Atus 22:1-30
22 Ãne te Paulu hã dama siwasuꞌu:
— Ĩsisãnawã norĩ duré damama norĩ, maꞌãpé ĩwapari zaꞌra waꞌaba, ĩsiꞌwawi ĩmreme na ĩsimapazé hã.
2 Tawamhã Ebreu norĩ mreme na te te dama inharĩzé hã da te wapari zaꞌra wamhã, ariꞌiwi pese ma tô oto aimasam ni. Tahawa Paulu hã te ãne dama siwasuꞌu:
3 — Wa hã, Zudeu. Tarsu ãma ĩpotozé hã, Silisia ꞌremhã. Tane nherẽ, ãme wa ĩprédu, Zeruzalẽ ꞌre. Gamaliéu hã ma tô te te ĩma ꞌre romnhoré. Wa tô te ꞌre romnhoré pese, wahiꞌrata norĩ te, roti zahi na hã. Ĩnhimiꞌẽ na wa tô te ꞌre romhuri pese, ꞌRe ihâimana uꞌâsi mono ma, asine zaꞌra waꞌaba, ãhã na hã.
4 Ã hã Bâdâdi na ꞌre inomro mono norĩ ma, wa tô te tãma ꞌre arobꞌmanharĩ wasété. Wa tô duré te tãma ꞌre apisutu, da te ꞌre simroi mono da hã. Aibâ norĩ duré piꞌõ norĩ zama, wa tô te ꞌre awaibu. Dazazéb ꞌre, wa tô duré te ꞌre ꞌmaza.
5 Sasedoti tisiré norĩ nhipai u ipire hã duré uburé Zudeu norĩ ma rotiꞌwa norĩ zama, te te waihuꞌu pese zaꞌra di, tô sena ĩsiwasuꞌu na hã. Ta norĩ hã ma tô tinhimiꞌuiꞌéré hã ĩma sõmri zaꞌra, Damascu ãma isazeiꞌwa norĩ hâiba ꞌru na hã, tamomo te âri da, isisãnawã norĩ Zudeu norĩ ma, te sõmri zaꞌra da. Tawamhã tamomo wa tô mo, Ã hã Bâdâdi na ꞌre inomro mono norĩ hã te waibu da, isiꞌuwazi nhorõ rutu na pawasisi na te we simroi mono da ãwa Zeruzalẽ u, da te tãma robꞌmanharĩ wasété zaꞌra da hã.
6 — Niwamhã abzuma waꞌwa Damascu u te oto rosahutu wamhã, waptu na rosaꞌrese õ ré, ma tô rowaꞌa hâiwa hawi isiptete uptabi hã rowaꞌa, ĩmana wawi.
7 Tiꞌai u wa tô waptãrã. Tawamhã damreme wa tô wapa, ãne te te ĩma inharĩ hã: “Saulu, Saulu, e marĩ da, te ĩma ꞌre irobꞌmanharĩ wasété mo.”
8 — Tawamhã wa tô sadanha, ãne: “Apito, e ꞌwa hã, a hã.”
— Ma tô ĩzadaꞌâ, ãne: “Wa hã Zezusi, Nazaré ãma aré ꞌre ĩnhamra mono, tãma ꞌre irobꞌmanharĩ wasété mono.”
9 — Aibâ norĩ ĩsiré isiꞌabaꞌré norĩ hã rowaꞌa ma ꞌmadâꞌâ zaꞌra. Tane nherẽ, damreme te te ĩma inharĩ hã te te siwi sadaihuꞌu õ di.
10 Wa tô duré sadanha, ãne: “Apito, e marĩ, wa za ꞌmanha.”
— Tawamhã Wanhibꞌapito ma ĩzadaꞌâ, ãne: “Aiwahutu. Damascu u asébré. Tame te za niꞌwa hã aima waihuꞌu, uburé marĩ ꞌre iꞌabꞌmanharĩ mono zéb da hã, ꞌRe ihâimana uꞌâsi mono te te sima iwẽ hã.”
11 — Ta hã rowaꞌa isiptete uptabi hã ma tô ĩtobꞌa. Tahawa, ĩsiré isiꞌabaꞌré norĩ hã ma tô ĩpano na siwi ĩzaprõ, Damascu u.
12 Tamemhã te aibâ hã ꞌre sãmra, Anania na isisi hã. Ta hã ꞌRe ihâimana uꞌâsi mono nhimiroti zahi ꞌmadâꞌâ pese ꞌwa. Duré uburé Zudeu norĩ Damascu ꞌre, ꞌre ihâimana zaꞌra mono norĩ hã te te siwi ꞌre wazé pese.
13 Ta hã aibâ hã ma tô ĩzô rĩni. Ĩtẽme wisi wamhã, ma tô ãne ĩma tinha: “Ĩsisãnawã Saulu, apâ robꞌmadâꞌâ.”
— Tawamhã awaꞌawi pesere, wa tô apâ robꞌmadâ. Anania hã wa tô ꞌmadâ.
14 Tawamhã ta hã ma tô ãne ĩma tinha: “Saulu, ꞌRe ihâimana uꞌâsi mono wahiꞌrata norĩ te hã ma tô sima aipisutu, te te sima iwẽ hã waihuꞌu da duré ꞌmadâꞌâ da, Ite Romhuriꞌwa Iwẽ hã duré wapari da, siꞌuihâ na te te aima inharĩzé hã.
15 A hã te za uburé danhoꞌa dama ꞌre iwasuꞌu mo, iꞌmadâꞌâzé hã duré iwaparizé hã.
16 Tahawa ãhã na hã e marĩ zô te asimipa. Maꞌãpé aiwahutu, â dawabzuri hã da te aima ꞌmanharĩ da. Duré Wanhibꞌapito hã asina ꞌmahârâ, aiwasédé hã te te aiꞌãma ꞌmadâꞌâ tõ da.”
Paulu hã ꞌRe ihâimana uꞌâsi mono ma te te iromhurizé
17 Tawamhã Paulu hã ma tô tisiwasuꞌu dama ꞌrãsutu, ãne:
— Tawamhã Zeruzalẽ u apâ ĩwisi wamhã, ꞌRe ihâimana uꞌâsi mono nhorõwa ꞌri ꞌrãihâ ãma te rowaptẽrẽ ré hã, ma tô ĩma tihâiba, ĩnhotõ ꞌrowim ne te irobꞌmadâꞌâzé hã.
18 Wa ꞌmadâ Wanhibꞌapito hã. Ãne ma tô ĩma tinha: “Maꞌãpé waptu na aimorĩ Zeruzalẽ hawimhã, za da te dasiwi aiwapari õ wa, dama ĩwasuꞌuzém na hã.”
19 — Tawamhã wa tô sadaꞌâ, ãne: “Wanhibꞌapito, dama ĩwaihuꞌu pese di, rowahutuzé mono bâ ꞌre ĩzasi mono na hã, te te ꞌre iꞌasaze zaꞌra mono norĩ hã te ꞌre awaibui mono da, duré te ꞌre ahâ zaꞌra mono da hã.
20 Estevã te te ꞌre iꞌaiwasuꞌu mono hã da te dasiwi wĩrĩ ré, wa dame ĩhâiba. Wa ãma dazaze, da te dasiwi iwĩrĩzém na hã. Iwĩrĩꞌwa norĩ uza ihâpa hã, wa hã wa sa ꞌmadâꞌâ zaꞌra.”
21 — Tane nherẽ, Wanhibꞌapito hã ma tô ĩma tinha, ãne: “Mo oto aimorĩ. Romhâ na wa za asaprõ, zudeuꞌõ norĩ u.”
22 Tawamhã daꞌahâ uptabi na idahâimana zaꞌra hã Paulu ma tô dasiwi wapari ni, ãne te te inharĩzéb u. Tahawa ma tô oto dahârâ ꞌrãihâ uptabi na tahãsi ni, ãne:
— Wĩrĩ aba, ã hã aibâ hã. Sadai õ di, ꞌre ihâimana mono da hã.
23 Tawamhã dahârâ sina, daꞌuza hã ma tô sani zaꞌra ni. Robzapru hã hâimo ma tô duré nasi sãmra zaꞌra ni.
Paulu hã dasiꞌwapéi ꞌmanharĩꞌwa norĩ nhibꞌapito ma, isiwasuꞌuzé
24 Tawamhã dasiꞌwapéi ꞌmanharĩꞌwa norĩ nhibꞌapito hã tite dasiꞌwapéi ꞌmanharĩꞌwa norĩ ma, ma tô ꞌru zaꞌra, ꞌri isiptete u te te siwi ꞌmazébré da, Paulu hã. Ma tô duré tãma ꞌru zaꞌra, te te siwi ꞌre préꞌé mono da, siwasuꞌu da, marĩ wa, dahârâ ꞌrãihâ na da te nasi dasiwi ꞌmahârâ zô.
25 Te te siwi pawasisi ré hã te te siwi ꞌre préꞌé mono da, Paulu hã ma tô sadanha, dasiꞌwapéi ꞌmanharĩꞌwa norĩ wadaꞌuriꞌwa iꞌrata isa hã, ãne:
— E aima iꞌru zahi zaꞌra waꞌaba bâ, romanu na iwamri hã ꞌre ihâ zaꞌra waꞌaba mono da hã da te ãma ꞌre waihuꞌu zaꞌra mono õ nherẽ, marĩ te te ꞌre iꞌupa zaꞌra mono zé hã.
26 Tawamhã dasiꞌwapéi ꞌmanharĩꞌwa norĩ wadaꞌuriꞌwa, ãne hã te te wapari wamhã, ma tô tinhibꞌapito ma wasuꞌu, ãne:
— E niha te za tãma irobꞌmanha. Ãhã aibâ hã, romanu.
27 Tawamhã, apito hã ma tô mo Pauluhu u. Ma tô sadanha, ãne:
— Ĩma asiwasuꞌu na, te waihuꞌu da. E tô a hã romanu.
— Ĩhe. Wa hã, romanu.
28 Tawamhã apito hã te tãma siwasuꞌu, ãne:
— Wa hã duré romanu. Waꞌâbâ zaꞌẽtẽ na wa waꞌâ ĩsima, romanu na ꞌre ĩhâimana mono da hã.
Tawamhã Paulu hã te duré tãma tinha, ãne:
— Tazahã wa hã romanu na wa podo.
29 Tawamhã awaꞌawi pesere aibâ norĩ te te aré siwi ꞌre ipréꞌé mono da hã ma tô tãma aiꞌré zaꞌra. Duré dasiꞌwapéi ꞌmanharĩꞌwa norĩ nhibꞌapito hã ãne hã te te waihuꞌu wamhã, ma tô tipẽꞌẽwara pese, isimiwadaꞌuri zarina te te siwi pawasisi wa.
Paulu hã rotiꞌwa norĩ nhoꞌre isiwasuꞌuzé
30 Dasiꞌwapéi ꞌmanharĩꞌwa norĩ nhibꞌapito hã ma tô sima wẽ, te te waihuꞌu wẽ da, e marĩ wa, Pauluhu ãma ma tô Zudeu norĩ hã iwasédé hã hiri zaꞌra. Tahawa awẽm na ma tô tiꞌru, da te dasiwi wazere da. Taha pari ma tô tiꞌru, sasedoti dama ipire norĩ hã siꞌrãꞌõtõ da, duré uburé Zudeu norĩ ma rotiꞌwa norĩ zama. Taha pari ma tô tiꞌru, Paulu hã da te sãrĩ da, isõꞌreb zaꞌra.
