Esdra 1:1-11
1 Tawamhã Persia te apito, Ciru dama isiꞌiꞌrãnhoꞌõmozém na misi imorĩꞌrata na ãma iwahub ãma*, ma tô Uburé Danhibꞌapito, isadawa ꞌmahârâꞌwa Zeremiaha nhimirowasuꞌu zarina timreme hã ãma uwaimra oto. Tawamhã Uburé Danhibꞌapito ma tô apito Ciru hã ꞌrãi piꞌra. Tahawa, ma tô dama tiꞌru, daro mono bâ tinhimiꞌmadâꞌâzéb ꞌremhã isimiroti na, da te ãma dasima ropéi mono da, robꞌuiꞌéré na duré daꞌahâ nhoꞌa da te dasima ꞌre isõré zaꞌra mono zéb da hã, ãne isimiroti na:
2 “Wa hã Ciru, Persia nhibꞌapito, wa aima nharĩ zaꞌra waꞌwa ãne: Uburé Danhibꞌapito, ꞌRe ihâimana uꞌâsi mono hâiwa ãma ꞌre isãmra mono hã ma tô tiꞌai ãma uburé te ꞌre idaꞌabꞌmadâꞌâ mono da hã danhibꞌihâꞌa na ꞌre ĩhâimana mono zé hã ĩma tisõ. Ma tô duré ĩpisutu, Zeruzalẽ ãma iwa ꞌre idawata zaꞌra mono zé ꞌri hã te tãma sãrĩ da, Zuda na romnhisi ãma.
3 ꞌRe ihâimana uꞌâsi mono, asiré ꞌre hâimana zaꞌra waꞌaba mono da si ĩma iwẽ hã, tinhibꞌaꞌuwẽ siré. Tahawa, maꞌãpé Zeruzalẽ u aiꞌabaꞌréi waꞌaba, Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono nhorõwa asiwi ꞌri wahutu aba da, iwa ãma ꞌre idawata zaꞌra mono zéb da hã, Zeruzalẽ ꞌre, ꞌre isãmra mono ãma.
4 Tawamhã iwaptoma ꞌre isiꞌubumroi mono, te za Izaraéu nhihudu norĩ pawaptob zaꞌra, apâ tirob u siꞌabaꞌré da. Tawamhã ẽtẽ waipo prã prata, ẽtẽ waipo pré oru, mra hã, duré danhimizama te za ta norĩ hã tãma sõmri zaꞌra. Duré danhoprubzéb da zama te za tãma sõmri zaꞌra, Zeruzalẽ ãma ꞌRe ihâimana uꞌâsi mono nhorõwa ꞌre, te te tãma isõmri zaꞌra da hã.”
Izaraéu nhihudu norĩ, Zeruzalẽ u apâ isiꞌabaꞌrézé wasuꞌu
5 Tawamhã Zudaha nhihudu norĩ te, duré Bẽzamihĩ nhihudu norĩ te, dawaꞌõtõ nhibꞌihâꞌa norĩ hã, sasedoti norĩ hã, levita norĩ hã, duré uburé aꞌuwẽ ma ꞌRe ihâimana uꞌâsi mono ipẽꞌẽ to, te te tãma isõmri zaꞌra norĩ hã ma tô oto sima robꞌubumro zaꞌra, Zeruzalẽ u siꞌabaꞌré da, tame Uburé Danhibꞌapito nhorõwa ꞌri, apâ te te siwi ꞌri da.
6 Tawamhã aꞌuwẽ iwaptoma ꞌre ihâimana zaꞌra mono norĩ, te te uburé ipawaptob zaꞌra norĩ hã ma tô nasi tãma sõmri zaꞌra, prata na piza hã, oru na hã, dasa hã, danhimizama hã, duré marĩ iwaꞌâbâ zaꞌẽtẽ norĩ hã. Duré ꞌre idanhoprub zaꞌra mono zéb zama ma tô tãma sõmri zaꞌra, Zeruzalẽ ãma ꞌRe ihâimana uꞌâsi mono nhorõwa za te te siwi iꞌri norĩ ma.
7 Tawamhã Nabucodonozo marĩ nhemezé pizaꞌa norĩ, hâsizém norĩ me, Zeruzalẽ ãma Uburé Danhibꞌapito nhorõwa hawi te te isani zaꞌra, tite ihâibaꞌõ norĩ ãma ꞌre idawata zaꞌra mono zéb u te te iꞌãwisi zaꞌra hã ma tô duré apito Ciru hã apâ sõmri zaꞌra.
8 Robꞌuiprazé ꞌmadâꞌâꞌwa Mitredatehe ma, ma tô marĩ mono hã tãma sõmri zaꞌra. Taha pari ma ta hã iwamri zaꞌratazé mono na ãma romnhihâtâ. Tahawa, ma tô Sesbaza, Zuda ãma dama iꞌrãnhoꞌõmo ma hã uburé tãma sõmri zaꞌra.
9 1:9-10 Ãhãta ãne marĩ zaꞌrata na ãma irobꞌuiꞌéré zaꞌra hã: pizaꞌa nhoꞌa ꞌreptõ oru na hã 30 na, pizaꞌa nhoꞌa ꞌreptõ prata na iꞌmanharĩ hã miu na, pizaꞌa nhoꞌa ꞌreptõ ihâiba amo norĩ hã 29 na, pizaꞌa nhoꞌa ꞌreptõ ẽtẽ waipo pré oru na iꞌmanharĩ hã 30 na, pizaꞌa nhoꞌa ꞌreptõ iwaꞌâbâ surure iꞌmanharĩ hã 410 na, duré marĩ ihâiba amo norĩ hã miu na.
10 ꞌMadâꞌâ 1:9
11 Tawamhã oru na duré prata na marĩ mono hã ma tô uburé simisutu hã watobro, 5.400 na. Ta hã Sesbaza, Zeruzalẽ u ma tô uburé apâ tidu, Izaraéu nhihudu norĩ Babilonia hawi apâ isiꞌabaꞌré norĩ siré.
Ĩwaꞌõtõ piꞌreba watsuꞌu mono
^ 1:1 Persia te apito Ciru hã ma tô ꞌri nhoꞌu Babilonia hã tiꞌâ. Taha wamhã, ma tô Babilonia nhibꞌapito na hã sãnaꞌrata.
