Atus 2:1-47
2 Pẽtecosti na bâtâ nhisi iwisizéb u hã, Zezusihi zazeiꞌwa norĩ hã ma tô siꞌrãꞌõtõ siré, ꞌri ꞌre.
2 Tawamhã rosaꞌrese õ ré, robruru hã ma tô watobro hâiwa hawi, rowaꞌu isaꞌẽtẽ uptabi te te ꞌre irobruruꞌu zaꞌra mono ne. Ta hã ꞌri ma tô sina sito, siré isiꞌubumrozé hã.
3 Tawamhã ma tô ꞌmadâꞌâ zaꞌra unhama roꞌo zoto ne sima isipé hã. Ta norĩ hâiba mono bâ ma tô iꞌrã nhisiwi mazahâri zaꞌra.
4 Tahawa uburé pese ꞌRe ihâimana uꞌâsi mono Pẽꞌẽzani ihâiba ꞌre ꞌmasisi na ma tô tihâimana zaꞌra. Damreme aimawi na timremezém nhiti, ma tô duré oto mreme zu, ꞌRe ihâimana uꞌâsi mono Pẽꞌẽzani te te tãma iwaihuꞌu zaꞌra zéb zarina.
5 Tame Zeruzalẽ ꞌremhã te ꞌre siꞌubumro, Zudeu norĩ ꞌRe ihâimana uꞌâsi mono nhimiroti na robꞌuiꞌéré ꞌmadâꞌâꞌwa norĩ hã ropâ daro ꞌre ihâimana zaꞌra mono hawi ꞌre isihutu mono hã.
6 Robruru da te wapari zaꞌra wamhã, daꞌahâ uptabi na ma tô ubumro ni. Tawamhã ma tô ãma tatobꞌuzu zaꞌra ni, damreme mono bâ da te wapari zaꞌra wa.
7 Daꞌahâ uptabi na ma tô ãma tatobꞌuzu zaꞌra ni. Tahawa, te ãne dasima nharĩ zaꞌra ni:
— Uburé ã hã aibâ norĩ hã e Galiléia ãma ꞌre isiꞌubumroi mono ã bâ, te ãne hã mreme zu.
8 E niha wa wamreme mono bâ, imreme zaꞌra hã wapari zaꞌra ni, wahâiba mono bâ.
9 Wa norĩ hã Patia na tiꞌa nhisi hawimhã, Média, Elã, Mezopotãmia, Zudéa, Capadosia, Põtu, duré Azia na tiꞌa nhisi hawimhã,
10 Frizia na tiꞌa nhisi hawimhã, Pãfilia, Ezitu, duré Libia na tiꞌa nhisi hawimhã, tame Cireni na ꞌri nhisi ꞌrata dazaꞌrui hawimhã. Nima norĩ hã Roma hawimhã ma tô we duré aihutu,
11 Zudeu norĩ hã duré nima norĩ zudeuꞌõ, Zudeu norĩ hâimanazéb u isipizari zaꞌra norĩ hã. Nima norĩ hã Creta hawimhã duré nima norĩ hã Arabia hawimhã. E niha wa bété wamreme mono bâ wapari zaꞌra ni, aibâ norĩ te te wama irowasuꞌu zaꞌra zé hã, ꞌRe ihâimana uꞌâsi mono, te te dama ꞌre iꞌabꞌmanharĩ wẽ uptabi mono wasuꞌu hã.
12 Tawamhã uburé ma tô ãma tatobꞌuzu zaꞌra ni. Da te ãma rosaꞌrata waihuꞌu zaꞌra õ di. Tahawa, te ãne tasisadanharĩ zaꞌra ni:
— E niha wa za ãma waihuꞌu zaꞌra ni.
13 Tane nherẽ, niꞌwam norĩ hã ma tô duré ãma tito zaꞌra. Ãne te nasi nharĩ zaꞌra ni:
— Uva ꞌrãi waꞌu isé hã saꞌẽtẽ na te te âhuri wa, ma siꞌuihâ idiꞌiti zaꞌra.
Pedru te te dama irowahutuzé
14 Tawamhã Pedru hã ma tô hâiwi za, tisiré Zezusihi zadawa wasuꞌuꞌwa norĩ, 11 na ihâiba zaꞌra norĩ siré. Tawamhã mreme ꞌrãihâ na ma tô daꞌahâ uptabi na idahâimana zaꞌra norĩ ma tinha, ãne:
— Wasiré Zudeu norĩ duré uburé Zeruzalẽ ꞌre, ꞌre iꞌaiꞌubumroi waꞌaba mono norĩ, ĩwapari pese zaꞌra waꞌaba, za te aima irowasuꞌu zaꞌra waꞌaba zém na hã.
15 Ã hã aibâ norĩ hã, ꞌrã siwamnarĩ zaꞌra õ di, ãma irosaꞌrata zaꞌra waꞌaba zarina. Zahadu bâtâ pibuzé hã 9 hora ãma.
16 Tazahã ãhã na iromhâimana na hã ꞌRe ihâimana uꞌâsi mono zadawa wasuꞌuꞌwa Zoéu ma tô ãma robꞌuiꞌéré siro, ãne:
17 “Ãne wa za ꞌmanha, Robꞌrãsutuzéb ãma bâdâ siꞌutõrĩ wana ré hã. — Ãne ꞌRe ihâimana uꞌâsi mono te tinha.Ĩpẽꞌẽzani hã wa za saꞌwa, uburé dapoto mono bâ.Aiꞌra siꞌaibâ norĩ duré aiꞌra sipiꞌõ norĩ hã te za te te ꞌre ĩmreme ꞌmahârâ zaꞌra.Aibâ ipréduptém norĩ hã sõtõ ꞌrowim ne, te za marĩ hã te te ꞌre waihuꞌu zaꞌra.Ihi norĩ hã te za te te ꞌre rosawẽrẽ zaꞌra.
18 Ĩma romhuriꞌwa norĩ aibâ duré piꞌõ norĩ ma, Ĩpẽꞌẽzani hã wa za saꞌwa.Tawamhã ta norĩ hã taha bâtâ ꞌremhã te za te te ꞌre ĩzadawa ꞌmahârâ zaꞌra.
19 Wa za hâiꞌré hâiwa na marĩ dama iwaihuꞌuꞌõ hã, tiꞌai ãma zama.Dawapru duré uzâ duré hunhizé unhama nhizédé na hã te za tihâimana zaꞌra.
20 Bâdâ hã te za tirobra.Aꞌamo hã te za titõmo wapru, dawapru ne, bâdâ iwẽ uptabi wisi wana ré, Bâdâ Uburé Danhibꞌapito te hã.
21 Tawamhã uburé niꞌwam norĩ hã Uburé Danhibꞌapito zô isisi na ihãsi hã ta norĩ te za sõꞌreptu zaꞌra.”
22 Tawamhã Pedru hã ma duré ãma uzusi, ãne:
— Izaraéu nhihudu norĩ, ã hã ĩmreme hã wapari pese zaꞌra waꞌaba. Zezusi hã Nazaré ãma aré ꞌre isãmra mono hã, ꞌRe ihâimana uꞌâsi mono ma tô wẽsã. Ma tô aima hâiꞌré zara waꞌwa, marĩ dama iꞌmanharĩ waihuꞌuꞌõ te te ꞌre iꞌaꞌmanharĩ mono zém na. Zezusihi hâiba na ꞌRe ihâimana uꞌâsi mono ma tô marĩ dama iꞌmanharĩ waihuꞌuꞌõ hã te te ꞌre abꞌmanharĩ. Ta hã aima waihuꞌu pese zaꞌra waꞌaba di.
23 ꞌRe ihâimana uꞌâsi mono hã te te sima iwẽzéb zarina, duré tiwaihuꞌu pese na ma tô waihuꞌu siro, Zezusi hã za asibꞌrata aima ihâimana zaꞌra waꞌaba na hã. Tahawa ma tô asiwi iwĩrĩ ꞌwa, aibâ iwasété norĩ nhibꞌrata na. Wedepoꞌo nhonhiꞌrãmi na ma tô asiwi isasõmri ꞌwa.
24 Tane nherẽ, ꞌRe ihâimana uꞌâsi mono hã ma tô apâ hâiwaꞌutu. Adâ ꞌre ihâimana zaꞌra mono zém hawimhã ma tô waze, dadâꞌâ nhiptetezé wi. E marĩ wa. Pire uptabi wa, dadâ te te ãma iꞌaiꞌuté da hã.
25 Davi hã Zezusihi ãma ma tô duréihã robꞌuiꞌéré, ãne:“Wa tô te ꞌre ꞌmadâꞌâ uꞌâsi, Uburé Danhibꞌapito hã ĩnhoꞌre.E marĩ wa. Ta hã ĩnhimire niwĩ te ꞌre hâimana, marĩ hã te te ĩrési tõ da.
26 Tahawa, ĩpẽꞌẽ ꞌremhã ĩma rowẽ di.Duré ĩmreme toi uptabi di.Tahawa, ĩhâiba na wa robꞌumnhasi sina ꞌre ĩhâimana.
27 E marĩ wa. A hã adâꞌâ norĩ, ꞌre ihâimana zaꞌra mono zéb ãma ĩrẽme õ wa za, ĩdâꞌâ uꞌâsi ĩhâimana tõ da hã.Duré wa hã te aima ꞌre romhuri wẽ uꞌâsi mono wa, ꞌru dai õ di za, abꞌre ꞌre ĩhâiba ꞌro da hã.
28 A hã ma tô ĩma iwaihu, bâdâdi dahâimanazé isiꞌutõrĩꞌõ u ꞌre idanomro mono zé hã.Asõꞌre, ꞌre ĩhâimana mono wa, rowẽ isaꞌẽtẽ na ma tô ꞌre ĩhâiba ubu mo.”
29 Tawamhã Pedru hã te duré dama rowasuꞌu, ãne:
— Ĩsisãnawã norĩ, wa ĩsima wẽ, sõꞌawi te aima wasuꞌu zaꞌra waꞌaba da, wahiꞌrada Davi hã. Ta hã apito dama isaꞌẽne ma tô dârâ. Ma tô ãma tiꞌa ni. Ta hã te zahadu ꞌre hâimana, ã bâtâ na zama.
30 Ta hã ꞌRe ihâimana uꞌâsi mono zadawa ꞌmahârâꞌwa. Duré tãma waihuꞌu pese di, ꞌRe ihâimana uꞌâsi mono te te tãma iropisutuzé hã, isihudu hã za isine apito na ꞌre ihâimana mono na hã.
31 Davi hã te te waihuꞌu pese di duré, za ꞌRe ihâimana uꞌâsi mono te te iꞌmanharĩzé hã. Tahawa ma tô wasuꞌu, Danhoꞌreptuiꞌwa da, ꞌRe ihâimana uꞌâsi mono te te ipisudu apâ ihâiwaꞌutuzém na hã, ãne:“Dâꞌâ nherẽ, ꞌRe ihâimana uꞌâsi mono hã te te rẽme õ di, adâꞌâ norĩ ꞌre ihâimana zaꞌra mono zéb ãma hã. Ihâiba hã ꞌroi õ di, abꞌre ꞌremhã.”
32 ꞌRe ihâimana uꞌâsi mono hã ma tô õ hã Zezusi hâiwaꞌutu apâ. Ta hã wa tô ꞌmadâꞌâ zaꞌra ni wa norĩ hã.
33 ꞌRe ihâimana uꞌâsi mono hã ma tô sitẽme tiꞌâ apâ, isimire niwĩ oto ꞌre sãmra uꞌâsi mono da. Taha ma Imama ma tô tisõ, Tipẽꞌẽzani hã te te ãma iropisudu hã. Ta hã ma tô we saꞌwa. Ta hã te ãhã na iꞌmadâꞌâ zaꞌra waꞌwa. Te duré iwapari zara waꞌwa.
34 Davi hã hâiwa u morĩ õ di, Zezusi hã imorĩ ne. Tane nherẽ, ma tô ãne wasuꞌu:“Uburé Danhibꞌapito hã te ãne tinha, Ĩnhibꞌapito ma: ‘Ĩnhimire niwĩ asãmra,
35 asitobꞌru norĩ aipara nhimizusizéb zahâpâ, te isõrézéb u.’ ”
36 Tahawa, uburé Izaraéu nhihudu norĩ hã waihuꞌu zaꞌra waꞌaba. Ã hã Zezusi hã wedepoꞌo nhonhiꞌrãmi na asiwi isasõmri ꞌwa hã, ꞌRe ihâimana uꞌâsi mono ma tô pisutu Wanhibꞌapito da, duré Danhoꞌreptuiꞌwa da.
37 Ãne hã da te wapari zaꞌra wamhã, ma tô dasina tahâtâꞌâ zaꞌẽtẽ zaꞌra ni. Tahawa, Pedru hã ma tô siwi sadanha duré Zezusihi zadawa wasuꞌuꞌwa norĩ hã, ãne:
— Wasisãnawã norĩ, e marĩ, wa za tawamhã ꞌmanharĩ zaꞌra ni.
38 Tawamhã Pedru hã ma ãma sadaꞌâbâ zaꞌra, ãne:
— Aiwasété na te za asisãmri zaꞌra waꞌwa, taha zarina asiwẽꞌõ zaꞌra waꞌaba da. Tawamhã aihâiba mono bâ te za â dawabzuri hã iꞌmanharĩ zaꞌra waꞌwa, Zezu Cristuhu nhisi na, aiwasédé iꞌmanharĩ zaꞌra waꞌaba zé hã te te oto aiꞌãma ꞌmadâꞌâ zaꞌra waꞌaba tõ da. Tawamhã ꞌRe ihâimana uꞌâsi mono te za Tipẽꞌẽzani tinhoprubzé iwẽ uptabi iwaꞌâbâꞌõ hã aima sõmri zaꞌra waꞌwa.
39 Ã hã ropisudu hã aima zaꞌra waꞌaba, aiꞌra norĩ waꞌaba ma hã duré romhâ na ꞌre idahâimana zaꞌra mono norĩ ma zama, uburé dama hã Uburé Danhibꞌapito ꞌRe ihâimana uꞌâsi mono, sima dazô ꞌre ihârâ mono norĩ ma hã.
40 Tawamhã Pedru hã ma tô ꞌwapé zaꞌra, te te tãma irowasuꞌu zaꞌra zém na, te te pizari zaꞌra da, ãne:
— Ã bâtâ ꞌremhã dawasété na ꞌre idahâimana zaꞌra mono norĩ wi asisani zaꞌra waꞌaba, asisõꞌreptu zaꞌra waꞌaba da!
41 Tawamhã daꞌahâ na ma tô saze zaꞌra ni, Pedru te te dama irowasuꞌuzém na hã. Ta norĩ hã â dawabzuri ma tô ꞌmanharĩ zaꞌra. Taha bâtâ ꞌremhã niwamhã 3 miu na dahâiba na ma tô Zezusihi zazeiꞌwa norĩ siré oto tahâimana zaꞌra ni, duré tô 3 miu na ãma isisiwi na dahâiba na.
Isaze naꞌrata ꞌwa norĩ hâimanazé
42 Isazeiꞌwa norĩ hã ma tô te te ꞌre wapari pese zaꞌra, Zezusihi zadawa wasuꞌuꞌwa norĩ nhimirowahudu hã. Siré ma tô ꞌre hâimana zaꞌra. Iꞌuꞌẽtẽ wapu hã siré ma tô te te ꞌre huri*. Siré ma tô duré te te ꞌre rowaptẽrẽ zaꞌra.
43 Tawamhã Zezusihi zadawa wasuꞌuꞌwa norĩ hã marĩ dama iꞌmanharĩ waihuꞌu hã ma tô te te ꞌre ꞌmanharĩ zaꞌra, duré marĩ iwẽ uptabi hã ãma ꞌre idatobꞌuzu zaꞌra mono zama. Tahawa ꞌRe ihâimana uꞌâsi mono wazép sina, ma tô ꞌre dahâimana zaꞌra.
44 Tawamhã isazeiꞌwa norĩ hã siré te oto ꞌre hâimana zaꞌra. Uburé tinhibrom na ma tô duré ꞌre sipawapto wẽ zaꞌra.
45 Tinhiptiꞌa hã ma tô te te ꞌre wede zaꞌra, tinhimarĩ zama. Taha waꞌâ hã ma tô te te dama ꞌre poꞌo zara, marĩ hã dawi sô ꞌre irowaptâꞌâ zaꞌra mono zéb uwaibaba, marĩ saꞌẽtẽ na niwamhã duré suru na zama.
46 Awẽ sidâpâ ma tô ꞌre siꞌrãꞌõtõ simisutu, ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra ꞌre. Tinhorõwa mono bâ, ma tô duré iꞌuꞌẽtẽ wapu hã te te siré ꞌre huri. Siré ma tô duré ꞌre saihuri, rowẽ sina duré tipẽꞌẽ ꞌre sena na ꞌre ihâimana zaꞌra mono zéb zarina.
47 ꞌRe ihâimana uꞌâsi mono ãma ma tô ꞌre wata zaꞌra. Aihĩni ma tô da te ꞌre wẽsãmri zaꞌra, ta norĩ hã. Tawamhã bâtâ sidâpâ ma tô Uburé Danhibꞌapito hã daꞌãma hâꞌâ uꞌâsi, te te isõꞌreptu zaꞌra norĩ na hã.
Ĩwaꞌõtõ piꞌreba watsuꞌu mono
^ 2:42 isazeiꞌwa norĩ hã, siré ꞌre siꞌrãꞌõtõ mono wa, ꞌre isaihuri mono zé
