paulu norĩ hã Silaha me ma tô roꞌrahâri zahuré, Ãfipulis na ꞌri nhoꞌõmo nhisi na duré Apolonia na. Tawamhã ma tô oto aimasisi, Tesalonica na ꞌri nhoꞌõmo nhisi u. Tame te Zudeu norĩ te rowahutuzé hã ꞌre sa.
2 Te te nasi iꞌmanharĩzéb zarina, Paulu hã ma tô ãzé, rowahutuzéb u. Tawamhã sabadu siꞌubdatõ isiꞌutõrĩ na hã ma tô dama rowasuꞌu, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré na, rowahutuzéb ꞌre, ihâimana zaꞌra norĩ ma.
3 Tô iꞌru zahi zarina Danhoꞌreptuiꞌwa te te irobzépatazém na hã te ãma tãma rowasuꞌu zaꞌra, duré dâꞌâ pari apâ ihâiwaꞌutu na hã. Ãne te dama wasuꞌu:
— Ã hã Zezusi te aima iwasuꞌu zaꞌra waꞌwa hã, ta hã Danhoꞌreptuiꞌwa.
4 Tawamhã niꞌwam norĩ Zudeu norĩ hã ma tô saze zaꞌra, Paulu mreme hã. Tahawa, ma tô isiré oto tihâimana zaꞌra, Paulu norĩ siré Silaha me. Ahâ na gregu norĩ zudeuꞌõ norĩ hã, ꞌRe ihâimana uꞌâsi mono ãma ꞌre iwata zaꞌra mono norĩ hã duré ahâ na piꞌõ norĩ dama mreme pire na ꞌre ihâimana zaꞌra mono hã ma tô oto isiré tihâimana zaꞌra, ta norĩ zama te te saze zaꞌra wa.
5 Tane nherẽ, Zudeu norĩ hã ma tô sõꞌru zaꞌra. Tahawa ma tô ꞌrãꞌõtõ zaꞌra aibâ iwasété norĩ hã, ꞌri nhiꞌriti na ꞌre ihâimana zaꞌra mono norĩ hã. Tawamhã ahâ wa oto, ma tô ꞌri waꞌõtõ ꞌremhã roꞌwaꞌrutu zaꞌra. Zasãhã nhorõwa u ma tô asisi, Paulu norĩ zô Silaha me, te te siwi sõpẽtẽ wa, dawaꞌwa u te te siwi saprõni zahuré da.
6 Tane nherẽ, te te siwi sõpẽtẽ zahuré õ wamhã, Zasã hã ma tô siwi saprõ, daꞌupana duré nima norĩ isazeiꞌwa norĩ zama, dama ipire norĩ nhoꞌre u, ãne hârâ ꞌrãihâ na te te ꞌmahârâ zaꞌra mono sina:
— Ã hã aibâ norĩ hã daro mono bâ, te te dawi ꞌre iroꞌwaꞌrutu zaꞌra mono norĩ hã ma tô oto we aihutu ãwa.
7 Zasã hã tinhorõwa u ma tô ꞌmazasi zahuré. Roma te apito Cézaha nhimiroti zahi hã te te ꞌmadâꞌâ zaꞌra õ di. Te dama rowasuꞌu zaꞌra, apito aimawi iré na hã, Zezusi na isisi hã.
8 Tawamhã daꞌahâ uptabi na idahâimana zaꞌra hã duré dama ipire norĩ hã ãne hã te te wapari zaꞌra wamhã, ma tô darési zaꞌra.
9 Tawamhã dama ipire norĩ hã ma tô Zasãhã ma, duré isiré norĩ ma zama robꞌru zaꞌra, oto siꞌabaꞌré da, isisani zaꞌra zé te te waꞌâbâ zaꞌra pari.
Paulu norĩ Silaha me Béréia ãma ihâimana zahuré zé
10 Maꞌrã wi, isazeiꞌwa norĩ hã ma tô siwi satõrĩ zahuré Paulu norĩ Silaha me, Béréia na ꞌri nhoꞌõmo nhisi u. Tamomo simasisi wamhã, ma tô tineb zahuré, Zudeu norĩ te rowahutuzéb u.
11 Tawamhã Béréia ãma ꞌre isiꞌubumroi mono norĩ hã isimiwazé wẽ uptabi si hã, Tesalonica ãma nei õ di. Zezusihi wasuꞌuwẽ hã ma tô wapari pese zaꞌra, te te sima wẽ uptabi zaꞌra sina. Awẽ sidâpâ, ma tô ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã nasi sõré zaꞌra, Pauluhu nhimirowasuꞌu hã tô sena zô.
12 Ãne wa, Zudeu norĩ hã ahâ na ma tô saze zaꞌra. Gregu siꞌaibâ norĩ, gregu sipiꞌõ norĩ isibro pese norĩ zama ma duré ahâ na saze zaꞌra.
13 Tane nherẽ, Tesalonica ãma Zudeu norĩ hã, Paulu ꞌRe ihâimana uꞌâsi mono Béréia ãma te te isadawa wasuꞌu na rowasuꞌu te te wapari zaꞌra wamhã, ma tô itẽme aiꞌabaꞌré. Tame ma tô dawadaꞌuri wasété zaꞌra, Paulu norĩ zada dahâimana zaꞌra da hã.
14 Tahawa isazeiꞌwa norĩ hã awaꞌawi ma tô Paulu hã siwi satõ, âporé zaihâ u. Tane nherẽ, Silas norĩ hã Timotiuhu me ma tô aimasisi isaꞌu, Béréia ãma.
15 Isazeiꞌwa norĩ hã Pauluhu ꞌwawi isimapa zaꞌra hã ma tô siwi saprõ, Atena na ꞌri waꞌõtõ nhisi u. Taha pari ma tô apâ sina siri zaꞌra Béréia u. Pauluhu mreme hã ma tô siwi tiꞌâ, Silas duré Timotiu norĩ hã itẽme neb da Atena u, waptu na uptabi.
Paulu hã Atena ãma te te iromhurizé
16 Tawamhã Atena ãma Paulu hã, Silas norĩ zô simipari ré Timotiu me, ma tô abꞌrui pese, romhâiba ꞌmanharĩ hã ahâ uptabi na te te aꞌmadâꞌâ wa, ꞌri waꞌõtõ ꞌremhã.
17 Tahawa, Zudeu norĩ te rowahutuzéb ãma ma tô awẽ sidâpâ nasi daꞌazadaꞌâ, Zudeu norĩ hã duré zudeuꞌõ norĩ, ꞌRe ihâimana uꞌâsi mono ãma ꞌre iwata zaꞌra mono norĩ hã duré da te ꞌre iꞌubumroi mono zéb u, te te ꞌre iꞌubumroi mono norĩ zama.
18 Tawamhã nima norĩ dama romnhoréꞌwa norĩ epicureu duré nima norĩ estoicu norĩ hã ma tô nasi siwi sadaꞌâ. Ãne te nasi nharĩ zaꞌra:
— Ã hã aibâ isimizaꞌreseꞌõ hã, e marĩ te sima wẽ, te te wama wasuꞌu zaꞌra da.
Tawamhã nima norĩ hã te duré ãne nasi nharĩ zaꞌra:
— Ãté ihâibaꞌõ wama iwaihuꞌu zaꞌra õ, te te wama wasuꞌu zaꞌra da.
Ãne hã ma tô nasi nharĩ zaꞌra ni, Paulu Rowasuꞌu wẽ ité te te dama wasuꞌu wa, Zezusihi wasuꞌu duré ihâiwaꞌutuzéb zama.
19 Tawamhã Paulu hã ma tô siwi saprõ, Areopagu na rosaꞌrataꞌwa norĩ siꞌrãꞌõtõzém nhisi u. Tame ma tô siwi sadanha, ãne:
— Wa wasima wẽ zaꞌra ni, wa te waihuꞌu zaꞌra da. E niha hã ã hã, rowahudu ité ãma irowasuꞌu hã.
20 Te wama iwasuꞌu zaꞌra, marĩ wama isaꞌrese zaꞌra õ. Ta hã wa wasima wẽ zaꞌra ni, wa te waihuꞌu zaꞌra da, marĩ te te iwasuꞌu hã.
21 Atena ãma ꞌre isiꞌubumroi uꞌâsi mono norĩ hã duré darob amoi hawi isiré ꞌre isiꞌubumroi mono norĩ zama, tãma wẽ zaꞌra di, rowasuꞌu ité hã te te sima ꞌre iwasuꞌu uꞌâsi zaꞌra mono da hã duré te te ꞌre iwapari zaꞌra mono da hã.
22 Tawamhã Paulu hã hâiwi ma tô za danhoꞌre, dasiꞌrãꞌõtõzé Areopagu ãma. Ãne te tãma nharĩ zaꞌra:
— Atena ãma ꞌre iꞌaiꞌubumroi waꞌaba mono norĩ, wa aiꞌmadâꞌâ zaꞌra waꞌwa, uburé marĩ na te ꞌre asimizaze zaꞌra waꞌaba mo.
23 Tô ꞌri waꞌõtõ na ꞌre ĩmorĩ wamhã, wa abꞌmadâ, romhâiba norĩ hã ãma ꞌre iꞌaiwata zaꞌra waꞌaba mono zé hã. Wa tô duré sõpẽtẽ ihâibaꞌõ norĩ ma, danhoprubzéb zaꞌra zé hã, ãne ãma irobꞌuiꞌéré ré hã: “Ihâibaꞌõ iwaihuꞌu pe, dama isaꞌreseꞌõ ma.” Ã hã ihâibaꞌõ waihuꞌu õ nherẽ, ãma ꞌre iꞌaiwata zaꞌra waꞌaba mono hã, ta hã wa aima wasuꞌu zaꞌra waꞌwa.
24 — ꞌRe ihâimana uꞌâsi mono, uburé marĩ te te iꞌapodo duré uburé marĩ iwa ꞌre ihâimana zaꞌra mono hã, ta hã hâiwa ãma Uburé Danhibꞌapito duré tiꞌai ãma zama. Ta hã ꞌre sãmra mono õ di, ꞌri tiꞌai ãma aꞌuwẽ norĩ hã tinhibꞌrata na te te ꞌre iꞌri zaꞌra mono wa.
25 Duré marĩ hã da te tãma ꞌre iꞌmanharĩ zaꞌra mono da hã, sadai õ di. E marĩ wa. Tô õhõ si dapẽꞌẽzani hã te te dama ꞌre anhomri mono wa, dapẽꞌẽzanizé hã duré uburé marĩ norĩ hã.
26 Aibâ misi nherẽ, taha hâiba hawimhã ma tô uburé dapoto mono bâ daꞌapoto, tiꞌai ãma ꞌre dahâimana zaꞌra mono da hã. Te te daꞌapoto õ ré hã, ꞌRe ihâimana uꞌâsi mono hã ma tô ro apisutu siro, dapoto mono bâ iwa ꞌre idahâimana zaꞌra mono zéb da hã duré niha wahum na iwa ꞌre idahâimana zaꞌra mono zéb da hã.
27 Ãne hã ma tô ꞌmanha, uburé sô ꞌre darĩtĩ zaꞌra mono da, duré ãté da te ꞌre sõpẽtẽ zaꞌra mono da, romhâ na wanhiti zaꞌra ꞌre hâimana mono õ nherẽ.
28 Niꞌwa hã ma tô ãne tinha: “Õhõ ãma si wa ꞌre wahâimana zaꞌra, wa ꞌre wasirési zaꞌra, duré wa ꞌre wanomro.” Niꞌwam norĩ ate zaꞌra waꞌwa rowaihuꞌu pese ꞌwa norĩ hã ma tô ãne duré robꞌuiꞌéré zaꞌra: “Wa norĩ zama wa iꞌra ꞌre wanomro.”
29 Tahawa, wa norĩ hã ꞌRe ihâimana uꞌâsi mono ꞌra wamhã, wa te ãma ꞌre rosaꞌrata zaꞌra mono õ di za, ta hã romhâiba ꞌmanharĩ ẽtẽ waipo pré oru na iꞌmanharĩ na hã, ẽtẽ waipo prã prata na duré ẽtẽ na iꞌmanharĩ na hã. Danhipese na da te ꞌre irobꞌmanharĩ zaꞌra mono ne hãi õ di.
30 Duréihã ꞌRe ihâimana uꞌâsi mono hã dama waihuꞌu ãna ꞌre danomro mono nherẽ, te te ꞌre daꞌahâ zaꞌra mono õ di. Tane nherẽ, ãhã na hã uburé dapoto mono bâ te oto dama tiꞌru, dawasété na dasisãmri zaꞌra wa, itẽme dasipizari zaꞌra da.
31 E marĩ wa. Bâdâ hã ma tô sima pisutu siro, dapoto mono bâ iꞌuwaibaba na te te daꞌãma iꞌarowairébé da hã. Aibâ hã ma tô sima pisutu, daꞌãma rowairébéꞌwa da hã. Taha ãma ma tô hâiꞌré, uburé dama hã, dâꞌâ nherẽ apâ te te ihâiwaꞌutu na hã.
32 Tawamhã Paulu hã apâ dahâiwaꞌutuzém na te te irowasuꞌuzé hã da te wapari zaꞌra wamhã, niꞌwam norĩ hã ma tô ãma tito zaꞌra. Tane nherẽ, niꞌwam norĩ hã ma tô ãne nharĩ zaꞌra:
— Wa wasima wẽ zaꞌra ni, nimahã bâtâ na si duré wama rowasuꞌu zaꞌra da, ã hã rowasuꞌu na hã.
33 Tahawa Paulu hã ma tô dahawi mo.
34 Tane nherẽ, niꞌwam norĩ hã ma tô saze zaꞌra. Tahawa ma tô Pauluhu ãma sasõmri zaꞌra. Aibâ hã Dioniziu na isisi hã ma tô dasiré saze, daꞌãma rowairébéꞌwa norĩ siré Atena ãma, dama ipire uptabi hã. Piꞌõ Damaris na isisi hã ma tô duré saze. Duré niꞌwam norĩ hã ma tô isiré saze zaꞌra.
