Esdra 5:1-17
5 Tawamhã ꞌRe ihâimana uꞌâsi mono zadawa ꞌmahârâꞌwa Ageu norĩ, Idoho ꞌra Zacariaha me hã Zuda ãma duré Zeruzalẽ ãma zudeu norĩ ꞌre ihâimana zaꞌra mono norĩ ma, Izaraéu nhihudu norĩ te, ꞌRe ihâimana uꞌâsi mono timreme te te tãma iwaihuꞌu zahuré zém na ma tô dama ãma rowasuꞌu zahuré.
2 Tawamhã Salatiꞌéhé ꞌra Zorobabé, Zozadaquihi ꞌra Zozuéhé me ꞌRe ihâimana uꞌâsi mono zadawa wasuꞌu hã ma tô wapari zahuré. Tahawa, Zeruzalẽ ãma ꞌRe ihâimana uꞌâsi mono nhorõwa ꞌri na ma tô apâ ãma dasiwi sãnaꞌrata ni. Tahawa, ma tô isadawa ꞌmahârâꞌwa norĩ hã duré ãma dapawaptob zahuré.
3 Tawamhã taha ré, Tatenaꞌi, Eufrati bâtâ zasizém niwĩ dazaꞌrui waꞌõtõ ãma dama iꞌrãnhoꞌu hã, Seta-Bozenaꞌi hã, duré isiré norĩ hã ma tô Zeruzalẽ u aiꞌabaꞌré. Siꞌabaꞌréi wamhã, ma tô ãne sadanharĩ zaꞌra:
— E ꞌwa ma tô ꞌri hã apâ asiwi wahutu aba da hã ãma aima rowairébé zaꞌra waꞌwa, duré ꞌri uparizé mono hã apâ asiwi sõré aba mono da hã.
4 E niha aibâ norĩ nhisi hã ꞌri na romhuriꞌwa hã.
5 Tane nherẽ, tite zaꞌra ꞌRe ihâimana uꞌâsi mono tõmobre, ma tô zudeu ma, iꞌrãnhoꞌõmo norĩ hã tihâimana zaꞌra. Tahawa Persia ãma dama ipire norĩ hã ma tô marĩ te te aꞌâ ꞌmanharĩ zaꞌra tõ da, ãma sima rowairébé zaꞌra, apito Dariuhu ma, za taha na te te ãma iromnhihâtâ zaꞌra zé waꞌrãmi, te te ãma sadaꞌâbâ zaꞌra õ ré hã.
6 Tawamhã Tatenaꞌihi norĩ nhimiromnhihâdâ hã, Seta-Bozenaꞌihi me duré isiré ꞌre ihâimana zaꞌra mono norĩ me, ma tô apito ma ãne na hã siwi time:
7 “Apito Dariu, rowẽ na si iꞌrãnhoꞌõmo na hã dama ꞌre aihâimana mono!
8 Ãne wa za ãma aima wasuꞌu zaꞌra ni, apito. Zuda ãma dazaꞌrui waꞌõtõ u wasiꞌabaꞌréi wamhã, wa tô dama isaꞌẽne ꞌRe ihâimana uꞌâsi mono nhorõwa wasiwi ꞌmadâꞌâ ni, ẽne itõmo zaꞌẽtẽ nhisuꞌu pese na da te dasiwi iꞌri hã, duré wedepo ipoꞌo hâ zaꞌõno hã da te dasiwi tãma isõré mono hã, ꞌri naꞌrata ꞌmanharĩzé ma. Romhuri hã te wẽ uptabi na dasiwi ꞌmanharĩ ni ãma. Te duré saꞌẽtẽ romhuri hã mo.
9 “Tahawa, wa tô dama iꞌrãnhoꞌõmo norĩ ãma sadanharĩ zaꞌra ni, apâ da te dasiwi iꞌri wahutuzéb da hã, duré apâ ꞌri naꞌrata ꞌmanharĩzé da te dasiwi iwahutu da hã niꞌwa te te dama ãma rowairébé zô.
10 Tawamhã danhibꞌihâꞌa norĩ nhisi zaꞌra zô, wa tô duré sadanharĩ zaꞌra ni, isisi zaꞌra hã wa te aima uiꞌéré zaꞌra wa, awaihuꞌu da.
11 Tahawa, ma tô asa ãma wazadaꞌâbâ zaꞌra ãne: ‘Wa norĩ hã, ꞌRe ihâimana uꞌâsi mono hâiwa ꞌmanharĩꞌwa tiꞌai ꞌmanharĩꞌwa nhibꞌaꞌuwẽ, wa ꞌre wahâimana zaꞌra. Wa norĩ hã wa oto ꞌRe ihâimana uꞌâsi mono nhorõwa ꞌri hã wasiwi wahutu ni, duréi Izaraéu nhihudu norĩ nhibꞌapito isaꞌẽne te te aré iꞌri nharĩ hã.
12 Tane nherẽ, wahiꞌrata norĩ hã ma tô ꞌRe ihâimana uꞌâsi mono hâiwa ãma ꞌre isãmra mono ma hã siꞌrui wazere zaꞌra. Taha zarina, ma tô Babilonia nhibꞌapito Nabucodonozoho ma, te te ãma aiꞌuté zaꞌra da hã tãma hâiba zaꞌré zaꞌra, Caldéia hawi aꞌuwẽ ma. Tahawa ꞌRe ihâimana uꞌâsi mono nhorõwa ꞌri hã ma tô dasiwi prum ni. Ma tô duré aꞌuwẽ wahiꞌrata norĩ hã Babilonia u da te dasiwi simro.
13 Tane nherẽ, Babilonia nhibꞌapito Ciruhu ãma imorĩꞌrata na isiꞌiꞌrãnhoꞌõmozém na ãma iwahub ãma, ma tô ꞌRe ihâimana uꞌâsi mono nhorõwa ꞌri apâ da te dasiwi wahutu da hã tinhimiromnhihâtâ na hã dama tiꞌru.
14 Tawamhã pizaꞌa oru ꞌmanharĩ na hã, duré ẽtẽ waipo prã prata ꞌmanharĩ na zama hã, apito Nabucodonozo Zeruzalẽ ãma ꞌRe ihâimana uꞌâsi mono nhorõwa ꞌri hawi te te isani zaꞌra hã, te te Babilonia ãma tite ihâibaꞌõ norĩ ãma ꞌre idawata zaꞌra mono zé ꞌri wa, te te isaꞌra norĩ hã ma tô apito Ciru hã apâ sõmri zaꞌra, aibâ Sesbaza na isisi ma, Zuda ãma dama iꞌrãnhoꞌõmo na ꞌre hâimana mono da, te te ipisutu ma hã.
15 Tawamhã apito, Sesbazaha ma hã ma tô tãma tiꞌru, apâ Zeruzalẽ ãma ꞌRe ihâimana uꞌâsi mono nhorõwa ꞌri ꞌre isa mono u hã te te ãma siri zaꞌra da. Tahawa, ꞌRe ihâimana uꞌâsi mono nhorõwa ꞌri imorĩꞌrata na isabzéb ãma tô apâ da te dasiwi iꞌri da hã, ma tô duré dama tiꞌru.
16 Tawamhã Sesbaza morĩ wamhã, ma tô ꞌRe ihâimana uꞌâsi mono nhorõwa ꞌri naꞌratazé mono hã te te abꞌmanharĩ. Ta hawim haré te zahadu ãhã na hã ꞌri na da te ãma ꞌre robꞌmaꞌwamarĩ. Tane nherẽ, zahadu siꞌutõrĩ õ di.’
17 “Tahawa, apito, ãne hã aima wẽ wamhã, maꞌãpé dama ꞌmaiꞌru na, Babilonia ãma dahiꞌrata norĩ wasuꞌuzéb ré ibaihâi mono hã da te sabu zaꞌra da, apito Ciru hã sena na te te iꞌruzéb zô, Zeruzalẽ ãma ꞌRe ihâimana uꞌâsi mono nhorõwa ꞌri apâ da te dasiwi iꞌrizéb da hã. Taha parip si, te za we wama asiwasuꞌu zaꞌra, niha na ãma asima irowairébézém na hã.”
