Colosu 3:1-25
3 Tahawa, Cristuhu siré, ꞌRe ihâimana uꞌâsi mono apâ te te aihâiwaꞌutu zaꞌra waꞌaba wa, maꞌãpé imorĩꞌrata na marĩ hâiwa hawib zô asima ꞌre asõpré waꞌaba mono, Cristu hã ꞌRe ihâimana uꞌâsi mono nhimire niwĩ ꞌre isãmra mono zém hawib zô.
2 Asimirosaꞌrada hã marĩ hâiwa hawim na si aima ꞌre hâimana uꞌâsi zaꞌra waꞌaba mono. Mare di, tiꞌai ãma marĩ na hã.
3 E marĩ wa. Atâꞌâ pari zaꞌra waꞌaba wa. Tahawa, ãhã na hã aihâimanazéb zaꞌra waꞌwa hã te Cristuhu siré isimiꞌuri ne ꞌre hâimana zaꞌra, ꞌRe ihâimana uꞌâsi mono ãma.
4 Cristu hã, aihâimanazé ité te te aima ꞌre iꞌanhomri aba mono ꞌwa. Ta hã we sihâiꞌré wamhã, a norĩ waꞌaba zama te za duré isine aihâiba na rowaꞌa isaꞌẽtẽ ré asihâiꞌré zaꞌra waꞌwa.
Dahâimanazé iꞌrada, duré ꞌre idanomro mono zép té
5 Ãne wa, maꞌãpé ꞌre uprosi pese zaꞌra waꞌaba mono, uburé marĩ tiꞌai ãma iwasédé aihâiba ꞌre te te ꞌre iromhuri zaꞌra waꞌaba mono hã, ã norĩ hã: Dasina dahâimana, duré danhiséb õ na marĩ ꞌmanharĩ wasédé, duré marĩ iwasété zô si dasima robꞌruiwapari pe, duré marĩ na danhoꞌru. E marĩ wa. Marĩ na danhoꞌru hã ta hã ꞌRe ihâimana uꞌâsi mono upana, ꞌre idawata zaꞌra mono zé.
6 Ãne hã da te ꞌre iꞌmanharĩ zaꞌra mono uꞌâbâ, te za ꞌRe ihâimana uꞌâsi mono nhimihâzé hã ꞌre rereꞌe, niꞌwam norĩ isimiroti te te ꞌre iꞌmadâꞌâ zaꞌra mono õ norĩ nhisiwimhã.
7 A norĩ waꞌwa hã ꞌre saze zaꞌra waꞌaba mono õ ré hã, ma tô siwaꞌru ꞌre aihâimana zaꞌra waꞌaba mo aré, ãne hã ꞌre ꞌmanharĩ zaꞌra waꞌaba mono ré hã.
8 Tane nherẽ, ãhã na hã maꞌãpé oto rẽme pese zaꞌra waꞌaba, uburé ã norĩ hã: marĩ na dasiꞌrãzézé hã, duré dasisada dasiꞌrãiwaꞌrozé hã duré daꞌãma marĩ ꞌmanharĩ wasédé duré damreme iwasété na robzanhamri zama.
9 Asima ꞌre asadawa nhipese zaꞌra waꞌaba mono tõ, aihâimanazé iꞌrada hã duré taha na marĩ iwasédé ꞌre iꞌmanharĩ zaꞌra waꞌaba mono zé hã rẽme pari zaꞌra waꞌaba wa oto,
10 duré aihâimanazé itém na oto asiꞌuza zaꞌra waꞌaba wa. Ta hã oto aihâiba ité waꞌwa, Tisine aiꞌmanharĩꞌwa ne te za ꞌre sihâtéb uꞌâsi zaꞌra, ꞌRe ihâimana uꞌâsi mono te rowaihu hã ibâ na oto aima ꞌre hâimana zaꞌra waꞌaba mono da.
11 Ã hã dahâimanazé itéb ꞌremhã, aiwab õ na daꞌmadâ hã oto hâimana õ di. Aiwapsi te oto ꞌre dahâimana zaꞌra, Zudeuꞌõ norĩ hã Zudeu norĩ me duré isihâiwata nhihâriꞌõ, isihâiwata nhihâri ré norĩ me duré niꞌwa dasiré aꞌuwẽꞌõ hã darob ꞌre dasiré aꞌuwẽ me duré wadaꞌuri zarina titedeꞌwai ma romhuriꞌwa norĩ, wadaꞌuri ãna ꞌre ihâimana zaꞌra mono norĩ me. Tazahã, Cristuhu si uburé danhipai u, te ꞌre hâimana. Duré uburé te tizazeiꞌwa norĩ wa ꞌre hâimana.
12 Tahawa, a norĩ waꞌwa hã ꞌRe ihâimana uꞌâsi mono, tinhibꞌaꞌuwẽ da, te te sima aipisutu zaꞌra waꞌaba wa, aimawi tãma ꞌre aihâimana zaꞌra waꞌaba mono wa, duré te te ꞌre asawi pese zaꞌra waꞌaba mono wa, maꞌãpé asima sô ꞌre asõpré uꞌâsi aba mono, daꞌãma ꞌre aiba zaꞌra waꞌaba mono da, duré aihâimana wẽ na dama ꞌre aihâimana zaꞌra waꞌaba mono da, duré asiꞌmadâꞌâ zei ãna, duré marĩ da te dasima ꞌre iwẽ zaꞌra mono zéb zarina, ãma ꞌre dazaze zaꞌra waꞌaba mono da, mare di, asima iwẽzéb zarina si ꞌre idawati zaꞌra waꞌaba mono da hã, duré daꞌãma aiwaꞌa suꞌu ãna ꞌre aihâimana zaꞌra waꞌaba mono da.
13 Asiꞌãma ꞌre aiwaꞌa zaꞌra waꞌaba mono tõ. Duré marĩ na asina ꞌre upa zaꞌra waꞌaba mono wamhã, asiꞌãma ꞌre ꞌmadâꞌâ zaꞌra waꞌaba mono tõ. Wanhibꞌapito hã aiwasédé te te aiꞌãma ꞌre iꞌabꞌmadâꞌâ aba mono õ ne, dawasédé hã daꞌãma ꞌre ꞌmadâꞌâ zaꞌra waꞌaba mono tõ.
14 Uburé ã norĩ nhipai u, maꞌãpé dazawizé hã aima ꞌre hâimana zaꞌra waꞌaba mono. E marĩ wa. Dazawi hã te za uburé marĩ hã ibâ na sitẽme te te ꞌre aꞌubumro.
15 Cristu hã rowẽ uꞌâ te te aima ꞌre iꞌanhomri aba mono hã, aipẽꞌẽ ꞌre te te ꞌre iꞌasimroi wẽ uꞌâsi aba mono da si iwẽ hã, rowẽ uꞌâsi na ꞌre aihâimana zaꞌra waꞌaba mono da. E marĩ wa. Tô õ hã rowẽ uꞌâsi da, ma tô ꞌRe ihâimana uꞌâsi mono hã asô tihârâ zaꞌra waꞌwa, dahâiba misi ne asiré ꞌre aihâimana zaꞌra waꞌaba mono da. Tahawa, maꞌãpé ꞌRe ihâimana uꞌâsi mono ãma si ꞌre aiwata uꞌâsi zaꞌra waꞌaba mono.
16 Cristuhu wasuꞌuwẽ, aiwa saꞌẽtẽ uptabi na ꞌre ihâimana zaꞌra waꞌaba mono da si, iwẽ hã! Tahawa, maꞌãpé asima ꞌre rowahutu zaꞌra waꞌaba mono duré ꞌre asipawaptob zaꞌra waꞌaba mono, uburé rowaihuꞌu wẽ na hã. Duré asõꞌre na ꞌRe ihâimana uꞌâsi mono ãma ꞌre aiwata zaꞌra waꞌaba mono, Salmu ãma robꞌuiꞌéré zarina duré isazeiꞌwa norĩ nhoꞌrezém na, aipẽꞌẽ ꞌre ꞌRe ihâimana uꞌâsi mono ãma ato zaꞌẽtẽ zaꞌra waꞌaba sina.
17 Uburé marĩ ꞌre ꞌmanharĩ zaꞌra waꞌaba mono sidâpâsi duré ꞌre nharĩ zaꞌra waꞌaba mono sidâpâ, maꞌãpé Wanhibꞌapito Zezusihi nhisi na ꞌre ꞌmanharĩ zaꞌra waꞌaba mono. Taha uꞌâbâ duré ãma ꞌre aiwata zaꞌra waꞌaba mono, ꞌRe ihâimana uꞌâsi mono Imama ãma.
ꞌRi ꞌre, isazeiꞌwa norĩ ꞌre ihâimana zaꞌra mono zé
18 Piꞌõ imro ré norĩ, aimro zahâpâ ꞌre aihâimana zaꞌra waꞌaba mono, Wanhibꞌapito ãma ꞌre inomro mono norĩ hâimanazéb zarina.
19 Aibâ imro ré norĩ, maꞌãpé aimro hã ꞌre sawi pese zaꞌra waꞌaba mono. Duré aihâimana zasi õ na tãma ꞌre aihâimana zaꞌra waꞌaba mono.
20 Daꞌra norĩ, maꞌãpé aimama norĩ, ana me ꞌre wapari pese zaꞌra waꞌaba mono, ãne hã Uburé Danhibꞌapito ma, te te sina tãma ꞌre rowẽ mono wa.
21 Damama norĩ, aiꞌra norĩ ma ꞌre ipẽtẽ uꞌâsi zaꞌra waꞌaba mono zém na ꞌre sahi zani zaꞌra waꞌaba mono tõ, robzei ãna ꞌre hâimana zaꞌra mono tõ da.
22 Aiwadaꞌuri zarina atedeꞌwai ma romhuriꞌwa norĩ, tiꞌai ãma asibꞌapito na aima ꞌre ihâimana zaꞌra waꞌaba mono hã, uburé marĩ na ꞌre wapari pese zaꞌra waꞌaba mono, mare di, te te ꞌre aiꞌmadâꞌâ zaꞌra waꞌaba mono wap si hã, te te ꞌre aiwẽsãmri zaꞌra waꞌaba mono zô. Tazahã, tô sena na aipẽꞌẽ na ꞌre wapari pese zaꞌra waꞌaba mono, Wanhibꞌapito hã ꞌre iwazé pese zaꞌra waꞌaba mono zéb zarina.
23 Uburé marĩ ꞌre ꞌmanharĩ zaꞌra waꞌaba mono sidâpâsi, maꞌãpé aipẽꞌẽ toi uptabi sina ꞌre ꞌmanharĩ zaꞌra waꞌaba mono, Wanhibꞌapito ma ꞌre iꞌmanharĩ zaꞌra waꞌaba mono ne, mare di, tiꞌai ãma dama ꞌre iꞌmanharĩ zaꞌra waꞌaba mono ne hã.
24 Maꞌãpé ãma ꞌre asipoꞌre puꞌu uꞌâsi zaꞌra waꞌaba mono, za aipawaꞌâ iwaibui waꞌaba na hã, Wanhibꞌapito tinhibꞌaꞌuwẽ norĩ ma te te ãma iropisutu siromo zé hã. Ta hã Cristu, Wanhibꞌapito ma, te ꞌre iromhuri zaꞌra waꞌaba mo.
25 Niꞌwa hã marĩ iwasédé te te ꞌmanharĩ wamhã, iwaꞌrãmi te za tô waꞌâ, marĩ iwasédé te te iꞌmanharĩzéb zarina. E marĩ wa. ꞌRe ihâimana uꞌâsi mono te te daꞌãma arowairébé wamhã, aiwab õ na te te daꞌãma arowairébé dai õ di.
