Esdra 4:1-24
4 Tawamhã Zudaha nhihudu norĩ nhitobꞌru, Bẽzamihĩ nhihudu norĩ nhitobꞌru me, ma tô Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono nhorõwa ꞌri, Babilonia hawi apâ isiꞌabaꞌré norĩ te te siwi iꞌri téb zaꞌra zé hã waihuꞌu zaꞌra.
2 Tawamhã ma tô Zorobabé u, duré dawaꞌõtõ nhibꞌihâꞌa norĩ u hã aiꞌabaꞌré. Tahawa te ãne tãma nharĩ zaꞌra:
— Wa wasima wẽ zaꞌra ni, ꞌri na wa te aipawaptob zaꞌra waꞌaba da hã. Tô ate zaꞌra waꞌwa ꞌRe ihâimana uꞌâsi mono na wa ꞌre wawata zaꞌra. Õhõ ma si, wa duré wanhimizama zata na wanhoprubzém na hã ãma tãma ꞌre wanhoprub zaꞌra, Asiriaha nhibꞌapito Hasa-Hadõ ãme ꞌre wasiꞌubumroi mono da, te te we iwanhimroi mono zém hawim haré.
3 Tane nherẽ, Zorobabé, Zozué, duré isiré Izaraéu nhihudu waꞌõtõ nhibꞌihâꞌa norĩ hã ma tô ãne asa ãma sadaꞌâbâ zaꞌra:
— Wa te aiꞌãma rosaꞌrata zaꞌra waꞌaba õ di, Uburé Danhibꞌapito, wate ꞌRe ihâimana uꞌâsi mono te ꞌri ꞌmanharĩ na wapawaptob zaꞌra waꞌaba da hã. Ãne si wa za tô wasiwaprosi wasiwi ꞌri ni, Persiaha nhibꞌapito Ciru te te iꞌruzéb zarina.
4 Tawamhã õhõ tiꞌai ãma aꞌuwẽ norĩ hã ma tô Izaraéu nhihudu norĩ wi, te te ãma tiwi irobzeiꞌõ zaꞌra da hã nasi niha na hã tãma robꞌmanharĩ zaꞌra. Ma tô duré nasi tãma robꞌrãmi zaꞌra, pahi zaꞌra da, ꞌri ꞌmanharĩ na te te ãma uzusi zaꞌra tõ da.
5 Dama iꞌrãnhoꞌõmo hawi tipawaꞌâbâ zô te te iromhuri zaꞌra norĩ ma hã, ma tô duré robꞌuiprazé hã piꞌuriwi tãma sõmri zaꞌra, Izaraéu nhihudu norĩ te te sima ãma irowaꞌõtõ zaꞌra zé hã te te tiwi ãma ꞌwaꞌrutu zaꞌra da. Ãne hã ma tô Persia nhibꞌapito Ciru ꞌre hâimana mono ré, duré Persia ãma apito Dariu ꞌre ihâimana mono zéb u hã uburé isitobꞌru norĩ hã te te siwi ꞌre ꞌmanharĩ.
Apito ma, da te iromnhihâtâzé wasuꞌu
6 Tawamhã Zersi* dama iꞌrãnhoꞌõmo na ihâimana naꞌratazéb ãma, ma tô Izaraéu nhihudu nhitobꞌru norĩ hã, Zuda ãma ꞌre ihâimana zaꞌra mono norĩ na, duré Zeruzalẽ ãma ꞌre ihâimana zaꞌra mono norĩ na te te ãma iwasété zaꞌra na ãma robꞌuiꞌéré zaꞌra, apito ma.
7 Tawamhã nimahã na ma tô Bisrã hã, Mitredate hã duré Tabeꞌé hã tisiré norĩ me Persiaha nhibꞌapito Artazesihi ma tãma romnhihâtâ zaꞌra. Robꞌuiꞌéré hã aramaicu mremezém na. Duré ãma isaprĩzé hã Persia ãma aꞌuwẽ mreme u.
8 Tawamhã dama iꞌrãnhoꞌu Reum, Sĩsaꞌĩ dama romnhihâtâ ꞌmanharĩꞌwai me ma tô apito Artazesihi ma hã duré tãma romnhihâtâ zahuré, Zeruzalẽ ãma ꞌre idahâimana zaꞌra mono norĩ na iwasédé te te siwi ãma ihirizém na hã. Tawamhã ãne romnhihâdâ hã:
9 “Ã romnhihâdâ hã, Reum dama iꞌrãnhoꞌõmo norĩ, Sĩsaꞌĩ dama romnhihâtâ ꞌmanharĩꞌwai me hã, tisiré ꞌre ihâimana zaꞌra mono zu, te te daꞌãma ꞌre irowairébé zaꞌra mono zu, uburé aimawi pawaꞌâbâ zô Erequi na tizaꞌru nhisi ãma te te ꞌre iromhuri zaꞌra mono zu, Babilonia ãma ꞌre idahâimana zaꞌra mono zu, Susã ãma ꞌre idahâimana zaꞌra mono zu, duré Elã na romnhisi ãmab zu zama ma tô siwi time,
10 apito isiptede Assurbanipaꞌu, aꞌuwẽ ihâiba amo norĩ te, tiꞌai waꞌõtõ nhoꞌõmo hawi te te isani zaꞌra, ꞌri nhoꞌu Samaria ãma oto ꞌre hâimana zaꞌra mono da, duré dazaꞌrui waꞌõno Eufrati bâtâ zasizém niwĩ ꞌre hâimana zaꞌra mono da, ꞌre ihâimana zaꞌra mono norĩ zu.”
11 Tawamhã ãne romnhihâdâ ãma iꞌuzu hã duré:
“Apito Artazesi, dazaꞌrui waꞌõno Eufrati â bâtâ zasizém niwĩ aima romhuriꞌwa ꞌre iwahâimana zaꞌra mono, wa ãma aima romnhihâtâ zaꞌra ni, ãne na:
12 “Apito, wa ãma aima wasuꞌu zaꞌra ni, asadawa para we zudeu norĩ isiꞌabaꞌré, we isihudu Zeruzalẽ u ma tô apâ ꞌri nhoꞌu isimipariꞌõ iwasété uptabi siwi ꞌri. Ma tô duré ꞌri ꞌwawi waꞌra wahutu na hã ãma siwi sãnaꞌrata. Taha romhuri na te za duré siwi uprosi suꞌu za.
13 Apito ãhã nhipai u ihâiba amo niha hã iwaihuꞌu da hã aima iꞌruzahi. Ã hã ꞌri nhoꞌu apâ te te siwi ꞌri wamhã, duré apâ ꞌri ꞌwawi waꞌra te te siwi wahutu wamhã, ã norĩ aꞌuwẽ tipawaꞌâ aima te te ꞌre iꞌarĩ zaꞌra mono da hã mare di za. Ãne wamhã, te za robꞌuiprazé ꞌre iꞌaꞌubumroi mono zé hã aiwi sina tiꞌawi.
14 Tahawa, wa norĩ aima romhuriꞌwa, wa te wasiwi ꞌre aiꞌumnhasi mono na ꞌre aihâimana mono nherẽ, te te siwi iꞌasisi uptob da hã, wa te wasima wẽ zaꞌra õ di, wa norĩ hã. Tahawa ãne romreme hã wa aima me zaꞌra ni,
15 dama ꞌru da, aihiꞌrata norĩ wasuꞌu ré ibaihâ mono hã da te sabu zaꞌra mono da. Ãne ꞌmanharĩ wamhã, te za iꞌupsibi me, ꞌri nhoꞌu Zeruzalẽ ãma aꞌuwẽ õne uꞌâ tinhibꞌapito te te siwi ꞌre iwapari õ uꞌâsi zaꞌra mono na, duré duréi romnaꞌrata hawi, apito norĩ ma, duré dazaꞌrui waꞌõtõ mono bâ dama iꞌrãnhoꞌõmo norĩ ma, we marĩ te te ꞌre isani zaꞌra mono na. Tawamhã duré nimahã na taha zarina ma tô dasiwi ꞌri prum ni.
16 Tahawa, apito, wa ãne aima wasuꞌu zahi zaꞌra ni: Apâ ꞌri nhoꞌu hã te te siwi ꞌmanharĩ té wamhã, duré iꞌwawi waꞌra te te siwi ꞌmanharĩ téb ꞌrãsutu wamhã, a hã Eufrati bâtâ zasizém niwĩ dazaꞌrui waꞌõno ihâimana ãma te za asiptetezé hã isimini.”
Apito, romnhihâdâ te te isadaꞌâbâzé wasuꞌu
17 Tawamhã apito Artazesi, ma te ãne asa romnhihâtâ na sadaꞌâbâ zaꞌra:
“Reum dama iꞌrãnhoꞌu, duré Sĩsaꞌĩ dama romnhihâtâ ꞌmanharĩꞌwa, duré asiré Samaria* ãma ꞌre ihâimana zaꞌra mono norĩ, duré Eufrati bâtâ zasizém niwĩ dazaꞌrui waꞌõtõ ãma ꞌre ihâimana zaꞌra mono norĩ me, simisutu wa ãma asawi zaꞌra waꞌwa.
18 “Romnhihâdâ we ĩma asiwi isõmri ꞌwa hã, ma tô Persia norĩ mreme u ãma isaprĩ na ĩma sõré ni.
19 Tawamhã wa tô, dama tiꞌru, ibaihâi ꞌre Zeruzalẽ wasuꞌuzéb ré zô, darĩtĩ zaꞌra da. Tahawa, duréi romnaꞌrata hawi, Zeruzalẽ ãma apito norĩ zada ꞌre idahâimana zaꞌra mono zé wasuꞌu hã, duré marĩ wasété téb ré uꞌâsi ꞌwa na ahâ uptabi na we ꞌre ihâimana uꞌâsi zaꞌra mono zé wasuꞌu hã ma tô dasiwi upsibi me ni.
20 Apito isiptete norĩ tamemhã ma tô te te ꞌre daꞌmadâꞌâ zaꞌra. Ta norĩ hã ma tô duré uburé Eufrati bâtâ zasizém niwĩ dazaꞌrui waꞌõtõ ãma dama iꞌrãnhoꞌõmo na hã ꞌre hâimana zaꞌra. Tahawa, ma tô dapawaꞌâbâ arĩre hã te te dawi ꞌre awaibu.
21 Tahawa, maꞌãpé aibâ norĩ ma, waihuꞌu zaꞌra waꞌaba, ꞌri nhoꞌõmo na tinhimiromhuri te te sahâri zaꞌra da. ꞌRi nhoꞌu, wa hã te ꞌrui õ nherẽ, apâ da te dasiwi iꞌri da hã mare uptabi di.
22 Maꞌãpé ã hã rowaihuꞌuzé hã, uburé ãma asiwi uwaimrami wẽ zaꞌra waꞌaba, te te siwi ãma uzusi tõ da, duré ĩnhimiꞌmadâꞌâzém hawimhã te ꞌre romnhimini tõ mono da.”
23 Tawamhã apito Artazesihi nhimiromnhihâdâ hã ma tô Reum norĩ ma, dama romnhihâtâ ꞌmanharĩꞌwa Sĩsaꞌĩhĩ me, duré isiré norĩ me hã tãma sõré zaꞌra ni. Tahawa awaꞌawi ma tô ta norĩ hã Zeruzalẽ u aiꞌabaꞌré. Siꞌabaꞌréi wamhã, ma tô zudeu norĩ ma, tisiꞌwapézém na hã tãma amhâzépa zaꞌra, tinhimiromhuri te te sahâri zaꞌra da.
ꞌRe ihâimana uꞌâsi mono nhorõwa ꞌri wahutuzé wasuꞌu apâ
24 Tawamhã ꞌRe ihâimana uꞌâsi mono nhorõwa ꞌri ꞌmanharĩ na romhuri ma tô aré dasiwi sazâri ni. Taha haré ma tô aré we ãma ꞌre ropsaꞌwari, Persia ãma Dariu dama iꞌrãnhoꞌõmo na maparane ãma iwahubzéb u hã.
