Atus 23:1-35
23 Tawamhã Paulu hã, ma tô aꞌmadâꞌâ pese, Zudeu norĩ ma rotiꞌwa norĩ hã. Ãne ma tô tãma nharĩ zaꞌra:
— Ĩsisãnawã norĩ, ĩnhimirosaꞌrata ꞌremhã marĩ te te ĩwi ꞌre rowaꞌré mono ãna, wa ꞌre ĩhâimana, ꞌRe ihâimana uꞌâsi mono nhoꞌremhã ãwa bâtâ u hã.
2 Tane nherẽ, Anania hã sasedoti tisiré norĩ nhipai u ipire uptabi hã ma tô aibâ norĩ ma tiꞌru, iꞌrata isimasam norĩ ma, te te siwi sadawa préꞌé da, Paulu hã.
3 Tawamhã Paulu ma tô Ananiaha ma tinha, ãne:
— Aihâimana siꞌamoi pese na ꞌre iꞌaihâimana mono, ꞌRe ihâimana uꞌâsi mono hã te za aiꞌazâ za! E niha asãmra nherẽ hã, ꞌRe ihâimana uꞌâsi mono nhimiroti zahi zarina ĩꞌãma rowairébé da hã. Tane nherẽ, ma tô dama ĩꞌru, da te dasiwi ĩꞌazâri da, roti zahi te te isawi zahi upana.
4 Tawamhã iꞌrata isimasam norĩ hã te Paulu hã siwi sadanha, ãne:
— E te ãma iwasé, sasedoti ipire uptabi ãma hã.
5 Tawamhã Paulu hã ma sadaꞌâbâ zaꞌra, ãne:
— Ĩsisãnawã norĩ, te waihuꞌu õ di, õ hã sasedoti dama ipire na hã. Tô ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne: “Ãma wasété zaꞌra tõ, ate aꞌuwẽ norĩ ma ipire norĩ ãma hã.”
6 Paulu hã, nima norĩ dama rotiꞌwa norĩ hã niꞌwam norĩ saduceu niwĩ ꞌre ihâimana zaꞌra mono na hã duré niꞌwam norĩ farizeu niwĩm na te te waihuꞌu wamhã, ma tô mreme ꞌrãihâ na siꞌmahâ, ãne:
— Ĩsisãnawã norĩ, wa hã farizeu duré farizeu ꞌra. Ãhã na hã ãmemhã ĩꞌãma rowairébé te tihâiba, ãma ĩnhimizazei wa, idâꞌâ zaꞌra norĩ niwamhã za apâ ihâiwaꞌutu zaꞌra na hã.
7 Ãne siwasuꞌu wamhã, farizeu norĩ duré saduceu norĩ hã ma tô siwasu zaꞌra. Tahawa dama rotiꞌwa norĩ hã ma tô sima aipoꞌo.
8 E marĩ wa. Saduceu norĩ hã ꞌre simizaze zaꞌra mono õ wa, idâꞌâ norĩ hã apâ ꞌre ihâiwaꞌutu zaꞌra mono na hã duré hâiwa ãma romhuriꞌwa norĩ ꞌre ihâimana zaꞌra mono na hã niwamhã duré dapẽꞌẽzani hã. Tazahã farizeu norĩ, ã norĩ na hã te ãma ꞌre simizaze zaꞌra.
9 Tahawa, ma tô tahârâ ꞌrãihâ pese zaꞌra ni. Tawamhã ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã, farizeu norĩ niwĩ ꞌre ihâimana zaꞌra mono norĩ hã hâiwi ma tô aimasa. Te duré saꞌẽtẽ wasu zaꞌra. Ãne ma tô nharĩ zaꞌra:
— Marĩ hã iꞌupa, wa te wasiwi sõpẽtẽ õ di, ã hã aibâ ãma hã. Ãté tô hâiwa hawi romhuriꞌwa duré ãté niꞌwai pẽꞌẽzani hã tãma tinha.
10 Tawamhã siwasu zaꞌra wa, sisada sibꞌrui pese zaꞌra wa, ma tô dasiꞌwapéi ꞌmanharĩꞌwa norĩ nhibꞌapito hã Pauluhu ãma hâtârâ, da te dasiwi hâiba pru pese õꞌumnhasite. Tahawa, ma tô tiꞌru, dasiꞌwapéi ꞌmanharĩꞌwa norĩ hã dawaꞌwa hawi te te siwi wazere da, ꞌri isiptete u apâ te te siwi ꞌmazébré da.
11 Tawamhã mara iꞌamo na Wanhibꞌapito hã ma tô sihâiꞌré, Pauluhu ma. Ãne ma tô tãma tinha:
— Paulu, aipahi tõ! A hã ma tô dama ĩwasuꞌu, ãme Zeruzalẽ ꞌremhã. Tane te za duré Roma ãma hã dama ĩwasuꞌu.
Paulu hã da te dasiwi wĩrĩ da, da te ãma dasima irowaꞌõtõ zaꞌra zé
12 Tawamhã awẽm na Zudeu norĩ hã ma tô siꞌrãꞌõtõ. Ropisutu zahi hã ma tô ꞌmanharĩ zaꞌra, â te te âhuri tõ da, duré saihuri tõ da, Paulu hã te te siwi wĩrĩ õ ré hã.
13 Tawamhã aibâ norĩ, ãne na te te iropisutu zaꞌra hã 40 nhipai u ihâiba zaꞌra hã.
14 Ta norĩ hã ma tô aiꞌabaꞌré, sasedoti norĩ ma ipire norĩ u, duré Zudeu nhibꞌihâꞌa norĩ u zama, ãne te te tãma nharĩ zaꞌra da:
— Ropisutu zahi hã wa tô ꞌmanharĩ zaꞌra ni, ãne: “ꞌRe ihâimana uꞌâsi mono hã iwasédé te te tô wama pisutu zaꞌrare, wasaihuri wamhã, duré siwaꞌru marĩ wa te âhuri wamhã, Paulu wa te wasiwi wĩrĩ õ ré hã.”
15 Tahawa dama rotiꞌwa norĩ, ãhã na hã maꞌãpé dasiꞌwapéi ꞌmanharĩꞌwa norĩ nhibꞌapito ma ꞌru zaꞌra waꞌaba, Paulu hã we te te siwi saprõni da ãwa. Tãma rowasuꞌu zaꞌra waꞌaba, za wa te ãma irosaꞌrata pese zaꞌra na ite romhâimanazém na hã. Tawamhã wei wisi wana ré, wa za sô mare siromo zaꞌra ni, wa te wasiwi wĩrĩ da.
16 Tane nherẽ, ꞌritéiꞌwa Pauluhu hidiba ꞌra hã ma tô waihuꞌu, te te sima irowaꞌõtõ zaꞌra zé hã. Tahawa Pauluhu u ma tô ãzé, ꞌri isiptete u hã. Tame ma tô tãma rowasuꞌu pese.
17 Tawamhã Paulu hã dasiꞌwapéi ꞌmanharĩꞌwa norĩ wadaꞌuriꞌwa zô ma tô hâ. Ãne ma tô tãma tinha:
— Saprõni ã hã ꞌritéiꞌwa hã, asibꞌapito u. Marĩ te te tãma iwasuꞌu da hã iré hã.
18 Tawamhã dawadaꞌuriꞌwa hã ma tô saprõ, tinhibꞌapito u. Ãne ma tô tãma rowasuꞌu:
— Dazazéb ꞌre isa, Paulu na isisi hã ma tô ĩzô hâ. Ma tô ĩma tinha, ã hã ꞌritéiꞌwa hã te we saprõni da, marĩ te te u aima iwasuꞌu da hã, iré wa.
19 Tawamhã dasiꞌwapéi ꞌmanharĩꞌwa norĩ nhibꞌapito hã ma tô ꞌritéiꞌwa hã paꞌâ. Danhiti ma tô saprõ. Ãne te sadanha:
— E marĩ te za ĩma iwasuꞌu.
20 Tawamhã ma sadaꞌâ, ãne:
— Niꞌwam norĩ Zudeu norĩ hã ma tô sima roti zaꞌra, te te aiwi waptẽrẽ zaꞌra da, awẽ Paulu hã dama rotiꞌwa norĩ u saprõni da, siꞌudâ sina, ite romhâimanazém na te te ãma rosaꞌrata pese zaꞌra da newa.
21 Tane nherẽ, saze zaꞌra tõ za ãma. Aibâ norĩ hã 40 nhipai u ihâiba zaꞌra hã te za sô aimaꞌuri zaꞌra, Paulu hã te te siwi wĩrĩ da. Ta norĩ hã uburé roti zahi hã ma tô ꞌmanharĩ zaꞌra, ãne: “ꞌRe ihâimana uꞌâsi mono hã iwasédé hã te te wama pisutu zaꞌrare, wasaihuri wamhã, duré siwaꞌru marĩ hã wa te âhuri wamhã, Paulu wa te wasiwi wĩrĩ õ ré hã.” Te oto mapari zaꞌra, ropisudu hã te te ãma uwaimrami zaꞌra da hã. Niha hã ãma isadaꞌâbâ zaꞌra zô si, te oto mapari zaꞌra.
22 Tawamhã apito hã te tãma tinha, ꞌritéiꞌwa ma, ãne:
— Niꞌwai ma rowasuꞌu tõ, ĩma irowasuꞌu na hã.
Taha pari, te tãma robꞌru, morĩ da.
Apito Félisihi u, Paulu da te isaprõnizé
23 Tawamhã dasiꞌwapéi ꞌmanharĩꞌwa norĩ nhibꞌapito hã maparane tizapari dasiꞌwapéi ꞌmanharĩꞌwa norĩ wadaꞌuriꞌwa norĩ zô ma tô tihârâ zahuré. Ãne te tãma nharĩ zahuré:
— Maꞌãpé ubumroi waꞌaba, 200 na dasiꞌwapéi ꞌmanharĩꞌwa norĩ hã duré 70 nhipai u awaru na ꞌre inomro mono norĩ hã, duré 200 na isiꞌuwazi ꞌrãꞌwa na romhâꞌwa norĩ zama, ꞌri waꞌõno Cézaréia u siꞌabaꞌré da. Asisa robꞌubumro zaꞌra waꞌaba za, ã hawimhã 9 na bâtâ pibuzéb ãma aiwairébé aba da, mara na.
24 Awaru hã duré ubumroi waꞌaba, Paulu hã ãma imorĩzéb da hã. Asiwi saprõni waꞌaba. ꞌMadâꞌâ pese waꞌaba, ãwisi wẽ aba da asiwi, danhibꞌapito Félisihi u hã.
25 Taha pari, dasiꞌwapéi ꞌmanharĩꞌwa norĩ nhibꞌapito hã ma tô robꞌuiꞌéré hã ꞌmanha, ãne:
26 “Aiwazép sina danhibꞌapito Félis, wa ãma asawi.
“Wa hã, Claudiu Lizia.
27 “Ã hã aibâ hã, niꞌwam norĩ Zudeu norĩ hã ma tô siwi tiꞌâ. Ma aré siwi tiwĩ. Romanu na ꞌre ihâimana mono na, te waihuꞌu wamhã, wa tô itẽme mo, ĩte dasiꞌwapéi ꞌmanharĩꞌwa norĩ me. Wa tô sawi, da te dasiwi wĩrĩ tõ da.
28 Wa tô ĩsima wẽ, te waihuꞌu da, e marĩ wa, ma tô iwasédé hã dasiwi ãma hiri ni. Tahawa wa tô saprõ, Zudeu norĩ ma rotiꞌwa norĩ u hã.
29 Tawamhã wa tô waihuꞌu, marĩ hã te te upai õ di, dazazéb ꞌre isab da hã duré da te iwĩrĩ da hã. Da te dasiwi iwasuꞌu wasété zé hã, tô õ norĩ nhimiroti zahi waꞌrãmi, ꞌre ihâimana mono zém na si ma tô iwasédé hã ãma siwi tihi.
30 Da te dasiwi wĩrĩ da, rowaꞌõno ãma ihâimana na, da te ĩma ꞌmairowasuꞌu wamhã, wa tô waihuꞌu, te ãma atẽme tãma robꞌru da. Wa duré tinha, Zudeu norĩ iwasuꞌu wasété ꞌwa norĩ hã asõꞌa te te siwi wasuꞌu wasété da.
“Wa ãma sawi. Claudiu Lizia.”
31 Tawamhã dasiꞌwapéi ꞌmanharĩꞌwa norĩ hã tãma iꞌru zaꞌra zé hã ma tô ãma uwaimrami zaꞌra. Paulu hã ma tô siwi saprõ, mara bâre, Ãtipatridi na ꞌri nhoꞌõmo nhisi u.
32 Awẽm na dasiꞌwapéi ꞌmanharĩꞌwa norĩ para na isiꞌabaꞌré norĩ hã ma tô apâ aiꞌabaꞌré, ꞌri isiptete u hã. Awaru na ꞌre inomro mono norĩ si, Paulu hã te te siwi saprõni da oto, ma tô ta norĩ si rẽme zaꞌra.
33 Cézaréia u sihutu wamhã, apito ma robꞌuiꞌéré hã ma tô siwi tisõ. Pauluhu zama ma tô tãma ãwisi zaꞌra.
34 Apito hã robꞌuiꞌéré hã ma tô sõré. Paulu ma tô duré sadanha, nima hawib zô. Silisia hawim na te te waihuꞌu wamhã,
35 ma tô tãma tinha, ãne:
— Aiwasuꞌu wasété ꞌwa norĩ hã we sihutu wapsi, wa za wapa ate romhâimanazé hã.
Taha pari dasiꞌwapéi ꞌmanharĩꞌwa norĩ ma, ma tô ꞌru zaꞌra, Paulu hã te te siwi sẽrẽ da, Erodihi nhimiromhurizé ꞌri ꞌrãihâ ãma.
