Atus 3:1-26
3 Tawamhã nimahã bâtâ na Pedru norĩ hã ma tô tineb zahuré, Zuwãhã me, ꞌRe ihâimana uꞌâsi mono nhorõwa ꞌri ꞌrãihâ u, bâdâ da te ꞌre irowaptẽrẽ zaꞌra mono zéb da bâtâ ãma, bâtâ pibuzé hã siꞌubdatõ bâtâ ãma hâiwahâ.
2 Tame aibâ hã te nhamra, hiꞌré haré ipodo hã. Awẽ sidâpâ ma tô da te ꞌre ꞌwapé “Iꞌmadâꞌâ ze” na ꞌridawa nhisi u, robꞌuiprazém na te te ꞌre daꞌawari mono da, ꞌre danhisisi mono sidâpâ.
3 Tawamhã Pedru norĩ Zuwãhã me ꞌri ꞌwawi waꞌra u zasi zahuré na te te ꞌmadâꞌâ zahuré wamhã, ma tô wari zahuré.
4 Tahawa Pedru norĩ hã Zuwãhã me, ma tô ꞌmadâꞌâ pese zahuré, aibâ ihiꞌré hã. Ãne te Pedru hã tãma tinha:
— Waꞌmadâꞌâ!
5 Tawamhã aibâ hã ma tô ꞌmadâꞌâ zahuré. Ma tô mapa, marĩ te te tãma sõmri zahuré da newa.
6 Tane nherẽ, Pedru hã te duré tãma tinha, ãne:
— Robꞌuiprazé ĩte hã baba di. Tane nherẽ, ĩma ihâimana na wa za aipawapto. Zezu Cristu, Nazaré ãma aré ꞌre isãmra mono nhisi na aiwahutu. Aimorĩ oto!
7 Taha parimhã, Pedru hã ma tô paꞌâ isimire niwĩ, ihiꞌré hã. Ma tô wahutu. Awaꞌawi pesere aibâ para hã duré iparaꞌõno hã ma tô aptete zahuré.
8 Tawamhã hâimo ma tô sime. Timorĩ na ma tô sãnaꞌrata. Taha pari isiré ma tô tizébré zahuré, ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra u, morĩ sina duré sarõtõ mono sina, ꞌRe ihâimana uꞌâsi mono ãma wata sina.
9 Tawamhã daꞌahâ uptabi na idahâimana zaꞌra hã, aibâ, ꞌre isarõtõ mono na duré ꞌRe ihâimana uꞌâsi mono ãma iwata na da te dasiwi ꞌmadâꞌâ wamhã,
10 ma tô dasiwi waihuꞌu ni, õ hã tô ꞌre isãmra mono na te te ꞌre daꞌawari mono da, ꞌri ꞌrãihâ u ꞌre idanhisisi mono zé “Iꞌmadâꞌâ ze” na isisi u hã. Ma tô ãma tatobꞌuzu zaꞌra ni. Ma tô duré tãma aꞌrãmi pese zaꞌra ni, tãma iromhâimanazé ma.
ꞌRe ihâimana uꞌâsi mono nhorõwa ꞌri ꞌrãihâ ãma, Pedru te te dama irowahutuzé
11 Aibâ hã ma tô mo Pedru norĩ siré, Zuwãhã me. Uburé ma tô ãma tatobꞌuzu zaꞌra ni. Tahawa ma tô isarina dasisaꞌre, Salomahã nhisi na ꞌri zahâpâ nhisi u.
12 Tawamhã Pedru hã te te daꞌaꞌmadâꞌâ wamhã, ma tô ãne dama tinha:
— Izaraéu nhihudu norĩ, e marĩ da, ma tô ãma atobꞌuzu zaꞌra waꞌwa. E marĩ wa, te iwaꞌmadâꞌâ pese zaꞌra waꞌwa, wa norĩ hã wa te iꞌmanharĩ ne, ã hã aibâ hã morĩ ré da hã. E wawaihuꞌu pese bâ. Duré e iwahâimana wẽ zéb zarina bâ.
13 ꞌRe ihâimana uꞌâsi mono, wahiꞌrada Abraꞌãhã te, Izaquihi te, duré Zacoho te, ta hã ma tô tite romhuriꞌwa Zezusihi ma tisõ, iwaihuꞌu pe hã. Tane nherẽ, ta hã ma tô asiwi iꞌrui waꞌwa da te dasiwi wĩrĩ da hã ma tô duré asiwi iwẽꞌõ waꞌwa Pilatuhu nhoꞌremhã, te te sima rowairébé nherẽ apâ te te sãrĩ da morĩ da.
14 Ma tô asiwi iꞌudâ waꞌwa sõꞌawi, Iwẽ Uptabi hã duré ꞌRe Imorĩ Wẽ Uptabi hã. Iꞌupana ma tô asiwi iwaptẽrẽ ꞌwa, dapãrĩꞌwa hã da te wazere da, morĩ da oto.
15 Ãne ma tô asiwi iwĩrĩ ꞌwa, Dahâimanazém nhomriꞌwa hã. Tane nherẽ, ꞌRe ihâimana uꞌâsi mono ma tô apâ hâiwaꞌutu. Wa norĩ hã wa tô ꞌmadâꞌâ zaꞌra ni.
16 Zezusihi nhisi iꞌumnhasi zarina, ma tô Isisi hã ã hã aibâ ihiꞌré hã pese, ã hã iꞌmadâꞌâ zaꞌra waꞌwa hã duré iwaihuꞌu zaꞌra waꞌwa hã. Isisi iꞌumnhasi zarina, ta hã Zezusihi umnha ma tô pese ã hã aibâ hã, asõꞌa zaꞌra waꞌaba.
17 — Ãhã na hã ĩsisãnawã norĩ, wa tô oto aiwaihuꞌu zaꞌra waꞌwa, iꞌmanharĩ zaꞌra waꞌaba na hã aima waihuꞌu zaꞌra waꞌaba ãna, asibꞌihâꞌa norĩ me.
18 Tane nherẽ, ꞌRe ihâimana uꞌâsi mono hã ãne na ma tô ãma uwaimra, te te ꞌre iꞌawaihuꞌu mono zé hã, isadawa ꞌmahârâꞌwa norĩ te te ꞌre iwasuꞌu zaꞌra mono zéb zarina hâiba mono bâ, danhoꞌreptuiꞌwa da, te te ipisudu hã za te te irobzépata zaꞌẽtẽ na hã.
19 Tahawa, aiwasété na asiꞌruiwapari zaꞌra waꞌaba. ꞌRe ihâimana uꞌâsi mono u apâ aipizari zaꞌra waꞌaba, te te aiꞌãma ꞌmadâꞌâ zaꞌra waꞌaba tõ da, aiwasédé hã.
20 Bâdâ hã aima hâimana zaꞌra waꞌaba da, iꞌaiwaꞌutu zaꞌra waꞌaba zé hã Uburé Danhibꞌapito hawimhã, te te we atẽme satõrĩ zaꞌra waꞌaba da, Zezusi hã, ate zaꞌra waꞌwa danhoꞌreptuiꞌwa da, te te ipisudu hã.
21 Tane nherẽ, iꞌru zahi, Zezusi hã aꞌâ ꞌre hâimana mono da hâiwa ãma, uburé marĩ isisaprĩ zaꞌra zéb u bâdâ iwisizéb u, ꞌRe ihâimana uꞌâsi mono hã wahub ahâ na te te iwaihuꞌuzéb zarina, isadawa ꞌmahârâꞌwa norĩ sena uptabi tãma ꞌre ihâimana zaꞌra mono norĩ, te te ꞌre iwasuꞌu zaꞌra mono zéb zarina.
22 Duréihã, Mozési ma tô ãne robꞌuiꞌéré: “Uburé Danhibꞌapito ꞌRe ihâimana uꞌâsi mono hã te za tizadawa ꞌmahârâꞌwa hã pisutu, te te ĩpisutu ne, aihawi zaꞌra waꞌaba. Taha mreme hã te za uburé ꞌre iwapari pese zaꞌra waꞌaba mo za.
23 Niꞌwa hã imreme te te wapari õ wamhã, te za dasiwi wĩrĩ ni, ꞌRe ihâimana uꞌâsi mono nhibꞌaꞌuwẽ ꞌre ihâimana zaꞌra mono norĩ waꞌwa ꞌre ihâimana mono zém hawimhã.”
24 Tô duréihã uburé ꞌRe ihâimana uꞌâsi mono zadawa ꞌmahârâꞌwa norĩ hã Samuéu hawi ma tô ãne na ãma rowasuꞌu siromo zaꞌra, hâiba mono bâ, ã hã bâdâ ihâimana zaꞌra zém na hã.
25 A norĩ waꞌwa hã, ꞌRe ihâimana uꞌâsi mono zadawa ꞌmahârâꞌwa norĩ nhihudu. Tahawa, ꞌRe ihâimana uꞌâsi mono aihiꞌrata norĩ waꞌaba ma, te te iropisutuzé hã aima zaꞌra waꞌaba zama te ꞌre hâimana. Abraꞌãhã ma, ma tô ãne tinha: “Asihudu norĩ uꞌâbâ, wa za uburé daro mono bâ aꞌuwẽ norĩ ma, iwẽ hã te ꞌre apisutu.”
26 — Ãne, ꞌRe ihâimana uꞌâsi mono hã ma tô tite Romhuriꞌwa pisutu. Ta hã ma tô we satõ imorĩꞌrata na, atẽme zaꞌra waꞌaba, iwẽ te te aima pisutu zaꞌra waꞌaba da, duré aihâiba mono bâ waꞌaba aiwasédé hã rẽme zaꞌra waꞌaba da.
