Daniéu 6:1-28
6 Tawamhã apito Dariu ma tô tiꞌai waꞌõtõ nhoꞌu tinhimiꞌmadâꞌâzéb ꞌremhã, 120 na dazaꞌrui waꞌõtõ mono na ãma sipoꞌo da hã rowairébé. Taha zarina ma tô duré aibâ norĩ hã 120 na dazaꞌrui waꞌõtõ mono bâ dama iꞌrãnhoꞌõmo na ꞌre hâimana zaꞌra mono da hã pisutu zaꞌra.
2 Tawamhã ro morĩ wẽ da, niha marĩ hâimana tõ da, ma tô apito siꞌubdatõ dama ipire norĩ, 120 na dama iꞌrãnhoꞌõmo norĩ te te ꞌre ꞌmadâꞌâ zaꞌra mono da hã pisutu zaꞌra. Tawamhã Daniéu zama ma tô dazu pisutu, dama ipire na hâimana da.
3 Tawamhã Daniéu ma tô tisiré norĩ dama iꞌrãnhoꞌõmo na ꞌre ihâimana zaꞌra mono nhipai u tinhimiromhuri wẽ na hã sihâiꞌré. Taha ma, tãma romhuri waihuꞌu pese uptabi wa, ma tô apito hã ãma rosaꞌrata, te te sẽrẽ da, uburé danhipai u danhibꞌihâꞌa na oto ꞌre hâimana mono da.
4 Tahawa, isiré dama ipire norĩ, duré dama iꞌrãnhoꞌõmo norĩ, ma tô Daniéu hã te te siwi ꞌre pibu, niha isimiꞌmadâꞌâzéb ꞌremhã marĩ hã te te ãma siwi sãmri wasété wa, iwasédé te te ãma siwi hiri da. Tane nherẽ, marĩ hã te te ãma siwi sãmri õ di, sena na duré iꞌuwaibaba na si ꞌre hâimana mono wa. Tahawa, niꞌwa hã te te marĩ iꞌmanharĩ wasété na duré te te ãma iꞌupa na te te ãma wasété waihuꞌu õ di.
5 Tahawa, te ãne sima wasuꞌu zaꞌra:
— Niwamhã Daniéu, marĩ na siwasété ré hã, wa te wasiwi sõpẽtẽ waihuꞌu õ di, wa te ãma wasiwi iwasuꞌu wamnarĩzéb da hã. Ãne wa, ãté ꞌRe ihâimana uꞌâsi mono ãma isimizaze tãma ihâimana na te te ãma upai wapsi, wa za wasiwi sãmri ni, niha na iwasétézé hã.
6 Tawamhã uburé dama ipire norĩ ma tô apito u aiꞌabaꞌré. Siꞌabaꞌréi wamhã, te ãne tãma nharĩ zaꞌra:
— Apito Dariu, ꞌre aihâimana uꞌâsi mono da si, iwẽ hã!
7 Uburé wa norĩ, dama iꞌrãnhoꞌõmo norĩ hã, ꞌri nhoꞌõmo ꞌre, dama ipire norĩ hã, dazaꞌrui waꞌõtõ mono bâ dama iꞌrãnhoꞌõmo norĩ hã, duré uburé aimawi dama ipire norĩ hã wasiꞌrãꞌõtõ wamhã, wa tô ãma wasisaze zaꞌra ni, asimiroti itede iꞌmanharĩ da hã, wa te aiwi waptẽrẽ zaꞌra da, ãma idanhimipari prédu, iꞌru zahi hã. Tahawa, te za a hã dama iwaihu, 30 bâtâ ꞌremhã aiwi si, da te ꞌre rowaptẽrẽ zaꞌra mono da. Tawamhã taha ré niꞌwam norĩ, marĩ siwaꞌru ihâibaꞌõ norĩ wi, duré siwaꞌru dawi te te ꞌre rowaptẽrẽ zaꞌra mono wamhã, te za huꞌu zérépa ma, abꞌre ꞌremhã dasiwi sãmra ni.
8 Tahawa apito, maꞌãpé asimiroti nhiptede hã ꞌmanharĩ, ãma iꞌasisihâtâ da hã. Tawamhã Média norĩ nhimiroti zarina Persa norĩ me, asimiroti nhiptete ꞌmanharĩzé niwamhã da te ipari da hã, mare di za.
9 Tawamhã apito ma tô ãma saze zaꞌra. Taha zarina ma tô duré tinhisi hã ãma tisã, isimiroti na robꞌuiꞌéré hã da te ãma ropéi mono da, uburé dama.
10 Tawamhã apito tinhimirotizém na isisi hâtâzém na te te waihuꞌu wamhã, ma tô tinhorõwa u apâ hã mo. Hâimo ãma ꞌri ꞌre waꞌõno ihâimana ãma te nhamra, zanela ꞌri zadazâri norĩ Zeruzalẽ nhoꞌõmoi baba ihâimana zaꞌra ãma. Tawamhã Daniéu ma tô ꞌri zadazâri hã sima ꞌridawa zaꞌra. Taha pari ma tô hiꞌrãtitõ nhamra. Ma tô duré tite ꞌRe ihâimana uꞌâsi mono ma hã mre, awẽ sidâpâsi siꞌubdatõ na ãma isahu na tãma ꞌre imreme uꞌâsi mono ne.
11 Tawamhã Daniéu nhitobꞌru norĩ, simisutu isõrõwa u siꞌabaꞌréi wamhã, ma tô siwi ꞌmadâ, ꞌRe ihâimana uꞌâsi mono te te pawaptob da, timreme na te te tiwi rowaptẽrẽ ré.
12 Tawamhã apito tinhimiroti te te iwaihuꞌuzém na te te tãma nharĩ zaꞌra da hã, ma tô oto aiꞌabaꞌré. Tahawa, te tãma nharĩ zaꞌra ãne:
— Apito, asimiroti nhiptede iwaihuꞌuzém na iꞌasisihâtâzém na hã ma tô dawi isawi, 30 bâtâ ꞌremhã niꞌwa hã, siwaꞌru ihâibaꞌõ norĩ wi duré siwaꞌru dawi, da te ꞌre rowaptẽrẽ zaꞌra mono tõ da, duré aiwi si da te ꞌre rowaptẽrẽ zaꞌra mono da. Tawamhã asimiroti ꞌmanharĩzém na ma tô duré ipisu, niꞌwa asimiroti te te wapari õ wamhã, za huꞌu zérépa ma, da te dasiwi ime na hã, abꞌre ꞌre. Ãne na hã, e senai õ di bété, iꞌasisihâtâzé hã.
Tawamhã apito asa ma te ãma sadaꞌâbâ zaꞌra ãne:
— Ĩhe sena tô roti hã. Tahawa, te za tô da te ꞌre wapari pese zaꞌra. Duré Média norĩ nhimiroti ꞌmanharĩzéb zarina Persa norĩ me da te ipari da hã mare di tô.
13 Tahawa, ta norĩ hã te duré tãma nharĩ zaꞌra ãne, apito ma hã:
— Tane nherẽ, Daniéu, Zuda tiꞌai hawi wa te daꞌãma aiꞌuté wa, dasiré da te we dasiwi isaprõni hã, ta hã asimiroti nhiptede iꞌmanharĩzém na hã te te aiwazéb õ di. Tãma hã tarére. Õne haré te ꞌRe ihâimana uꞌâsi mono ma, awẽ sidâpâsi ꞌre mreme, misi bâtâ ꞌremhã siꞌubdatõ na ãma isahu na.
14 Tawamhã ãne hã apito te te wapari wamhã, ma tô tiwi tirobzeiꞌõ pese. Tiwi robzeiꞌõ pese wa, ma tô aré sima rosaꞌrata, Daniéu te te sõꞌreptu da. Tô taha bâtâ na, bâdâ isébrézéb u, ma tô niha hã nasi sima pibu, te te sõꞌreptu da hã.
15 Tane nherẽ, Daniéu nhitobꞌru norĩ, apâ duré apito u siꞌabaꞌréi wamhã, ma tô ãne tãma nharĩ zaꞌra:
— Apito, Média norĩ nhimiroti ꞌmanharĩzéb zarina Persa norĩ nhimiroti me, apito nhimiroti ꞌmanharĩzém na romnhihâdâ da te dasiwi iꞌmapari waihuꞌu õ na hã aima waihuꞌu pese di.
16 Tahawa apito, ma tô Daniéu hã dama tiꞌru, da te dasiwi saprõni da, huꞌu zérépa ma, abꞌre ꞌre, da te dasiwi me da. Tahawa, te apito, Daniéu ma tinha ãne:
— Ate ꞌRe ihâimana uꞌâsi mono, ãma ꞌre iꞌaihâimana mono hã, duré õne uꞌâ tãma ꞌre iꞌasisõmri mono hã te te asõꞌreptu zô, wa za wa hã robꞌmadâ.
17 Tawamhã ẽtẽ tõmo wawẽ na ma tô abꞌre zadawa hã iré siwi sito. Taha pari, ma tô apito hã tinhiptõmohi tétézém na, duré dama ipire norĩ nhiptõmohi wasisi zaꞌra zém na zama ãma tobꞌrata to, Daniéu ma, iromhâimanazém na hã niꞌwa te te ãma saprĩ tõ da.
18 Tawamhã apito tinhimiromhurizé ꞌri ꞌrãihâ u hã ma tô apâ mo. Morĩ wamhã, sai õ di. Duré tãma dasima romhuꞌuzé hã te te waptẽrẽ õ di, te te ꞌre iꞌmanharĩ uꞌâsi mono ne hã. Duré tô taha mara na hã sõtõ waihuꞌu õ di.
19 Tawamhã mararé uptabi ma tô udu. Utu wamhã, ma tô saꞌẽtẽ mo, huꞌu zérépa abꞌre ꞌre, isimasabzéb u.
20 Tawamhã abꞌre u te te sina rotété wamhã, ma tô te te ãma robzépata wa, mreme zei ãna ꞌmahâ ãne:
— Daniéu, ꞌRe ihâimana uꞌâsi mono idâꞌâꞌõ nhibꞌaꞌuwẽ! E ꞌRe ihâimana uꞌâsi mono, a hã ãma ꞌre iꞌaihâimana mono hã, duré õne uꞌâ tãma ꞌre iꞌasisõmri mono hã, ma tô huꞌu zérépa norĩ wi te te iꞌasõꞌreptu da hã ãma aima uwaimra.
21 Tawamhã Daniéu, ma te asa sadaꞌâ ãne:
— Apito, ꞌre aihâimana uꞌâsi mono da si, iwẽ hã!
22 Ĩte ꞌRe ihâimana uꞌâsi mono, tite hâiwa ãma romhuriꞌwa we te te isatõrĩ hã ma tô te te siwi ĩꞌuꞌa tõ da, sadawa nhiptob zaꞌra, huꞌu zérépa norĩ hã. ꞌRe ihâimana uꞌâsi mono ma, wa hã marĩ iwasédé te tiwi iꞌmanharĩ õ na hã tãma ĩwaihuꞌu pese wa, ma tô ãne hã ĩma ꞌmanha. Duré niwamhã aiwi zama marĩ te aiwi ꞌmanharĩ wasété õ di.
23 Tawamhã apito, to zaꞌẽtẽ uptabi wa, ma tô Daniéu abꞌre hawi da te dasiwi wazere da, dama tiꞌru. Tawamhã da te oto dasiwi wazere wamhã, ma tô ꞌmadâꞌâ zaꞌra ni, huꞌu zérépa marĩ ihâiba na te te ãma iꞌmanharĩ zaꞌra õ na hã, ꞌRe ihâimana uꞌâsi mono si te te sina ꞌre umnhasi mono wa.
24 Tawamhã apito nhimiwadaꞌuri zarina ma tô Daniéu wasuꞌu wasétéꞌwa norĩ hã dasiwi sãmra ni, huꞌu zérépa isimasabzé abꞌre u, uburé isiré zaꞌra zama imro norĩ hã, duré iꞌra norĩ hã. Tawamhã zahadu hâimo hawi itẽme zaꞌra sisaꞌrei mono ré, abꞌre nhitõ u hã ma tô zahadu ré huꞌu zérépa norĩ sô tizarõtõ zaꞌra. Tahawa, ma tô uburé te te hipru pese zaꞌra.
25 Tawamhã apito Dariu ma tô uburé daro mono bâ, duré dapoto mono bâ duré damreme mono bâ ꞌre idamreme zusi mono ma, robꞌuiꞌéré, ãne:
“Rowẽ na ꞌre aihâimana zaꞌra waꞌaba mono!
26 Uburé aꞌuwẽ norĩ, ĩnhimiꞌmadâꞌâzéb ꞌre dazaꞌrui mono bâ ꞌre iꞌaihâimana zaꞌra waꞌaba mono ma, wa aima waihuꞌu zaꞌra waꞌwa, ãne. Maꞌãpé Daniéu, ꞌRe ihâimana uꞌâsi mono ãma ꞌre iwata mono hã asiwi ꞌre wazé aba mono.E marĩ wa, õ hã ꞌRe ihâimana uꞌâsi mono idâꞌâꞌõ, õne uꞌâ ꞌre ihâimana mono.Niwamhã duré dama iꞌrãnhoꞌõmo na isimiꞌmadâꞌâzé hã isipru waihuꞌu õ.Duré niwamhã isiptetezé hã tiwi isiꞌutõrĩ waihuꞌu õ.
27 Taha si, siminhoꞌreptu waihuꞌu pese di.Hâiwa ãma, duré tiꞌai ãma te dama isaꞌreseꞌõ na te te ꞌre romhõsi.Taha si ma tô Daniéu hã sõꞌreptu, huꞌu zérépa nhiptetezé wi hã.”
28 Tawamhã Daniéu, Dariu iꞌrãnhoꞌõmo na te te ꞌre daꞌaꞌmadâꞌâ mono ré, duré Persia norĩ siré Ciru te te ꞌre daꞌaꞌmadâꞌâ mono siwaprã, ma tô danhipai u dama ipire na ꞌre ihâimana mono zém na hã ãma uzusi.
