Esdra 10:1-44
10 Tawamhã Esdra, ꞌRe ihâimana uꞌâsi mono nhorõwa ꞌri nhoꞌre hiꞌrãtitõ sãmra sina, ma tô tãma mre, wawa sina, dawasété uꞌâbâ. Taha ré, ma tô Izaraéu nhihudu norĩ ahâ uptabi na imana wawimhã siꞌrãꞌõtõ, aibâ norĩ hã, piꞌõ norĩ hã, duré aiꞌuté norĩ hã. Ma tô duré ta norĩ zama tiꞌruꞌru.
2 Tawamhã Zeiꞌéhé ꞌra, Secaniasi, Elãhã hawi aꞌuwẽ hã te Esdraha ma tinha ãne:
— Wa norĩ ꞌRe ihâimana uꞌâsi mono wi, wa tô wawasété zaꞌra ni, wasiré aꞌuwẽꞌõ norĩ wasété na ꞌre ihâimana zaꞌra mono sipiꞌõ na ꞌre iwamro zaꞌra mono hã. Tane nherẽ, te zahadu Izaraéu nhihudu norĩ, marĩ iwẽ zô sima ꞌre isõpré mono zé hã tãma ꞌre hâimana zaꞌra.
3 Tahawa, ãhã na awaꞌawi na wa za ipire na ropisutu zaꞌra ni, wate ꞌRe ihâimana uꞌâsi mono nhoꞌremhã, piꞌõ norĩ ma, ꞌra ré siꞌabaꞌré da, wa te tãma irobꞌru zaꞌra zéb zarina. Ãne wa za asimiroti hã duré wate ꞌRe ihâimana uꞌâsi mono nhimiroti te te ꞌre iwazéb zaꞌra mono norĩ mreme zama wasiwi ꞌmanharĩ ni. Ãne wa za tô ꞌRe ihâimana uꞌâsi mono nhimiroti te te iꞌruzé hã ꞌmanharĩ zaꞌra ni.
4 Hâiwi maꞌãpé asa na, a hã ãne na hã ꞌmanharĩ hâ. Wa norĩ hã wa za wasiwi aiꞌupari ni za. Tahawa, maꞌãpé sada asiptete. Maꞌãpé õne haré niha na we ꞌmanharĩ!
5 Tawamhã Esdra, hâiwi oto sa wamhã, ma tô sasedoti ipire norĩ ma hã, levita ipire norĩ ma hã, duré uburé aꞌuwẽ norĩ ma hã tãma ꞌru zaꞌra, Secaniasi te te tãma inharĩ zaꞌra zéb zarina te te siwi ꞌmanharĩ da, te te siwi iropisutu da hã. Tahawa, ma tô ropisutu zaꞌra oto.
6 Tawamhã Esdra, ꞌRe ihâimana uꞌâsi mono nhorõwa ꞌri nhoꞌre hawi ma tô watobro. Watobro wamhã, ma tô Eriasibehe ꞌra siꞌaibâ Zoãnahã zaꞌwarizéb u mo. Tame ma tô ãma timara. Ma tô duré ãma tiꞌawẽ, sai ãna, duré te te hâꞌrẽne ãna, tãma robzeiꞌõ uptabi wa, Babilonia hawi aꞌuwẽ norĩ apâ te te sina isiri zaꞌra, ꞌRe ihâimana uꞌâsi mono ãma si ꞌre nomro mono õ wa.
7 Taha pari Zeruzalẽ ãma, duré Zuda ãma, uburé Babilonia ãma sito pese na ꞌre ihâimana zaꞌra mono zém hawi apâ isiꞌabaꞌré norĩ, Zeruzalẽ ãma isiꞌrãꞌõtõzéb na ma tô rowasuꞌu na ãma ropé zaꞌra ni.
8 Tawamhã ma tô dama iꞌrãnhoꞌõmo norĩ nhimirowaihuꞌu na duré danhibꞌihâꞌa nhimirowaihuꞌu na dapoꞌre pu hã dasiwi ꞌmanharĩ ni, niꞌwa hã siꞌubdatõ bâtâ pisutu pese upana wisi wamhã, za tinhimarĩ te te isiminizém na hã, duré za Izaraéu nhihudu norĩ hawimhã da te dasiwi iwazere na hã.
9 Ãne wa, Zuda ãma, duré Bẽzami ãma uburé aibâ norĩ ꞌre ihâimana zaꞌra mono siꞌubdatõ bâtâ ꞌre aꞌamo hã 9 ãma, duré bâdâ hã 20 na ihâimana ãma ma tô Zeruzalẽ u aihutu. Tahawa, ma tô siꞌrãꞌõtõ, ꞌRe ihâimana uꞌâsi mono nhorõwa nhoꞌremhã, sõꞌawi. Tawamhã taha siwaprã, tã ipini nhiptede taꞌa wa, duré roti ipire zô isiꞌrãꞌõtõ siwaprã, ma tô uburé tipopoꞌo zaꞌra.
10 Tawamhã sasedoti Esdra hã ma tô hâiwi za, para na. Sa wamhã, te tinha ãne:
— A norĩ waꞌwa hã ꞌRe ihâimana uꞌâsi mono ãma si ꞌre iꞌanomro aba mono õ zarina, ma tô Izaraéu nhihudu norĩ te te ꞌre iꞌupa zaꞌra mono zém na hã tiwi ãma ꞌre ihâimo zaꞌra waꞌaba mo, duré asiré aꞌuwẽꞌõ norĩ sipiꞌõ na ꞌre iꞌaimro zaꞌra waꞌaba mono uꞌâbâmhã.
11 Tahawa, maꞌãpé ãhã na, Uburé Danhibꞌapito, aihiꞌrata norĩ te, ꞌRe ihâimana uꞌâsi mono ma, aiwasété aba na tãma asiwẽꞌõ zaꞌra waꞌaba. Duré tãma iwẽ hã maꞌãpé ꞌre ꞌmanharĩ zaꞌra waꞌaba mono. Maꞌãpé duré wasiré aꞌuwẽꞌõ wanhiptiꞌai ꞌre, ꞌre ihâimana zaꞌra mono ma, ꞌre asaꞌo hâ zaꞌra waꞌaba mono. Duré maꞌãpé asiré aꞌuwẽꞌõ sipiꞌõ na ãma ꞌre iꞌaimro zaꞌra waꞌaba mono hã satõrĩ zaꞌra waꞌaba, siꞌabaꞌré da oto aihawib zaꞌra waꞌaba.
12 Tawamhã uburé aꞌuwẽ norĩ timreme ꞌrãihâ na, ma te ãma sadaꞌâbâ zaꞌra ãne:
— Ĩhe! Wa za tô uburé wama iꞌru zaꞌra zé hã wasiwi ꞌmanharĩ zahi ni!
13 Tane nherẽ, waꞌahâ uptabi di. Te duré tã hã pĩni nhiptete na we titaꞌa, ãhã na hã. Tahawa, ãme rowi iwasiꞌubumro da hã mare di za. Duré ã hã wama iꞌru zaꞌra hã, misi bâtâ na niha wamhã, duré maparane bâtâ na wa te wasiwi iꞌmanharĩ da hãi õ di. E marĩ wa. Ã hã wawasédé, wa te ꞌre iꞌmanharĩ zaꞌra mono na wa te ꞌre iꞌupa zaꞌra mono hã waꞌahâ uptabi wa.
14 Maꞌãpé wanhibꞌihâꞌa norĩ, Zeruzalẽ ãma aꞌâ hâimana zaꞌra, niha na te te siwi rowairébé da, uburé daꞌãma. Tawamhã aibâ mono bâ wate ꞌri nhoꞌõmo ãma ꞌre ihâimana zaꞌra mono, wasiré aꞌuwẽꞌõ sipiꞌõ na ꞌre imro zaꞌra mono hã te za bâdâ ipisutu pese ãma we aiꞌabaꞌré, tite ꞌri nhoꞌõmo ãma dama iꞌrãnhoꞌõmo norĩ siré, duré daꞌãma rowairébéꞌwa norĩ siré zama. Ãne wamhã, te za ꞌRe ihâimana uꞌâsi mono wazada isitiꞌruzé hã wama aiꞌré zaꞌra.
15 Tawamhã Azaéu ꞌra Zonataha norĩ si Ticvaha ꞌra Zazéiaha me si te te dazaze zahuré õ di ãma, rosaꞌrata ꞌmanharĩ na. Tahawa, Mesulã norĩ hã, levita Sabetaꞌihi me ma tô simirosaꞌrata waptob zahuré.
16 Tane nherẽ, Babilonia hawi apâ isiꞌabaꞌré norĩ hã ma tô rosaꞌrata ꞌmanharĩzé hã siwi wẽsã. Tahawa, sasedoti Esdra, ma tô niꞌwam norĩ aꞌuwẽ waꞌõtõ mono bâ danhibꞌihâꞌa ꞌremhã pisutu zaꞌra. Taha pari ma tô isisi zaꞌra duré sihâtâ zaꞌra. Tawamhã ta norĩ hã ma tô aꞌamo 10 na ihâimana ãma bâdâ imorĩꞌrata hawi sima asimro, aibâ norĩ hâiba na niha na te te siwi ãma rowairébé da.
17 Tahawa, siꞌubdatõ aꞌamoi ꞌremhã ma tô uburé aibâ norĩ, piꞌõ dasiréꞌõ na ꞌre imro zaꞌra mono na hã oto sima ãma rowairébé zaꞌra.
Piꞌõ dasiré aꞌuwẽꞌõ na imro zaꞌra norĩ nhisi na robꞌuiꞌérézé wasuꞌu
18 Ã hã piꞌõ dasiré aꞌuwẽꞌõ na imro zaꞌra norĩ nhisi na robꞌuiꞌéré zaꞌra ãne:
Sasedoti norĩ, aꞌuwẽ waꞌõtõ mono bâ ãne:
Zozadaquihi ꞌra Zozuéhé hawi aꞌuwẽ norĩ, duré isisãnawã norĩ ãne: Maaséia, Eliézé, Zaribe, duré Gedalia.
19 Ã norĩ ma tô timro te te irẽme zaꞌra da hã ropisutu zaꞌra. Ma tô duré poneꞌẽrebâ zéré mapure siꞌaibâ na tiwasété zaꞌra parizéb da, hâiba mono bâ ãma tinhoprub zaꞌra, izata na hã.
20 Imehe hawi aꞌuwẽ norĩ hã: Hanani norĩ, Zebadiasihi me.
21 Harĩhĩ hawi aꞌuwẽ norĩ hã: Maaséia, Elias, Semaia, Zeiꞌé, duré Uzias.
22 Pasuhu hawi aꞌuwẽ norĩ hã: Elioenai, Maaséia, Ismaeu, Netaneu, Zozabade, duré Elasa.
23 Levita norĩ ꞌremhã, ã norĩ hã:
Zozabade, Simei, duré Quelaia (Quelita na isisi amo hã), Petaia, Zuda, duré Eliézé.
24 Dama isõꞌre nhamraꞌwa hã:
Eriasibe.
Duré ꞌRe ihâimana uꞌâsi mono nhorõwa ꞌri ꞌmadâꞌâꞌwa norĩ hã:
Salu, Terẽ, duré Uri.
25 Ihâiba amo norĩ:
Paroho hawi aꞌuwẽ norĩ hã: Ramia, Zezia, Malquia, Miꞌami, Eliaza, Malquia, Benaia.
26 Elãhã hawi aꞌuwẽ norĩ hã: Matania, Zacaria, Zeiꞌé, Abdi, Zerimote duré Elias.
27 Zatuhu hawi aꞌuwẽ norĩ hã: Elioenai, Eriasibe, Matania, Zerimote, Zabade duré Aziza.
28 Bebaꞌihi hawi aꞌuwẽ norĩ hã: Zeoãna, Hanania, Zabaꞌi duré Atlaꞌi.
29 Banihi hawi aꞌuwẽ norĩ hã: Mesulã, Maluque, Adaia, Zasube, Seal duré Zerimote.
30 Paate-Moabihi hawi aꞌuwẽ norĩ hã: Adna, Quelal, Benaia, Maaséia, Matania, Bezareu, Binuꞌi duré Manasé.
31 10:31-32 Harĩhĩ hawi aꞌuwẽ norĩ hã: Eliézé, Zosia, Malquia, Semaia, Simiã, Bẽzami, Maluque duré Semaria.
32 ꞌMadâꞌâ 10:31
33 Hasuhu hawi aꞌuwẽ norĩ hã: Matenai, Matata, Zabade, Eripéréti, Zeremai, Manasé duré Simei.
34 10:34-37 Banihi hawi aꞌuwẽ norĩ hã: Maadai, Anrã, Uel, Benaia, Bedia, Quelui, Vania, Meremote, Eriasibe, Matania, Matenai duré Zaꞌasau.
35 ꞌMadâꞌâ 10:34
36 ꞌMadâꞌâ 10:34
37 ꞌMadâꞌâ 10:34
38 10:38-42 Binuꞌihi hawi aꞌuwẽ norĩ hã: Simei, Selemia, Natã, Adaia, Macnadebai, Sasai, Sarai, Azareu, Selemia, Semaria, Salu, Amaria duré Zuzé.
39 ꞌMadâꞌâ 10:38
40 ꞌMadâꞌâ 10:38
41 ꞌMadâꞌâ 10:38
42 ꞌMadâꞌâ 10:38
43 Neboho hawi aꞌuwẽ norĩ hã: Zeiel, Matitia, Zabade, Zebina, Zadai, Zoéu duré Benaia.
44 Ã norĩ ma tô uburé piꞌõ dasiréꞌõ na hã aré timro zaꞌra. Tawamhã ta norĩ hã ma tô oto timro hã siwi wẽꞌõ pese zaꞌra. Taha zarina ma tô tãma robꞌru zaꞌra, siꞌabaꞌré da hã ꞌra ré.
