Esdra 3:1-13
3 Tawamhã Izaraéu nhihudu norĩ, 7 aꞌamo oto isébrézéb ãma, ꞌri nhoꞌõmo mono wa ꞌre hâimana zaꞌra mono wamhã, ma tô uburé Zeruzalẽ ãma aꞌuwẽ norĩ hã siꞌrãꞌõtõ.
2 Tawamhã sasedoti Zozué, Zozadaquihi ꞌra, isiré ihâimana zaꞌra norĩ hã, isiré ihâiba amo sasedoti norĩ hã, Zorobabé, Salatiꞌéhé ꞌra zama, duré isisãnawã norĩ hã ma tô Izaraéu nhihudu norĩ te, ꞌRe ihâimana uꞌâsi mono ma danhoprubzé zata nomrizéb da hã siwi ꞌmanha, Mozési, ꞌRe ihâimana uꞌâsi mono nhibꞌaꞌuwẽ nhimiroti na robꞌuiꞌéré zarina.
3 Tawamhã tô õ hã tiꞌai ꞌre, aꞌuwẽ norĩ ꞌre isiꞌubumroi mono ma, pahi zaꞌra nherẽ, ma tô apâ iwana ꞌre isa mono ne hã siwi ꞌmanha, ꞌRe ihâimana uꞌâsi mono ma, danhoprub zata nhomrizé hã. Tahawa, ma tô taha nhisiwi ãma siwi sãnaꞌrata tinhoprubzéb hã mararé nhidâpâsi, duré hâiwahâ nhidâpâsi.
4 Taha nhipai u ma tô Romhâ ꞌmanharĩ ꞌri na dasima romhuꞌuzém nhisi na ꞌmanharĩ zaꞌra ni, Mozésihi nhimiroti na robꞌuiꞌéré zarina, te te iwa sima ꞌre iromhuꞌu zaꞌra mono zéb da hã. Taha ré, ma tô bâtâ sidâpâsi tinhoprubzéb da, tinhimizama zada hã te te ꞌre sõmri zaꞌra, tô taha bâtâ mono na sipuꞌu pese na ipisutu pese mono zarina.
5 Tawamhã bâtâ sidâpâsi danhoprubzéb da, danhimizama wahuré, da te ꞌre izata zaꞌra mono norĩ zama, ma tô te te ꞌre ꞌwasari, duré aꞌamo itém na dato isaꞌẽtẽ na te te ãma sima ꞌre irowẽ zaꞌra mono zéb da zama. Duré dato isaꞌẽtẽ hâiba amo norĩ iwazéb zahi na te te ãma sima ꞌre irowẽ zaꞌra mono zéb da zama, ma tô te te ꞌre ꞌwasari. Tawamhã sima iwẽ na tite na ãma ꞌre sõprub zaꞌra mono da, te te ꞌre iꞌwasari mono na hã ma tô duré ãma tãma ꞌre sõprub zaꞌra.
6 Tawamhã aꞌuwẽ norĩ, ma tô oto Uburé Danhibꞌapito ma tinhoprubzém na hã ãma sãnaꞌrata zaꞌra, 7 aꞌamo te bâdâ isãnaꞌrata hawi, Uburé Danhibꞌapito te, ꞌri ꞌmanharĩ na apâ te te ãma siwi sãnaꞌrata õ ré.
ꞌRi ꞌmanharĩ na apâ da te dasiwi ãma isãnaꞌratazé wasuꞌu
7 Tawamhã aꞌuwẽ norĩ, ẽtẽ poꞌo hâ suꞌu nomri na romhuriꞌwa norĩ ma hã, duré wedepoꞌo na romhuriꞌwa norĩ ma hã ma tô robꞌuiprazé hã tãma sõmri zaꞌra. Ma tô duré Sidõ ãma ma, Tiru ãma ma aꞌuwẽ norĩ ma, dasa norĩ hã, marĩ waꞌu norĩ te te ꞌre iꞌâhuri mono da hã, duré azeitona waꞌu to hã tãma sõmri zaꞌra. Ta norĩ na ma tô wede nhinhihã na ãma saprĩ zaꞌra, âporé na hã Libanu na darom nhisi hawi, Zope u hã. Ãne ma tô Persia nhibꞌapito Ciru te te irowairébézéb zarina siwi ꞌmanha.
8 Tawamhã apâ isiꞌabaꞌrézém na maparane wahub ꞌre maparane aꞌamoi ãma, ma tô Izaraéu nhihudu norĩ, ꞌRe ihâimana uꞌâsi mono nhorõwa ꞌri ꞌmanharĩ tém na hã ãma siwi sãnaꞌrata, Zeruzalẽ ãma za ꞌre isa mono na. Zorobabé Salatiꞌéhé ꞌra hã, Zozué Zozadaquihi ꞌra hã, isisãnawã norĩ isiré zaꞌra hã, sasedoti norĩ hã, levita norĩ hã, duré uburé aꞌuwẽ norĩ Zeruzalẽ u apâ te te sina isiri zaꞌra norĩ hã, ma tô siptete na romhuri hã siwi tiꞌâ. Tawamhã levita norĩ 20 na ãma iwahub zaꞌra nhipai u ma tô uburé dama romhuriꞌwa da hã pisutu zaꞌra ni.
9 Tawamhã Zozué norĩ, tiꞌra norĩ me, duré tisisãnawã norĩ me ma tô dawaꞌõno hã siwi ꞌmanha, Cadmiꞌéhé siré, duré iꞌra norĩ Hodaviaha nhihudu norĩ siré. Ã norĩ dawaꞌõno hã ma tô ꞌri na romhuriꞌwa na hã dama ꞌre hâimana zaꞌra. Tahawa, ma tô levita norĩ hã Henadadehe te aꞌuwẽ waꞌõno te te ꞌre pawaptob zaꞌra.
10 Tawamhã ꞌriꞌwa norĩ, ꞌri nhanaꞌrata ꞌmanharĩ na te te oto ãma siwi sãnaꞌrata wamhã, ma tô sasedoti norĩ hã uza hâi wẽ uptabi ré, duré tinhibꞌrata danhimnhihârâzé te te ꞌre ꞌwasari sina hâiwi aimasa. Taha ré, ma tô duré Asafihi sipoto zarina levita norĩ hã pratu baihâ ꞌmanharĩ ne roptaꞌazéb ré hã simasa, Uburé Danhibꞌapito ãma, wata zaꞌra da, Dawi Izaraéu nhihudu norĩ nhibꞌapito te te iꞌruzéb zarina.
11 Tawamhã nima norĩ, Uburé Danhibꞌapito ãma iwata zaꞌra na ma tô tinhoꞌre zaꞌra. Tahawa, isiré ihâiba amo hã ma tô nasi ꞌrâwi ãma sadaꞌâbâ zaꞌra, tinhoꞌre na tô õhõ danhoꞌre na. Ãne te nasi ãma sisadaꞌâbâ zaꞌra:
“Uburé Danhibꞌapito hã wẽ uptabi di.Duré isimizawizé Izaraéu nhihudu norĩ ãma hã te õne uꞌâ ꞌre hâimana uꞌâsi!”
Tawamhã uburé aꞌuwẽ norĩ hã te mreme ꞌrãihâ sina Uburé Danhibꞌapito ãma hã tinhoꞌre na, nasi ãma tiwata zaꞌra, ꞌri ꞌmanharĩ na apâ te te oto ãma siwi sãnaꞌrata wẽ te.
12 Tawamhã ahâ uptabi na sasedoti siꞌihi norĩ hã, levita siꞌihi norĩ hã, duré aꞌuwẽ waꞌõtõ nhibꞌihâꞌa siꞌihi norĩ hã ma tô duréihã imorĩꞌrata na aré ꞌri ꞌre isa mono hã te te ꞌre ꞌmadâꞌâ zaꞌra. Ãhã wa, ta norĩ hã ma tô wawa ꞌrãihâ na tiꞌruꞌru, ꞌri tém nhanaꞌratazé apâ da te dasiwi saꞌra ré, te te ꞌmadâꞌâ zaꞌra wa. Tane nherẽ, isiré norĩ isimasa hã ma tô rowẽ te, saꞌẽtẽ nasi hã, hârâ ꞌrãihâ na.
13 Ãne wa, nima hã robruruꞌuzé niꞌwa hã te te wapari waihuꞌu õ di, sina sito wa, dazadarizé, daꞌruꞌru me. Saꞌẽtẽ uptabi da te dasima iromhuꞌu zaꞌra zé robruru hã da te dasima ꞌmanharĩ zaꞌra wa, ma tô romhâ hawim nherẽ wapari zaꞌra ni, robruru hã.
