Atus 4:1-37
4 Tawamhã Pedru norĩ hã Zuwãhã me, zahadu te te dama rowasuꞌu zahuré ré, ma tô sasedoti norĩ hã aihutu, ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ nhibꞌapito siré duré saduceu norĩ zama.
2 Ta norĩ hã ma tô abꞌrui pese zaꞌra, Pedru norĩ hã Zuwãhã me te te dama rowahutu zahuré wa, Zezusi hã apâ ihâiwaꞌutu na duré taha zarina, za apâ idâꞌâ zaꞌra norĩ hã ꞌRe ihâimana uꞌâsi mono te te iꞌahâiwaꞌutu na hã.
3 Tawamhã Pedru norĩ hã Zuwãhã me ma tô siwi timra. Za oto robrazéb u wa, ma tô dazazéb ꞌre siwi tiza aꞌâ, awẽb u simaꞌwara da.
4 Tane nherẽ, daꞌahâ na ma tô saze zaꞌra ni, Zezusihi wasuꞌu da te iwapari zaꞌra hã. Aibâ norĩ te te isaze zaꞌra norĩ hã niwamhã 5 miu na ihâiba zaꞌrata zaꞌra hã.
5 Tawamhã awẽm na hã ma tô siꞌrãꞌõtõ, Zeruzalẽ ãma sasedoti ipire norĩ hã duré Zudeu norĩ ma rotiꞌwa norĩ hã duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama.
6 Tamemhã te dame tihâimana zahuré, Anasi hã sasedoti ꞌRe ihâimana uꞌâsi mono ma daꞌãma romhuriꞌwa, tisiré norĩ nhipai u ipire uptabi hã duré Caifasi, Zuwã, Alesãdri duré isiré norĩ hã sasedoti pire na ꞌre ihâimana zaꞌra mono sipoto hawi aꞌuwẽ hawimhã.
7 Ta norĩ hã ma tô dama ꞌru zaꞌra, Pedru norĩ hã Zuwãhã me, isõꞌreb zaꞌra da te dasiwi simizusi da.
Tahawa, ma tô sadanharĩ zahuré ni, ãne:
— E ꞌwai waihuꞌu pese na duré e ꞌwa nhisi na ma tô ãne hã iꞌmanharĩ ꞌwa.
8 Tawamhã Pedru hã ꞌRe ihâimana uꞌâsi mono Pẽꞌẽzani ihâiba ꞌremhã ꞌmasisi wa, ma tô ãne tãma nharĩ zaꞌra:
— Dama ipire norĩ duré danhibꞌihâꞌa norĩ!
9 Te iwazadanharĩ zaꞌra waꞌwa, iwẽ hã wa te iꞌmanharĩzém na aibâ ihiꞌré ma duré niha ipesezéb zô.
10 Wẽ di tô! Waihuꞌu zaꞌra waꞌaba duré uburé Izaraéu nhihudu norĩ hã. Ã hã aibâ imorĩ ré na asiwi iꞌmadâꞌâ ꞌwa hã ma tô tipese, Zezu Cristuhu waihuꞌu pese na, Nazaré ãma aré ꞌre isãmra mono asiwi iwĩrĩ ꞌwa, ꞌRe ihâimana uꞌâsi mono apâ te te ihâiwaꞌudu.
11 Ta hã Zezusi, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré na te te iwasuꞌu hã, ãne:“Ẽne, a norĩ waꞌwa ꞌriꞌwa norĩ, asiwi iwẽꞌõ waꞌwa hã. Ta hã oto danhipai u pire uptabi di.”
12 Danhoꞌreptuzé hã, Zezusihi ãma si wa za wa te ꞌre sõpẽtẽ zaꞌra. Niꞌwa, isine hã hâimana õ di, daro mono bâ ꞌre idahâimana zaꞌra mono ꞌremhã, ꞌRe ihâimana uꞌâsi mono te te ipisudu hã, danhoꞌreptuzé wa te ãma ꞌre isõpẽtẽ zaꞌra mono da hã.
13 Tawamhã Pedru norĩ hã Zuwãhã me pahi ãna te te irowasuꞌu zahuré zém na duré te te sada romnhoré zahuré õ nherẽ, te te ꞌmadâꞌâ zaꞌra wamhã, ma tô ãma titobꞌuzu zaꞌra. Ma tô duré ꞌmadâꞌâ waihuꞌu zaꞌra, Zezusihi siré ꞌre inem na hã.
14 Tane nherẽ, niha hã te te tãma nharĩ waihuꞌu zaꞌra õ di, aibâ ihiꞌré te te ipese zahuré hã, isababa sab zahuré wa.
15 Ãne wa, ma tô tãma robꞌru zaꞌra, neb da oto dasiꞌrãꞌõtõzém hawimhã. Pusi zaꞌu si, ma tô ãma sima robzanhamri zaꞌra.
16 Ãne te sisadanharĩ zaꞌra:
— E marĩ, wa za ꞌmanharĩ zaꞌra ni, ã hã aibâ norĩ ãma hã. Zeruzalẽ ꞌremhã uburé dama waihuꞌu pese zaꞌra di, marĩ dama iꞌmanharĩ waihuꞌuꞌõ te te iꞌmanharĩ zahuré na hã. Tahawa, wa te wasiwi udâ waihuꞌu zaꞌra õ di.
17 Tane nherẽ, rowasuꞌu hã dazaꞌrui mono bâ te te ropé tõ da hã, wa te tãma amhâzépa zaꞌra na, te te dama irowasuꞌu zahuré na te te sahu zahuré tõ da, Zezusihi wasuꞌu na hã.
18 Tawamhã apâ ma tô sô tihârâ zaꞌra. Ma tô tiwi sawi pese zaꞌra, te te dama irowahutu zahuré na hã te te ãma sahu zahuré tõ da, Zezusihi wasuꞌu na.
19 Tane nherẽ, Pedru norĩ hã Zuwãhã me ma tô ãne dazadaꞌâbâ zahuré:
— ꞌRâwi asima waihuꞌu zaꞌra waꞌaba: E iꞌuwaibaba, ꞌRe ihâimana uꞌâsi mono ma hã wa te wapari õ wamhã, a norĩ waꞌaba si wa te aiwapari zaꞌra waꞌaba wamhã.
20 Wa te sahâri waihuꞌu õ di za, watõmo na wa te ꞌre iꞌmadâꞌâ mono wasuꞌu hã duré wapoꞌre na wa te ꞌre iwapari mono wasuꞌu hã.
21 Te te duré nasi tãma amhâzépa zaꞌra pari, ma tô oto siwi satõrĩ zahuré. Niha hã te te tãma robꞌmanharĩ waihuꞌu zaꞌra õ di, uburé ꞌRe ihâimana uꞌâsi mono ãma dawata zaꞌra wa, iromhâimanazém na hã.
22 Aibâ ihiꞌré marĩ dama iꞌmanharĩ waihuꞌuꞌõ na ipesezé hã 40 nhipai u ãma wahum nherẽ.
Zezusihi zazeiꞌwa norĩ te te irowaptẽrẽ zaꞌra zé
23 Tawamhã Pedru norĩ hã Zuwãhã me da te tãma robꞌru zahuré pari, ne wamhã oto, ma tô apâ aimasisi tisiré isazeiꞌwa norĩ u. Tame ma tô tãma rowasuꞌu zaꞌra, ꞌRe ihâimana uꞌâsi mono ma, daꞌãma romhuriꞌwa ipire norĩ mreme na duré dama ipire norĩ mreme na duré uburé te te tãma inharĩ zaꞌra zém na zama.
24 Ãne hã te te wapari zaꞌra wamhã, ma tô uburé siré ꞌRe ihâimana uꞌâsi mono ãma tiwata zaꞌra, ãne:
— Uburé Danhibꞌapito, a hã hâiwa ma tô ipo, tiꞌa, âporé duré uburé marĩ iwa ꞌre ihâimana zaꞌra mono norĩ hã!
25 A hã ma tô inha, Aipẽꞌẽzani na duré aima romhuriꞌwa zadawa na, wahiꞌrada Davihi zadawa na, ãne:“E marĩ wa, daro mono bâ ꞌre idahâimana zaꞌra mono, ma tô tazahi pese zaꞌra ni. E marĩ wa, aꞌuwẽ norĩ hã ma tô rowaꞌõno ꞌmanharĩ zaꞌra, iꞌuptabi õ na.
26 Tiꞌai ãma isibꞌapito norĩ hã duré ite tiꞌai waꞌõtõ mono bâ rotiꞌwa norĩ zama, te sada tihâimana zaꞌra, Uburé Danhibꞌapito ꞌRe ihâimana uꞌâsi mono zada, duré te te sima ipisutu zada zama.”
27 — Tô sena, Erodi norĩ hã duré Põsiu Pilatuhu me, ma tô siꞌrãꞌõtõ, zudeuꞌõ norĩ me duré ãme aꞌuwẽ Izaraéu nhihudu norĩ ꞌre ihâimana zaꞌra mono norĩ me, sada hâimana zaꞌra da Iwẽ uptabi aima romhuriꞌwa Zezusi, Danhoꞌreptuiꞌwa da, asima ipisutu da, hâimana zaꞌra da.
28 Ma tõ siꞌrãꞌõtõ, uburé marĩ te te ꞌmanharĩ zaꞌra da, aiwaihuꞌu pese na duré asima iwẽzéb zarina, marĩ hã hâimana zaꞌra da, iwaihuꞌu siromo zé hã.
29 Uburé Danhibꞌapito, ãhã na hã ãma rosaꞌrata, te te wama iꞌamhâzépa zaꞌra zém na hã. Maꞌãpé rowaihu hã wama sõmri zaꞌra na aima romhuriꞌwa norĩ ma, wanhibꞌru na wa te ꞌre aimreme ꞌmahârâ zaꞌra mono da.
30 Asibꞌrada hã wei wẽ na, ꞌre daꞌapese mono da. Marĩ dama iꞌmanharĩ waihuꞌuꞌõ hã duré ꞌre abꞌmanharĩ mono iwẽ uptabi hã, aima romhuriꞌwa iwẽ uptabi Zezusihi nhisi na.
31 Tawamhã te te rowaptẽrẽ zaꞌra parimhã, ihâimana zaꞌra zéb ãma ꞌri hã ma tô sãsã. Tahawa ꞌRe ihâimana uꞌâsi mono Pẽꞌẽzani ré ꞌmasisi na ma tô tihâimana zaꞌra uburé. Ãne wa pahi ãna ma tô oto ꞌRe ihâimana uꞌâsi mono zadawa wasuꞌu na sãnaꞌrata zaꞌra.
Isazeiꞌwa norĩ hã sima ꞌre ihâimana zaꞌra mono zé
32 Uburé te te ꞌre isaze zaꞌra mono hã aiwapsi misi haré ma tô te te ꞌre rosaꞌrata zaꞌra. Duré misi haré tipẽꞌẽ ꞌremhã ma tô ꞌre hâimana zaꞌra. Niꞌwa hã te te sawi waihuꞌu õ di, marĩ tite sima si hã. Tazahã wẽ uptabi na ma tô te te sima ꞌre poꞌo zaꞌra, tinhimarĩ hã.
33 Mreme nhiptete sina, ma tô Wanhibꞌapito Zezusi apâ ihâiwaꞌutuzém na ma tô te te ꞌre rowasuꞌu zaꞌra, isadawa wasuꞌuꞌwa norĩ hã. ꞌRe ihâimana uꞌâsi mono hã iwẽ te te tãma ipisutu zaꞌra zé hã saꞌẽtẽ na ma tô tãma ꞌre hâimana zaꞌra.
34 Isiré zaꞌra hã niꞌwai õ di, tãma ropire na ꞌre ihâimana mono hã. Niꞌwam norĩ ma, tiꞌa hã duré isõrõwa hã ma tô te te ꞌre wede zaꞌra. Iwaꞌâ hã ma tô te te ꞌre ubumro zaꞌra.
35 Ma tô te te ꞌre ãwisi zaꞌra, Zezusihi zadawa wasuꞌuꞌwa norĩ u. Tawamhã ma tô te te ꞌre poꞌo zaꞌra dahâiba mono bâ, niꞌwam norĩ ma, marĩ zô tiwi ꞌre irowaptâꞌâ zaꞌra mono zéb zarina.
36 4:36-37 Zuzé, Levihi nhihudu Chipri hawimhã, Zezusihi zadawa wasuꞌuꞌwa norĩ hã Barnabé na te te siwi isisi hã (te wasuꞌu isisi hã “Danhipteteꞌwa”). Ta hã ma tô wede tinhiptiꞌa hã. Tawamhã robꞌuiprazé hã ma tô ãwisi, Zezusihi zadawa wasuꞌuꞌwa norĩ u.
37 ꞌMadâꞌâ 4:36
